បញ្ជីពត៍មានគេហទំព័រសិទ្ធិ

កំពុងស្វែងរកទិន្នន័យ

រកឃើញ: 13.090

១ មេសា ២០១៥
លោក ហង្ស ពុទ្ធា សន្យាជួយកែទម្រង់ផ្នែកបោះឆ្នោតនៅកម្ពុជា

លោក ហង្ស ពុទ្ធា នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិច (NICFEC) បានដាក់ពាក្យសុំធ្វើជាសមាជិកទី៩ នៃគណៈកម្មាធិការជាតិរៀបចំការបោះឆ្នោត (គ.ជ.ប)។ លោកសន្យានឹងខិតខំប្រឹងប្រែងធ្វើការងារបោះឆ្នោតដើម្បីកែទម្រង់ការបោះឆ្នោតនៅកម្ពុជា ឲ្យមានលក្ខណៈសេរី និងយុត្តិធម៌។ លោក ហង្ស ពុទ្ធា បញ្ជាក់ថា បទពិសោធន៍ការងាររយៈពេល ១៧ឆ្នាំ ពាក់ព័ន្ធផ្នែកសង្គម និងការបោះឆ្នោត នឹងផ្តល់លទ្ធភាពឲ្យលោកជួយធ្វើកំណែទម្រង់ផ្នែកបោះឆ្នោតនៅកម្ពុជា។
១ មេសា ២០១៥
លោក ហ៊ុន សែន ថាទោះបីលោក ហង្ស ពុទ្ធា កើតទឹកនោមផ្អែមឬអេដស៍ក៏ច្បាប់មិនហាមដែរ

លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានសម្តែងការពេញចិត្តចំពោះបេក្ខភាពរបស់លោក ហង្ស ពុទ្ធា ដែលនឹងត្រូវចូលជាសមាជិកទី៩ ក្នុងគ.ជ.ប ថ្មី ជំនួសលោកស្រី ពុង ឈីវកេក ដែលបានបដិសេធតំណែងនេះ ។ ថ្លែងក្នុងពិធីបើកឲ្យប្រើប្រាស់ជាផ្លូវការ ស្ពាន និងផ្លូវជាតិលេខ៩ ពីខេត្តស្ទឹងត្រែងទៅខេត្តព្រះវិហារ នៅព្រឹកថ្ងៃទី០១ ខែមេសានេះ លោកនាយករដ្ឋមន្ត្រី ហ៊ុន សែន បានជំរុញឲ្យលោក សម រង្ស៊ី ឆាប់ចុះហត្ថលេខាទទួលយកបេក្ខភាពលោក ហង្ស ពុទ្ធា ជំនួសលោកស្រី ពុង ឈីវកេក ដោយបានព្រមានជាថ្មីទៀតថា បើនៅតែខ្វែងគំនិតគ្នាទៀត លោកនឹងវិលទៅប្រើ គ.ជ.ប ចាស់ ដែលរងការរិះគន់ថា មិនឯករាជ្យនោះ ។
១ មេសា ២០១៥
នាយករដ្ឋមន្ត្រីប្រកាសថា ច្បាប់គ្រប់គ្រង NGOជិតចេញជារូបរាងហើយ

