កំពុងស្វែងរកទិន្នន័យ
រកឃើញ: 13.090
-
អង្គការសិទ្ធិមនុស្សស្នើលោក ស ខេង បកស្រាយការអនុវត្តច្បាប់អង្គការចំពោះបណ្តាញតាមមូលដ្ឋាន
មជ្ឈមណ្ឌលសិទ្ធិមនុស្សកម្ពុជា(CCHR)ស្នើលោក ស ខេង រដ្ឋមន្ដ្រីក្រសួងមហាផ្ទៃ បកស្រាយជាលាយល័ក្ខអក្សរចំពោះការអនុវត្តច្បាប់ស្តីពីសមាគមនិងអង្គការមិនមែនរដ្ឋាភិបាល ដោយបារម្ភពីផលប៉ះពាល់លើអង្គការមូលដ្ឋាននិងក្រុមបណ្ដាញក្រៅផ្លូវការ។ កាលពីថ្ងៃទី១២ខែសីហា ព្រះមហាក្សត្រ ព្រះបាទនរោត្តមសីហមុនីបានឡាយព្រះហស្តលេខាប្រកាសប្រើប្រាស់ច្បាប់ស្តីពីសមាគមនិងអង្គការមិនមែនរដ្ឋាភិបាល។ លិខិតចំហរបស់មជ្ឈមណ្ឌលសិទ្ធិមនុស្សកម្ពុជា ចុះថ្ងៃសុក្រទី២១ ខែសីហានេះឲ្យដឹងថាកាលពីថ្ងៃទី០៨ ខែកក្កដា កន្លងទៅ រដ្ឋលេខាក្រសួងមហាផ្ទៃ លោក សក់ សេដ្ឋា បានលើកឡើងថាច្បាប់អង្គការនឹងមិនត្រូវអនុវត្តចំពោះក្រុមអង្គការនៅមូលដ្ឋាននិងបណ្ដាញផ្លូវការឡើយ។ ប៉ុន្ដែលិខិតនោះបញ្ជាក់ថាថ្មីៗនេះមានករណីមួយនៅខេត្តក្រចេះ នៅពេលប្រជាពលរដ្ឋប្រមូលផ្ដុំគ្នាជាសហគមន៍ដើម្បីតវ៉ារឿងដីធ្លី ស្រាប់តែអធិការស្រុកស្នួលខេត្តក្រចេះបានប្រាប់ទៅតំណាងសហគមន៍ទាំងនោះថាបើចង់បង្កើតសហគមន៍ គឺពួកគេត្រូវទៅចុះឈ្មោះនៅក្រសួងមហាផ្ទៃ។ លិខិតនោះបញ្ជាក់ថាមជ្ឈមណ្ឌលសិទ្ធិមនុស្សកម្ពុជាមានក្ដីព្រួយបារម្ភចំពោះការអនុវត្តច្បាប់អង្គការនេះ ហើយស្នើឲ្យលោក ស ខេង បកស្រាយករណីនេះជាលាយល័ក្ខអក្សរ។
-
ក្រសួងព័ត៌មាន បើកឲ្យពលរដ្ឋបញ្ចេញមតិលើគេហទំព័រ«សិទ្ធិទទួលបានព័ត៌មាន»
ក្រសួងព័ត៌មានប្រកាសបើកឲ្យដំណើរការគេហទំព័រថ្មី ដើម្បីបើកចំហព័ត៌មាន និងផ្តល់ឱកាសឲ្យសាធារណជន បានចូលរួមបញ្ចេញមតិយោបល់ ធ្វើការកែលម្អ និងដាក់បញ្ចូលទៅក្នុងសេចក្តីព្រាងច្បាប់ស្តីពី«សិទ្ធិទទួលបានព័ត៌មាន» នៅក្នុងគេហទំព័រក្រសួងព័ត៌មានដែលមានឈ្មោះថា www.information.gov.kh ហើយស្វែងរកពាក្យស្តីពី«សិទ្ធិទទួលបានព័ត៌មាន»។ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានមានប្រសាសន៍នៅក្នុងកិច្ចប្រជុំក្រុមការងារបច្ចេកទេសរៀបចំតាក់តែងសេចក្តីព្រាងច្បាប់ស្តីពី«សិទ្ធិទទួលបានព័ត៌មាន»លើកពី៥ នៅថ្ងៃទី២០ សីហានេះ ថា ការបង្កើនគេហទំព័រថ្មីនេះ គឺផ្តល់នូវអត្ថប្រយោជន៍សម្រាប់ឲ្យប្រជាពរដ្ឋទូទៅ អាចចូលរួមបញ្ចេញមតិយោបល់ឲ្យបានទូលំទូលាយ។ ជាពិសេស ក្រសួងចង់បានច្បាស់ស្តីពី«សិទ្ធិទទួលបានព័ត៌មាន»នេះ ឆ្លើយតបទៅនឹងតម្រូវការនៅក្នុងសង្គម និងប្រជាជនកម្ពុជា ដោយធ្វើយ៉ាងណាឲ្យស្របតាមបរិបទសង្គមបច្ចុប្បន្ន។
អានបន្ត -
ស្ទាវឡើងកចាប់ក្មេងស្រីអាយុ១៣ឆ្នាំរំលោភជាច្រើនដង ទីបំផុតដេកគុក
ខេត្តកណ្ដាល ៖ ជនស្ទាវឡើងកម្នាក់បានស្រឡាញ់គ្នាជាមួយក្មេងស្រីម្នាក់ ដែលទើបតែមានអាយុ១៣ឆ្នាំ កន្លងមកបានណាត់ជួបគ្នារួមមេត្រីជាច្រើនដងរួចមកហើយ លុះដល់លើកចុងក្រោយនេះ ត្រូវបានជីដូននាងមកទាន់ក៏បានប្ដឹងឲ្យប៉ូលិសចាប់ខ្លួន ដោយចោទប្រកាន់ថា បានចាប់រំលោភសេពសន្ថវៈចៅស្រី ពេលនេះយុវជនខាងលើ ត្រូវបានជាប់ខ្នោះ និងក្លាយជាអ្នកទោស ព្រោះរំលោភលើអនីតិជន កាលពីព្រឹកថៃ្ងទី២៦ សីហា ២០១៥ នៅក្នុងផ្ទះរបស់យុវជនរូបនេះ ស្ថិតនៅក្នុងភូមិត្រពាំងក្រឡាញ់ ឃុំសំរោងលើ ស្រុកអង្គស្នួល ។ ជនសង្ស័យ ឈ្មោះ អឿង ថា អាយុ១៩ឆ្នាំ ជាកម្មកររោងចក្រចំណីសត្វក្រុមហ៊ុនមួយ មានទីលំនៅក្នុងភូមិឃុំកើតហេតុខាងលើ ។ ចំណែកក្មេងស្រីរងគ្រោះ អាយុ១៣ឆ្នាំ ជាសិស្ស ។
-
ព្រះសង្ឃខ្មែរកម្ពុជាក្រោមតវ៉ាទាមទារឲ្យដោះលែងសង្ឃពីរអង្គ ដែលត្រូវសមត្ថកិច្ចចាប់ខ្លួន
ព្រះសង្ឃខ្មែរកម្ពុជាក្រោមនិងប្រជាពលរដ្ឋប្រមាណ៦០អង្គ/នាក់នាំគ្នាតវ៉ានៅមុខសាលាដំបូងរាជធានីភ្នំពេញនៅព្រឹកថ្ងៃពុធនេះ ដើម្បីទាមទាឲ្យដោះលែងព្រះសង្ឃពីរអង្គដែលត្រូវសមត្ថ កិច្ចចាប់ខ្លួន ដោយក្រុមព្រះសង្ឃអះអាងថាសង្ឃទាំងពីរអង្គនោះគ្មានទោសដូចការចោទប្រកាន់របស់តុលាការនោះឡើយ។ កាលពីថ្ងៃទី១ ខែសីហា ព្រះសង្ឃពីរអង្គព្រះនាម ជា វណ្ណដា និងព្រះតេជគុណ ដាវ ទេព្យ គង់ នៅវត្តអង្គតាមិញ ខណ្ឌពោធិ៍សែនជ័យ រាជធានីភ្នំពេញ ត្រូវបានសមត្ថកិច្ចចាប់ព្រះកាយនិងផ្សឹក ដោយចោទថាព្រះសង្ឃទាំងពីរអង្គនោះ បានប្រព្រឹត្តឬហៅថាបដិបត្តិផ្ទុយពីបញ្ញត្តិសាសនា។ អាជ្ញាធរអះអាងថាបានរកឃើញភស្តុតាងមួយចំនួនមានកាំបិទ ដាវ ដំបង និងវត្ថុផ្សេងទៀតនៅក្នុងកុដិ។
-
