កំពុងស្វែងរកទិន្នន័យ
រកឃើញ: 13.090
-
កម្មករព្រមានដុតរោងចក្រ ដោយសារថៅកែរត់ចោលមិនបានទូទាត់សំណង
កម្មករជាង១០០នាក់ ដែលថៅកែរត់ចោលនោះ បាននាំគ្នាតវ៉ាដុតកង់ឡាននៅមុខរោងចក្រដេរខោខោប៊ូយឈ្មោះ ធានធាន ស្ថិតក្នុងខេត្តកណ្តាល នៅព្រឹកថ្ងៃទី៣១ ខែសីហានេះ ដើម្បីទាមទាររកដំណោះស្រាយលើប្រាក់ខែចុងក្រោយ។ កម្មការនី ឌុត សុភ័ក្ត្រ ដែលចូលរួមការតវ៉ានេះបានឲ្យដឹងថា កម្មករបានដាក់ពាក្យបណ្តឹងទៅតុលាការខេត្តកណ្តាល បន្ទាប់ពីថៅកែរោងចក្របានលួចរត់ចោលកម្មករ ហើយតុលាការបានចេញដីកា ឲ្យដាក់លក់ឡៃឡុងនូវសម្ភាររោងចក្រ ដើម្បីយកប្រាក់ទូទាត់ឲ្យកម្មករ។ ក៏ប៉ុន្តែបើតាមកម្មការនីរូបនេះ ជាងមួយខែបន្ទាប់ពីមានដីកាពីតុលាការ គឺមិនទាន់ឃើញមានដំណោះស្រាយជូនកម្មករនៅឡើយទេ។ កញ្ញាបញ្ជាក់ថា៖ "ឥឡូវនេះជាងមួយខែហើយ មួយខែជិតពីរខែហើយ ចូលក្បាលពីរខែហើយ គាត់អត់មានធ្វើអីបានទេ។ ពួកខ្ញុំទូរស័ព្ទទៅសួរគាត់ព្រឹកមិញ គាត់ថា គាត់អត់ទាន់ធ្វើអីបានផង ហើយគាត់សន្យាជាមួយពួកខ្ញុំ តាំងពីថ្ងៃអង្គារសប្តាហ៍មុន គាត់ថា គាត់ជួយចុះមកថ្ងៃចន្ទហ្នឹង គាត់ជួយសម្រេចឲ្យបានថ្ងៃចន្ទហ្នឹង។ ហើយឥឡូវ Call ទៅគាត់ គាត់បិទទូរស័ព្ទ។ គាត់លើកនិយាយមួយមាត់ គាត់ថាមិនទាន់បានធ្វើអី ហើយគាត់បិទទូរស័ព្ទរបស់គាត់ លែងនិយាយជាមួយកម្មករ។ អ៊ីចឹងពួកខ្ញុំគិតថា មានតែធ្វើវិធីអស់ហ្នឹងហើយ"។
-
ពលការិនីខ្មែររងគ្រោះនៅម៉ាឡេស៊ី២នាក់ទៀត នឹងបញ្ជូនមកកម្ពុជាវិញនៅថ្ងៃស្អែក
ពលការិនីខ្មែរ២នាក់ទៀត ដែលត្រូវបានមេខ្យល់នាំទៅបម្រើការងារនៅប្រទេសម៉ាឡេស៊ី ជួបប្រទះនឹងលំបាកក្នុងការងារ នឹងត្រូវបញ្ជូនត្រឡប់មកកម្ពុជាវិញ នៅម៉ោង៧ និង ៣៥នាទីព្រឹកថ្ងៃទី០១ កញ្ញា ក្រោយពីស្ថានឯកអគ្គរាជទូតកម្ពុជា ប្រចាំប្រទេសម៉ាឡេស៊ីជួយសង្គ្រោះ។ នេះបើតាមលិខិតក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី៣១ សីហា ។ បើតាមលោក ជុំ សុន្ទរី នារីខ្មែរទាំងពីររូបនឹងត្រឡប់មកដល់កម្ពុជានៅថ្ងៃទី០១ ខែកញ្ញា ឆ្នាំ២០១៥ តាម ជើងយន្តហោះ AK 536 វេលាម៉ោង ៧ និង៣៥ នាទី ព្រឹក នៅអាកាសយានដ្ឋានអន្តរជាតិភ្នំពេញ។ ក្រសួងការបរទេស អំពាវនាវដោយដល់ពលរដ្ឋខ្មែរ ពិសេសនារីខ្មែរ ដែលងាយរងគ្រោះ ត្រូវធ្វើការប្រុងប្រយ័ត្នចំពោះការឆបោក អូសទាញ បញ្ចុះបញ្ចូលពីសំណាក់មេខ្យល់ ដែលមានគំនិតទុច្ចរិតបម្រើផលប្រយោជន៍ផ្ទាល់ខ្លួន ប៉ុនប៉ងនាំបងប្អូនទៅធ្វើការនៅក្រៅប្រទេស ដោយភូតកុហក ថា នឹងទទួលបានប្រាក់ខែច្រើន៕
-
គ.ជ.ប ផ្សព្វផ្សាយតារាងឈ្មោះឃុំសង្កាត់និងភូមិសម្រាប់ចុះឈ្មោះបោះឆ្នោតសាកល្បង
គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសផ្សព្វផ្សាយតារាងឈ្មោះឃុំសង្កាត់ និងចំនួនភូមិ សម្រាប់ចុះឈ្មោះបោះឆ្នោតសាកល្បងតាមប្រព័ន្ធកុំព្យូទ័រចាប់ពីដើមខែវិច្ឆិកា ឆ្នាំ២០១៥។ បន្ទាប់ពីការចុះឈ្មោះសាកល្បងនេះ គ.ជ.ប នឹងធ្វើការដើម្បីកែសម្រួល និងចែងនៅក្នុងនីតិវិធីនៃការចុះឈ្មោះរៀបចំបញ្ជីថ្មី។ អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍នៅថ្ងៃទី៣១ សីហា ថា ការចុះឈ្មោះសាកល្បងនេះ នឹងធ្វើនៅតាមឃុំសង្កាត់ចំនួន២៥ ដោយក្នុងនោះឃុំសង្កាត់ខ្លះជ្រើសរើសយក ១ភូមិ ឃុំ សង្កាត់ ខ្លះជ្រើសរើសយក ២ភូមិ និងឃុំសង្កាត់ ខ្លះទៀតជ្រើសរើសយក ៣ភូមិ ដែលជាកន្លែងចុះឈ្មោះបោះឆ្នោតសាកល្បងតាមប្រព័ន្ធកុំព្យូទ័រ។ លោក ហង្ស ពុទ្ធា បន្តថា គោលបំណងនៃការផ្សព្វផ្សាយនៅពេលនេះ គឺលោកចង់ឲ្យមានការចូលរួមរបស់អ្នកសង្កេតការណ៍ ហើយការចុះឈ្មោះសាកល្បងនេះ គឺដើម្បីសាកល្បងនូវបច្ចេកវិទ្យាថ្មី រកពីចំណុចសកម្ម និងអសកម្ម។ ទន្ទឹមនឹងគ្នានេះ ក៏នឹងត្រូវដឹងថា តើការសាកល្បងតាមបែបបច្ចេកវិទ្យាថ្មីជាមួយអាជ្ញាធរ ប្រព្រឹត្តទៅយ៉ាងណា? រីឯឥរិយាបថ និងការទំនាក់ទំនងរបស់ប្រជាពលរដ្ឋ ជួបបញ្ហាអ្វីខ្លះ? លោក ហង្ស ពុទ្ធា៖ «បន្ទាប់ពីការធ្វើសាកល្បងនេះហើយ គ.ជ.ប កែសម្រួល ហើយយកទៅចែងក្នុងនីតិវិធីនៃការចុះឈ្មោះ ដើម្បីរៀបចំបញ្ជីបោះឆ្នោតថ្មី។ ពីមុនមក យើងឮសូរតែធ្វើនីតិវិធីអត់ទាន់ស្ថាពរទេ យើងដាក់ជូនភាគីជប៉ុន និងសហគមន៍អឺរ៉ុប ផ្ដល់អនុសាសន៍ដាក់ជូនស្ថាប័នពាក់ព័ន្ធ អង្គការ សមាគម គណបក្សនយោបាយ មានក្រសួងមហាផ្ទៃ ជាដើម លោកបានផ្ដល់អនុសាសន៍ហើយ។ គ.ជ.ប រង់ចាំការធ្វើសាកល្បងនេះ ដើម្បីបំពេញបន្ថែមទៅលើនីតិវិធី»។
-
ពលរដ្ឋខេត្តកោះកុងបន្តតវ៉ាទាមទារឲ្យដោះលែងសកម្មជនមាតាធម្មជាតិ
ប្រជាពលរដ្ឋនិងក្រុមយុវជនប្រមាណ៥០នាក់នៅព្រឹកថ្ងៃចន្ទនេះ នៅតែបន្តនាំគ្នាតវ៉ាខាងមុខសាលាដំបូងខេត្តកោះកុង និងដើរដង្ហែជាក្បួន ដោយស្នើដោះលែងយុវជននៃចលនាមាតាធម្មជាតិ៣នាក់ដែលសមត្ថកិច្ចបានចាប់ខ្លួនកាលពីពេលកន្លងទៅ។ សកម្មជននៃក្រុមចលនាមាតាធម្មជាតិមួយរូប លោក ម៉ូត គឹមរី បានឱ្យដឹងថានាព្រឹកថ្ងៃចន្ទនេះក្រុមយុវជន និងអ្នកភូមិ រួមទាំងក្រុមអ្នកភូមិបឹងកក់ដែលមកពីភ្នំពេញ បានបន្តតវ៉ានៅពីមុខសាលាដំបូងខេត្តកោះកុង និងមានការដើរហែរក្បួននៅក្នុងក្រុងខេមរៈភូមិន្ទ ដើម្បីសុំឱ្យតុលាការទម្លាក់ការចោទប្រកាន់និងដោះលែងសកម្មជនទាំង៣នាក់ឱ្យមានសេរីភាពវិញ។ សកម្មជនទាំងនោះរួមមាន លោក សាន់ ម៉ាឡា លោក ទ្រី សុវិគា និងលោក ស៊ិម សំណាង។ ប្រជាពលរដ្ឋបានតវ៉ាឲ្យមានការដោះលែងសកម្មជនទាំងនោះចាប់តាំងពីថ្ងៃទី១៩ខែសីហា ឆ្នាំ២០១៥។ អ្នកសម្របសម្រួលបច្ចេកទេសនៃអង្កការលីកាដូ លោក អំ សំអាត បានឱ្យវីអូឌីដឹងដែរថាកាលពីថ្ងៃពុធសប្តាហ៍មុន មេធាវីការពារមកពីអង្គការលីកាដូបានដាក់លិខិតដាក់ទៅតុលាការ ដើម្បីស្នើសុំឱ្យយុវជនទាំង៣នាក់ស្ថិតនៅក្រៅឃុំ។ លោកបន្តថារហូតមកទល់ពេលនេះខាងមេធាវីកំពុងរង់ចាំការឆ្លើយតបពីតុលាការ។ ប្រភពដដែលបានបន្តថានៅថ្ងៃអង្គារ ទី០៨ សប្តាហ៍ក្រោយ ចៅក្រុមស៊ើបសួរនឹងបន្តការសាកសួរយុវជន២នាក់គឺលោក សាន់ ម៉ាឡានិងលោក ទ្រី សុវិគា។
-
សាលាក្ដីខ្មែរក្រហមបញ្ចប់នីតិវិធីប្រឆាំងជនជាប់ចោទ អៀង ធីរិទ្ធ