ស្របពេលដែរអង្គការក្រៅរដ្ឋាភិបាលភាគច្រើនកំពុងទាមទារឲ្យរដ្ឋាភិបាលបើក ទូលាយក្នុងការពិគ្រោះច្បាប់ស្តីពីសមាគម និងអង្គការមិនមែនរដ្ឋាភិបាល មិនទាន់រួចផង នៅថ្ងៃទី១ មេសានេះ លោកនាយករដ្ឋមន្ត្រី ហ៊ុន សែន បានប្រកាសថា ច្បាប់គ្រប់គ្រង NGO នឹងត្រូវបានអនុម័តនាពេលដ៏ឆាប់ខាងមុខ។ ការប្រកាសដែលលោកនាយករដ្ឋមន្ត្រី ហ៊ុន សែន អះអាងថា អង្គការក្រៅរដ្ឋាភិបាលមួយ ចំនួនកំពុងអនុវត្តការងារនៅក្រៅប្រព័ន្ធច្បាប់ និងបម្រើឲ្យផលប្រយោជន៍គណបក្ស នយោបាយនោះ ត្រូវបានប្រព្រឹត្តឡើងក្នុងពិធីសម្ពោធដាក់ឲ្យប្រើប្រាស់ស្ពានមិត្តភាពកម្ពុជា-ចិន នៅខេត្តស្ទឹងត្រែង។
១ មេសា ២០១៥
លោក ហ៊ុន សែន គំរាមថាក្រែងលោមានសង្រ្គាម ពេលគណបក្សប្រជាជនចាញ់ឆ្នោត

លោកនាយករដ្ឋមន្រ្តី ហ៊ុន សែន នៅថ្ងៃពុធនេះ ផ្ញើសារគំរាមជាថ្មីទៅកាន់អ្នកបោះឆ្នោតថាប្រសិនបើគណបក្សប្រជាជនកម្ពុជាចាញ់ការបោះឆ្នោត លទ្ធភាពសង្រ្គាមក្នុងប្រទេសនឹងកើតមានឡើង ដែលនាំឲ្យឱកាសនៃការអភិវឌ្ឍបាត់បង់។ លោកនាយករដ្ឋមន្រ្តីគំរាមជាថ្មីបែបនេះនៅក្នុងពិធីបើកឲ្យប្រើប្រាស់ជាផ្លូវការ ស្ពាន និងផ្លូវជាតិលេខ៩ពីខេត្តស្ទឹងត្រែងទៅខេត្តព្រះវិហារ ស្របពេលដែលលោករិះគន់អង្គការសង្គមស៊ីវិលដែលថាច្បាប់គជបថ្មីអាក្រក់ជាងច្បាប់គជបចាស់។
១ មេសា ២០១៥
កម្លាំងប្រដាប់អាវុធ និងក្រុមហ៊ុនវៀតណាមដុតខ្ទមជនជាតិដើមជាង១០០

កម្មករវៀតណាម និងកម្លាំងចម្រុះរបស់អាជ្ញាធរមានសមត្ថកិច្ចស្រុកកែវសីមា ប្រមាណជា ៧០ នាក់ បានដុត និងឈូសបំផ្លាញខ្ទមពលរដ្ឋអស់ ១៣៦ កាលពីម្សិលមិញ ដើម្បីបណ្តេញពួកគេចេញពីដីសហគមន៍ដែលរដ្ឋាភិបាលផ្តល់ឲ្យក្រុមហ៊ុនវៀតណាម។ កម្លាំងប្រដាប់អាវុធចម្រុះក្នុងស្រុក កែវសីមា រួមនឹងកម្មករវៀតណាមរបស់ក្រុមហ៊ុន ប៊ិនភៀក ១ បានសហការណ៍គ្នាដុតបំផ្លាញ និងប្រើគ្រឿងចក្រឈូសឆាយខ្ទម និងរោងស្នាក់នៅរបស់អ្នកភូមិ ១៣៦ កាលពីរសៀលថ្ងៃអង្គារម្សិលមិញនៅភូមិចក់ចារ ឃុំស្រែឈូក ស្រុកកែវសីមា ខេត្តមណ្ឌលគិរី។ នេះបើយោងតាមការអះអាងរបស់អ្នកភូមិ និងអង្គការអាដហុកខេត្តមណ្ឌលគិរី។
១ មេសា ២០១៥
បញ្ជូនយុវជនម្នាក់ទៅតុលាការក្រោយចាប់រំលោភក្មេងស្រីអាយុ៨ឆ្នាំ

