កំពុងស្វែងរកទិន្នន័យ
រកឃើញ: 13.090
-
កម្មការិនីរបួសជំរុញជាថ្មីឲ្យរដ្ឋាភិបាលដាក់ទោស ឈូក បណ្ឌិត តាមអំណាចសាលដីកា
កម្មការនីដែលរងរបួសក្នុងការបាញ់ប្រហារ នៅខេត្តស្វាយរៀង រកអន្តរាគមន៍ពីរដ្ឋសភាដើម្បីឲ្យជំរុញឲ្យរដ្ឋាភិបាលតាមចាប់ខ្លួនខ្មាន់កាំភ្លើង ឈូក បណ្ឌិត មកផ្តន្ទាទោស ខណៈតុលាការគ្រប់ជាន់ថ្នាក់បានផ្តន្ទាទោស អតីតអភិបាលក្រុងរូបនោះជាច្រើនឆ្នាំហើយ តែសមត្ថកិច្ចនៅមិនទាន់ចាប់ខ្លួនបាន។ ការរកអន្តរាគមន៍ជាថ្មីរបស់ស្ត្រីរងរបួស មានឈ្មោះ កែវ នា, ប៊ុន ចិន្តា និងនុត សុខន នៅថ្ងៃទី២៧ ខែកក្កដា ឆ្នាំនេះ ធ្វើឡើងបន្ទាប់ពីរដ្ឋមន្ត្រីក្រសួងមហាផ្ទៃ លោក ស ខេង និងលោកនាយករដ្ឋមន្ត្រី ហ៊ុន សែន គំរាមជាសាធារណៈ ឲ្យសមត្ថកិច្ចចាត់វិធានការផ្លូវច្បាប់លើលោកឧកញ៉ា សុខ ប៊ុន ករណីប្រើហិង្សា ទៅលើកញ្ញា សាសា ជាពិធីការនីទូរទស្សន៍ CTN។ ប៉ុន្តែលោកមិនបានបញ្ជាឲ្យចាប់ខ្លួនទណ្ឌិត ឈូក បណ្ឌិត នៅឡើយ។
-
HRW ចាត់ទុកការកាត់ទោសសកម្មជនបក្សប្រឆាំង១១នាក់ថាជាសាលក្រមនយោបាយ
កាលពីថ្ងៃទី២២ ខែកក្កដា ឆ្នាំ២០១៥ អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch = HRW) បានចេញសេចក្តីថ្លែងការណ៍ថ្កោលទោសសាលក្រមសាលាដំបូងរាជធានីភ្នំពេញ ដែលបានកាត់ទោសឲ្យសកម្មជនគណបក្សប្រឆាំងចំនួន ១១រូប ជាប់ពន្ធនាគារ ដែលក្នុងនោះ ៣នាក់ជាប់រហូតដល់ ២ទសវត្សរ៍ ពីបទចូលរួម និងដឹកនាំកុប្បកម្ម បង្កហិង្សានៅស្ពាននាគក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។ អង្គការឃ្លាំមើលសិទ្ធិមនុស្សលើពិភពលោកមួយនេះ ហៅសេចក្តីសម្រេចចេញដោយក្រុមចៅក្រមជំនុំជម្រះដឹកនាំដោយ លោក លឹម មករន្ទ កាលពីថ្ងៃទី២១ ខែកក្កដា ឆ្នាំ២០១៥ នោះ ថាជាសាលក្រមនយោបាយ និងបំពានច្បាប់។
-
កម្មការិនីរោងចក្រ អី ហ្វា ចំនួន១៩នាក់បានដួលសន្លប់
កម្មការិនីចំនួន១៩នាក់នៅរោងចក្រ អី ហ្វាបានដួលសន្លប់ជាបន្តបន្ទាប់កាលពីវេលាម៉ោង ៨ព្រឹក ថ្ងៃទី២៧ខែកក្ដដា ឆ្នាំ២០១៥ ស្ថិតក្នុងភូមិព្រៃទា សង្កាត់ចោមចៅខណ្ឌពោធិ៍សែនជ័យ រាជធានីភ្នំពេញ។ នេះបើតាមការចុះផ្សាយរបស់អគ្គស្នងការនគរបាលជាតិ នៅថ្ងៃទី២៧ ខេកក្កដា ឆ្នាំ២០១៥ ។ យោងតាមអគ្គស្នងការនគរបាលជាតិ មូលហេតុដែលកម្មការិនីទាំង១៩នាក់ ដួលសន្លប់ គឺបណ្តាលមកពីអាកាសធាតុក្តៅខ្លាំងពេកនិងខ្វះអ៊ុកស៊ីសែន។
-
ជនជាតិភាគតិចព័រខេត្តពោធិ៍សាត់ផ្ដិតមេដៃស្នើសុំកាន់កាប់ដីជាសមូហភាព