អង្គជំនុំជម្រះសាលាដំបូងនៃសាលាក្ដីខ្មែរក្រហម នឹងបន្តសវនាការស្ដាប់ការថ្លែងទុក្ខសោករបស់ជនរងគ្រោះ ទាក់ទងនឹងការដ្ឋានការងារដោយបង្ខំចំនួន៣ នៅក្នុងសំណុំរឿង០០២ វគ្គ២។ ទន្ទឹមគ្នានេះ ក៏បញ្ចប់នីតិវិធីប្រឆាំងនឹងជនជាប់ចោទ អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចកម្ពុជាប្រជាធិបតេយ្យ ដែរ។ សាលាក្ដីខ្មែរក្រហម ប្រកាសនៅថ្ងៃច័ន្ទ ទី៣១ សីហា ថា អង្គជំនុំជម្រះសាលាដំបូង សម្រេចរំលត់បណ្ដឹងអាជ្ញា និងបញ្ចប់បណ្ដឹងរដ្ឋប្បវេណីប្រឆាំងជនជាប់ចោទ អៀង ធីរិទ្ធ នៅសាលាក្ដីនេះហើយ។ មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ដ្រា មានប្រសាសន៍បញ្ជាក់ថា អង្គជំនុំជម្រះសាលាដំបូង បានចេញសេចក្ដីសម្រេចបញ្ចប់កិច្ចដំណើរការនីតិវិធីនេះ កាលពីថ្ងៃទី២៧ សីហា យោងតាមលិខិតរបស់ចៅសង្កាត់ក្រុងប៉ៃលិន និងអនុប្រធានមន្ទីរពេទ្យបង្អែកខេត្តប៉ៃលិន ដែលបញ្ជាក់ពីមរណភាពរបស់ អ្នកស្រី អៀង ធីរិទ្ធ៖ «លិខិតបង្ហាញថា អៀង ធីរិទ្ធ បានទទួលមរណភាពនៅខេត្តប៉ៃលិន ប្រទេសកម្ពុជា នៅថ្ងៃទី២២ ខែសីហា ឆ្នាំ២០១៥។ គាត់បានទទួលមរណភាពនៅឯគេហដ្ឋានរបស់គាត់ ដោយសារតែគាំងបេះដូង។ យោងតាមច្បាប់ដែលមានជាធរមាន ដូចជាទីមួយ គឺអនុលោមតាមមាត្រា៧ (១) នៃក្រមនីតិវិធីព្រហ្មទណ្ឌកម្ពុជា គឺមរណភាពរបស់ជនជាប់ចោទ ត្រូវរលត់បណ្ដឹងអាជ្ញាប្រឆាំងនឹងរូបគាត់ ហើយអនុលោមតាមវិធាន ២៣ស្ទួន នៃវិធានផ្ទៃក្នុងរបស់សាលាក្ដីខ្មែរក្រហម មរណភាពជនជាប់ចោទ ក៏បញ្ចប់កិច្ចដំណើរការនីតិវិធីបណ្ដឹងរដ្ឋប្បវេណីផងដែរ នៅអង្គជំនុំជម្រះវិសាមញ្ញក្នុងតុលាការកម្ពុជា។ ដូច្នេះ សំណុំរឿងរបស់គាត់ ត្រូវបានបិទបញ្ចប់ហើយនៅចំពោះមុខអង្គជំនុំជម្រះ»។
-
អាជ្ញាធរចុះរុះរើផ្ទះពលរដ្ឋ២ខ្នងដែលប៉ះពាល់គម្រោងពង្រីកផ្លូវនៅខណ្ឌព្រែកព្នៅ
អាជ្ញាធរចម្រុះរាជធានីភ្នំពេញ ប្រដាប់ដោយអាវុធ និងបិទម៉ាស់ស្ទើរគ្រប់គ្នា នៅរសៀលថ្ងៃទី៣១ សីហា ចុះរុះរើផ្ទះពលរដ្ឋ ២ខ្នង នៅខណ្ឌព្រែកព្នៅ ដែលបដិសេធមិនព្រមចាកចេញ ដើម្បីផ្ដល់ទីតាំងដីឲ្យក្រុមហ៊ុន សៀង ហៃ ពង្រីក និងស្ថាបនាកំណាត់ផ្លូវជាតិលេខ៥ ឡើងវិញ។ ការចុះរុះរើនេះ បន្ទាប់ពីសាលារាជធានីភ្នំពេញ បានផ្ញើលិខិតមួយច្បាប់ចុះថ្ងៃទី១៤ សីហា ជូនអភិបាលខណ្ឌព្រែកព្នៅ ឲ្យសហការជាមួយក្រុមការងារអន្តរក្រសួង ដើម្បីចុះអនុវត្តរុះរើផ្ទះពលរដ្ឋ ២ គ្រួសារ ឋិតនៅភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ ដែលមិនព្រមទទួលយកគោលការណ៍ដោះស្រាយសំណង។ ពលរដ្ឋទាំងពីរគ្រួសារនោះ គឺជាម្ដាយ និងកូន មានឈ្មោះ លោកស្រី ស៊ូ ស្រីនាង និងលោកស្រី ឃៀង សុធី។ លិខិតនោះបញ្ជាក់ថា អាជ្ញាធរបានទុកឱកាស និងលទ្ធភាពជូនពលរដ្ឋទាំង ២គ្រួសារពិចារណា និងសម្រេចចិត្តរួចហើយ ចំណែកប្រាក់គោលនយោបាយ អាជ្ញាធរនៅតែរក្សាជំហរសម្របសម្រួលផ្ដល់ជូនដដែល។
-
មរណៈភាពជនជាប់ចោទអៀង ធីរិទ្ធនឹងធ្វើឲ្យរលត់បណ្តឹងចោទប្រកាន់ក្នុងសំណុំរឿង០០២