ខេត្ដរតនគិរី ៖ នគរបាលស្រុកវ៉ើនសៃ ចាប់ខ្លួនយុវជនម្នាក់បញ្ជូនទៅតុលាការ ពីបទរំលោភសេពសន្ថវៈលើក្មេងស្រី អាយុ៨ឆ្នាំ ខណៈនាងនៅតែម្នាក់ឯង ម្ដាយរបស់នាងទៅមើលបងប្អូនឆ្លងទន្លេ។ ជនសង្ស័យត្រូវបានចាប់ខ្លួននៅថ្ងៃទី ២៩ ខែមីនា ឆ្នាំ២០១៥ ក្រោយពីធ្វើ សកម្មភាពនិងបានបញ្ជូនទៅតុលាការ នៅព្រឹកថ្ងៃទី៣០ ខែមីនា ឆ្នាំ២០១៥ ដើម្បីចាប់ការតាមច្បាប់ ។ ជនសង្ស័យឈ្មោះ ស៊ី ចន្ធី អាយុ១៧ ឆ្នាំ រស់នៅភូមិបាតុង ឃុំប៉ុង ស្រុកវ៉េើនសៃ ខេត្ដរតនគិរី រីឯក្មេងស្រីរងគ្រោះ ឈ្មោះ ខ.ស អាយុ៨ឆ្នាំ រស់នៅឃុំជាមួយគ្នា ។
១ មេសា ២០១៥
ក្រសួងការងារហាមម្ចាស់សហគ្រាស-ក្រុមហ៊ុនកាត់លុយកម្មករពេលបុណ្យចូលឆ្នាំ

ក្រសួងការងារបានហាមម្ចាស់សហគ្រាស ឬក្រុមហ៊ុន មិនឲ្យកាត់លុយកម្មករនិយោជិក ក្នុងពេលសម្រាកបុណ្យចូលឆ្នាំខ្មែរខាងមុខនេះទេ ខណៈដែលរដ្ឋាភិបាលបានអនុញ្ញាតិឲ្យមានការឈប់សម្រាក៣ថ្ងៃ ។ សេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី៣១ ខែមីនា ប្រកាសថា «ក្រសួងមិនអនុញាតឲ្យម្ចាស់សហគ្រាស និងគ្រឹះស្ថាននានានៅទូទាំងប្រទេស កាត់ប្រាក់ឈ្នូលកម្មករសម្រាប់ថ្ងៃឈប់សម្រាកបុណ្យចូលឆ្នាំខ្មែរ រយៈពេល៣ថ្ងៃចាប់ពីថ្ងៃទី១៤-ដល់១៦ ខែមេសា ឆ្នាំ២០១៥នេះ» ។
១ មេសា ២០១៥
កម្មកររោងចក្រខេថេកនៅតាកែវជាង១០នាក់ទៀតដួលសន្លប់នៅថ្ងៃទី១មេសា

កម្មកររោងចក្រ គ័នថេក ខេមបូឌា ខបភើរ៉េហ្សិន (Kauntech Cambodia Cooperation Limited) ឬ ខេថេក (Ktec) នៅស្រុកត្រាំកក់ ខេត្តតាកែវ ជាង ១០នាក់ទៀត បានដួលសន្លប់នៅព្រឹកថ្ងៃទី១ មេសា។ មន្ត្រីជំនាញសង្ស័យថា ការសន្លប់នេះ គឺដោយសារអាកាសធាតុក្ដៅខ្លាំងផង រួមផ្សំនឹងរោងចក្រនេះមិនបានបំពាក់ប្រព័ន្ធខ្យល់អុកស៊ីហ្សែនផង ទើបធ្វើឲ្យកម្មករសន្លប់ដូច្នេះ។ កម្មការិនីរោងចក្រដែលដួលសន្លប់នោះ ត្រូវបានបញ្ជូនទៅសង្គ្រោះបន្ទាន់នៅគ្លីនិកឯកជននៅក្បែររោងចក្រនោះ។
១ មេសា ២០១៥
លោក ហ៊ុន សែន មិនឆ្លើយរឿងពលរដ្ឋរងគ្រោះដោយការសង់ស្ពានមិត្តភាពកម្ពុជា-ចិននៅស្ទឹងត្រែង

