និយមន័យ និងវិធីសាស្ត្រ

និយមន័យ៖ ខណៈប្រភេទនៃការរំលោភបំពានលើសារព័ត៌មាន មាននិយមន័យរួចស្រេចហើយនោះ ម.ស.ម.ក សូមផ្តល់និយមន័យដល់ប្រភេទនៃការរំលោភបំពានដូចខាងក្រោម៖

• ការវាយប្រហារ៖ អំពើហិង្សាត្រូវបានប្រព្រឹត្តទៅលើអ្នកសារព័ត៌មាន ជាការសងសឹកទៅលើការងារសារព័ត៌មាន ខណៈពួកគេកំពុងស្រាវជ្រាវ ប៉ុនប៉ងផ្សព្វផ្សាយ ឬកំពុងផ្សព្វផ្សាយ ឬក្រោយការផ្សព្វផ្សាយព័ត៌មាន។

• ការយាយី៖ អ្នកសារព័ត៌មានត្រូវបានប្រមាថ តាមឃ្លាំមើលហួសហេតុ គម្រាម បំភិតបំភ័យ ឬរារាំងពីការបំពេញការងារសារព័ត៌មាន។

• ការរឹបអូស៖ សម្ភារៈ និង/ឬ ទ្រព្យសម្បត្តិឯកជនរបស់អ្នកសារព័ត៌មានត្រូវបានរឹបអូស ដើម្បីរារាំងមិនឱ្យពួកគេបំពេញការងារសារព័ត៌មានរបស់ខ្លួន។

• ការគំរាមដោយនីតិវិធីព្រហ្មទណ្ឌ៖ អ្នកសារព័ត៌មានត្រូវបានគំរាមដោយការចោទប្រកាន់ច្បាប់ព្រហ្មទណ្ឌអំឡុងពេលស្រាវជ្រាវ ឬប៉ុនប៉ងផ្សព្វផ្សាយព័ត៌មាន ឬដោយសារតែមាតិកានៃព័ត៌មានដែលបានផ្សព្វផ្សាយ។

• ការចាប់ខ្លួន៖ អ្នកសារព័ត៌មានត្រូវបានចាប់ខ្លួនអំឡុងពេលស្រាវជ្រាវ ឬប៉ុនប៉ងផ្សព្វផ្សាយព័ត៌មាន ឬដោយសារតែមាតិកានៃព័ត៌មានដែលបានផ្សព្វផ្សាយ។

• ការឃុំខ្លួន៖ អ្នកសារព័ត៌មានត្រូវបានឃុំខ្លួនអំឡុងពេលស្រាវជ្រាវ ឬប៉ុនប៉ងផ្សព្វផ្សាយព័ត៌មាន ឬដោយសារតែមាតិកានៃព័ត៌មានដែលត្រូវបានផ្សព្វផ្សាយ។

• ការបង្ខំឱ្យចុះហត្ថលេខាលើកិច្ចព្រមព្រៀង៖ អ្នកសារព័ត៌មានត្រូវបានបង្ខំ ឬដាក់សម្ពាធឱ្យចុះហត្ថលេខាលើឯកសារយល់ព្រមបញ្ឈប់សកម្មភាពរាយការណ៍អំពីព័ត៌មានជាក់លាក់ណាមួយ។

• ការចោទប្រកាន់៖ អ្នកសារព័ត៌មានត្រូវបានចោទប្រកាន់អំឡុងពេលស្រាវជ្រាវ ឬប៉ុនប៉ងផ្សព្វផ្សាយព័ត៌មាន ឬដោយសារតែមាតិកានៃព័ត៌មានដែលបានផ្សព្វផ្សាយ។

• ការផ្ដន្ទាទោស៖ អ្នកសារព័ត៌មានត្រូវបានផ្តន្ទាទោស ដោយសារតែមាតិកានៃព័ត៌មានដែលបានផ្សព្វផ្សាយ។

វិធីសាស្ត្រ៖ ទិន្នន័យបង្ហាញក្នុងគេហទំព័រនេះ ត្រូវបានដកស្រង់ពីរបាយការណ៍របស់ ម.ស.ម.ក ដែលមានចំណងជើង «ស្ថានភាពនៃសេរីភាពខាងការបញ្ចេញមតិ សេរីភាពសារព័ត៌មាន និងសិទ្ធិទទួលព័ត៌មាននៅកម្ពុជា» ក្នុងផ្នែកទាក់ទងទៅនឹងសេរីភាពសារព័ត៌មាន។ ព័ត៌មានក្នុងរបាយការណ៍នេះត្រូវបានចងក្រង ដោយប្រើប្រាស់ទិន្នន័យពីច្រើនប្រភពដែលត្រូវបានកត់ត្រាជាប្រព័ន្ធ។ ដើម្បីរាយការណ៍អំពីស្ថានភាពបច្ចុប្បន្ននៃសិទ្ធិសេរីភាពខាងការបញ្ចេញមតិ សេរីភាពសារព័ត៌មាន និងសិទ្ធិទទួលព័ត៌មាន ការសិក្សាស្រាវជ្រាវឯកសារច្បាប់ជាតិ និងអន្តរជាតិលើក្របខណ្ឌនៃសិទ្ធិត្រូវបានធ្វើឡើង។ ការស្រាវជ្រាវក្នុងទម្រង់ការវិភាគច្បាប់ទៅលើអនុក្រឹត្យស្តីពីការបង្កើតច្រកទ្វារអ៊ីនធឺណិតជាតិ និងសេចក្តីព្រាងច្បាប់ស្តីពីការទទួលបានព័ត៌មានត្រូវបានធ្វើឡើង ដើម្បីពិនិត្យពីភាពសមស្រមទៅតាមបទដ្ឋានសិទ្ធិមនុស្សអន្តរជាតិ។

ទិន្នន័យដែលប្រើក្នុងរបាយការណ៍នេះត្រូវបានប្រមូលតាមរយៈការឃ្លាំមើលព័ត៌មានប្រចាំថ្ងៃ និងតាមរយៈការប្រមូលរបាយការណ៍ឧប្បត្តិហេតុដោយគម្រោងឃ្លាំមើលសេរីភាពមូលដ្ឋានរបស់ ម.ស.ម.ក ។ ទិន្នន័យនេះត្រូវបានបំពេញបន្ថែមជាមួយនឹងទិន្នន័យបន្ថែមដែលបានកត់ត្រាដោយគម្រោងបង្កើនការគោរពសិទ្ធិ និងគម្រោងលើកកម្ពស់និងការពារសេរីភាពខាងការបញ្ចេញមតិ និងប្រព័ន្ធផ្សព្វផ្សាយឯករាជ្យ។ របាយការណ៍នេះក៏មានករណីសិក្សាស្តីពីការរំលោភបំពានលើសេរីភាពខាងការបញ្ចេញមតិ សេរីភាពសារព័ត៌មាន និងទទួលព័ត៌មាន ដែលព័ត៌មានទាំងនោះត្រូវបានប្រមូលតាមរយៈការឃ្លាំមើលព័ត៌មានតាមរយៈអ៊ីនធឺណិត។