​សង្គម​ស៊ីវិល និង​សកម្មជន​ដីធ្លី រក្សា​ជំហរ​ធ្វើ​យុទ្ធនាការ​ប្រឆាំង​ច្បាប់​NGOs ទោះបី​មាន​ការឃាត់ខ្លួន​​

សង្គម​ស៊ីវិល និង​សហគមន៍​មាន​ជម្លោះ​ដីធ្លី នៅ​តែ​រក្សា​ជំហរ​ធ្វើ​យុទ្ធនាការ​ប្រឆាំងនឹង​ច្បាប់​ស្តី​ពី​សមាគម និង​អង្គការ​មិនមែន​រដ្ឋា​ភិបាល បើទោះបីជា​មាន​ការរារាំង និង​មាន​ការឃាត់ខ្លួន​ពី​សំណាក់​អាជ្ញា​ធរមាន​សមត្ថកិច្ច​ក៏ដោយ ​។​ ​តំណាង​សហគមន៍​ដីធ្លី​តំបន់​បឹងកក់ អ្នកស្រី ទេព វ​ន្នី ដែល​បាន​ត្រូវ​សមត្ថកិច្ច​ដោះលែង​បន្ទាប់ពី​ឃុំខ្លួន​ប្រមាណ ៥ ម៉ោង កាល​ពី​ម្សិលមិញ មានប្រសាសន៍ថា រូប​គាត់​ផ្ទាល់ និង​សហគមន៍​រងគ្រោះ​ដីធ្លី​ដទៃទៀត​នៅ​តែ​រក្សា​ជំហរ​ធ្វើ​យុទ្ធនាការ​ប្រឆាំង​ច្បាប់ NGOs ដដែល បើទោះជា​មាន​ការឃាត់ខ្លួន​រូបគាត់​ក៏​ដោយ ។ អ្នកស្រី​បន្ត​ថា នៅ​សប្តាហ៍​ក្រោយនេះ សហគមន៍​ដីធ្លី និង​សង្គម​ស៊ីវិល នឹង​ចាប់ផ្តើម​ធ្វើ​យុទ្ធនាការ​ជាថ្មីទៀត ដោយ​ដើរ​ចែក​ខិតប័ណ្ណ និង​រាំ​បទ (​ខ្ញុំ​មិន​សុខចិត្ត​ទេ​) ដើម្បី​បង្ហាញ​ដល់​សាធារណជន​ឲ្យបាន​ដឹង​ពី​ផលប៉ះពាល់​នៃ​ការបង្កើត​ច្បាប់​ស្តី​ពី​សមាគម និង​អង្គការ​មិនមែន​រដ្ឋាភិបាល​ ។ បើ​តាម​អ្នកស្រី ទេព វ​ន្នី ទិសដៅ​ដែល​គ្រោង​នឹង​ចែក​ខិតប័ណ្ណ​នោះ អាច​នៅ​មុខ​ទីស្តីការគណៈរដ្ឋមន្ត្រី ទីសាធារណៈ តាម​ផ្សារ​ក្នុង​រាជធានី​ភ្នំពេញ និង​មុខ​រដ្ឋសភា​ជាដើម ​។

សង្គម​ស៊ីវិល​រិះគន់​តុលាការ​ខេត្ត​កោះកុង​ថា​លម្អៀង​ទៅ​លើ​អ្នក​មាន​អំណាច​និង​មាន​លុយ

មន្ត្រី​ការពារ​សិទ្ធិ​មនុស្ស និង​អ្នក​ឃ្លាំ​មើល​ការ​អភិវឌ្ឍ​សង្គម បាន​រិះគន់​ស្ថាប័ន​តុលាការ​ខេត្ត​កោះកុង ថា​អនុវត្ត​ការងារ​មិន​ឯករាជ្យ និង​លម្អៀង​ទៅ​លើ​អ្នក​មាន​អំណាច និង​អ្នក​មាន​ទ្រព្យ​ធន។ ប្រតិកម្ម​នេះ កើត​ឡើង​បន្ទាប់​ពី​ស្ថាប័ន​អង្គការ​សិទ្ធិ​មនុស្ស​មួយ​ចំនួន បាន​រក​ឃើញ​ថា តុលាការ​ខេត្ត​កោះកុង បាន​ផ្អឹប​សំណុំ​រឿង​របស់​ប្រជាពលរដ្ឋ​ក្រីក្រ មិន​លើក​មក​ចាត់​ការ​ទេ ប៉ុន្តែ​បើ​ពាក្យ​បណ្ដឹង​ប្ដឹង​ដោយ​មន្ត្រី​មាន​អំណាច ឬ​ឈ្មួញ​មាន​ទ្រព្យ​ធន​វិញ ស្ថាប័ន​នេះ​បាន​លើក​យក​សំណុំ​រឿង​មក​អនុវត្ត ឬ​បើក​សវនាការ​យ៉ាង​ឆាប់​រហ័ស និង​មាន​ភាព​រលូន។ វា​មិន​មែន​ជា​រឿង​ថ្មី​ទេ​ដែល​ស្ថាប័ន​តុលាការ​ស្ទើរ​ទូទាំង ២៥​រាជធានី-ខេត្ត រង​នូវ​ការ​ចោទ​ប្រកាន់​អំពី​អព្យាក្រឹតភាព​មាន​ភាព​លម្អៀង និង​អនុវត្ត​ការងារ​មិន​ឯករាជ្យ ជាដើម រហូត​ដល់​ប្រមុខ​ដឹក​នាំ​រដ្ឋាភិបាល​អាណត្តិ​ទី​៥ ប្រកាស​ធ្វើ​កំណែ​ទម្រង់​ស៊ី​ជម្រៅ​ក្នុង​ស្ថាប័ន​កំពូល​មួយ​នេះ។ ត្រង់​ចំណុច​នេះ លោក អ៊ិន គង់ជិត មន្ត្រី​សម្រប​សម្រួល​នៃ​អង្គការ​លីកាដូ (Licadho) ប្រចាំ​ខេត្ត​កោះកុង បាន​កត់​សម្គាល់​ថា បណ្ដឹង​របស់​ប្រជាពលរដ្ឋ​ដែល​ដាក់​ប្ដឹង​ទៅ​កាន់​តុលាការ​ខេត្ត​នេះ ប្ដឹង​ចោទ​ឈ្មួញ ឬ​មន្ត្រី​មាន​អំណាច ភាគ​ច្រើន​តុលាការ​ខេត្ត​កោះកុង តែង​ផ្អឹប​សំណុំ​រឿង​ទុក​មិន​ចាត់​ការ​ទេ។ លោក​បញ្ជាក់​ថា ក្នុង​ប៉ុន្មាន​ឆ្នាំ​ចុង​ក្រោយ​នេះ ប្រជាពលរដ្ឋ​ដែល​ស្វែងរក​យុត្តិធម៌​នៅ​តុលាការ​ខេត្ត​កោះកុង ប៉ុន្តែ​ភាគ​ច្រើន​មិន​ទទួល​បាន​ការ​យក​ចិត្ត​ទុក​ដាក់​ពី​តុលាការ​ទេ ដោយ​បណ្ដឹង​ភាគ​ច្រើន​ត្រូវ​តុលាការ​ខេត្ត​នេះ​ផ្អឹប​សំណុំ​រឿង​ចោល ប៉ុន្តែ​បើ​ពាក្យ​បណ្ដឹង​ប្ដឹង​ដោយ​ឈ្មួញ​មាន​ទ្រព្យ​ធន ឬ​មន្ត្រី​មាន​អំណាច​វិញ តុលាការ​ខេត្ត​កោះកុង បាន​បង្ហាញ​ភាព​សកម្ម​អនុវត្ត​ការងារ​របស់​ខ្លួន​មាន​សកម្មភាព​រស់​រវើក និង​លើក​យក​មក​បើក​សវនាការ​ឆាប់​បំផុត។