លោកនាយករដ្ឋមន្ត្រី ហ៊ុន សែន មិនឆ្លើយតបទៅនឹងរឿងពលរដ្ឋរងគ្រោះ ដោយការសាងសង់ស្ពានមិត្តភាពកម្ពុជា-ចិនឡើយ ព្រោះលោកនិយាយថា ការសាងសង់ស្ពានជាសមិទ្ធផលធំធេង ហេតុអីត្រូវនិយាយរឿងតូចមួយបែបនេះ។ ថ្លែងក្នុងបទសម្ភាសខ្លីមួយក្រោយពិធីសម្ពោធស្ពាន ក្នុងខេត្តស្ទឹងត្រែង នៅថ្ងៃទី០១ មេសា លោក ហ៊ុន សែន បដិសេធឆ្លើយនឹងសំនួរ របស់យកព័ត៌មានវិទ្យុអាស៊ីសេរីឡើយ ទាក់ទងនឹងរឿងពលរដ្ឋមួយគ្រួសារ មិនទាន់ទទួលបានសំណងពីការសាងសង់ស្ពាននេះ។
១ មេសា ២០១៥
ពលរដ្ឋមានជម្លោះនឹងក្រុមហ៊ុនយូញៀនស្នើវៀលដីតាមរូបមន្តស្បែកខ្លា

តំណាងពលរដ្ឋជាង ៣០០ គ្រួសារ នៅស្រុក គិរីសាគរ និងបទុមសាគរ ខេត្តកោះកុង បានទាមទារឲ្យរាជរដ្ឋាភិបាលវៀលដីភូមិ និងដីស្រែចម្ការពួកគាត់តាមរូបមន្តស្បែកខ្លា ចេញពីដីរបស់ក្រុមហ៊ុនចិនយូញៀន ដើម្បីបញ្ចប់វិវាទដែលបានអូសបន្លាយជាច្រើនឆ្នាំមកនោះ។ នៅក្នុងកិច្ចពិគ្រោះយោបល់ថ្នាក់ជាតិ ស្តីពីការស្វែងរកដំណោះស្រាយលើបញ្ហាដីធ្លីនៅស្រុក បទុមសាគរ និង គិរីសាគរ ខេត្តកោះកុង កាលពីម្សិលមិញ នៅសណ្ឋាគារកាំបូឌីយ៉ាណា តំណាងពលរដ្ឋនៅឃុំព្រែកខ្សាច់ ស្រុកគិរីសាគរ អ្នកស្រី ទី ប្រាថា លើកឡើងថា បន្ទាប់ពីក្រុមហ៊ុន យូញៀនមកអភិវឌ្ឍនៅតំបន់នោះ បានធ្វើឲ្យប្រជាពលរដ្ឋរងទុក្ខវេទនា ដោយសារការឈូសបំផ្លាញផ្ទះសម្បែង និងធ្វើឲ្យប៉ះពាល់ដីស្រែចម្ការពួកគាត់ ក្នុងនោះ ក៏ធ្វើឲ្យស្ត្រីម្នាក់ចងកសម្លាប់ខ្លួនផងដែរ។
១ មេសា ២០១៥
សហគមន៍ប៊ូស្រាចាប់ជនជាតិវៀតណាមម្នាក់និងរថយន្តពីរគ្រឿងដែលចូលដឹកឈើ