តំណាងជនជាតិភាគតិចព័រ និងអាជ្ញាធរខ្លះនៅស្រុកវាលវែង ខេត្តពោធិ៍សាត់ អះអាងថា ផ្ទៃដីព្រៃរាប់រយហិកតារនៅចំណុចស្រែយក្ស ស្រែតាស៊ូ និងចំណុចស្រែថ្មី ឋិតក្នុងទឹកដីរដ្ឋបាលឃុំប្រមោយ និងឃុំក្រពើ២ ត្រូវឈ្មួញ និងអាជ្ញាធរមូលដ្ឋានដណ្ដើមគ្នាចូលកាន់កាប់យ៉ាងអនាធិបតេយ្យ។ ជនជាតិភាគតិចព័រ និងខ្មែររស់នៅឃុំប្រមោយ និងឃុំក្រពើ២ ស្រុកវាលវែង នាំគ្នាផ្ដិតមេដៃសុំទុកដីព្រៃទំហំ ៥០០ហិកតារ ដើម្បីប្រើប្រាស់ជាសមូហភាព។ តំណាងពលរដ្ឋអះអាងថា បច្ចុប្បន្នអ្នកភូមិស្ទឹងថ្មី នៃឃុំប្រមោយ ចំនួន ៧០គ្រួសារ បានផ្ដិតមេដៃរួចហើយ។ ពួកគេនឹងប្រមូលស្នាមមេដៃជនជាតិភាគតិចជាច្រើនទីតាំងទៀត ដើម្បីដាក់ជូនអាជ្ញាធរឃុំរហូតដល់ខេត្ត នៅដើមខែសីហា ឆ្នាំ២០១៥។ តំណាងជនជាតិភាគតិចព័រ នៅចំណុចទួលកកោះ នៃភូមិស្ទឹងថ្មី ឃុំប្រមោយ លោក ហេង ហួន ថ្លែងនៅថ្ងៃទី២៦ ខែកក្កដា ថា ដីព្រៃសហគមន៍ ដីអាស្រ័យផលសមូហភាព និងដីបញ្ចុះសពរបស់ជនជាតិភាគតិចព័រ របស់លោក ត្រូវបានអ្នកមានលុយ និងអាជ្ញាធរភូមិឃុំរំលោភយក។ លោកថា ក្រុមតំណាងពលរដ្ឋឡើងពិភាក្សាការងារ និងរៀបចំលិខិតស្នើសុំជាមួយអង្គការលីកាដូ (Licadho) ឲ្យបានត្រឹមត្រូវសិន មុននឹងដាក់ជូនអាជ្ញាធរមានសមត្ថកិច្ចពិនិត្យ និងដោះស្រាយ៖ «សម្រាប់ជនជាតិដើមភាគតិចគេអត់វាស់ឲ្យទេដីស្រែនោះ បានតែដីភូមិម្នាក់បន្តិចៗ ហើយដីស្នើសុំហ្នឹងជាដីចាស់បុរាណធ្វើស្រែអីនៅក្នុងហ្នឹង។ សំណូមពរ ខ្ញុំសូមឲ្យអាជ្ញាធរគ្រប់លំដាប់ថ្នាក់មេត្តាជួយពិនិត្យមើលឲ្យពិតប្រាកដ ចុះវាស់វែងឲ្យចំគោលដៅ ដើម្បីឲ្យពួកខ្ញុំគ្រប់គ្រងតដល់កូនចៅជំនាន់ក្រោយៗទៀត»។
-
សមត្ថកិច្ចចាប់ក្រុមយុវជន៦នាក់ស្លៀកពាក់ឯកសណ្ឋានអ្នកទោសជាប់ច្រវ៉ាក់ ប្រឆាំងនឹងច្បាប់NGO
ក្រុមយុវជនស្លៀកពាក់ឯកសណ្ឋានអ្នកទោសជាប់ច្រវ៉ាក់៦នាក់ ត្រូវបានសមត្ថកិច្ចនិងកម្លាំងសន្តិសុខខណ្ឌចំការមន ចាប់ដាក់ឡានបញ្ជូនទៅខណ្ឌ នាព្រឹកថ្ងៃអាទិត្យនេះ ខណៈពួកគេតវ៉ាប្រឆាំងឲ្យ ទម្លាក់ចោលច្បាប់គ្រប់គ្រងNGO ដោយពួកគេអះអាងថា ផ្ទុយពីរដ្ឋធម្មនុញ្ញ។ យុវជនទាំងនោះរួមមាន កញ្ញា លក្ខិណា, យុវជន មួង សូនី, យុវជន នាគ ព័ន្ធ,យុវជន ជីម ហួត និងយុវជន ជីម ហួរ ជាដើម ។ មុនពេលចាប់ខ្លួនយុវជនទាំង៦នាក់នោះ ពួកគេបានថ្លែងប្រាប់អ្នកយកព័ត៌មាននៅមុខរដ្ឋសភាថា មូលហេតុដែលពួកគេយកច្រវ៉ាក់ដាក់ចាក់សោជាប់ជើងខ្លួនឯង និងស្លៀកពាក់ឯកសណ្ឋានអ្នកទោស ដោយអះអាងថា ច្បាប់ស្តីពីសមាគម និងអង្គការ ដែលរដ្ឋាភិបាលបង្កើតឡើងរិតត្បិតសិទ្ធិសេរីភាពសង្គមស៊ីវិល និងប្រជាពលរដ្ឋខ្មែរ ។ ពួកគេថា បើទោះជាអាជ្ញាធរចាប់ដាក់គុកឬមករារាំងពួកគាត់យ៉ាងណា ក៏ត្រូវតែប្រឆាំងដាច់ខាតទាមទារឲ្យរដ្ឋសភាទម្លាក់ចោលច្បាប់NGOនេះ ។
-