ក្រោយទទួលមរណៈភាពបានជាងមួយសប្តាហ៍ ជនជាប់ចោទអៀង ធីរិទ្ធ ត្រូវបានសាលាក្តីខ្មែរក្រហម ចេញសេចក្តីសម្រេចបញ្ចប់ដំណើរការនីតិវិធីប្រឆាំងនឹងនឹងរូបគាត់។ ការសម្រេចនេះ ដោយអនុលោមតាមមាត្រា៧(១) នៃក្រមព្រហ្មទណ្ឌកម្ពុជា ដែលមរណៈភាពរបស់ជនជាប់ចោទ មានអានុភាពរលត់បណ្តឹងអាជ្ញា និងបញ្ចប់បណ្តឹងរដ្ឋប្បវេណីនៅសាលាក្តីខ្មែរក្រហម។ នេះបើយោងតាមសេចក្តីសម្រេចរបស់សាលាក្តីខ្មែរក្រហមចេញផ្សាយនៅថ្ងៃទី៣១ ខែសីហា ឆ្នាំ២០១៥។ ដោយឡែក ក្នុងកំណត់ហេតុស្តីពីរមរណៈភាពរបស់លោកស្រីអៀង ធីរិទ្ធ ដែលចេញដោយចៅសង្កាត់ក្រុងប៉ៃលិន និងអនុប្រធានមន្ទីពេទ្យបង្អែកខេត្តប៉ៃលិនបានបញ្ជាក់ថា លោកស្រីអៀង ធីរិទ្ធ បានទទួលមរណៈភាពកាលពីវេលាម៉ោង១០:៤៥នាទីព្រឹក ថ្ងៃទី២២ ខែសីហា ឆ្នាំ២០១៥ នៅខេត្តប៉ែលិន។ កំណត់ហេតុដដែលបានឱ្យដឹងបន្ថែមថា ជនជាប់ចោទរូបនេះបានទទួលមរណៈភាពនៅឯគេហដ្ឋានរបស់គាត់ ដោយសារគាំងបេះដូង។
-
វិភាគ៖ ករណីគំរាមមន្ត្រីរដ្ឋាភិបាលតាមប្រព័ន្ធសង្គមនឹងនាំឲ្យមានការពន្លឿនច្បាប់អ៊ីនធើណែត?
កាលពីថ្ងៃសៅរ៍ ប្រធានក្រុមស្រាវជាវផែនទីនៃរាជបណ្ឌិត្យសភាកម្ពុជាលោកបណ្ឌិត សុខ ទូច បានអះអាងថា មានជនមិនស្គាល់មុខបានផ្ញើសារគំរាមសម្លាប់លោកទាំងលើបណ្តាញសង្គម និងតាមទូរស័ព្ទដៃ។ លោកបណ្ឌិត សុខ ទូច អះអាងថា ក្នុងសារគំរាមសម្លាប់នោះ ជនមិនស្គាល់មុខបានចោទលោកថា ជាជនក្បត់ជាតិលក់ដីឲ្យវៀតណាម។ ចំណែកអនុប្រធានលេខាធិការដ្ឋានអចិន្រៃ្តយ៍ នៃអាជ្ញាធរជាតិទទួលបន្ទុកកិច្ចការព្រំដែន លោកស្រី កុយ ពិសី ក៏បានអះអាងប្រាប់សារព័ត៌មានក្នុងស្រុកថា លោកស្រីក៏ត្រូវបានជនមិនស្គាល់មុខគំរាម និងជេរប្រមាថតាមរយៈបណ្ដាញសង្គមហ្វេសប៊ុកផងដែរ ពាក់ព័ន្ធនឹងករណីថា លោកស្រីចោទតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដើរនិយាយកុហករឿងព្រំដែន។ លោកស្រីបានលើកឡើងថា លោកស្រីគិតថារដ្ឋាភិបាលនឹងមានចំណាត់ការលើរឿងនេះ និងសង្ឃឹមថាអ្នកទាំងនោះនឹងយល់ហើយឈប់ធ្វើនូវអ្វីដែលនាំឲ្យប៉ះពាល់ដល់អារម្មណ៍ និងកិត្តិយសរបស់លោកស្រី។
-
ពលរដ្ឋខេត្តកោះកុងបន្តតវ៉ាទាមទារឲ្យដោះលែងសកម្មជនមាតាធម្មជាតិ
ប្រជាពលរដ្ឋនិងក្រុមយុវជនប្រមាណ៥០នាក់នៅព្រឹកថ្ងៃចន្ទនេះ នៅតែបន្តនាំគ្នាតវ៉ាខាងមុខសាលាដំបូងខេត្តកោះកុង និងដើរដង្ហែជាក្បួន ដោយស្នើដោះលែងយុវជននៃចលនាមាតាធម្មជាតិ៣នាក់ដែលសមត្ថកិច្ចបានចាប់ខ្លួនកាលពីពេលកន្លងទៅ។ សកម្មជននៃក្រុមចលនាមាតាធម្មជាតិមួយរូប លោក ម៉ូត គឹមរី បានឱ្យដឹងថានាព្រឹកថ្ងៃចន្ទនេះក្រុមយុវជន និងអ្នកភូមិ រួមទាំងក្រុមអ្នកភូមិបឹងកក់ដែលមកពីភ្នំពេញ បានបន្តតវ៉ានៅពីមុខសាលាដំបូងខេត្តកោះកុង និងមានការដើរហែរក្បួននៅក្នុងក្រុងខេមរៈភូមិន្ទ ដើម្បីសុំឱ្យតុលាការទម្លាក់ការចោទប្រកាន់និងដោះលែងសកម្មជនទាំង៣នាក់ឱ្យមានសេរីភាពវិញ។ សកម្មជនទាំងនោះរួមមាន លោក សាន់ ម៉ាឡា លោក ទ្រី សុវិគា និងលោក ស៊ិម សំណាង។
-