ថយន្តច្នៃពីរគ្រឿងផ្ទុកដោយឈើពេញ និងពលរដ្ឋវៀតណាម ម្នាក់ ត្រូវបានសហគមន៍ស្ទាក់ចាប់ ខណៈពួកគេប៉ុនប៉ងដឹកជញ្ជូនឈើឆ្លងកាត់ព្រំដែនខ្មែរចូលទៅប្រទេសវៀតណាម។ ក្រុមសហគមន៍អះអាងថា ជនជាតិវៀតណាម ដែលជនល្មើសបានឆ្លើយដាក់ទៅអាជ្ញាធរនៅតំបន់នោះ ថាជាអ្នកអនុញ្ញាតឲ្យពួកគេចូលកាប់ឈើក្នុងដីខ្មែរ។ តំណាងសហគមន៍ចំនួនបីភូមិនៅឃុំប៊ូស្រា គ្រោងដាក់ពាក្យប្ដឹងមន្ត្រីបរិស្ថានមួយរូប ដែលអ្នកភូមិសង្ស័យថាមានជាប់ឃុបឃិតឲ្យពលរដ្ឋវៀតណាម ចូលកាប់ឈើក្នុងដីខ្មែរ។
១ មេសា ២០១៥
នាយករដ្ឋមន្ត្រីប្រកាសថា ច្បាប់គ្រប់គ្រង NGOជិតចេញជារូបរាងហើយ

ស្របពេលដែរអង្គការក្រៅរដ្ឋាភិបាលភាគច្រើនកំពុងទាមទារឲ្យរដ្ឋាភិបាលបើក ទូលាយក្នុងការពិគ្រោះច្បាប់ស្តីពីសមាគម និងអង្គការមិនមែនរដ្ឋាភិបាល មិនទាន់រួចផង នៅថ្ងៃទី១ មេសានេះ លោកនាយករដ្ឋមន្ត្រី ហ៊ុន សែន បានប្រកាសថា ច្បាប់គ្រប់គ្រង NGO នឹងត្រូវបានអនុម័តនាពេលដ៏ឆាប់ខាងមុខ។ ការប្រកាសដែលលោកនាយករដ្ឋមន្ត្រី ហ៊ុន សែន អះអាងថា អង្គការក្រៅរដ្ឋាភិបាលមួយ ចំនួនកំពុងអនុវត្តការងារនៅក្រៅប្រព័ន្ធច្បាប់ និងបម្រើឲ្យផលប្រយោជន៍គណបក្ស នយោបាយនោះ ត្រូវបានប្រព្រឹត្តឡើងក្នុងពិធីសម្ពោធដាក់ឲ្យប្រើប្រាស់ស្ពានមិត្តភាពកម្ពុជា-ចិន នៅខេត្តស្ទឹងត្រែង។
១ មេសា ២០១៥
ពលរដ្ឋខ្មែរជំទាស់ទៅនឹងកិច្ចព្រមព្រៀងស្តីពីជនភៀសខ្លួន ខណៈជនភៀសខ្លួនមិនចង់តាំងទីលំនៅថ្មីនៅកម្ពុជា