សហព័ន្ធសិទ្ធិមនុស្សនិងអភិវឌ្ឍន៍កម្ពុជាប្រតិកម្មនឹងទូតអាមេរិកករណីសកម្មជន១១នាក់
សហព័ន្ធសិទ្ធិមនុស្ស និងអភិវឌ្ឍន៍កម្ពុជា នៅថ្ងៃទី២៦ កក្កដា ចេញសេចក្តីថ្លែងការណ៍សម្ដែងការសោកស្ដាយចំពោះស្ថានទូតសហរដ្ឋអាមេរិក ដែលបានចេញសេចក្តីប្រកាសព័ត៌មាន ស្នើឲ្យរដ្ឋាភិបាលកម្ពុជា ពិនិត្យឡើងវិញដំណើរការកាត់ទោសដាក់ពន្ធនាគារសកម្មជនគណបក្សសង្រ្គោះជាតិ ១១រូប។ សហព័ន្ធសិទ្ធិមនុស្ស និងអភិវឌ្ឍន៍កម្ពុជា លើកឡើងថា ការដែលស្ថានទូតសហរដ្ឋអាមេរិក ប្រចាំកម្ពុជា បង្គាប់ និងបញ្ជារដ្ឋាភិបាលកម្ពុជា ឲ្យជ្រៀតជ្រែកទៅលើសេចក្តីសម្រេចរបស់តុលាការដែលជាស្ថាប័នឯករាជ្យ គឺជាការខុសឆ្គងដ៏ធ្ងន់ធ្ងរមិនអាចទទួលយកបានឡើយ។ អង្គការមិនមែនរដ្ឋាភិបាលមួយនេះ រិះគន់បន្ថែមថា ការលើកឡើងរបស់ស្ថានទូតសហរដ្ឋអាមេរិក បង្ហាញឲ្យឃើញថា សហរដ្ឋអាមេរិក មិនអើពើទាល់តែសោះនូវយុត្តិធម៌សម្រាប់កងកម្លាំងសន្តិសុខ ៣៩រូប ដែលរងរបួសក្នុងការប៉ះទង្គិចហិង្សាកាលពីថ្ងៃទី១៥ ខែកក្កដា ឆ្នាំ២០១៤។ សហព័ន្ធសិទ្ធិមនុស្ស និងអភិវឌ្ឍន៍កម្ពុជា ចាត់ទុកការអំពាវនាវរបស់សហរដ្ឋអាមេរិក ថាជាការទាញកម្ពុជា ឲ្យដើរថយក្រោយ ឬងាកចេញពីដំណើរការនីតិរដ្ឋ និងជាការលើកទឹកចិត្តឲ្យមានវប្បធម៌និទ្ទណ្ឌភាព ឬភាពគ្មានទោសពៃរ៍នៅកម្ពុជា។
អានបន្ត -
ពលរដ្ឋ១៤គ្រួសារនៅភូមិបឹងឈូកចោទអាជ្ញាធរខណ្ឌឫស្សីកែវមិនផ្ដល់សំណងដីប៉ះពាល់
ពលរដ្ឋចំនួន ១៤គ្រួសារ រស់នៅភូមិបឹងឈូក សង្កាត់គីឡូម៉ែត្រលេខ៦ នៅខណ្ឌឫស្សីកែវ រាជធានីភ្នំពេញ ចោទប្រកាន់អាជ្ញាធរខណ្ឌថា រឹបអូសដីពួកគេដើម្បីធ្វើផ្លូវ ដោយមិនផ្តល់សំណង។ ផ្ទុយពីការចោទប្រកាន់នេះ អភិបាលរងខណ្ឌឫស្សីកែវ ដែលចុះអនុវត្តការងារធ្វើផ្លូវអះអាងថា សាលារាជធានីភ្នំពេញផ្តល់សំណងជូនពលរដ្ឋដែលរងផលប៉ះពាល់ទាំងនោះអស់ហើយ។ ទោះជាមានការអះអាងបែបនេះក្ដី តំណាងពលរដ្ឋ លោកស្រី សាម សំណាង បញ្ជាក់ថា ប្រជាពលរដ្ឋរងផលប៉ះពាល់ ឲ្យដឹងថា អាជ្ញាធរខណ្ឌនាំកម្លាំង និងឡានដឹកដីចាក់ដីលើដីរបស់លោកស្រី ដែលមានផ្ទៃដីបណ្តោយ ៨ម៉ែត្រ ទទឹង ២០ម៉ែត្រ។ ពលរដ្ឋរូបនេះឲ្យដឹងទៀតថា ពលរដ្ឋប៉ះពាល់ទាំងអស់ចំនួន ១៤គ្រួសារ មិនទាន់ទទួលបានសំណង៖ «»។ ពលរដ្ឋឲ្យដឹងថា អាជ្ញាធររាជធានីភ្នំពេញ ចាក់ដីនៅភូមិបឹងឈូក សង្កាត់គីឡូម៉ែត្រលេខ៦ នៅខណ្ឌឫស្សីកែវ ចាប់ពីថ្ងៃទី២៥ ខែកក្កដា និងបន្តដល់ថ្ងៃទី២៦ ខែកក្កដា សាងសង់ផ្លូវលេខ១៨០៨ ដើម្បីបើកផ្លូវតំបន់អភិវឌ្ឍន៍ឫស្សីកែវ។ អាជ្ញាធរថា ពលរដ្ឋដែលរងផលប៉ះពាល់មួយចំនួនជាអ្នករស់នៅលើដីចំណីផ្លូវ និងជាសំណង់មិនរៀបរយ។
-