លោក​​ខៀវ​ កាញារីទ្ធ​៖​​អ្នក​កាសែត​​សរសេរ​​បំភ្លៃ​​ឬ​​មួល​បង្កាច់​​ការពិត​​នឹង​​មាន​​ទោស

​ថ្លែង​នៅក្នុង​ជំនួប​ជាមួយ​គណៈប្រតិភូ​សមាគម​ទូរទស្សន៍​វៀតណាម នា​ព្រឹក​ថ្ងៃទី​១៨ ខែកក្កដា​នៅ​ទីស្ដីការ​ក្រសួង​ព័ត៌មាន លោក ខៀវ កាញារីទ្ធ រដ្ឋមន្ត្រីក្រសួង​ព័ត៌មាន បាន​ថ្លែងថា អ្នកកាសែត ប្រសិន​បើ​គេ​បញ្ចេញ​មតិ​លើ​ទស្សនៈ​របស់​គេ លើ​បញ្ហា នយោបាយ ក៏​គេ​មាន​ការធានា​មិនឱ្យ​មាន​ការចាប់​ឃុំឃាំង​ដែរ ប៉ុន្តែ​បើ​និយាយ សរសេរ​បំភ្លៃ​ឬ​មួលបង្កាច់​សភាពការណ៍​ពិត​ដោយ​ចេតនា​ក៏​គេ​អាច​មាន​ទោស​ដែរ​។​លោក ខៀវ កាញារីទ្ធ បាន​មានប្រសាសន៍​ទៀតថា និយាយ​រួម គឺ​យើង​ធានា​រក្សាបាន​នូវ​សេរីភាព​សារព័ត៌មាន ក៏ដូចជា សេរីភាព​របស់​អ្នកសារព័ត៌មាន ហើយ​ឥឡូវនេះ ក្រសួង​កំពុង​តែ​រៀបចំ​ព្រាង​ច្បាប់​មួយទៀត គឺ​ច្បាប់​ស្ដីពី សិទ្ធិ​ទទួលបាន​ព័ត៌មាន ដែល​ជា​ច្បាប់​មួយ មាន​ឥទ្ធិពល​ទៅលើ​ច្បាប់​ដទៃ​ឯទៀត​។​

សហគមន៍​មាន​ទំនាស់​ដីធ្លី​ជាង​៦០០​នាក់​នឹង​ប្រមូល​ផ្ដុំ​នៅ​ខាង​មុខ​រដ្ឋសភា

សហគមន៍​ដែល​មាន​ទំនាស់​ដីធ្លី​ប្រមាណ​ជាង ៦០០​នាក់ នឹង​ប្រមូល​ផ្ដុំ​នៅ​ខាង​មុខ​វិមាន​រដ្ឋសភា ដើម្បី​ទាមទារ​ឲ្យ​មាន​កិច្ច​អន្តរាគមន៍​លើ​ដី​ដែល​មាន​ជម្លោះ ក្រោម​គោល​នយោបាយ​សម្បទាន​ដី​សេដ្ឋកិច្ច​របស់​រដ្ឋាភិបាល។ សេចក្ដី​ជូន​ដំណឹង​ដែល​ត្រូវ​បាន​គេ​បង្ហោះ​តាម​បណ្ដាញ​សង្គម នៅ​ថ្ងៃ​ទី​១៩ ខែ​កក្កដា បាន​ឲ្យ​សរសេរ​ថា សហគមន៍​ដែល​មាន​វិវាទ​ដីធ្លី​ដែល​មាន​សមាជិក​ប្រមាណ ៦៥០​នាក់ ក្នុង​ចំណោម​សមាជិក​សរុប​ជិត ៨​ពាន់​នាក់ ដែល​ភាគ​ច្រើន​គឺ​ជា​កសិករ ក្នុង​ចំណោម ៨​រាជធានី​ខេត្ត​ក្រុង នឹង​ប្រមូល​ផ្ដុំ​គ្នា​នៅ​ខាង​មុខ​វិមាន​រដ្ឋសភា។ ការ​ជួប​ជុំ​ដែល​គ្រោង​រៀបចំ​នៅ​ថ្ងៃ​ទី​២០ កក្កដា នេះ គឺ​ក្នុង​គោល​បំណង​ជំរុញ​ឲ្យ​ស្ថាប័ន​រដ្ឋសភា ជួយ​អន្តរាគមន៍​ស្វែងរក​ដំណោះស្រាយ​ដី​មាន​វិវាទ ក្រោម​គោល​នយោបាយ​ផ្ដល់​ដី​សម្បទាន​សេដ្ឋកិច្ច​របស់​រដ្ឋាភិបាល​ឲ្យ​ទៅ​ក្រុមហ៊ុន​ឯកជន​វិនិយោគ៕

​ប្រជា​សហគមន៍​ចែក​ខិតប័ណ្ណ​ប្រឆាំង​ច្បាប់​NGOs ៥​នាក់​ត្រូវ​សមត្ថកិច្ច​ឃាត់ខ្លួន​​