ខណៈជនភៀសខ្លួនដែលត្រូវបានឃុំខ្លួនដោយប្រទេសអូស្ត្រាលីនៅលើប្រទេសដែនកោះណូរូស្ថិតនៅភាគខាងត្បូងមហាសមុទ្រប៉ាស៊ីហ្វិកបន្តច្រានចោលការតាំងទីលំនៅថ្មីនៅក្នុងប្រទេសកម្ពុជា ពលរដ្ឋខ្មែរជាច្រើននាក់បានសំដែងការជំទាស់ស្រដៀងនេះថា ពួកគាត់មិនចង់ឃើញជនភៀសខ្លួនណាមួយត្រូវបានបញ្ជូនមកប្រទេសកម្ពុជាឡើយ។ កាលពីខែកញ្ញា រដ្ឋាភិបាលក្រុងកង់បេរ៉ា និងរដ្ឋាភិបាលក្រុងភ្នំពេញបានចុះហត្ថលេខាលើកច្ចព្រមព្រៀងមួយ ដែលនឹងអនុញ្ញាតឲ្យជនភៀសខ្លួនដែលត្រូវបានបញ្ជូនទៅឃុំឃាំងនៅលើប្រទេសដែនកោះណូរូ ដើម្បីរង់ចាំគេរៀបចំពាក្យសុំសិទ្ធិជ្រកកោនឲ្យនោះ តាំងទីលំនៅថ្មីក្នុងប្រទេសកម្ពុជាដោយផ្អែកលើការស្ម័គ្រចិត្ត។ ជាថ្នូរនឹងកិច្ចព្រមព្រៀងនេះ ប្រទេសអូស្ត្រាលីបានសន្យាផ្តល់ជំនួយបន្ថែមក្នុងទឹកប្រាក់៣៥លានដុល្លារសម្រាប់រយៈពេលបួនឆ្នាំ។ កិច្ចព្រមព្រៀងនេះត្រូវបានរិះគន់យ៉ាងខ្លាំងដោយអង្គការសិទ្ធិមនុស្ស និងគណបក្សប្រឆាំងនៅក្នុងប្រទេសទាំងពីរ។ ដំណើរទៅកាន់ប្រទេសណូរូរបស់មន្ត្រីកម្ពុជាក្នុងពេលថ្មីៗនេះមិនអាចបញ្ចុះបញ្ចូលជនភៀសខ្លួនប្រហែល៤០០នាក់ ដែលរស់នៅក្នុងសហគមន៍មួយឲ្យយល់ព្រមមកតាំងទីលំនៅថ្មីនៅប្រទេសកម្ពុជាបានឡើយ។
១ មេសា ២០១៥
តុលាការគ្រោងជំនុំជម្រះសំណុំរឿងឪពុកម្តាយលោក ថោង សារ៉ាត់

សាលាដំបូងរាជធានីភ្នំពេញ គ្រោងបើកសវនាការជំនុំជម្រះលើសំណុំរឿងឪពុកម្តាយលោក ថោង សារ៉ាត់ នៅថ្ងៃទី៣ ខែមេសាខាងមុខនេះ ក្រោមការចោទពីបទកាន់កាប់អាវុធខុសច្បាប់ ខណៈមន្រ្តីក្រសួងយុត្តិធម៌បង្ហើបឲ្យដឹងថា អធិការកិច្ចលើភាពមិនប្រក្រតីនៃសំណុំរឿងនៅក្រៅឃុំរបស់ជនជាប់ចោទទាំងពីរ មានលទ្ធផលខ្លះហើយ។ ឪពុកម្ដាយឧកញ៉ា ថោង សារ៉ាត់ មានលោក ថោង ចំរើន អាយុ ៦៣ ឆ្នាំ និងអ្នកស្រី កែវ សារី អាយុ ៥៥ ឆ្នាំ ត្រូវបានតុលាការរាជធានីសម្រេចចោទប្រកាន់ កាលពីថ្ងៃទី០៧ ខែធ្នូ ឆ្នាំ២០១៤ ក្រោមការចោទពីបទកាន់កាប់អាវុធខុសច្បាប់ តាមមាត្រា ៤៩០ នៃក្រមព្រហ្មទណ្ឌ ពាក់ព័ន្ធនឹងការរក្សាទុកនូវអាវុធវែងខ្លី ១១ដើម ដែលសមត្ថកិច្ចរឹបអូសបានពីភូមិគ្រឹះឧកញ៉ា ថោង សារ៉ាត់ ជាទីស្នាក់នៅអចិន្រៃ្តយ៍របស់ជនជាប់ចោទ។
១ មេសា ២០១៥
CCHR៖ អ្នកការពារសិទ្ធិមនុស្សស្ថិតក្នុងស្ថានភាពគ្រោះថ្នាក់

