នៅថ្ងៃទី២៩ ខែមេសា ឆ្នាំ២០២២ អ្នកសារព័ត៌មានវិទ្យុសំឡេងប្រជាធិបតេយ្យ លោក ម៉ិច តារា ត្រូវបានចាប់ និងឃាត់ខ្លួនអស់រយៈពេលជាងពីរម៉ោងនៅខេត្តព្រះសីហនុ ដោយសារលោកបានថតរូប និងវីដេអូអំពីប្រតិបត្តិការរបស់នគរបាលទៅលើជនអន្តោប្រវេស្តន៍វៀតណាម។ ដំបូងឡើយ នគរបាលបានសួររកប័ណ្ណអ្នកសារព័ត៌មាន ហើយលោកបានបង្ហាញទៅពួកគេ។ បន្ទាប់មកលោកត្រូវបានបញ្ជាឱ្យចូលទៅក្នុងបរិវេណនៃអាគារដែលនគរបាលកំពុងបំពេញការងារនោះ។ នៅទីនោះ លោក រុន សុវណ្ណា នាយករងនៃនាយកដ្ឋានស្រាវជ្រាវ និងអនុវត្តនីតិវិធីបានបញ្ជាឱ្យឃុំខ្លួនលោក តារា និងបង្ខំលោកឱ្យលុបរូបថត និងវីដេអូដែលលោកបានថត។ នគរបាលបានប្រាប់លោកតារាថាលោកត្រូវចាប់ខ្លួនដោយសារតែលោកថតរូបដោយមិនមានការអនុញ្ញាត។ លោកបដិសេធមិនព្រមលុបរូបដែលលោកបានថត។ បន្ទាប់មក អាជ្ញាធរបានរឹបអូសយកទូរស័ព្ទ ប័ណ្ណបេឡាជាតិរបបសន្តិសុខសង្គម ប័ណ្ណវ៉ាក់សាំង ប័ណ្ណអ្នកសារព័ត៌មាន និងសោម៉ូតូរបស់លោក។ លោកត្រូវបាននគរបាលប្រាប់សារជាថ្មី ឱ្យលុបរូបថត និងវីដេអូ លោកក៏បានបន្លំធ្វើជាលុបដើម្បីត្រូវបានដោះលែង។