សមត្ថកិច្ច​រាជធានី​ភ្នំពេញ​ឃាត់ខ្លួន ប្រជា​សហគមន៍​៥​នាក់​ដែល​ធ្វើ​សកម្មភាព​ចែក​ខិតប័ណ្ណ​ជំទាស់​ច្បាប់​គ្រប់គ្រង​អង្គការ​សង្គម​ស៊ីវិល នៅ​ព្រឹក​ថ្ងៃ​សៅរ៍​នេះ នៅក្នុង​ទីតាំង​ផ្សារ​អូ​ឫស្សី ​។​ ប្រជា​សហគមន៍​ដែល​មាន​ជម្លោះ​ដីធ្លី សហគមន៍​ការពារ​ធនធាន​ធម្មជាតិ​ទាំង​នៅ​រាជធានី​ភ្នំពេញ និង មកពី​តាម​បណ្តាល​ខេត្ត​ប្រមាណ​៥០​ទៅ​៦០​នាក់ បាន​ដើរ​ចែក​ខិតប័ណ្ណ​តាម​តំបន់​គោលដៅ​មួយ​ចំនួន​នៅ​ភ្នំពេញ ដើម្បី​បង្ហាញ​ជំហរ​ប្រឆាំង​ការបង្កើត​ច្បាប់​គ្រប់គ្រង​សមាគមន៍ និង អង្គការ​មិនមែន​រដ្ឋាភិបាល​ ។ តំបន់​គោលដៅ​ទាំងនោះ​រួមមាន ផ្សារ​ចាស់ ផ្សារកណ្តាល ផ្សារ​ថ្មី និង​ផ្សារ​អូប្ញ​ស្សី ​។​ ​ប៉ុន្តែ​នៅ​ម៉ោងជាង​១០​ព្រឹក​នេះ បន្ទាប់​ពី​ប្រជា​សហគមន៍​ចែក​ខិតប័ណ្ណ​នៅ​ផ្សារ​ចាស់ ផ្សារកណ្តាល ផ្សារ​ថ្មី ហើយ​ទៅ​ដល់​គោលដៅ​ផ្សារ​អូរឫស្សី ក៏​មាន​សមត្ថកិច្ច​ប្រមាណ​៣០​នាក់​ចេញ​មក​រារាំង ហើយ​មាន​ការប៉ះទង្គិច​គ្នា​មួយ​សន្ទុះ​ក្រោយមក​ក៏​មាន​ការឃាត់ខ្លួន ប្រជា​សហគមន៍​៥​នាក់​ ។ ប្រជា​សហគមន៍​៥​នាក់​នោះ រួមមាន អ្នកស្រី ទេព វ​ន្នី អ្នកស្រី ប៊ូ​វ សោភា អ្នកស្រី គង់ ចន្ថា អ្នកស្រី ស៊ុង ស្រី​លាភ និង អ្នកស្រី ឆាយ គឹម​ហ៊​ន ​។​

អង្គការ​សហប្រជាជាតិ​ទទូច​ឲ្យ​ព្រឹទ្ធសភា​កម្ពុជា​ទម្លាក់​ចោល​ច្បាប់​អង្គការ​សមាគម

មន្ត្រី​ផ្នែក​សិទ្ធិ​មនុស្ស​អង្គការ​សហប្រជាជាតិ ទទូច​ឲ្យ​ព្រឹទ្ធសភា​ច្រាន​ចោល​នូវ​សេចក្តី​ព្រាង​ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល ដែល​តំណាង​រាស្ត្រ​គណបក្ស​ប្រជាជន​កម្ពុជា ទើប​បាន​អនុម័ត​កាល​ពី​ពេល​ថ្មីៗ​នេះ។ អង្គការ​សហប្រជាជាតិ យល់​ឃើញ​ថា ច្បាប់​នេះ​នឹង​គំរាម​កំហែង​ដល់​សេរីភាព និង​ឯករាជ​ភាព​របស់​អង្គការ​សង្គម​ស៊ីវិល​នៅ​កម្ពុជា។ សមាជិក​ព្រឹទ្ធសភា​មក​ពី​គណបក្ស សម រង្ស៊ី លើក​ឡើង​ថា ពួក​គេ​នឹង​មិន​ចូលរួម​ប្រជុំ​អនុម័ត​ច្បាប់​នោះ​ទេ បើ​វា​មិន​មាន​ការ​កែប្រែ ខណៈ​ដែល​សមាជិក​ព្រឹទ្ធសភា​មក​ពី​គណបក្ស​ប្រជាជន​កម្ពុជា អះអាង​ថា ពួក​គេ​នឹង​ពិនិត្យ​ឲ្យ​ជាក់លាក់​ឡើង​វិញ។ វា​មិន​ទាន់​យឺត​ពេល​នៅ​ឡើយ​ទេ​ក្នុង​ការ​សើរើ​សេចក្តី​ព្រាង​ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល។ នេះ គឺ​ជា​ការ​លើក​ឡើង​របស់ លោក ម៉ៃណា គីអៃ (Maina Kiai) អ្នក​រាយការណ៍​ពិសេស​អង្គការ​សហប្រជាជាតិ ទទួល​បន្ទុក​សិទ្ធិ​សេរីភាព​ក្នុង​ការ​ជួប​ប្រជុំ​ដោយ​សន្តិវិធី និង​ក្នុង​ការ​បង្កើត​សមាគម។

ព្រឹទ្ធ​សមាជិក​បក្ស​ប្រឆាំង​ពហិការ​ច្បាប់​អង្គការ

ភ្នំពេញៈ សមាជិក​ព្រឹទ្ធ​សភា​មកពី​គណបក្ស​សមរង្ស៊ី​ចំនួន ១១ នាក់​កាលពី​ថ្ងៃ​ម្សិលមិញ​បាន​ប្រកាស​ធ្វើ​ពហិការ​ចូលរួម​ប្រជុំ​ពេញ​អង្គ​ផ្តល់​យោបល់ និង​​អនុម័ត​ច្បាប់​​សមាគម និង​អង្គការ​មិនមែន​រដ្ឋាភិបាល​ដែល​គ្រោង​ធ្វើ​នៅ​ថ្ងៃ​​ទី ២២ ​ខែ​កក្កដា​ខណៈ​​​សហគមន៍​អន្តរជាតិ​បន្ត​រិះគន់​ចំពោះ​រដ្ឋសភា​ដែល​​អនុម័ត​ច្បាប់​នេះ​ដោយ​ឯកបក្ស។ យោង​តាម​លិខិត​ផ្តល់​យោបល់​អំពី​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល​របស់​ប្រធាន​ក្រុម​សមាជិក​​ព្រឹទ្ធសភា​​គណបក្ស​​ សមរង្ស៊ី លោក គង់ គាំ ចុះ​ថ្ងៃ​ទី​ ១៦ ខែ​កក្កដា​បាន​លើក​ឡើង​ថា​តាំងពី​ឆ្នាំ​ ១៩៩៣ ​​មក​សមាគម និង​អង្គការ​មិនមែន​រដ្ឋាភិបាល​បាន​ធ្វើ​ប្រតិបត្តិការ​ផ្អែក​លើ​រដ្ឋធម្មនុញ្ញ និង​ច្បាប់​ពាក់ព័ន្ធ​យ៉ាង​រលូន​រហូត​មក​ដែល​ករណី​នេះ​មិន​ទាន់​មាន​ការ​ចាំបាច់ និង​ភាព​បន្ទាន់​ដាក់​ឲ្យ​ប្រើប្រាស់​ច្បាប់​ដ៏ចម្រូងចម្រាស​នេះ​ទេ។