សង្គមស៊ីវិលចោទអាជ្ញាធរខេត្តក្រចេះថាឃាត់ខ្លួនអ្នកភូមិប្រមាខុសនីតិវិធី
មន្ត្រីសង្គមស៊ីវិល ចោទអាជ្ញាធរខេត្តក្រចេះ ថាចាប់ខ្លួនអ្នកភូមិប្រមា ខុសនីតិវិធី។ ការចោទប្រកាន់នេះ ធ្វើឡើងស្របពេលដែលសមត្ថកិច្ចជំនាញក្នុងខេត្តនេះ ឃាត់ខ្លួនអ្នកភូមិប្រមា ម្នាក់ពុំមានដីកាពីតុលាការឡើយ កាលពីថ្ងៃទី១៩ កក្កដា កន្លងទៅ ទាក់ទិនបញ្ហាទំនាស់ដីធ្លី។ មន្ត្រីឃ្លាំមើលសិទ្ធិមនុស្ស រិះគន់អាជ្ញាធរខេត្តក្រចេះ ថា អាជ្ញាធរមិនព្យាយាមដោះស្រាយបញ្ហាជម្លោះដីធ្លីជូនប្រជាពលរដ្ឋទេ តែបែរជាចាប់ខ្លួនប្រជាពលរដ្ឋរងគ្រោះដីធ្លីជាការដោះស្រាយបញ្ហាទៅវិញ។ ស្ត្រីត្រូវជាភរិយាបុរសដែលសមត្ថកិច្ចចាប់ខ្លួន អ្នកស្រី សៀម លីងសៀង រៀបរាប់ថា អាជ្ញាធរខេត្តក្រចេះ បានចាប់ខ្លួនប្ដីអ្នកស្រីមានឈ្មោះថា សាយ យីម អាយុជាង ៦០ឆ្នាំដាក់ពន្ធនាគារកាលពីថ្ងៃទី១៩ កក្កដា ដោយចោទថា កាន់កាប់រានដីព្រៃខុសច្បាប់។ អ្នកស្រីបន្តថា លោក ចាន់ គង់ មានតួនាទីជាអនុប្រធានមន្ទីរសុរិយោដី ខេត្តក្រចេះ រួមទាំងកម្លាំងប្រដាប់អាវុធ គំរាមកំហែងគ្រួសារអ្នកស្រី និងរារាំងអ្នកភូមិមិនឲ្យដាំដំណាំនៅទីតាំងដីដែលធ្លាប់ដាំកន្លង៖ «ពិបាកណាស់គេធ្វើបាបតាមចិត្ត! របស់ខ្លួនឯងសោះ គេចាប់ដាក់គុកទៀត ឡើងឈានក្នុងគុកទៀត អត់មានមេត្តាមនុស្សទេ អយុត្តិធម៌ណាស់»។ វិទ្យុអាស៊ីសេរី មិនអាចទាក់ទងសុំការអធិប្បាយពីអនុប្រធានមន្ទីរសុរិយោដី លោក ចាន់ គង់ ដើម្បីឆ្លើយតបការចោទប្រកាន់នេះបានទេ នៅថ្ងៃទី២៦ កក្កដា ព្រោះទូរស័ព្ទមិនអាចទាក់ទងបាន។ ចំណែកអភិបាលខេត្តក្រចេះ លោក សរ ចំរុង ក៏មិនអាចទាក់ទងបាន ព្រោះទូរស័ព្ទហៅចូល តែពុំមានអ្នកទទួល។
-
កម្ពុជាប្រាប់ទៅស្ថានទូតអាមេរិកឲ្យឈប់រំលោភលើអំណាចតុលាការកម្ពុជា
កម្ពុជាប្រាប់ទៅស្ថានទូតអាមេរិកនៅរាជធានីភ្នំពេញ ឲ្យបញ្ឈប់ជាបន្ទាន់នូវការរំលោភលើអំណាចឆន្ទានុសិទ្ធិរបស់តុលាការ ដែលស្នើឲ្យរដ្ឋាភិបាលកម្ពុជាពិនិត្យឡើងវិញករណីហិង្សាក្បែរស្ពាននាគជិតទីលានប្រជាធិបតេយ្យ ខណៈសកម្មជនគណបក្សប្រឆាំង១១នាក់ ត្រូវបានតុលាការផ្តន្ទាទោសដាក់ពន្ធនាគារ កាលពីថ្ងៃទី២១ខែកក្កដា។ ការប្រតិកម្មរបស់កម្ពុជានៅពេលនេះ ធ្វើឡើងបន្ទាប់ពីស្ថានទូតសហរដ្ឋអាមេរិកចេញសេចក្តីប្រកាសព័ត៌ មានខ្លឹមសារថា សូមឲ្យរដ្ឋាភិបាលកម្ពុជាពិនិត្យឡើងវិញករណីនៃការកាត់ទោសសកម្មជនសង្គ្រោះជាតិទាំង១១នាក់ ដោយចាត់ទុកថាការកាត់ទោសនេះមានភាពមិនប្រក្រតី ។ សេចក្តីប្រកាសបញ្ជាក់ថា៖”សហរដ្ឋអាមេរិកមានកង្វល់យ៉ាងខ្លាំង ចំពោះដំណើរការដែលនាំដល់ការដាក់ទោសដល់អ្នកទាំងនោះដោយតុលាការ។ យើងសុំឲ្យរដ្ឋាភិបាលកម្ពុជាពិនិត្យមើលឡើងវិញឲ្យបានម៉ត់ចត់នូវ ដំណើរក្តីនៃតុលាការរបស់ខ្លួន ដើម្បីធ្វើយ៉ាងណាឲ្យវាមានលក្ខណៈពេញលេញ តម្លាភាព ហើយស្របទៅនឹងច្បាប់ក្នុងប្រទេសនិងបទដ្ឋានអន្តរជាតិ”។