មជ្ឈមណ្ឌលសិទ្ធិមនុស្សកម្ពុជា(CCHR)ព្រមានថា អ្នកការពារសិទ្ធិមនុស្ស កំពុងស្ថិតក្នុងស្ថានភាពគ្រោះថ្នាក់ ដោយសាររដ្ឋាភិបាលព្រងើយកន្តើយ អនុវត្ត តាមស្មារតីរដ្ឋធម្មនុញ្ញ និងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ ។ មជ្ឈមណ្ឌលសិទ្ធិមនុស្សកម្ពុជា នៅថ្ងៃទី១ ខែមេសា ឆ្នាំ២០១៥នេះ បានចេញរបាយការណ៍អង្កេតកម្រាស់៣០ទំព័រ បង្ហាញថា ភាពស្ទាក់ស្ទើររបស់រាជរដ្ឋាភិបាលកម្ពុជា ក្នុងការជំរុញអនុវត្តច្បាប់ និងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិមនយោបាយ ធ្វើឲ្យអ្នការពារសិទ្ធិមនុស្សជាច្រើននៅកម្ពុជារងការគំរាមកំហែង និងការចាប់ខ្លួនតាមអំពើចិត្ត ។
១ មេសា ២០១៥
អង្គការសិទ្ធិមនុស្សព្រមានក្រុមហ៊ុនចិនមួយថា ប្រឈមមុខផ្លូវច្បាប់នៅថ្ងៃក្រោយ

សមាគមការពារសិទ្ធិមនុស្សអាដហុក ព្រមានក្រុមហ៊ុនចិនមួយនៅខេត្តកោះកុងថានឹងប្រឈមមុខផ្លូវច្បាប់ទៅថ្ងៃអនាគត បើការអនុវត្តគម្រោងរបស់ក្រុមហ៊ុននោះ នូវតែជាប់ពាក់ព័ន្ធនឹងការរំលោភសិទ្ធិមនុស្ស ។ ការព្រមាននេះ ធ្វើឡើងក្នុងសិក្ខាសាលាថ្នាក់ជាតិមួយក្នុងរាជធានីភ្នំពេញ កាលពីថ្ងៃទី៣១ ខែមិនា ឆ្នាំ២០១៥ ដែលមានពលរដ្ឋមានជម្លោះ តំណាងក្រុមហ៊ុន អាជ្ញាធរខេត្ត មន្ត្រីក្រសួងបរិស្ថាន និងក្រុមអង្គការឃ្លាំមើលការរំលោភសិទ្ធិមនុស្សចូលរួម ។ ក្នុងវេទិកានោះ អ្នកភូមិដែលមានជម្លោះដីធ្លីមកពីស្រុកបុទុមសាគរ និងគីរីសាគរ ខេត្តកោះកុង បានចោទប្រកាន់ក្រុមហ៊ុនចិន UNION DEVELOPMENT GRUP CO.Ltd ថាបានប្រើកម្លាំងចុះរុះរើ និងដុតផ្ទះពួកគេ មិនផ្តល់សំណងដោយអះអាងថា ដីទាំងនោះក្រុមហ៊ុនបានទទួលសិទ្ធិស្របច្បាប់ពីរដ្ឋាភិបាល សម្រាប់វិនិយោគ៩៩ឆ្នាំ លើទំហំដីជាង៣ម៉ឺនហិកតា ។
១ មេសា ២០១៥
ចំនួនស្រ្តីកម្ពុជាស្លាប់ពេលមានផ្ទៃពោះនិងឆ្លងទន្លេនៅតែខ្ពស់ក្នុងតំបន់
១ មេសា ២០១៥
អង្គការលីកាដូរកឃើញដីសម្បទានមានចំនួន ២៧២ កន្លែង

អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) អំពាវនាវជាថ្មីឲ្យរាជរដ្ឋាភិបាលបង្ហាញឲ្យបានពេញលេញនូវចំនួន ដីសម្បទានទាំងអស់ ដែលត្រូវបានផ្តល់ទៅឲ្យក្រុមហ៊ុនឯកជន ខណៈដែលអង្គការនេះបានរកឃើញថា ដីសម្បទានទំហំជាង ២ លានហិកតានៃដីសម្បទាន ២៧២ កន្លែងស្ថិតនៅក្រោមការគ្រប់គ្រងរបស់ក្រុមហ៊ុនក្នុងស្រុក និងបរទេស។
១ មេសា ២០១៥
ម.ស.ម.ក អំពាវនាវឲ្យបញ្ឈប់ការឈូសឆាយដី ក្នងជម្លោះរវាងអ្នកភូមិជនជាតិដើមភាគតិច និងក្រុមហ៊ុនកៅស៊ូនៅខេត្តមណ្ឌលគិរី