EU​​បង្ហាញ​​វត្តមាន​​អង្គការ​​ថ្មី​​មួយ​​ដែល​​ជួយ​​ដល់​​ដំណើរ​កា​រ​គ​.​ជ​.​ប​​កាន់​តែ​​ឆាប់​រហ័ស​​

ក្រោយ​កិច្ចពិភាក្សា​ជាមួយ​សហគមន៍​អឺរ៉ុប​អស់​ប្រមាណ​ជិត​២​ម៉ោង នៅ​ព្រឹក​ថ្ងៃទី​១៧​កក្កដា​នេះ​នៅ​ទីស្តីការ គ​.​ជ​.​ប លោក​ហង្ស ពុទ្ធា អ្នកនាំពាក្យ គ​.​ជ​.​ប បាន​ប្រាប់​អ្នកសារព័ត៌មាន​ពី​លទ្ធផល​មួយ​ចំនួន​ក្នុង​កិច្ចប្រជុំ​ជាមួយ​EU​នោះ​។ ក្រៅពី​នោះ​លោក​ក៏បាន​លើកឡើង​ពី​ការបង្ហាញ​ពី​របស់​EU ពី​អង្គការ​ថ្មី​មួយ​គឺ​UNOPS ដែល​នឹង​បន្ត​សហការ​ជាមួយ​គជប ជំនួស​EU​។ ដោយ​EU អះអាងថា អង្គការ​UNOPS មាន​បទពិសោធន៍​ក្នុង​ការគ្រប់គ្រង និង​និយ័តកម្ម​ផ្សេងៗ​ពាក់ព័ន្ធ​នឹង​ការងារ​បោះឆ្នោត និង​អាច​ជួយ​ដល់​ដំណើរការ​របស់​គជប​បាន​លឿន ជាង​ការដែល​ធ្វើការ​ជាមួយ​EU​។​

ប្រាក់​ឈ្នួល​អប្បបរមា​នៅតែ​ជា​បញ្ហា​ប្រឈម ខណៈ​វិស័យ​កាត់ដេរ​បន្ត​កើនឡើង

កម្មករ​រោងចក្រ​អេឃីន​ថិច​ប្រកាស​បន្ត​ធ្វើ​កូដកម្ម​ក្រោយ​ការ​ចរចា​មិន​ត្រូវ​គ្នា

កម្មករ​ជាង ៥០០​នាក់​នៃ​រោងចក្រ អេឃីន​ថិច (Akeentex Pte Ltd) ទាំង​ពីរ​ទីតាំង​ដែល​ស្ថិត​នៅ​សួន​វឌ្ឍនៈ និង​សួន​កាណាឌីយ៉ា រាជធានី​ភ្នំពេញ មិន​សុខ​ចិត្ត​ទទួល​យក​ប្រាក់​អតីត​ភាព​ការងារ​ក្នុង​មួយ​ឆ្នាំ ៤០​ដុល្លារ​ពី​ក្រុមហ៊ុន​នោះ​ទេ ខណៈ​ក្រុម​កម្មករ​ទាមទារ​រហូត ៧០​ដុល្លារ។ ក្រុម​កម្មករ​តវ៉ា​ទាំង​នោះ ប្រកាស​ថា​នឹង​បន្ត​ធ្វើ​កូដកម្ម​មិន​ចូល​ធ្វើ​ការ បើ​នៅ​តែ​គ្មាន​ដំណោះស្រាយ​សមរម្យ​ណា​មួយ​ពី​ភាគី​ក្រុមហ៊ុន។ ការ​ប្រកាស​បន្ត​សកម្មភាព​តវ៉ា​នេះ បន្ទាប់​ពី​ក្រុម​កម្មករ​រោងចក្រ អេឃីន​ថិច បាន​ប្រមូល​ផ្តុំ​គ្នា​តវ៉ា​នៅ​ខាង​មុខ​ក្រសួង​ការងារ អស់​រយៈពេល​ជាង ៣​ម៉ោង ដើម្បី​ជំរុញ​ឲ្យ​រដ្ឋមន្ត្រី​ក្រសួង​ការងារ លោក អ៊ិត សំហេង រក​ដំណោះស្រាយ និង​ទាមទារ​លក្ខខណ្ឌ​ការងារ​ចំនួន ៩​ចំណុច នៅ​ព្រឹក​ថ្ងៃ​ទី​១៦ ខែ​កក្កដា។ បន្ទាប់​ពី​មាន​ការ​តវ៉ា​នៅ​ខាង​មុខ​ក្រសួង​ការងារ របស់​ក្រុម​កម្មករ ដោយ​មិន​ព្រម​ចូល​ធ្វើ​ការ​អស់​រយៈពេល ៧​ថ្ងៃ​រួច​មក នៅ​ម៉ោង​ប្រមាណ ១០​ព្រឹក​ថ្ងៃ​នេះ ក្រសួង​ការងារ បាន​អញ្ជើញ​ភាគី​ក្រុមហ៊ុន តំណាង​កម្មករ តំណាង​សហជីព និង​តំណាង​សមាគម​រោងចក្រ​កាត់​ដេរ​នៅ​កម្ពុជា ឬ​ជីម៉ាក់ (GMAC) ដើម្បី​ពិភាក្សា​ស្វែងរក​ដំណោះស្រាយ​ជូន​កម្មករ។

លោក​គង់ គាំ​៖​​ខ្ញុំ​នឹង​​​​ធ្វើ​ពហិការ ​​ការ​ផ្តល់​​យោបល់​​​​លើច្បាប់​​NGO​​នៅ​​ព្រឹទ្ធ​​សភា ​​​