-
យុវជន៦នាក់ដែលតវ៉ាប្រឆាំងច្បាប់NGOs ត្រូវបានឃាត់ខ្លួនដោយសមត្ថកិច្ចខណ្ឌចំការមន
យុវជន៦នាក់ដែលស្លៀកពាក់ជាអ្នកទោស និងមានដាក់ច្រវ៉ាក់ជើងចងស្រាក់គ្នាផងនោះ ត្រូវបានសមត្ថកិច្ចខណ្ឌចំការមនចាប់ខ្លួន ខណៈដែលពួកគេកំពុងសំដែងមតិតវ៉ាប្រឆាំងការអនុម័តសេចក្តីព្រាងច្បាប់អង្គការ នៅមុខរដ្ឋសភានៅព្រឹកថ្ងៃអាទិត្យនេះ។
អានបន្ត -
អាមេរិកនឹងរកអន្តរាគមន៍ជួយលោក មាជ សុវណ្ណារ៉ា
ស្ថានទូតអាមេរិកនៅថ្ងៃទី២៥ ខែកក្កដានេះ តាមរយៈសេចក្តីប្រកាសព័ត៌មានរបស់ខ្លួន បានឲ្យដឹងថាក្រសួងការបរទេសអាមេរិកនឹងជួយដល់ លោក មាជ សុវណ្ណារ៉ា ជាពលរដ្ឋអាមេរិកតាមតែអាចធ្វើទៅបាន។ ចំណែក អ្នកនាំពាក្យរដ្ឋាភិបាលថាការបង្គាប់បញ្ជារបស់អាមេរិកមកកម្ពុជា គឺហាក់ដូចជាបង្ហាញការដើរថយក្រោយរបស់សហរដ្ឋអាមេរិក ដែលចង់ឃើញកម្ពុជាមាននីតិរដ្ឋ។ លោក មាជ សុវណ្ណារ៉ា ដែលមានសញ្ជាតិអាមេរិក ត្រូវបានស្ថានទូតអាមេរិកប្រចាំកម្ពុជាប្រកាសថាក្រសួងការបរទេសសហរដ្ឋអាមេរិកយកចិត្តទុកដាក់យ៉ាងខ្លាំងក្នុងការជួយដល់ពលរដ្ឋរបស់ខ្លួននៅបរទេស។ក្រោយពេល ដែលតុលាការក្រុងភ្នំពេញបានដាក់ទោសលោក មាជ សុវណ្ណារ៉ា និងសកម្មជនទាំង១០នាក់ផ្សេងទៀតរបស់គណបក្សសង្រ្គោះជាតិ មន្ត្រីកុងស៊ុលអាមេរិក នៅថ្ងៃសុក្រ ទី២៤ កក្កដា ក៏បានទៅមើលលោក សុវណ្ណារ៉ា ផងដែរ។ ហើយអាមេរិកនឹងបន្តគាំទ្រផ្នែកកុងស៊ុលទាំងអស់ តាមដែលអាចធ្វើទៅបាន។
-
អាមេរិកស្នើឲ្យរដ្ឋាភិបាលកម្ពុជាពិនិត្យការអនុវត្តរបស់តុលាការ
កាលពីថ្ងៃសុក្រម្សិលមិញ មន្ត្រីកុងស៊ុលសហរដ្ឋអាមេរិកប្រចាំនៅកម្ពុជាបានទៅសួរសុក្ខទុក្ខ លោក មាជ សុវណ្ណារ៉ា ដែលជាជនជាតិអាមេរិក និងមន្ត្រីជាន់ខ្ពស់គណបក្សសង្គ្រោះជាតិនៅពន្ធនាគារព្រៃស។ នេះបើយោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំនៅកម្ពុជា។ សហរដ្ឋអាមេរិកក៏បានបញ្ជាក់ដែរថា ខ្លួននៅតែបន្តផ្តល់ការគាំទ្រផ្នែកកុងស៊ុលទាំងអស់តាមដែលអាចធ្វើទៅបាន ទៅដល់លោក មាជ សុវណ្ណារ៉ា។ លោក មាជ សុវណ្ណារ៉ា ស្ថិតនៅក្នុងចំណោមសកម្មជនគណបក្សសង្គ្រោះជាតិ១០នាក់ផ្សេងទៀត ដែលត្រូវបានតុលាការដាក់ទោសភ្លាមៗ កាលពីថ្ងៃទី២១ខែកក្កដាកន្លងទៅ។ ក្រៅពីប្រកាសគាំទ្រផ្នែកការទូតដើម្បីការពារជនជាតិរបស់ខ្លួន សហរដ្ឋអាមេរិកបានបង្ហាញក្តីបារម្ភយ៉ាងខ្លាំង ចំពោះដំណើរការដាក់ទោសមនុស្សទាំង១១នាក់នោះ និងស្នើឲ្យរដ្ឋាភិបាលកម្ពុជាពិនិត្យឲ្យម៉ត់ចត់ឡើងវិញចំពោះដំណើរក្តីនៃតុលាការរបស់ខ្លួន ធ្វើយ៉ាងណាឲ្យមានលក្ខណៈពេញលេញ តម្លាភាព ស្របទៅនឹងច្បាប់ក្នុងប្រទេស និងបទដ្ឋានអន្តរជាតិ។