យោងតាមប្រជាពលរដ្ឋជនជាតិដើមភាគតិចពូនង រស់នៅក្នុងភូមិចក់ចារ ស្រុកកែវសីមា ខេត្តមណ្ឌលគិរី បានឲ្យដឹងថា នៅថ្ងៃទី៣១ ខែមីនា ឆ្នាំ២០១៥ មានកម្មកររបស់ក្រុមហ៊ុនចម្ការកៅស៊ូវៀតណាម ប៊ិញ ភឿក ១ ដែលអមដោយមន្ត្រីនគរបាលប្រដាប់ដោយអាវុធ និងមន្រ្តីអាវុធហត្ថ ប្រហែល៩០នាក់ មានឡានបាញ់ទឹក បានឈូសឆាយបំផ្លាញដីចម្ការរបស់សហគមន៍ និងខ្ទមជាង ១៧០។ ការកាប់ឆ្ការដីនេះកើតឡើងក្នុងអំឡុងជម្លោះដ៏រ៉ាំរ៉ៃលើដីសម្បទានសេដ្ឋកិច្ចដែលក្រុមហ៊ុនទទូលបានកាលពីឆ្នាំ២០១២។ មកទល់ពេលនេះកងកម្លាំងសន្តិសុខនៅមានវត្តមាននៅក្នុងតំបន់នោះនៅឡើយ អ្នកភូមិបាននិយាយថាពួកគាត់នឹងតបតចំពោះការឈូសឆាយដីដែលអាចនឹងកើតមានម្តងទៀត។
អានបន្ត
១ មេសា ២០១៥
សង្គមស៊ីវិលស្នើបក្សទាំងពីរដាក់សមាសភាពស្ត្រីទៅក្នុង គជប ថ្មី

អង្គការសង្គមស៊ីវិល និងបណ្តាញស្រី ស្នើគណៈកម្មាធិការអចិន្ត្រៃយ៍នៃរដ្ឋសភាជាតិ និងតំណាងរាស្ត្រនៃគណបក្សជាប់ឆ្នោតទាំងពីរ ដាក់សមាភាពស្រី្តទៅក្នុង គជប ថ្មី ឲ្យមានសមភាពយេនឌ័រ ។ ការស្នើនេះ ស្របពេលដែលអគ្គលេខាធិការដ្ឋានរដ្ឋសភាកំពុងទទួលពាក្យបេក្ខជន និងបេក្ខនារីធ្វើជាសមាជិកគណៈកម្មាធិកាជាតិរៀបចំការបោះឆ្នោតថ្មី ដែលគ្រោងប្រកាសសុពលភាពនៅមុនថ្ងៃចូលឆ្នាំខ្មែរ ។ សេចក្តីថ្លែងការណ៍រួមរបស់សង្គមស៊ីវិលដែលធ្វើការលើកស្ទួយស្រី្ត ចេញផ្សាយម្សិលមិញនេះ ឲ្យដឹងថា សមភាពយេនឌ័រ គឺជាវិធានការផ្តល់យុត្តិធម៌សង្គម និងអភិវឌ្ឍន៍ប្រកបដោយចីរភាព ។ សេចក្តីថ្លែងការណ៍បន្តថា បើប្រធានគណៈកម្មាធិកាជាតិរៀបចំការបោះឆ្នោតជាស្រី្ត ឬបុរស អនុប្រធានត្រូវតែជាភេទផ្ទុយ ។ ចំណែកសមាជិក៤រូប នៃ គជប ដែលត្រូវជ្រើសរើសដោយគណបក្សនយោបាយនីមួយៗ ត្រូវតែមានស្រី្តយ៉ាងតិច១រូបទៅ២រូប។