ឪពុកយុវជនដែលបាត់ខ្លួនពេលសមត្ថកិច្ចបាញ់ប្រហារនៅផ្លូវវ៉េងស្រេងទទូចរកយុត្ដិធម៌ដល់កូន
ឪពុករបស់យុវជន ខឹម សុផាត ដែលបានបាត់ខ្លួនក្នុងពេលសមត្ថកិច្ចបាញ់ប្រហារទៅលើកម្មកររោងចក្រ កាលពីថ្ងៃទី៣ ខែមករា ឆ្នាំ២០១៤ នៅផ្លូវវ៉េងស្រេង អំពាវនាវឲ្យសមត្ថកិច្ចនិងមន្ដ្រីពាក់ព័ន្ធជួយបង្ហាញភស្ដុតាងនិងផ្ដល់យុត្តិធម៌ចំពោះការបាត់ខ្លួនកូនប្រុសរបស់លោក។ កម្មករ៤នាក់បានស្លាប់និងជាង៣០នាក់ទៀត បានរងរបួស ដោយសារការបាញ់ប្រហាររបស់កម្លាំងសមត្ថកិច្ចទៅលើកម្មករ កាលពីថ្ងៃទី០៣ខែមករា ឆ្នាំ២០១៤ នៅគ្រាពួកគេតវ៉ាទាមទារការដំឡើងប្រាក់ឈ្នួល។ យុវជនម្នាក់ អាយុ១៧ឆ្នាំ ឈ្មោះ ខឹម សុផាត បានបាត់ខ្លួនរហូតមកដល់ពេលនេះ។ ឪពុកជនរងគ្រោះ លោក ខឹម សឿន បានប្រាប់វីអូឌី(VOD)នៅថ្ងៃចន្ទនេះថាកូនប្រុសរបស់លោក ឈ្មោះ ខឹម សុផាត បានបាត់ខ្លួនក្រោយពេលមានផ្ទុះហិង្សានៅផ្លូវវ៉េងស្រេង ខណៈកូនរបស់លោកទៅឈរមើលការប្រតាយប្រតប់គ្នារវាងមន្ដ្រីសន្ដិសុខនិងកម្មកររោងចក្រ។ លោកបន្ដថារហូតមកដល់ពេលនេះ គ្មានដំណឹងអ្វីមួយអំពីកូនគាត់ឡើយ ហើយលោកក៏ថាគ្មានសមត្ថកិច្ចឬក៏អ្នកជំនាញរបស់រដ្ឋាភិបាលណាមួយចុះទៅសួរនាំលោកអំពីករណីបាត់ខ្លួនកូនរបស់លោកផងដែរ។ លោកថាបើទោះបីជាកូនរបស់លោកមានរឿងអ្វីមួយកើតឡើងឬស្លាប់ក៏ដោយ ក៏លោកសុំស្នើឲ្យមន្ដ្រីមានសមត្ថកិច្ចរកយុត្តិធម៌តាមរយៈការបង្ហាញភស្ដុតាងនិងមូលហេតុបញ្ជាក់ពីការបាត់ខ្លួនឲ្យបានពិតប្រាកដ។
-
សមត្ថកិច្ចមិនទាន់រកឃើញយុវជន ឃឹម សុផាត ដែលបាត់ខ្លួនក្នុងហេតុការណ៍នៅផ្លូវវ៉េងស្រេង
នៅក្នុងទិវាអន្តរជាតិជនរងគ្រោះនៃការបាត់ខ្លួនដោយបង្ខំ អង្គការសង្គមស៊ីវិលផ្នែកសិទ្ធិមនុស្ស ស្នើឲ្យរដ្ឋាភិបាលរក្សាជំហានជាវិជ្ជមាន ចំពោះការបាត់ខ្លួនដោយបង្ខំ និងត្រូវស៊ើបអង្កេតឲ្យបានត្រឹមត្រូវ លើករណីនៃការបាត់ខ្លួនយុវជន ឃឹម សុផាត នៅក្នុងហេតុការណ៍កងកម្លាំងសមត្ថកិច្ចបង្ក្រាបបាតុករ កាលពីថ្ងៃទី៣ ខែមករា ឆ្នាំ២០១៤ នៅផ្លូវវ៉េងស្រេង។ មន្ត្រីជាន់ខ្ពស់រដ្ឋាភិបាល បញ្ជាក់ថា ករណីនេះតុលាការមិនទាន់បិទបញ្ចប់ការស្រាវជ្រាវនៅឡើយទេ។ ឪពុកម្តាយរបស់យុវជន ឃឹម សុផាត ទទូចដល់អាជ្ញាធរកម្ពុជា និងអង្គការក្រៅរដ្ឋាភិបាលជាតិ អន្តរជាតិ ស៊ើបអង្កេតរកកូនរបស់ពួកគាត់ បើទោះបីស្លាប់ក៏ត្រូវស្វែងរកឲ្យឃើញនូវសាកសពដែរ។ យុវជន ឃឹម សុផាត បានបាត់ខ្លួនកាលពីថ្ងៃទី៣ ខែមករា ឆ្នាំ២០១៤ ក្នុងកូដកម្មសុំដំឡើងប្រាក់ខែនាផ្លូវវ៉េងស្រេង ក្រុងភ្នំពេញ។ យុវជន ឃឹម សុផាត មានអាយុ ១៦ឆ្នាំ មានស្រុកកំណើតនៅភូមិបឹងក្រៀល ឃុំអង្គតាសូ ស្រុកស្វាយជ្រំ ខេត្តស្វាយរៀង។
-
សង្គមស៊ីវិលនិងបក្សប្រឆាំងស្វាគមន៍ជំហររដ្ឋាភិបាលដែលមិនទទួលជនភៀសខ្លួនបន្ថែម