«ខ្លួន​ខ្ញុំ (​គង់ គាំ​) និង​ក្រុម​សមាជិក​ព្រឹទ្ធសភា​ពី​គណបក្ស សម រង្ស៊ី និង​ធ្វើពហិការ​មិន​ចូលរួម​ផ្តល់​យោបល់ ក្នុង​សម័យប្រជុំ​ពេញ​របស់​ព្រឹទ្ធ​នៅពេល​ខាងមុខ​ទេ ប្រសិន​បើ​ព្រឹទ្ធសភា​សម្រេច​ដាក់​ច្បាប់​ស្តីពី សមាគម និង​អង្គការ​មិនមែន​រដ្ឋាភិបាល នៅ​ក្នុង​របៀបវារៈ ដើម្បី​ផ្តល់​យោបល់ និង​អនុម័ត​នោះ​»។ នេះ​បើ​តាម​លិខិត​របស់​គង់ គាំ សមាជិក​ព្រឹទ្ធសភា នីតិកាល​ទី​៣ ប្រធាន​ក្រុម​ទី​៦ សមាជិក​ព្រឹទ្ធសភា គណបក្ស សម រង្ស៊ី​៕

ពលរដ្ឋ​តវ៉ា​នៅ​មុខ​សាលាក្រុង​ប៉ោយ​ប៉ែ​ត​មាន​២​ក្រុម​ផ្សេង​គ្នា រឿង​ដី​រថភ្លើង និង​ដី​ស្ទឹង​បត់​សុំ​ឱ្យ​ដោះស្រាយ

ក្រុង​ប៉ោយ​ប៉ែ​ត ៖ សេចក្តីរាយការណ៍​បន្តនាវេលាម៉ោង​០៩ និង​៥០នាទីព្រឹក​ថ្ងៃទី១៦ កក្កដា នេះ​ថា ប្រជាពលរដ្ឋ​ដែល​​មក​តវ៉ា​នៅ​មុខ​សាលាក្រុង​ប៉ោយ​ប៉ែ​ត​នោះ គឺ​មាន​ករណី​២​ផ្សេង​គ្នា ដោយ​ប្រជាពលរដ្ឋ​មួយ​ក្រុម​លើក​បដា គឺ​តវ៉ា​ទាមទារ​សុំ​អាជ្ញាធរ​ក្រុង​ជួយ​ដោះស្រាយ​រឿង​ដី​រថភ្លើង ដែល​គាត់​កំពុង​រស់នៅ​សុំឱ្យ​បាន​សម​ស្រប ហើយ​ចំពោះ​ដី​ដែល​សេសសល់​មិន​ប៉ះពាល់ គឺ​សុំ​ឱ្យ​ចេញ​កម្មសិទ្ធិ​ស្របច្បាប់​ផង ។ ដោយឡែក​ប្រជាពលរដ្ឋ​មួយ​ក្រុម​ទៀត គឺ​​តវ៉ា​ទាមទារ​សុំ​ឱ្យ​ដោះស្រាយ​ពាក់ព័ន្ធ​រឿង​ដី​នៅ​ស្ទឹង​បត់ ។ គួរ​រំលឹក​ថា នៅ​វេលា​ម៉ោង​នេះ​ថ្ងៃ​ទី​១៦ កក្កដា ២០១៥ នៅ​មុខ​សាលាក្រុង​ប៉ោយ​ប៉ែ​ត មាន​ប្រជាពលរដ្ឋ​ជិត​១០០​នាក់ ក្នុង​នោះ​មក​ពី​ភូមិ​ស្ទឹង​បត់​ចំនួន​៣២​គ្រួសារ បាន​ប្រមូលផ្តុំ​គ្នា​ស្រែក​តវ៉ា ខណៈ​ដែល​មាន​ជនខិលខូច​បាន​រំលោភ​យក​ដី​របស់​ពួក​គាត់ ។ ទោះបីជា​យ៉ាងណា គេ​នៅ​មិន​ទាន់​ឃើញ​មាន​តំណាង​ខាង​ណា​ចុះ​មក​ដោះស្រាយ​ជាមួយ​ប្រជាពលរដ្ឋ​នោះ​ទេ ។

​សមត្ថកិច្ច​បិទបាំង​ព័ត៌មាន​ពី​ការចុះពិនិត្យ​ជម្លោះព្រំដែន​នៅ​ស្រុក​កំពង់រោទិ៍ខេត្តស្វាយរៀង​​

សមត្ថកិច្ច​ស្រុក​កំពង់​រោទិ៍ ខេត្ត​ស្វាយរៀង​រាប់សឹប​នាក់ បាន​រាយ​បណ្តាក់​គ្នា​ច្រើន​កន្លែង រារាំង​អ្នកសារព័ត៌មាន​មិនឲ្យ​ចូល​ទៅ​ដល់​បង្គោល​ព្រំដែ​ន​លេខ​២០២ និង​២០៣ ដែល​មន្ត្រី​កិច្ចការ​ព្រំដែន​កម្ពុជា​-​វៀតណាម បាន​ណាត់​ជួប​ពិភាក្សា​គ្នា នា​ព្រឹក​ថ្ងៃ​ព្រហស្បតិ៍​នេះ បន្ទាប់ពី​មាន​ផ្ទុះ​ហិង្សា​។​ នៅ​ព្រឹក​ថ្ងៃទី​១៦ ខែកក្កដា ឆ្នាំ​២០១៥​នេះ គណៈកម្មាធិការ​ព្រំដែន​កម្ពុជា​-​វៀតណាម បាន​ចុះ​ពិនិត្យ បង្គោល​ព្រំដែន​លេខ​២០២ និង​២០៣ ផ្តុំ​ភូមិ​ឆ្លោ​ក​ថ្មី​ឃុំ​ត្នោត ស្រុក​កំពង់រោទិ៍ ខេត្ត​ស្វាយរៀង ជា​កន្លែង​ផ្ទុះ​ហិង្សា​រវាង​ពលរដ្ឋ​ខ្មែរ និង​វៀតណាម​កាលពី​ខែ​មុន​។​ ​កម្លាំងចម្រុះ​របស់​ខេត្ត​នេះ បាន​រារាំង​ច្រើន​កន្លែង​មិនឲ្យ​អ្នកយក​ព័ត៌មាន​បាន​ទៅដល់ក​ន្លែ​ង​ដែល​មន្ត្រី​ជំនាញ​ភាគី​កម្ពុជា និង​វៀតណាម​ជួប​ពិភាក្សា​គ្នា​នៅ​កន្លែងកើតហេតុ​នោះ​ទេ ដោយ​អះអាង​ថា អធិការរង​លោក ឃឹង សុខា បញ្ជា​មិនឲ្យ​ចូល​ដាច់ខាត បើ​គ្មា​ការ​អនុញ្ញត​ពី​ថ្នាក់លើ បើទោះបី​អ្នកសារព័ត៌មាន បានបង្ហាញ​ប័ណ្ណសម្គាល់ខ្លួន ដែល​បញ្ជាក់​ពី​ក្រសួង​ព័ត៌មាន​ក៏ដោយ​។ លោក​ថា​៖ «​គាត់​ថា នរណា​មក​តាម​ផ្លូវ​ហ្នឹង មិន​ឲ្យ​ឆ្លង​ទាំងអស់ នរណា​ក៏​ដោយ គ្មាន​ភារកិច្ច​មិន​ឲ្យទៅ​…»​។​