ពលរដ្ឋ២ស្រុកលើកគ្នាបន្តតវ៉ាឲ្យតុលាការដោះលែងយុវជនបរិស្ថាន៣នាក់
ប្រជាពលរដ្ឋច្រើននាក់មកពីស្រុកបុទុមសាគរ និងស្រុកគីរីសាគរ ខេត្តកោះកុង បានបន្តប្រមូលផ្ដុំគ្នានៅពីមុខតុលាការខេត្តនេះ ទាមទារឲ្យដោះលែងសកម្មជនអង្គការចលនាមាតាធម្មជាតិ ៣នាក់ ចេញពីពន្ធនាគារ។ មន្ត្រីសង្គមស៊ីវិលខេត្តនេះ បានចាត់ទុកការចាប់ខ្លួន និងឃុំខ្លួនសកម្មជនការពារធនធានធម្មជាតិទាំង ៣នាក់ របស់តុលាការខេត្តនេះទៅតាមពាក្យបណ្ដឹងរបស់អាជ្ញាធរ និងក្រុមហ៊ុនបូមខ្សាច់ ថាជាការបំបាក់ស្មារតីសកម្មជនការពារធនធានធម្មជាតិដទៃទៀត ឲ្យបញ្ឈប់សកម្មភាពតវ៉ា។ គិតមកដល់ថ្ងៃព្រហស្បតិ៍ ទី២០ ខែសីហា គឺជាថ្ងៃទី២ ហើយដែលប្រជាពលរដ្ឋមកពីស្រុកគីរីសាគរ និងស្រុកបុទុមសាគរ បានលើកគ្នាតវ៉ា និងស្នាក់នៅទាំងយប់ថ្ងៃនៅពីមុខតុលាការសាលាដំបូងខេត្តកោះកុង ដើម្បីទាមទារឲ្យដោះលែងសមាជិកអង្គការចលនាមាតាធម្មជាតិ ៣នាក់ ដែលតុលាការខេត្តនេះចាប់ដាក់គុក។
-
ពលរដ្ឋតវ៉ាទាមទារឲ្យតុលាការខេត្តកោះកុងដោះលែងយុវជនចលនាមាតាធម្មជាតិ៣នាក់
ប្រជាពលរដ្ឋនៅខេត្តកោះកុងប្រមាណ១០០នាក់នៅព្រឹកថ្ងៃព្រហស្បត្តិ៍នេះ នាំគ្នាតវ៉ានៅមុខសាលាដំបូងខេត្តទាមទារឲ្យដោះលែងសកម្មជនបរិស្ថាន៣នាក់ដែលត្រូវបានចាប់ខ្លួន បន្ទាប់ពីតវ៉ាប្រឆាំងនឹងក្រុមហ៊ុនបូមខ្សាច់របស់វៀតណាម។ កាលពីថ្ងៃចន្ទ សកម្មជនចលនាមាតាធម្មជាតិ៣នាក់មានលោក សាន់ ម៉ាឡា លោក ទ្រី សុវិគា និងលោក ស៊ិម សំណាង ត្រូវបាននគរបាលយុត្តិធម៌ស្រុកបទុមសាគរនៃខេត្តកោះកុងឃាត់ខ្លួនរួចបញ្ជូនទៅតុលាការ។ អ្នកទាំង៣ត្រូវចៅក្រមស៊ើបសួរសាលាដំបូងខេត្តនេះចោទប្រកាន់ពីបទគំរាមកំហែងធ្វើឲ្យខូចខាត និងបញ្ជូនពួកគេទៅឃុំខ្លួនបណ្តោះអាសន្ននៅពន្ធនាគារខេត្ត។
-
មន្ត្រីក្រសួងមហាផ្ទៃថារូបភាពនៃការជួញដូរមនុស្សមានភាពសាំញ៉ាំពិបាកចាប់ជនល្មើស