មន្ត្រីសង្គមស៊ីវិល និងអ្នកនាំពាក្យបក្សប្រឆាំង ស្វាគមន៍ជំហររបស់រដ្ឋាភិបាលដែលគ្មានគម្រោងទទួលយកជនភៀសខ្លួនបន្ថែមពីកោះណាវរូ (Naurau) ដែលសុំសិទ្ធិជ្រកកោននៅប្រទេសអូស្ត្រាលី ខណៈដែលជនភៀសខ្លួន ៤នាក់របស់ប្រទេសអូស្ត្រាលី កំពុងរស់នៅក្នុងប្រទេសកម្ពុជា អស់រយៈពេល ៣ខែមកហើយ។ ក្រៅពីនេះ សង្គមស៊ីវិល និងមន្ត្រីបក្សប្រឆាំង ចង់ឃើញរដ្ឋាភិបាលដោះស្រាយបញ្ហារបស់ពលរដ្ឋខ្លួនជាមុនសិន មុននឹងជួយអ្នកដទៃ។ ថ្លែងបែបនេះរបស់អ្នកនាំពាក្យក្រសួងមហាផ្ទៃ ស្របពេលដែលព័ត៌មានទាក់ទងជនភៀសខ្លួន ៤នាក់ កំពុងរស់នៅក្នុងប្រទេសកម្ពុជា ស្ថិតក្នុងភាពអាថ៌កំបាំងនៅឡើយ។ លោក ខៀវ សុភ័គ អ្នកនាំពាក្យក្រសួងមហាផ្ទៃ ប្រទេសកម្ពុជា និយាយថា មិនមានផែនការណាមួយដើម្បីនាំជនភៀសខ្លួនច្រើនទៀតពីកោះណាវរូ មកកម្ពុជា ទេ។
-
តុលាការខេត្តកោះកុងនឹងសាកសួរអ្នកមានជម្លោះដីធ្លីរឿងចោទក្រុមហ៊ុនថារំលោភយកដី
អ្នកមានជម្លោះដីធ្លី នៅខេត្តកោះកុង អះអាងមកថា តុលាការខេត្តនេះ បានចេញដីកាបង្គាប់ ឲ្យពួកគេ៩នាក់ ត្រូវបង្ហាញមុខ ក្នុងអង្គសវនាការ នៅដើមខែក្រោយនេះ ដើម្បីបានចម្លើយ ពីការចោទប្រកាន់ថា ក្រុមហ៊ុន ហេង ហ៊ុយ រំលោភយកដីពួកគេជាង ៦០ហិកតា។ តំណាងអ្នកមានជម្លោះដីធ្លី អ្នកស្រី ផាវ ញឺង ឲ្យវីអូឌី(VOD)ដឹងនៅថ្ងៃអាទិត្យទី៣០ ខែសីហានេះថា អ្នកភូមិ៩នាក់ នៅភូមិព្រែកជីក ឃុំជីខក្រោក ស្រុកស្រែអំបិល ខេត្តកោះកុង ដែលមានជម្លោះដីធ្លី ជាមួយក្រុមហ៊ុន របស់លោក ហេង ហ៊ុយ ជាង៥ឆ្នាំមកនេះ នឹងទៅបំភ្លឺនៅសាលាដំបូងខេត្តកោះកុង នៅថ្ងៃទី២ ខែកញ្ញា ឆ្នាំ២០១៥ នៅម៉ោង៨ព្រឹក តាមដីកាកោះ។ ស្រី្តរូបនោះបញ្ជាក់ថា ការចូលបំភ្លឺនេះ អ្នកភូមិទាំង៩នាក់នឹងការពារបណ្តឹង របស់ពួកគេ ប្តឹងតុលាការ កាលពីជាង៣ឆ្នាំមុន ឲ្យធ្វើមោឃភាព ឬរំលាយចោលកិច្ចសន្យា រវាងអ្នកភូមិនិងភាគីក្រុមហ៊ុន។
-
សាលាឧទ្ធរណ៍នឹងបើកសវនាការលើការសុំនៅក្រៅឃុំរបស់លោក ហុង សុខហួរ នៅថ្ងៃទី២កញ្ញា
សាលាឧទ្ធរណ៍ នឹងបើកសវនាការលើការសុំនៅក្រៅឃុំរបស់សមាជិកព្រឹទ្ធសភាមកពីគណបក្សប្រឆាំង លោក ហុង សុខហួរ នៅព្រឹកថ្ងៃទី២ ខែកញ្ញា ខាងមុខ។ លោក ហុង សុខហួរ កំពុងជាប់ឃុំនៅពន្ធនាគារព្រៃស បន្ទាប់ពីសមត្ថកិច្ចចាប់ខ្លួនលោកនៅថ្ងៃទី១៥ សីហា។ ការចាប់ខ្លួននេះ គឺ ៣ថ្ងៃបន្ទាប់ពីមានបញ្ជាផ្ទាល់មាត់របស់លោកនាយករដ្ឋមន្ត្រី ហ៊ុន សែន។ ក្រោយការចាប់ខ្លួន សាលាដំបូងរាជធានីភ្នំពេញ ចោទប្រកាន់ លោក ហុង សុខហួរ ពីបទក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។ ការចោទប្រកាន់នេះ គឺបន្ទាប់ពី លោក ហុង សុខហួរ បង្ហោះវីដេអូឃ្លីប និងបកស្រាយអំពីខ្លឹមសារនៃសន្ធិសញ្ញា ឆ្នាំ១៩៧៩ ទាក់ទងនឹងផែនទី និងព្រំដែនរវាងកម្ពុជា និងវៀតណាម។ រដ្ឋាភិបាល ចាត់ទុកការផ្សាយវីដេអូនោះថា ផ្ទុយពីខ្លឹមសារដើមនៃសន្ធិសញ្ញាឆ្នាំ១៩៧៩។
អានបន្ត -
ល្បួងក្មេងស្រីរំលោភ បានសម្រេចបីថ្ងៃ ក្រោយត្រូវឪពុកម្តាយ ក្មេងស្រីរងគ្រោះប្តឹង ឲ្យនគរបាលឃាត់ខ្លួន