ILO ថា​វិស័យ​កាត់​ដេរ​សម្លៀកបំពាក់​និង​ស្បែក​ជើង​នៅ​តែ​បន្ត​កើន​ឡើង

ឧស្សាហកម្ម​វិស័យ​កាត់​ដេរ​សម្លៀកបំពាក់ និង​ស្បែក​ជើង​របស់​ប្រទេស​កម្ពុជា ត្រូវ​បាន​អង្គការ​អន្តរជាតិ​ខាង​ការងារ (ILO) បង្ហាញ​ថា នៅ​តែ​បន្ត​ការ​កើន​ឡើង​មក​ដល់​ឆ្នាំ​២០១៥។ ស្រប​ពេល​នេះ ក្រសួង​ការងារ និង​បណ្ដុះបណ្ដាល​វិជ្ជាជីវៈ និង​គណៈកម្មការ​អន្តរ​ក្រសួង ពិនិត្យ និង​រៀបចំ​គោល​នយោបាយ​ជាតិ ស្ដីពី​មុខ​របរ និង​ការងារ​សម្រាប់​ពលរដ្ឋ​កម្ពុជា ដែរ។ ឧស្សាហកម្ម​កាត់​ដេរ​សម្លៀកបំពាក់ និង​ស្បែក​ជើង ដែល​ជា​វិស័យ​គន្លឹះ​ធំ​មួយ​សម្រាប់​សេដ្ឋកិច្ច​របស់​ប្រទេស​កម្ពុជា បាន​បន្ត​ដំណើរ​ការ​ល្អ​ក្នុង​ឆ្នាំ​២០១៤។ កំណើន​ឧស្សាហកម្ម​នេះ ត្រូវ​បាន​មន្ត្រី​អង្គការ​អន្តរជាតិ​ខាង​ការងារ លោក ជា ហួត បង្ហាញ​ក្នុង​ពិធី​សម្ពោធ​ផ្សាយ​ព្រឹត្តិបត្រ​វិស័យ​កាត់​ដេរ​សម្លៀកបំពាក់ និង​ស្បែក​ជើង​កម្ពុជា នៅ​ព្រឹក​ថ្ងៃ​ទី​១៦ កក្កដា៖ «វា​ជា​ឧស្សាហកម្ម​មួយ​ដែល​មាន​តម្លៃ​តែ ២៧​លាន​ដុល្លារ កាល​ពី​ឆ្នាំ​១៩៩៥ មក​ដល់​ចុង​ឆ្នាំ​២០១៤ នេះ ជា​ឧស្សាហកម្ម​មួយ​ដែល​មាន​តម្លៃ​ជិត ៦​ពាន់​លាន​ដុល្លារ។ កើន​ឡើង​រហូត ហើយ​បើ​យើង​គិត​ប្រៀប​ត្រី​មាស​ទី​មួយ​នៃ​ឆ្នាំ​២០១៥ នេះ យើង​ឃើញ​ថា​បន្ត​ការ​កើន​ឡើង ១០,៦%។ ដូច្នេះ​មាន​សញ្ញា​វិជ្ជមាន​ល្អ​ចំពោះ​វិស័យ​សម្លៀកបំពាក់​កាត់​ដេរ និង​ស្បែក​ជើង​នេះ។ ទោះ​បី​មាន​ការ​បារម្ភ​ពី​មុន​មក ប៉ុន្តែ​យើង​ឃើញ​សញ្ញា​បង្ហាញ​ថា មាន​ការ​វិវឌ្ឍ​ល្អ​នៃ​ការ​នាំ​ចេញ»។

ជួយសង្គ្រោះស្រ្តីខ្មែរ៣នាក់ទៀតពីប្រទេសចិន

រាជធានីភ្នំពេញ៖ ស្ត្រីខ្មែរ៣នាក់ទៀតហើយ ត្រូវបានស្ថាន​អគ្គ​កុងស៊ុល​កម្ពុជា ប្រចាំ​នៅ​ទីក្រុង​ក្វាង​ចូ​វប្រ​ទេស​ចិនជួយសង្គ្រោះពីប្រទេសចិន បន្ទាប់ពីរងការចាញ់បោករបស់មេខ្យល់​នាំទៅ​រៀបការ​ជាមួយ​បុរស​ជនជាតិ​ចិន នៅ​ខេត្ត​ហ៊្វូជាន ប្រទេស​ចិន ។ លោក ជុំ សុន្ទរី អ្នកនាំពាក្យ​ក្រសួងការបរទេសកម្ពុជា បាន​ថ្លែង​កាលពី​រសៀល​ថ្ងៃ​ទី​១៦កក្កដា ឲ្យដឹងថា ស្ថាន​អគ្គ​កុងស៊ុល​កម្ពុជា ប្រចាំ​នៅ​ទីក្រុង​ក្វាង​ចូ​វប្រ​ទេស​ចិន បានសហការជាមួយអាជ្ញាធរចិន ជួយសង្គ្រោះនារីខ្មែរទាំង​បី​នាក់​នោះ ​មានឈ្មោះ ទី​១-ពេជ្រ សំអាត មាន​ស្រុកកំណើត នៅ​ភូមិ​អូ​អន្លក់ ឃុំ​តា​សែន ស្រុក​គំ​រៀង ខេត្តបាត់ដំបង។ ទី​២-ឈ្មោះ រិ​ន កញ្ញា មាន​ស្រុកកំណើត នៅ​ភូមិ​ជ្រួញ​ស្នែងក្របី​លើ ឃុំ​កំពង់​គ ស្រុក ព្រែក​ប្រសព្វ ខេត្តក្រចេះ​។ ទី​៣-ឈ្មោះ ខុម ខាន់ មាន​ស្រុកកំណើត នៅ​ឃុំ​វិហារ​សួគ៌ ស្រុក​វិហារ​សួគ៌ ខេត្តកណ្ដាល ។