មន្ត្រីជាន់ខ្ពស់ក្រសួងមហាផ្ទៃលើកឡើងថា អាជ្ញាធរមានការពិបាកក្នុងការតាមដានចាប់មេខ្យល់និងមេខ្លោងជួញដូរមនុស្ស ក៏ដូចជាពិបាកក្នុងការកំណត់អត្តសញ្ញាណជនរងគ្រោះ ដោយអះអាងថាដោយសារតែរូបភាពនៃការឆបោកនិងជួញដូរមានភាពសាំញ៉ាំ។ រដ្ឋលេខាធិការក្រសួងមហាផ្ទៃនិងជាអនុប្រធានអចិន្ត្រៃយ៍របស់គណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង បានថ្លែងបែបនេះប្រាប់អ្នកសារព័ត៌មាន បន្ទាប់ពីលោកស្រីបញ្ចប់សុន្ទរកថានៅក្នុងសន្និសីទមួយនៅព្រឹកថ្ងៃពុធនេះ ស្តីអំពីការអនុវត្តល្អនៃគម្រោងប្រយុទ្ធប្រឆាំងអំពើជួញដូរមនុស្សនិងយុទ្ធសាស្ត្រទៅថ្ងៃអនាគត។
-
"ការបន្តដោះស្រាយវិវាទក្រៅប្រព័ន្ធច្បាប់ធ្វើឲ្យបរាជ័យក្នុងការការពារស្ត្រីពីអំពើហិង្សា"
ក្រុមអង្គការសង្គមស៊ីវិល ដែលធ្វើការពាក់ព័ន្ធនឹងសិទ្ធិស្ត្រីមើលឃើញថា ការបន្តដោះស្រាយវិវាទលើច្បាប់ក្រៅផ្លូវការ ធ្វើឲ្យបរាជ័យក្នុងកិច្ចការពារស្ត្រីពីអំពើហិង្សា។ លើសពីនេះ ធ្វើឲ្យស្ត្រីប្រឈមទៅនឹងអំពើហិង្សា មានការរើសអើងពីសង្គម ដែលអាចឲ្យស្ត្រីកម្ពុជា នៅតែមិនបានទទួលបានយុត្តិធម៌ពេញលេញ។ សង្គមស៊ីវិលជាតិ និងអន្តរជាតិ ចាត់ទុកថា ការបន្តដោះស្រាយវិវាទលើច្បាប់ក្រៅផ្លូវការ មានន័យថា ការបន្តដោះស្រាយវិវាទតាមបែបទំនៀមទម្លាប់ប្រពៃណី ជះឥទ្ធិពលអវិជ្ជមានខ្លាំងលើកិច្ចការពារស្ត្រី ខណៈប្រព័ន្ធផ្លូវការបានផ្តល់នូវមធ្យោបាយដល់ស្ត្រី ឲ្យទទួលបានការការពារ។ ការលើកឡើងរបស់សង្គមស៊ីវិលនៅពេលនេះ ធ្វើឡើងនៅក្នុងវេទិកាថ្នាក់ជាតិស្ដីពីការផ្តល់យុត្តិធម៌ដល់ស្ត្រី ក្នុងប្រព័ន្ធយុត្តិធម៌ចម្រុះលើករណីអំពើហិង្សាលើស្ត្រី នៅថ្ងៃទី២០ ខែសីហា។
-
កម្មកររោងចក្រប៊ីយូធីហ៊្វូលនៅបាវិតបន្តធ្វើកូដកម្មទាមទារលក្ខខណ្ឌការងារ១១ចំណុច
កម្មកររោងចក្រប៊ីយូធីហ៊្វូល វីនដូរ (Beautiful Window) នៅតំបន់សេដ្ឋកិច្ចពិសេស សានតុងសាន់សែល (SHANDONG SUNSHEL) ស្ថិតក្នុងក្រុងបាវិត ធ្វើកូដកម្មទាមទារអត្ថប្រយោជន៍ចំនួន ១១ចំណុច ជាងមួយសប្ដាហ៍មកហើយ រហូតឈានដល់ផ្ទុះហិង្សាទៀតផង។ ឆ្លើយតបចំពោះបញ្ហានេះ តំណាងភាគីរោងចក្របញ្ជាក់ថា ក្រុមហ៊ុនបានធ្វើតាមការទាមទាររួចរាល់ហើយ តែកូដកម្មមិនចប់មិនហើយ ដោយសារសហជីពបន្តធ្វើការញុះញង់។ សូមស្ដាប់ លោក ថា កិត្យា ដែលបានចុះទៅតាមដានការតវ៉ានេះរាយការណ៍ដូចតទៅ៖
-
រដ្ឋមន្ត្រីព័ត៌មានច្រានចោលការលើកឡើងដែលថាច្បាប់ទទួលព័ត៌មានដាក់ទោសនាយករដ្ឋមន្ត្រី