កណ្តាល៖ យុវជនម្នាក់បាន ប្រើល្បិចល្បួងក្មេងស្រី អាយុ១២ឆ្នាំ រំលោភរហូតបាន សម្រេចនៅក្នុងបន្ទប់ទឹក បានបីថ្ងៃក្រោយ ត្រូវឪពុកម្តាយក្មេងស្រី រងគ្រោះប្តឹងនគរបាល ឲ្យឃាត់ខ្លួនចាត់ការ ទៅតាមផ្លូវច្បាប់ កាលពីព្រឹកថ្ងៃទី៣០ខែសីហាឆ្នាំ២០១៥ ស្ថិតនៅភូមិព្រែកឡុង ឃុំរកាខ្ពស់ ស្រុកស្អាង ខេត្តកណ្តាល ។ នគរបាលបានឲ្យដឹងថា ជនរងគ្រោះឈ្មោះ វ វ ណ រ ភេទស្រី អាយុ ១២ឆ្នាំរស់នៅ ក្នុងក្នុង បន្ទុកគ្រួសារ ដែលមានឪពុកឈ្មោះ ស្មាច់ វិន អាយុ ៤៧ឆ្នាំ ម្តាយឈ្មោះ គីម សុខចន អាយុ ៣៧ឆ្នាំរស់នៅក្នុងភូមិឃុំកើតហេតុខាងលើ ។ចំណែកជនសង្ស័យឈ្មោះ នាង ចន្ថា ភេទប្រុស អាយុ ១៩ឆ្នាំមាន មុខរបរសន្តិសុខរោងចក្ររស់នៅក្នុងភូមិឃុំកើតហេតុជាមួយគ្នា។
-
មេធាវីលោក ហុង សុខហួរ ជំរុញតុលាការជាន់ខ្ពស់ផ្តល់យុត្តិធម៌លើបណ្តឹងទាស់របស់កូនក្តី
មេធាវី និងក្រុមគ្រួសារ ជនជាប់ចោទជាសមាជិកព្រឹទ្ធសភាមកពីគណបក្សប្រឆាំង ជំរុញឲ្យតុលាការប្រកាន់ជំហរឯករាជ្យ ខណៈសាលាឧទ្ធរណ៍ គ្រោងបើកសវនាការ នៅដើមសប្តាហ៍ក្រោយនេះ លើបណ្តឹងទាស់ លោក ហុង សុខហួរ ប្រឆាំងនឹងដីកាឃុំខ្លួនរបស់សាលាដំបូងរាជធានីភ្នំពេញ ។ សាលាឧទ្ធរណ៍នឹងបើកសវនាការ លើបណ្តឹងទាស់នេះ នៅថ្ងៃទី២ ខែកញ្ញា ឆ្នាំ២០១៥ នៅវេលាម៉ោង ៨ព្រឹក តាមពាក្យបណ្តឹងរបស់មេធាវីការពារជនជាប់ចោទ។ មេធាវីការពារគឺលោក ជូង ជូងី ប្រាប់ វីអូឌី(VOD) នៅថ្ងៃអាទិត្យនេះថា ការចោទប្រកាន់ ការចាប់ខ្លួន និងការឃុំខ្លួនកូនក្តីលោកឈ្មោះ ហុង សុខហួរ លោកថាធ្វើឡើងខុសនីតិវិធីច្បាប់ ជាកត្តាជំរុញឲ្យលោកសម្រេចប្តឹងប្រឆាំងទៅនឹងដីកាសម្រេចរបស់សាលាដំបូងនេះ។ លោកសង្ឃឹមថា កូនក្តីលោកនឹងមានសេរីភាពវិញ បើចៅក្រុមសាលាឧទ្ធរណ៍ កាត់ក្តីសំនុំរឿងនេះ ឈរលើគោលការណ៍អព្យាក្រឹត្យ និងឯករាជ្យ។
-
មន្ត្រីថៃសន្យាម្តងទៀតថា ឈប់សម្លាប់ពលរដ្ឋខ្មែរឆ្លងដែនខុសច្បាប់
រដ្ឋមន្ត្រីក្រសួងមហាផ្ទៃថៃបានឯកភាពជាមួយកម្ពុជាម្តងទៀតថានឹងទប់ស្កាត់លំហូរឆ្លងដែនខុសច្បាប់ ដោយអនុលោមតាមបទដ្ឋានដែលទទួលស្គាល់ដោយអន្តរជាតិ ផ្អែកទៅតាមគោលការណ៍ច្បាប់និងលិខិតបទដ្ឋានគតិយុត្តិធម៌នៃប្រទេសទាំងពីរ។ ការសម្រេចនេះធ្វើឡើងក្នុងពិធីបិទកិច្ចប្រជុំអភិបាលខេត្តជាប់ព្រំដែនកម្ពុជា ថៃលើកទី៥ កាលពីថ្ងៃទី២៨ខែសីហា ឆ្នាំ២០១៥ នៅទីក្រុងបាងកកប្រទេសថៃ រវាងរដ្ឋមន្ត្រីក្រសួងមហាផ្ទៃកម្ពុជាលោក ស ខេង និងរដ្ឋមន្ត្រីក្រសួងមហាផ្ទៃថៃ លោក អនុពង្ស ផៅចិន្តា។ កាលពីឆ្នាំ២០១៤ ពលករខ្មែរជាង២០ម៉ឺននាក់ ត្រូវមេដឹកនាំយោធាថៃចាប់បញ្ជូនទាំងតក់ក្រហល់ មកទម្លាក់ចោលនៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ក្រោមហេតុផលពង្រឹងផ្ទៃក្នុង ។ ជាងនេះទៅទៀត ពលរដ្ឋខ្មែរមួយចំនួនត្រូវទាហានថៃបាញ់សម្លាប់ក្រៅច្បាបជារៀងរាល់ឆ្នាំ ពេលពួកគេចូលទៅរកការងារធ្វើនៅប្រទេសថៃដោយខុសច្បាប់។ បើទោះបីមន្ត្រីជាន់ខ្ពស់ថៃ ធ្លាប់បានសន្យានិងពេលខ្លះ មន្ត្រីជាន់ខ្ពស់ថៃធ្លាប់បានសុំទោសកម្ពុជាជាសាធារណៈពីការសម្លាប់ក្រៅច្បាប់នេះក៏ដោយ។
-
កម្ពុជាកំពុងជួយនាវិកខ្មែរ៤នាក់ដែលរត់គេចពីកប៉ាល់ហ្វីលីពីនដោយសារលក្ខខ័ណ្ឌការងារមិនល្អ
