-
អ្នកបឹងកក់ខ្លះប្តូរចិត្តដោយឈប់ប្រគល់ដីរបស់ខ្លួនជិតពាក់កណ្តាលឲ្យអាជ្ញាធរ
- Issue Date 24-Dec-2015
សហគមន៍ដីធ្លីប្រមាណជាង៤០នាក់នៅថ្ងៃព្រហស្បតិ៍នេះប្រមូលផ្តុំនិងដាក់ញត្តិទៅសាលារាជធានីភ្នំពេញជាថ្មីដើម្បីឲ្យស្ថាប័ននេះពន្លឿនដោះស្រាយបញ្ហាដីធ្លីនៅតំបន់បឹងកក់ដែលសេសសល់៧គ្រួសារឲ្យបានឆាប់ដោយអះអាងថាសាលារាជធានីមិនបានគោរពតាមការសន្យាដោយពន្យាពេលដោះស្រាយជូនពួកគេជាងកន្លះឆ្នាំ។តំណាងសហគមន៍អ្នកមានជម្លោះដីធ្លីទាំងនោះមកពីតំបន់បឹងកក់និងបុរីកីឡា។ តំណាងសហគមន៍បឹងកក់អ្នកស្រី លី ចាន់ណារី ថ្លែងថាមូលហេតុដែលពួកគេសុំឲ្យសាលារាជធានីភ្នំពេញផ្តល់ប័ណ្ណកម្មសិទ្ធិដល់ពួកគេលើទំហំដីដែលកាន់កាប់១០០ភាគរយខណៈកាលពីមុនពួកគេបានដីតែពាក់កណ្តាលនៃផ្ទៃដីសរុប។ អ្នកស្រីបន្តថា៖ “នៅពេលគេមិនដោះស្រាយពន្យាពេលអញ្ចឹងវាប្រឈមហើយដោយសារពួកខ្ញុំគេបូមពន្លិចផ្ទះសម្បែងអស់ហើយបាត់បង់មុខរបរបាត់បង់ផ្ទះសម្បែងទ្រព្យសម្បត្តិអញ្ចឹងទៅវាមានបញ្ហាប្រឈមអញ្ចឹងសុខចិត្តថាចង់បញ្ចប់ខ្ញុំយកតែ៥២ភាគរយតែឥឡូវអត់សាលារាជធានីអត់ដោះស្រាយឲ្យពួកខ្ញុំៗយក១០០ភាគរយវិញ”។អ្នកស្រី លី ចាន់ណារី បន្តថាកន្លងទៅប្រធានរដ្ឋសភាលោក ហេង សំរិន និងរដ្ឋមន្ត្រីក្រសួងមហាផ្ទៃលោក ស ខង បានចេញលិខិតអន្តរគមន៍មួយទៅអភិបាលសាលារាជធានភ្នំពេញឲ្យជួយពិនិត្យនិងដោះស្រាយជូនពួកគាត់តាមអ្វីដែលពួកគេទាមទារកាន់កាប់ដី៥៣ភាគរយនៃផ្ទៃដីសរុបដែរប៉ុន្តែមិនមានដំណោះស្រាយនោះទេ។អ្នកនាំពាក្យសាលារាជធានីភ្នំពេញលោក ឡុង ឌីម៉ង់ មានប្រសាសន៍ថាបើអ្នកមានជម្លោះដីធ្លីនោះទាមទារដី១០០ភាគរយមកវិញមិនអាចទៅរួចទេដោយលោកអះអាថាសាលារាជធានីធ្វើតាមការវាស់វែងជាក់ស្តែងតែប៉ុណ្ណោះ។ លោកបន្ថែមថា៖ ”ការស្នើសុំដែលលើសពីកម្រិតដែលយើងអាចធ្វើបានយើងអត់អាចធ្វើកើតទេហើយពួកគាត់ត្រូវដឹងថាដីរបស់ពួកគាត់មុន១០០ភាគរយប៉ុន្មានភាគរយៗគឺជាដីដែលមិនស្របច្បាប់ហើយអ្វីដែលយើងជូនទៅគាត់ឥឡូវនេះជាការដែលយើងធ្វើឲ្យគាត់ទៅជាស្របច្បាប់ខ្ញុំអត់ដឹងថា៥៣ភាគរយឬមិន៥៣ភាគរយអ្វីនោះទេអ្វីដែលសំខាន់គឺកំពុងតែវាស់វែងដីជូនពួកគាត់ ហើយនឹងចាប់ឆ្នោតនឹងចាប់អីជាមួយគាត់បន្តទៀតបើគាត់ព្រមអាហ្នឹងយើងនឹងបន្តសាច់រឿងហ្នឹងបន្តទៀតធ្វើយ៉ាងម៉េចគាត់អត់ព្រម”។យ៉ាងណាក៏ដោយលោក ឡុង ឌីម៉ង់ មិនបានបញ្ជាក់ពីពេលវេលាជាក់លាក់ណាមួយដោះស្រាយជូនអ្នកមានជម្លោះដីធ្លីបឹងកក់ទេ។តំណាងម្នាក់ទៀតអ្នកស្រី សែន ទូច ថ្លែងថាបើសាលារាជធានីភ្នំពេញមិនផ្តល់ប័ណ្ណកម្មសិទ្ធិដីឲ្យពួកគេបាន១០០ភាគរយទេ ពួកគេនឹងបន្តតវ៉ារហូតមានដំណោះស្រាយ។ អ្នកស្រីបន្តថា៖ “ខ្ញុំថាដូច៥៣ភាគរយហ្នឹងគាត់មិនដោះស្រាយឲ្យពួកខ្ញុំ ពួកខ្ញុំយក១០០ភាគរយឡើងវិញបើថាគាត់មិននៅដោះស្រាយពួកខ្ញុំនៅតែទាមទារស៊ូថ្ងៃស្លាប់ចាស! រហូតដល់ថ្ងៃមានដំណោះស្រាយ”។អ្នកស្រី សែន ទូច ឲ្យដឹងថាដីធ្លីពួកគេ៧គ្រួសារដែលអាជ្ញាធរមិនទាន់ផ្តល់ប័ណ្ណកម្មសិទ្ធិនោះមានផ្ទៃដីសរុបទំហំប្រហែលជិត១ហិកតា។ប្រជាសហគមន៍បឹងកក់ឲ្យដឹងថាកាលពីឆ្នាំ២០១០អាជ្ញាធរបានបូមខ្សាច់ពន្លិចផ្ទះរបស់ពួកគាត់ដោយមិនបានផ្តល់សំណងសមរម្យដែលធ្វើឲ្យប៉ះពាល់ដល់ប្រជាពលរដ្ឋដែលរស់នៅទីនោះរាប់ពាន់គ្រួសារ។ តែពួកគាត់បញ្ជាក់ថានៅឆ្នាំ២០១១ នាយករដ្ឋមន្ត្រីបានកាត់ដី១២,៤៤ហិកតាឲ្យអ្នកបឹងកក់ជិត១០០០គ្រួសារវិញដើម្បីអភិវឌ្ឍនៅនឹងកន្លែង។ ប៉ុន្តែនៅខែមេសា ឆ្នាំ២០១៥នេះសាលារាជធានីភ្នំពេញបានដោះស្រាយជូនពួកគាត់ជាច្រើនគ្រួសារហើយនៅសល់៧គ្រួសារបដិសេធមិនទទួលសំណងដោយអះអាងថាសំណងនោះតិចជាងទំហំដីរបស់ពួកគាត់ចាស់ឆ្ងាយពេក៕ ដកស្រង់ចេញពីវិទ្យុសម្លេងប្រជាធិបត្តេយ្យ ចេញផ្សាយថ្ងៃទី២៤ ខែធ្នូ ឆ្នាំ២០១៥។