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ច្រានចោលការលើកឡើងរបស់មន្ត្រីទីស្តីការគណៈរដ្ឋមន្ត្រីម្នាក់ ដែលបានលើកឡើងថា ច្បាប់ស្តីពីសិទ្ធិទទួលបានព័ត៌មាននឹងមានដាក់ទោសនាយករដ្ឋមន្ត្រី ឬរដ្ឋមន្ត្រីដែលមិនបានផ្តល់ព័ត៌មានដល់អ្នកដែលស្នើសុំ។ នៅក្នុងវគ្គបណ្តុះបណ្តាលក្រុមការងារបច្ចេកទេសរៀបចំតាក់តែងសេចក្តីព្រាងច្បាប់ស្តីពីសិទ្ធិទទួលបានព័ត៌មាននៅកម្ពុជាកាលពីរសៀលថ្ងៃទី១៨ ខែសីហាម្សិលមិញ អនុរដ្ឋលេខាធិការ និងជាសមាជិកក្រុមប្រឹក្សាអ្នកច្បាប់នៃទីស្ដីការគណៈរដ្ឋមន្ត្រី លោក ស៊ា ម៉ៅ បានមានប្រសាសន៍ថា ច្បាប់ស្តីពីសិទ្ធិទទួលព័ត៌មានដែលកំពុងស្ថិតក្នុងការធ្វើសេចក្តីព្រាង នឹងដាក់ទោសទណ្ឌមិនថាតែនាយករដ្ឋមន្ត្រី ឬរដ្ឋមន្ត្រី ដែលមិនឆ្លើយតបនឹងសំណួររបស់អ្នកសារព័ត៌មាន ឬប្រជាពលរដ្ឋដែលស្នើសុំព័ត៌មាន។
-
ក្រសួងដែនដីច្រានចោលការលើកឡើងរបស់ការិយាល័យសមាជិករដ្ឋសភាអាមេរិក
ក្រសួងរៀបចំដែនដី នគរូបនីយកម្ម និងសំណង់ ប្រតិកម្មនឹងការិយាល័យប្រធានគណៈកម្មាធិការទទួលបន្ទុកកិច្ចការបរទេស នៃរដ្ឋសភារបស់សហរដ្ឋអាមេរិក ដែលថា កម្ពុជា ខកខានមិនបានធានាសិទ្ធិជាមូលដ្ឋានរបស់ពលរដ្ឋ។ ក្រសួងរៀបចំដែនដី បានសំអាងលើបទដ្ឋានច្បាប់មួយចំនួន និងកិច្ចខិតខំប្រឹងប្រែងរបស់រដ្ឋាភិបាលក្នុងការធានាសិទ្ធិរបស់ពលរដ្ឋ។ ក្នុងសេចក្ដីប្រកាសព័ត៌មានរបស់ក្រសួងដែនដី នគរូបនីយកម្ម និងសំណង់ ចេញនៅថ្ងៃទី១៨ ខែសីហា ក្រសួងបញ្ជាក់ថា មកដល់ពេលនេះ កម្ពុជា មានបទដ្ឋានច្បាប់គ្រប់គ្រាន់ក្នុងការការពារសិទ្ធិស្របច្បាប់របស់ពលរដ្ឋ។
-
កម្មកររោងចក្រហ៊ីយ៉ុងជីននៅខណ្ឌពោធិ៍សែនជ័យកូដកម្មទាមទារឲ្យក្រុមហ៊ុនគោរពច្បាប់ការងារ
កម្មករប្រមាណ១០០នាក់នៅរោងចក្រ ហ៊ីយ៉ុងជីន ស្ថិតនៅភូមិកំបូល ខណ្ឌពោធិ៍សែនជ័យ រាជធានីភ្នំពេញ នាំគ្នាធ្វើកូដកម្មនៅព្រឹកថ្ងៃអង្ការនេះ ដើម្បីទាមទារឲ្យក្រុមហ៊ុនកុំបញ្ឈប់កម្មករដោយគ្មានមូលហេតុ និងលក្ខណ្ឌការងារមួយចំនួនទៀត។ បុគ្គលិកដោះស្រាយវិវាទសហជីពសេរីកម្មករលោក សយ ចាន់ធូ អះអាងថា ក្រុមហ៊ុនបានរំលោភច្បាប់កម្មករដូចជា