ក្រសួងការបរទេសកម្ពុជា អះអាងនៅថ្ងៃសៅរ៍នេះថា ខ្លួនកំពុងរកមធ្យោបាយ បញ្ជូននាវិកខ្មែរ៤នាក់ មកកម្ពុជាវិញ បន្ទាប់ពីអ្នកទាំង៤នោះ បានរត់គេចពីកប៉ាល់របស់ហ្វីលីពីនមួយ កាលពីប៉ុន្មានថ្ងៃមុននេះ ដោយសំអាងថា ក្រុមហ៊ុននោះ បានរំលោភលក្ខខ័ណ្ឌការងារ បង្ខំឲ្យធ្វើការទាំងមានជម្ងឺ ។ ក្រសួងការបរទេសកម្ពុជា ឲ្យដឹងតាមរយៈសេចក្តីប្រកាសព័ត៌មាន ចុះថ្ងៃទី២៩ ខែសីហានេះថា ពួកគេកំពុងទំនាក់ទំនងជាមួយអង្គការទេសន្តប្រវេសន៍អន្តរជាតិ (IOM) ដើម្បីបានបញ្ជូន នាវិកទាំង៤នាក់នោះមកកម្ពុជា។ បើតាមសេចក្តីប្រកាសដដែលឲ្យដឹងទៀតថា ស្ថានទូតបានអន្តរាគមន៍ ជាបន្ទាន់ក្នុងការសំរួល ឲ្យនាវិកទាំងនោះ បានមកដល់ស្ថានទូតកម្ពុជា នៅក្រុងម៉ានីល យប់ថ្ងៃទី២៧ សីហា ២០១៥ និងបច្ចុប្បន្នកំពុងស្នាក់នៅ និវេសន៍ដ្ឋានឯកអគ្គរាជទូត។
-
ជនសង្ស័យសំណុំរឿងបន្ថែមបន្តតាំងចិត្តមិនធ្វើតាមដីការរបស់ចៅក្រម
វ៉ាស៊ីនតោន—ក្រុមជនសង្ស័យក្នុងសំណុំរឿងបន្ថែម០០៣ និង០០៤នៅតែតាំងចិត្តថា ខ្លួននឹងមិនធ្វើ តាមដីការកោះហៅរបស់សហចៅក្រមស៊ើបអង្កេតអន្តរជាតិក្នុងដំណើរការនីតិវិធីទេ។ លោក សុខ ខេមរា នៃវីអូអេបានចុះទៅយកព័ត៌មានក្នុងប្រទេសកម្ពុជា បានជួបជាមួយជនសង្ស័យជាច្រើនកាលពីសប្តាហ៍កន្លងទៅ ហើយពួកគេតាំងចិត្តថា នឹងមិនមកកាន់តុលាការទេ ក្នុងពេលដែលគេដឹងថា គ្មានកិច្ចសហការពីភាគីកម្ពុជាទាក់ទងនឹងការនាំខ្លួនជនសង្ស័យទាំងនោះ។ ក្រុមជនសង្ស័យនៃសំណុំរឿង០០៣ និង០០៤ ដែលរដ្ឋាភិបាលធ្លាប់រារាំងមិនឲ្យ ដំណើរការទៅមុខនោះ នៅតែបន្តប្រឆាំងនឹងដំណើរការនីតិវិធីរបស់សហចៅក្រមអន្តរជាតិ ដែលចង់នាំខ្លួនពួកគេមកកាន់តុលាការនោះ ទោះជាមានដីការកោះហៅ ហើយតម្រូវឲ្យមានការនាំខ្លួនមកបំភ្លឺអំពីឧក្រិដ្ឋកម្មអន្តរជាតិធ្ងន់ធ្ងរក្នុងទសវត្សរ៍១៩៧០ ដែលត្រូវចោទប្រកាន់ដោយសហព្រះរាជអាជ្ញានោះក្តី។
-
ជនជាតិដើមព្នងនៅខេត្តមណ្ឌលគិរីស្នើទៅអភិបាលក្រុងពន្លឿនដោះស្រាយដីព្រៃចម្ការវិលជុំ
ជនជាតិដើមភាគតិចព្នង ស្នើទៅអភិបាលក្រុងសែនមនោរម្យ ខេត្តមណ្ឌលគិរី ឲ្យជួយពន្លឿនដោះស្រាយដីព្រៃចម្ការវិលជុំជិត៥០ហិកតានៅភូមិពូលូង ដែលមានជម្លោះជាមួយអភិបាលស្រុកកោះញែក ជូនប្រជាពរដ្ឋជាង៤០គ្រួសារ ដើម្បីឲ្យពួកគេបានប្រកបមុខរបរចិញ្ចឹមគ្រួសារដូចដើមវិញ។ តំណាងជនជាតិដើមភាគតិចស្ថិតនៅភូមិពូលូង សង្កាត់រម្យនា ក្រុងសែនមនោរម្យ លោក ហ៊ុល គ្រុល ប្រាប់អ្នកយកព័ត៌មាន VOD ថា មូលហេតុដែលពួកគេស្នើទៅអភិបាលក្រុងសែនមនោរម្យជួយដោះស្រាយបញ្ហានេះជូនពួកគេឲ្យបានឆាប់ ដោយសារតែអភិបាលរងស្រុកកោះញែកមកពីគណបក្សប្រជាជនកម្ពុជា លោក ហួត សូនី កាលពីពេលថ្មីៗនេះបានចេញមុខអះអាងថា ដីព្រៃចម្ការវិលជុំនៅភូមិពូលូងជារបស់ខ្លួន។ លោកថា៖ “សម័យឥឡូវវាឃាត់ហ្នឹងណា ដល់ឃាតទៅថា មិនឲ្យធ្វើទេ គឺដីនេះ ដីខ្ញុំ ថាអញ្ចឹង បើពូឯងចង់ទូលៗទៅ ចង់រ៉ែកៗទៅ ដ៏ចឹងអំណាចវាមិនចង់ឲ្យ ថាដីអញ អញ្ចឹងថាអញ្ចឹង អត់ឲ្យពួកខ្ញុំធ្វើចំការហ្នឹង”។
គាំទ្រដោយ