​ស្ត្រី​សកម្មជន​ដីធ្លី​ចង់​ទទួលបាន​ការយកចិត្ត​ទុកដាក់​ពី​រដ្ឋាភិបាល​ដូច​កញ្ញា​សា​សា​​

ស្ត្រី​សកម្មជន​ការពារ​សិទ្ធិ​ដីធ្លី​លើកឡើងថា ពួកគាត់​រង​ការប្រមាថ ការប្រើ​អំពើហិង្សា​ពី​សំណាក់​សមត្ថកិច្ច និង​សន្តិសុខ​ក្រុមហ៊ុន​ជា​បន្តបន្ទាប់ ហើយ​គួរតែ​មាន​ការយកចិត្ត​ទុកដាក់​ពី​រដ្ឋាភិបាល​ដូច​ករណី​ហិង្សា​លើ​អតីត​ពិធីការនី​កញ្ញា​សា​សា​។​ កាលពីដើម​ខែ​កក្កដា​កន្លងទៅនេះ មាន​ករណី​ហិង្សា​កើតឡើង​គឺ កញ្ញា ឯក សុជាតិ​តា ហៅ សា​សា អតីត​ពិធីការនី​ទូរទស្សន៍​ចោទ​លោក​ឧកញ៉ា សុខ ប៊ុន ថា​បាន​វាយដំ​លើ​រូប​ខ្លួន​បណ្តាលឲ្យ​របូត​អាវ និង រងរបួស​ធ្ងន់​។​ ​ក្រោយ​ហិង្សា​កើតឡើង​មាន​ប្រតិកម្ម​ពី​ក្រសួង​ជា​បន្តបន្ទាប់ គឺ​ក្រសួង​កិច្ចការនារី​ថ្កោលទោស​លោក សុខ ប៊ុន ហើយ​ជំរុញ​មាន​ការចាត់ការ​តាម​ផ្លូវច្បាប់ បន្ទាប់មក​លោក ស ខេង រដ្ឋមន្ត្រីក្រសួង​មហាផ្ទៃ​ប្រកាស​ចាត់ការ​លើ​លោក សុខ ប៊ុន និង​មន្ត្រី​ដែល​នៅ​ជួយ​ការពា​រលោក សុខ ប៊ុន​។ នៅ​ថ្ងៃ​ព្រហស្បតិ៍​នេះ​លោកនាយក​រដ្ឋមន្ត្រី ហ៊ុន សែន បានប្រកាស​ថ្កោលទោស​លោក សុខ ប៊ុន ថា​ប្រើ​អំ​ហិង្សា​ឃោរឃៅ​ទៅលើ​ស្ត្រី​។ លោក​ព្រមាន​ថា ប្រយ័ត្ន​ជាប់​ខ្នោះ បើ​ឧកញ៉ា​រូប​នោះ​មិន​ប្រញាប់​ចេញមុខ​ទទួលខុសត្រូវ​ចំពោះ​មុខ​ច្បាប់​។​

UNនិងEUថាច្បាប់អង្គការនឹងរឹតត្បិតសេរីភាពអង្គការនិងប៉ះពាល់ការអភិវឌ្ឍនៅកម្ពុជា​

មន្រ្តីអង្គការសហប្រជាជាតិទទួលបន្ទុកសិទ្ធិសេរីភាពក្នុងការជួបប្រជុំដោយសន្តិវិធីនិងសេរីភាព​ក្នុងការបង្កើតសមាគម លោកMaina Kiai និងមន្រ្តីសហភាពអឺរ៉ុប បានអះអាងថាច្បាប់អង្គកា​រ​ដែល​រដ្ឋសភាទើប​តែ​អនុម័ត​ នឹងរឹតត្បិ​តសេ​រីភាពអ​ង្គការ និងប៉ះ​ពាល់កា​រអភិវឌ្ឍនៅកម្ពុជា។ លោកMaina Kiai បានលើកឡើងនៅសេចក្ដីថ្លែងការណ៍មួយកាលពីថ្ងៃពុធថា៖«ប្រសិនបើសេចក្តីព្រាងច្បាប់នោះត្រូវគេអនុម័ត ក្រុមអ្នកតស៊ូមតិដើម្បីសិទ្ធិមនុស្ស សេរីភាពជាមូលដ្ឋាន និងអភិបាលកិច្ចល្អ អាចនឹងត្រូវបានគេបិទអង្គការ និងត្រូវជាប់បទល្មើសព្រហ្មទណ្ឌ»។ លោកបន្តថា៖«ចុងក្រោយវានឹងនាំមកនូវឥទ្ធិពលអវិជ្ជមានយ៉ាងខ្លាំងដល់ការចូលរួមបែបប្រជាធិបតេយ្យរបស់ប្រជាជនកម្ពុជា ក្នុងការអភិវឌ្ឍប្រទេសរបស់ពួកគេ»។ លោកMaina Kiai បានអំពាវនាវឲ្យព្រឹទ្ធសភាបដិសេធចោលទាំងស្រុងនូវច្បាប់ស្តីពីសមាគមនិងអង្គការមិនមែនរដ្ឋាភិបាលនេះ ដោយចាត់ទុកថាច្បាប់នេះមិនស្របតាមគោលការណ៍សិទ្ធិមនុស្ស​លើសេរីភាពនៃការប្រមូលផ្តុំ។

យុវជន​ ព្រះសង្ឃ​​ត្រូវ​គេ​​មើល​ឃើញ​ថា​ ​ជា​​ក្រុម​​ពលរដ្ឋ​​ស្អប់​​​អំពើ​ពុក​រលួយ​​ជាង​គេ​