ក្រុមហ៊ុនមិនទទួលខុសត្រូវនៅពេលកម្មករមានគ្រោះថ្នាក់ការងារ ហើយថែមទាំងបញ្ឈប់កម្មករទៀត។ លោកបន្តថា កម្មករបាននាំគ្នាធ្វើកូដកម្ម ដើម្បីទាមទារនូវលក្ខណ្ឌការងារ៧ចំណុចមានដូចជា កុំឲ្យក្រុមហ៊ុនបញ្ឈប់កម្មករដោយគ្មានមូលហេតុ សុំឲ្យក្រុមហ៊ុនបើកប្រាក់ខែឲ្យទៀងទាត់ដល់កម្មករ សុំឲ្យស្ត្រីដែលមានផ្ទៃពោះត្រូវចេញមុនម៉ោង១៥នាទី និងលក្ខណ្ឌមួយចំនួនទៀត។ កម្មករម្នាក់លោក អ៊ីន ស៊ីន័យ មានប្រសាសន៍ថា ពួកគាត់បានតវ៉ារយៈពេល២ថ្ងៃហើយ តែរហូតមកដល់ពេលនេះខាងភាគីក្រុមហ៊ុនមិនទាន់មានដំណោះស្រាយជួនពួកគាត់នោះទេ។ លោកបានបញ្ជាក់ថា៖ “ពួកយើងទាមទារនេះសូមកុំឲ្យក្រុមហ៊ុនរំលោភទៅលើច្បាប់ការងារ”។
-
អាដហុកបង្ហាញកង្វល់ជុំវិញដំណោះស្រាយបញ្ហាដីធ្លីរបស់អាជ្ញាធរនៅបន្ទាយមានជ័យ
ប្រជាពលរដ្ឋដែលមានទំនាស់ដីធ្លី និងមន្ត្រីអង្គការសង្គមស៊ីវិលនៅខេត្តបន្ទាយមានជ័យ បង្ហាញក្ដីកង្វល់ពីការដោះស្រាយទំនាស់ដីធ្លីរបស់អាជ្ញាធរ និងមន្ត្រីពាក់ព័ន្ធខេត្តនេះ ថាមានការយឺតយ៉ាវ និងមិនដំណើរការទៅមុខ។ បញ្ហានេះ បានបង្កផលលំបាកជាខ្លាំងដល់ប្រជាពលរដ្ឋ ធ្វើឲ្យពួកគាត់ខាតបង់ទាំងទ្រព្យ និងពេលវេលាអស់ជាច្រើនឆ្នាំ ក្នុងការស្វែងរកដំណោះស្រាយដោយពុំទទួលបានលទ្ធផលអ្វីឡើយ។ ទាំងប្រជាពលរដ្ឋ និងមន្ត្រីអង្គការអាដហុក (Adhoc) ខេត្តបន្ទាយមានជ័យ អំពាវនាវឲ្យលោកនាយករដ្ឋមន្ត្រី ហ៊ុន សែន និងមន្ត្រីពាក់ព័ន្ធពន្លឿនដោះស្រាយទំនាស់ដីធ្លីដល់ប្រជាពលរដ្ឋឲ្យបានឆាប់ ដើម្បីពួកគាត់យកដីនោះទៅដាំដុះដោះស្រាយជីវភាពគ្រួសារក្នុងរដូវវស្សានេះ។
-
តុលាការខេត្តកោះកុងសម្រេចចោទប្រកាន់យុវជនចលនាមាតាធម្មជាតិនិងបញ្ជូនទៅឃុំខ្លួន
ចៅក្រមស៊ើបសួរសាលាដំបូងខេត្តកោះកុងបានសម្រេចរក្សាការចោទប្រកាន់លើយុវជន៣នាក់ដែលជាសកម្មជនចលនាមាតាធម្មជាតិ ពីបទគំរាមកំហែងធ្វើឲ្យខូចខាត ដោយបញ្ជូនពួកគេទៅឃុំខ្លួនបណ្តោះអាសន្ននៅពន្ធនាគារខេត្ត។ កាលពីថ្ងៃចន្ទ សកម្មជនទាំង៣នាក់ មានលោក សាន់ ម៉ាឡា លោក ទ្រី សុវិគា និងលោក ស៊ិម សំណាង ត្រូវបាននគរបាលយុត្តិធម៌ស្រុកបូទុមសាគរនៃខេត្តកោះកុងឃាត់ខ្លួន រួចបញ្ជូនទៅតុលាការ។ អ្នកសម្របសម្រួលអង្គការសិទ្ធិមនុស្សលីកាដូប្រចាំខេត្តកោះកុង លោក អ៊ិន គង់ចិត្រ មានប្រសាសន៍ថាព្រះរាជអាជ្ញា ប៊ូ ប៊ុនហាំង បានចោទប្រកាន់យុវជនទាំង៣តាមមាត្រា៤២៤នៃក្រមព្រហ្មទណ្ឌពីបទគំរាមកំហែងថានឹងធ្វើឲ្យខូចខាតដែលភ្ជាប់នឹងបញ្ជាអ្វីមួយ។ លោកបន្តថារហូតមកដល់ពេលនេះ យុវជនទាំង៣កំពុងត្រូវបានឃុំខ្លួនបណ្តោះអាសន្ននៅពន្ធនាគារខេត្តកោះកុង។
-
មន្ត្រីច្រកព្រំដែនអូរស្មាច់នៅឧត្ដរមានជ័យរងការចោទប្រកាន់ថាទារលុយពីអ្នកឆ្លងដែន
ប្រជាពលរដ្ឋដែលឆ្លងដែនទៅប្រទេសថៃតាមច្រកអន្តរជាតិអូរស្មាច់ក្នុងខេត្តឧត្ដរមានជ័យអះអាងថា មន្ត្រីនគរបាលនៅច្រកព្រំដែននេះទារលុយពីពួកគាត់ពេលឆ្លងដែន ទោះបីជាពួកគាត់មានលិខិតឆ្លងដែនត្រឹមត្រូវក៏ដោយ។ ពលរដ្ឋម្នាក់ដែលឆ្លងដែនទៅធ្វើការនៅប្រទេសថៃតាមតាមច្រកអូរស្មាច់លោក ស្រ៊ុន សារេត ឲ្យដឹងថា មន្ត្រីនគរបាលព្រំដែនតែងតម្រូវឲ្យលោកបង់លុយចំនួន១០០០០រៀល ឬលុយថៃចំនួន១០០បាត បើមិនដូចនោះទេ លោកថា មន្ត្រីនគរបាលនឹងមិនបោះត្រាចេញពីប្រទេសឲ្យនោះទេ។
-
សេចក្តីព្រាងច្បាប់អធិការកិច្ច កំពុងពិភាក្សាអន្តរក្រសួង មុនដាក់ឆ្លងគណៈរដ្ឋមន្ត្រី
ភ្នំពេញ: សេចក្តីព្រាងច្បាប់អធិការកិច្ច បានត្រូវក្រសួងទំនាក់ទំនង រដ្ឋសភា ព្រឹទ្ធសភា និងអធិការកិច្ច ដាក់ឲ្យពិភាក្សាគ្នា នៅក្នុងសិក្ខាសាលាពិគ្រោះយោបល់ថ្នាក់ជំនាញជាអន្តរក្រសួងមួយ នាព្រឹកថ្ងៃទី១៨ ខែសីហា នេះ នៅសណ្ឋាគារកាំបូឌីយ៉ាណា ដោយមានការចូលរួមពី តំណាងក្រុមប្រឹក្សាអ្នកច្បាប់ នៃ ECO SOCC អង្គភាពប្រឆាំងអំពើពុករលួយ តំណាងសហគមន៍អឺរ៉ុប សង្គមស៊ីវិល និងដៃគូអភិវឌ្ឍន៍ មុននឹងបញ្ជូនសេចក្តីព្រាងច្បាប់នេះ ដាក់ចូលកិច្ចប្រជុំពិភាក្សា ពេញអង្គគណៈរដ្ឋមន្ត្រី។ នៅក្នុងឱកាសនោះ លោក ឆេង សារឿន តំណាងលោកស្រីឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនង រដ្ឋសភា ព្រឹទ្ធសភា និងអធិការកិច្ច បានមាន ប្រសាសន៍ថា៖ ការធ្វើសេចក្តីព្រាងច្បាប់អធិការកិច្ចនេះ គឺផ្អែកលើការស្រាវជ្រាវ ចងក្រង ច្បាប់ពាក់ព័ន្ធ លើវិស័យអធិការកិច្ច ពីបណ្តាប្រទេស មួយចំនួន មានដូចជា ប្រទេសចិន, កូរ៉េខាងត្បូង, បារាំង, និង វៀតណាម សម្រាប់ប្រើប្រាស់ ជាមូលដ្ឋាន និងខ្លឹមសារសមស្រប ដាក់បញ្ចូលក្នុងសេចក្តីព្រាងច្បាប់ អធិការកិច្ចនេះ។