-
គ.ជ.ប ផ្ញើសេចក្ដីព្រាងបទបញ្ជា និងនីតិវិធីចុះបោះឆ្នោតទៅស្ថាប័ណពាក់ព័ន្ធត្រួតពិនិត្យ
គណៈកម្មការជាតិរៀបចំការបោះឆ្នោង គ.ជ.ប. បានបញ្ជូនសេចក្ដីព្រាងបទបញ្ជា និងនីតិវិធីចុះឈ្មោះបោះឆ្នោត ទៅឲ្យស្ថាប័នពាក់ព័ន្ធមួយចំនួន កាលពីថ្ងៃទី២១ខែកក្កដា ដើម្បីឲ្យជួយត្រួតពិនិត្យមើល និងផ្ដល់យោបល់ ។ សេចក្ដីប្រកាសព័ត៌មានចុះថ្ងៃទី២៤ របស់គណៈកម្មការជាតិរៀបចំការបោះឆ្នោត គ.ជ.ប. បានបញ្ជាក់ថា ខ្លួនបាន បញ្ជូនសេចក្ដីព្រាងបទបញ្ជា និងនីតិវិធីសម្រាប់ការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មី ឆ្នាំ ២០១៦ ដែលមាន១០៦ទំព័រទៅឲ្យភាគីពាក់ព័ន្ធដូចជា គណបក្សនយោបាយ អង្គការមិនមែនរដ្ឋាភិបាល ក្រសួងមហាផ្ទៃ អគ្គលេខាធិការដ្ឋានរដ្ឋសភា អគ្គលេខាធិការដ្ឋានព្រឹទ្ធសភា អគ្គលេខាធិការដ្ឋានក្រុមប្រឹក្សាធម្មនុញ្ញ ដើម្បីអនុសាសន៍ ហើយស្ថាប័នទាំងអស់ត្រូវផ្ដល់យោបល់ត្រឡប់មក គ.ជ.ប វិញ យ៉ាងយូរត្រឹមថ្ងៃទៅ០៦ ខែសីហា ឆ្នាំ២០១៥ ។
-
លោក វន់ ពៅ និង សកម្មជន១០នាក់ផ្សេងទៀតចូលសវនាការនៅសាលាឧទ្ធរណ៍ខែក្រោយ
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA)លោក វន់ ពៅ នឹងចូល សវនាការសាលាឧទ្ធរណ៍នៅថ្ងៃទី១១ ខែសីហា ឆ្នាំ២០១៥ ខាងមុខនេះ ពាក់ព័ន្ធបណ្ដឹងទោសលើសំណុំរឿងក្តី ប៉ះទង្គិចគ្នារវាងកម្មករ និងសមត្ថកិច្ចនៅមុខរោងចក្រយ៉ាកជីង ។ លោក វន់ ពៅ បានប្រាប់ វីអូឌី(VOD) នៅថ្ងៃសៅរ៍នេះថា នៅម៉ោង៨ព្រឹកថ្ងៃទី ១១ ខែសីហាឆ្នាំ២០១៥ រូបលោក និង មនុស្ស១០នាក់ផ្សេងទៀតរួមមានមកពីសមាគម កម្មករ និង សហជីព និងចូលរួមក្នុងសវនាការនៅសាលាឧទ្ធរណ៍។ លោកបញ្ជាក់ថា ចូលសវនាការនេះក្នុងនាមរូបលោក និងអ្នក១០នាក់ផ្សេងទៀត ជាដើមបណ្តឹងព្រោះកាលពីដើមខែមេសាសាលា ដំបូងរាជធានីភ្នំ ពេញកាត់លោក និង សកម្មជនផ្សេងទៀតដោយអយុត្តិធម៌ ។
-
អង្គការចំនួន១៣ថ្កោលទោសការផ្ដន្ទាទោសសកម្មជនបក្សប្រឆាំង១១នាក់
អង្គការសង្គមស៊ីវិលចំនួន ១៣ បានចេញសេចក្តីថ្លែងការណ៍រួមគ្នាមួយ ថ្កោលទោសចំពោះការផ្ដន្ទាទោសសកម្មជនបក្សប្រឆាំង ១១រូប ដែលសាលាដំបូងរាជធានីភ្នំពេញ បានសម្រេចកាត់ទោសឲ្យជាប់ពន្ធនាគាររយៈពេល ៧ និង ២០ឆ្នាំ។ អង្គការសង្គមស៊ីវិលទាំង ១៣ បានរិះគន់សវនាការតុលាការក្រុងភ្នំពេញ ថាមានលក្ខណៈមិនយុត្តិធម៌ ប្រញាប់ប្រញាល់ និងរំលោភលើសិទ្ធិទទួលបានការជំនុំជម្រះក្តីដោយយុត្តិធម៌របស់ចុងចោទ។ ក្រៅពីនេះ អង្គការទាំងនោះក៏បានរិះគន់ថា ការកាត់សេចក្តីមិនផ្អែកលើការពិត និងស្ថិតក្រោមឥទ្ធិពលនយោបាយ។ អង្គការសង្គមស៊ីវិលទាំង ១៣ នោះរួមមាន សម្ព័ន្ធសហជីពកម្ពុជា មជ្ឈមណ្ឌលសិទ្ធិមនុស្សកម្ពុជា ក្រុមអ្នកច្បាប់ការពារសិទ្ធិកម្ពុជា គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា សហភាពការងារកម្ពុជា អង្គការខុមហ្វ្រែល (Comfrel) គណៈកម្មាធិការសហប្រតិបត្តិការដើម្បីកម្ពុជា អង្គការសមធម៌កម្ពុជា ក្រុមការងារពិសេសសិទ្ធិលំនៅឋាន សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ អង្គការសីលការ អង្គការស្ត្រីខ្មែរ និងសម្ព័ន្ធសហគមន៍កសិករកម្ពុជា។
-
អង្គការសិទ្ធិមនុស្សក្នុងស្រុកស្នើព្រឹទ្ធសភា បដិសេធសេចក្តីព្រាងច្បាប់ស្តីពីសមាគមនិងអង្គការ
សង្គមស៊ីវិលក្នុងស្រុក ដែលធ្វើការងារជំរុញឲ្យមានការគោរពសិទ្ធិមនុស្ស ស្នើឲ្យព្រឹទ្ធសភាបដិសេធ ឬពិចារណាកែសម្រួលជាបន្ទាន់ ទៅលើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ដោយចាត់ទុកថាច្បាប់នោះ នឹងរឹតបន្តឹងធ្ងន់ធ្ងរលើសេរីភាពបង្កើតសមាគម និងសេរីភាពបញ្ចេញមតិ។ ការស្នើនេះ ធ្វើឡើងពេលដែលព្រឹទ្ធសភា គ្រោងពិនិត្យនិងឲ្យយោបល់លើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល នៅថ្ងៃស្អែកនេះ បើទោះជាច្បាប់នេះនៅមានភាពចម្រូងចម្រាសក៏ដោយ។
-
ពលរដ្ឋនៅបឹងប្រាំលើកគ្នាមកតុលាការខេត្ត
បាត់ដំបងៈ ប្រជាពលរដ្ឋជិត ២០០ នាក់មកពីសហគមន៍ ៣ នៅក្នុងស្រុកបវេល និងស្រុកថ្មគោលកាលពីថ្ងៃម្សិលមិញបានប្រមូលផ្តុំគ្នានៅមុខសាលាដំបូងខេត្តដើម្បីគាំទ្រតំណាងពួកគាត់ ៥ នាក់ដែលត្រូវបានតុលាការកោះហៅទៅបំភ្លឺរឿងវិវាទដីធ្លីក្រោមបណ្តឹងពីបទប៉ះពាល់កម្មសិទ្ធិឯកជន។ តំណាងពលរដ្ឋទាំង ៥ នាក់នោះរួមមាន លោក តៅ ផាប អាយុ ៤៧ ឆ្នាំ លោក ឌឹម អាន លោក ឆម ស្រួច អាយុ ៥៥ ឆ្នាំ អ្នកស្រី អ៊ឹត យឿន អាយុ ៥៥ ឆ្នាំ និងអ្នកស្រី ឌួង អែម អាយុ ៥៨ ឆ្នាំ។ ពួកគេរស់នៅក្នុងសហគមន៍បឹងក្រឡា បឹងធំ និងបឹងប្រាំ ក្នុងឃុំបឹងប្រាំ ស្រុកបវេល។ ក្រោយពីការចូលទៅបំភ្លឺតំណាងពលរដ្ឋដែលរងការចោទប្រកាន់លោក ឌឹម អាន បានឲ្យដឹងថាពួកគាត់ទាំង ៥ នាក់ត្រូវបានកូនមេភូមិបឹងតាថុង ឈ្មោះ ថេង ប៊ុនធី ប្តឹងពីបទប៉ះពាល់កម្មសិទ្ធិឯកជននៅពេលដែលពួកគាត់ជាម្ចាស់ដីទៅធ្វើស្រែ និងការពារដីខ្លួនក៏ត្រូវបានកូនមេភូមិដែលលួចធ្វើប្លង់កម្មសិទ្ធិទៅហាមឃាត់ហើយដាក់ពាក្យបណ្តឹងមកតុលាការតែម្តង។
-
សង្គមស៊ីវិល៨ស្ថាប័នស្នើឲ្យគ.ជ.បផ្ដល់ឲ្យមានការចូលរួមពីស្ត្រីលើដំណើរការបោះឆ្នោត