មានការ​លើកឡើងថា អ្នក​ស្អប់​អំពើពុករលួយ​គឺជា​អ្នក​ប្រយុទ្ធប្រឆាំង​អំពើពុករលួយ។ មានការ​សង្កេតឃើញថា ព្រះសង្ឃ​និង​ក្រុមយុវជន នៅក្នុង​ប្រទេស​កម្ពុជា មាន​ភាព​សកម្ម​ក្នុងការ​ប្រយុទ្ធប្រឆាំង​អំពើពុករលួយ ខណៈដែល​អំពើពុករលួយ​ក្លាយជា​ជំងឺ​សង្គម​នៅក្នុង​ប្រទេស​ក្រីក្រ​មួយ​នេះ។ ជាក់ស្តែង​នៅក្នុង​យុទ្ធនា​ការចែក​កាត់ ឬ​ប័ណ្ណ​ប្រឆាំង​អំពើពុករលួយ របស់​អង្គការ​តម្លាភាព​កម្ពុជា កាលពីពេលថ្មីៗនេះ មាន​ព្រះសង្ឃ យុវជន ច្រើន​រយ​នាក់​បាន​ទៅ​ទទួល​កាត​ប្រឆាំង​អំពើពុករលួយ​នោះ។ ប្រការនេះ​គេ​អាច​សន្និដ្ឋានបានថា​ពល​ដ្ឋ​ទាំងពីរ​ប្រភេទ​នេះ គឺ​ព្រះសង្ឃ និង​យុវជន ជា​អ្នក​ស្អប់​អំពើពុករលួយ។

អ្នក​អនុវត្ត​ច្បាប់​ពិភាក្សា​ពង្រឹង​ពី​ការ​អនុវត្ត​ច្បាប់

ភ្នំពេញៈ ចៅក្រម​ព្រះរាជអាជ្ញា​ក្រឡា​បញ្ជី និង​តំណាង​មន្ត្រី​នគរបាល​យុត្តិធម៌​មន្ត្រី​កងរាជ​អាវុធហត្ថ​មកពី​អង្គភាព និង​ស្ថាប័ន​​​អនុវត្ថ​ច្បាប់​ពាក់ព័ន្ធ​នៅក្នុង​រាជធានី​ភ្នំពេញ​កាលពី​ម្សិលមិញ​បាន​ជួប​ប្រជុំ​គ្នា​ដើម្បី​ពិភាក្សា​ពង្រឹង​សមត្ថភាព​ក្នុង​ការ​អនុវត្ត​ច្បាប់​ដែល​សង្គម​ស៊ីវិល​ថា​នៅ​មាន​ភាព​ទន់​ខ្សោយ​។ កិច្ចប្រជុំ​ពិភាក្សា​ស្តីពី​ការ​ពង្រឹង​សមត្ថភាព​មន្ត្រី​តុលាការ និង​នគរបាល​យុត្តិធម៌​ក្នុង​ការ​អនុវត្ត​ច្បាប់ ទប់ស្កាត់ និង​បង្ក្រាប​បទល្មើស​ព្រហ្មទណ្ឌ​នេះ​ត្រូវ​បាន​ធ្វើ​ឡើង​ពេញ​មួយ​ថ្ងៃ​ក្រោម​អធិបតីភាព​របស់​ប្រធាន​សាលា​ដំបូង​រាជធានី​ភ្នំ​ពេញ​លោក តាំង ស៊ុនឡាយ និង​ព្រះរាជអាជ្ញា​នៃ​អយ្យការ​អម​សាលា​ដំបូង​រាជធានី​នៅ​សាល​ប្រជុំ​ធំ សាលា​ដំបូង​រាជធានី​។ លោក​ តាំង ស៊ុនឡាយ បាន​ឲ្យ​ដឹង​ថា​គោលបំណង​នៃ​កិច្ចប្រជុំ​នេះ​គឺ​ដើម្បី​ពិភាក្សា​លើ​ចំណាត់ការ​រឿងក្តី​ព្រហ្មទណ្ឌ​ដែល​ច្បាប់​កំណត់​ឲ្យ​មាន​ការ​ផ្តន្ទាទោស​ក្រោម​ ១ ឆ្នាំ​រួមមាន​បទល្មើស​ប្រើប្រាស់​គ្រឿងញៀន​បទល្មើស​លេង​ល្បែង​ស៊ីសង និង​បទ​ល្មើស​ចរាចរណ៍ ទំនាក់ទំនង​រវាង​ស្ថាប័ន​តុលាការ អយ្យការ និង មន្ត្រី​យុត្តិធម៌​ក្នុង​កិច្ចការ​ស៊ើបអង្កេត​បទល្មើស​ព្រហ្មទណ្ឌ និង​បញ្ហា​ផ្សេងៗ​ទៀត​។

អ្នក​មាន​ជម្លោះ​ដីធ្លី​នៅ​ឃុំ​២​ធ្នូ​ខេត្តក្រចេះ​អះអាងថា​នឹង​មិន​ចាកចេញ​ទោះ​តុលាការ​បង្គាប់​ឲ្យ​រុះរើ​​

​ប្រជាពលរដ្ឋ​មាន​ជម្លោះ​ដីធ្លី​នៅ​ភូមិ​ត្រពាំង​ស្រែ ឃុំ​២​ធ្នូ ស្រុក​ស្នួល ខេត្ត​ក្រចេះ អះអាងថា ពួកគេ​នឹង​មិន ព្រម​ចាកចេញ​ពី​ទីលំនៅ​របស់​ពួកគាត់​ដាច់ខាត ទោះបី​តុលាការ​បាន​ចេញ​ដីកា​សម្រេច​ការពារ​ឲ្យ​ពួកគាត់​រុះរើ​ចេញ​ក្នុង​រយៈពេល​៣០​ថ្ងៃ ដោយ​ពួកគាត់​ទាមទារ​ឲ្យ​អាជ្ញាធរកា​ត់​ដី​ឲ្យ​ពួក​គាត់​អាច​ដាំ​ដំណាំ​ឡើងវិញ​។​ ​ពលរដ្ឋ​ម្នាក់​អ្នកស្រី វ៉ាន់ នី អាយុ​៣៥​ឆ្នាំ ឲ្យដឹងថា តុលាការ​ខេត្ត​ក្រចេះ​បាន​ចេញ​ដីកា​បង្គាប់​ឲ្យ​ពួកគាត់​៨៣​គ្រួសារ​រុះរើ​លំនៅដ្ឋាន​ចេញពី​ដី​ដែល​អ្នកស្រី​អះអាង​ថា​ធ្លាប់​រស់នៅ​អស់​រយៈពេល​ជាច្រើន​ឆ្នាំ​មកហើយ ដើម្បី​យក​ដី​នោះ​ទៅឲ្យ​ក្រុមហ៊ុន UBE Development ធ្វើ​ជា​តំបន់​ឧស្សាហកម្ម​។ អ្នកស្រី​អះអាងថា ក្រុម​ប្រជាពលរដ្ឋ​មិន​ព្រម​ចាកចេញ​ជាដាច់ខាត ទោះបីជា​មាន​ការគំរាមកំហែង​ឬ​ឈូសឆាយ​ដោយ​បង្ខំ​ក៏ដោយ​។​