-
អ្នកជំនាញសង្ឃឹមថាការចុះឈ្មោះអ្នកបោះឆ្នោតរបៀបថ្មីនឹងផ្តល់បញ្ជីមានគុណភាព
ភ្នំពេញ—ការចុះឈ្មោះអ្នកបោះឆ្នោតតាមរបៀបថ្មីគឺការប្រើប្រព័ន្ធអេឡិចត្រូនិកនឹងធ្វើឲ្យមានបញ្ជីដែលមានគុណភាព។ នេះបើតាមការអះអាងរបស់លោក គុល បញ្ញា នាយកប្រតិបត្តិអង្គការខុមហ្រែ្វលដែលចូលរួមជាវាគ្មិនក្នុងកម្មវិធី Hello VOA ពិសេសកាលពីរាត្រីថ្ងៃអង្គារទី១៨ ខែសីហា។ លោកថ្លែងយ៉ាងដូច្នេះដោយយោងថា ការចុះឈ្មោះថ្មីដោយប្រើប្រព័ន្ធកុំព្យូទ័រនេះគឺនឹងកាត់បន្ថយឈ្មោះស្ទួន ឈ្មោះខ្មោច បាត់ឈ្មោះអ្នកបោះឆ្នោតជាដើម។ គណៈកម្មការជាតិរៀបចំការបោះឆ្នោត(គ.ជ.ប.) នឹងសាកល្បងការចុះឈ្មោះនេះក្នុងឃុំសង្កាត់ចំនួន២៥នៅដើមឆ្នាំ២០១៦ គឺ១ឆ្នាំមុនការបោះឆ្នោតជ្រើសរើសក្រុមប្រឹក្សាឃុំសង្កាត់ និង២ឆ្នាំមុនការបោះឆ្នោតជាតិនៅឆ្នាំ២០១៨។
-
សង្គមស៊ីវិល៖ រដ្ឋាភិបាលកំពុងធ្វើយុទ្ធនាការបិទសំឡេងក្រុមមតិភាគតិចសិទ្ធិមនុស្ស
ភ្នំពេញ—នៅថ្ងៃអង្គារនេះ អង្គការសង្គមស៊ីវិលធំៗចំនួន១៣បានបញ្ជាក់ការព្រួយបារម្ភរបស់ខ្លួនអំពីការរំលោភសិទ្ធិមនុស្ស និងការគំរាមកំហែងយ៉ាងធ្ងន់ធ្ងរដល់លទ្ធិប្រជាធិបតេយ្យនៅកម្ពុជា បន្ទាប់ពីមានការចាប់ឃុំខ្លួនសកម្មជននិងមន្ត្រីគណបក្សជំទាស់ និងសកម្មជនសិទ្ធិមនុស្សជាបន្តបន្ទាប់ នាពេលថ្មីៗនេះ។ សេចក្តីថ្លែងការណ៍រួមរបស់អង្គការសង្គមស៊ីវិលនៅក្នុងប្រទេសកម្ពុជាបានឲ្យដឹងថា ពួកខ្លួនយល់ថា រដ្ឋាភិបាលកម្ពុជាកំពុងតែរៀបចំយុទ្ធនាការថ្នាក់ជាតិមួយដើម្បីបិទមាត់ក្រុមមតិភាគតិច និងសង្គមស៊ីវិលនៅក្នុងប្រទេសកម្ពុជា។ ហើយការណ៍នេះធ្វើឲ្យប៉ះពាល់ដល់ដំណើរការប្រជាធិបតេយ្យនិងសិទ្ធិមនុស្សនៅក្នុងប្រទេសដ៏ក្រីក្រនេះ។ ក្រុមអង្គការសង្គមស៊ីវិលទាំងនេះរួមមានគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជាហៅកាត់ថា CHRAC អង្គការសិទិ្ធមនុស្ស ADHOC មជ្ឈមណ្ឌលសិទ្ធិមនុស្សកម្ពុជា CCHR អង្គការ SILAKA និងសហភាពការងារកម្ពុជា CLC ជាដើម។
គាំទ្រដោយ