អង្គការសង្គមស៊ីវិលដែលមកពីគណៈកម្មាធិការលើកស្ទួយស្ត្រីក្នុងវិស័យនយោបាយ ប្រមាណ ៨ស្ថាប័ន លើកឡើងថា វិសមភាពយេនឌ័រនៅកម្ពុជា នៅមានកម្រិតឡើយ ហើយធ្វើឲ្យការចូលរួមរបស់ស្ត្រី និងបុរសនៅពុំទាន់ស្មើភាពគ្នាក្នុងដំណើរការបោះឆ្នោត។ បញ្ហានេះ សង្គមស៊ីវិលបានស្នើទៅកាន់ គ.ជ.ប ឲ្យដាក់អនុសាសន៍ចំនួន ៧ចំណុច ទៅលើបទបញ្ជា និងនីតិវិធីសម្រាប់ការចុះឈ្មោះបោះឆ្នោត។ សង្គមស៊ីវិលចង់ឲ្យគណៈកម្មាធិការជាតិរៀបចំការបោះឆ្នោត (គ.ជ.ប) យកអនុសាសន៍ ៧ចំណុចរបស់ខ្លួនបញ្ចូលទៅក្នុងបទបញ្ជា និងនីតិវិធីសម្រាប់ការចុះឈ្មោះបោះឆ្នោតក្នុងបំណងឲ្យស្ត្រី និងបុរសមានឱកាសស្មើគ្នានៅក្នុងដំណើរការចូលរួមចុះឈ្មោះបោះឆ្នោត។ ការស្នើនេះ ធ្វើឡើងនៅក្នុងកិច្ចប្រជុំរវាង គ.ជ.ប និងអង្គការធ្វើការលើកស្ទួយសិទ្ធិស្ត្រី ស្ដីពីការពិភាក្សាសេចក្ដីព្រាងបទបញ្ជា និងនីតិវិធីសម្រាប់ការចុះឈ្មោះបោះឆ្នោត ដែលរៀបចំនៅថ្ងៃទី២១ ខែកក្កដា។
-
ព្រះមហាក្សត្រ សម្រេចបង្កើតគណៈកម្មការពិនិត្យលក្ខណវិនិច្ឆ័យ ចៅក្រម និងព្រះរាជអាជ្ញា
រាជធានីភ្នំពេញ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានសម្រេចបង្កើតគណៈកម្មការ ដើម្បីពិនិត្យលក្ខណវិនិច្ឆ័យ សម្រាប់ការធ្វើសមាហរណកម្ម ទៅក្នុងថ្នាក់ និងឋានន្តរស័ក្តិនៃចៅក្រម និងព្រះរាជអាជ្ញា ស្របតាមមាត្រា ១០៨នៃច្បាប់ស្តីពីលក្ខន្តិកៈ នៃចៅក្រម និងព្រះរាជអាជ្ញា។
-
ព្រឹទ្ធសភា ពិនិត្យ និងឲ្យយោបល់លើសេចក្តីព្រាងច្បាប់NGOsនៅថ្ងៃទី២៤ខែកក្កដា
គណៈកម្មាធិការអចិន្ត្រៃយ៍ព្រឹទ្ធសភា នឹងបន្តសម័យប្រជុំលើកទី៧ នីតិកាលទី៣ នៅថ្ងៃទី ២៤ខែកក្កដាខាងមុខនេះ ដោយពិភាក្សា លើរបៀបវារៈចំនួន២ ។ យោងតាមសេចក្តីជូនដំណឹងរបស់ព្រឹទ្ធសភា របៀបវារៈទាំង២នោះរួមមាន ការប្រកាសទទួលស្គាល់សមាជិកព្រឹទ្ធសភាថ្មី និងពិនិត្យ និងឲ្យយោបល់លើសេចក្តីព្រាងច្បាប់ ស្តីពីសមាគម និងអង្គការមិនមែនរដ្ឋាភិបាល។ កន្លងមកក្រុមអង្គការសង្គមស៊ីវិល បណ្តាញ និងសហគមមួយចំនួនបានទាមទារឲ្យព្រឹទ្ធសភាបដិសេធច្បាប់ស្តីពីដ៏ចម្រូងចម្រាសនេះ ដែលរដ្ឋសភាបានអនុម័ត កាលពីថ្ងៃទី១៣ខែកក្កដា។ ក្រុមអង្គការសង្គមស៊ីវិលទាំងនោះ បានចាត់ទុកការអនុម័ត សេចក្តីព្រាងច្បាប់នេះ គឺជាការវិវឌ្ឍន៍មួយដ៏អាក្រក់សម្រាប់ក្រុមសង្គមស៊ីវិលនៅកម្ពុជា និងរឹតត្បិតសិទិ្ធសេរីភាពប្រជាពលរដ្ឋ ធ្វើឲ្យប៉ះពាល់យ៉ាងធ្ងន់ធ្ងរដល់លទិ្ធប្រជាធិបតេយ្យ ព្រមទាំងរំលោភលើរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់អន្តរជាតិផងដែរ។
គាំទ្រដោយ
