កំពុងស្វែងរកទិន្នន័យ
រកឃើញ: 13.090
-
លោក សម រង្សុី សន្យាដោះស្រាយបញ្ហាដីធ្លីជូនជនជាតិដើមភាគតិចនៅរតនៈគិរី
ប្រធានគណបក្សសង្គ្រោះជាតិលោក សម រង្សុី នៅថ្ងៃអាទិត្យនេះ បានសន្យាថានឹងលើកយកបញ្ហាដីធ្លីរបស់ជនជាតិដើមភាគតិចនៅក្នុងខេត្តរតនគិរី ទៅពិភាក្សាជាមួយថ្នាក់ដឹកនាំគណបក្សកាន់អំណាច ដើម្បីរកដំណោះស្រាយជូនប្រជាពលរដ្ឋ ។ ការសន្យានេះធ្វើឡើងនៅក្នុងពិធីជួបសំណេះសំណាលជាមួយប្រជាពលរដ្ឋនៅសង្កាត់បឹងកន្សែង ក្រុងបានលុង ខេត្តរតនគិរី នៅថ្ងៃអាទិត្យនេះ ដែលមានអ្នកចូលរួមប្រមាណជាង៣០០នាក់ ។ ប្រជាពលរដ្ឋដែលបានចូលរួមវេទិកាសាធារណៈនេះបានប្រគល់ញត្តិមួយចំនួនទៅកាន់លោក សម រង្សុី ដើម្បីឲ្យលោកជួយរកដំណោះស្រាយបញ្ហាដីធ្លីឲ្យពួកគេ ។ ជាការឆ្លើយតប លោក សម រង្ស៊ី បានសន្យាថានឹងយកបញ្ហាដីធ្លីរបស់ប្រជាពលរដ្ឋទៅពិភាក្សាជាមួយគណៈកម្មការជំនាញនៃរដ្ឋសភា និងថ្នាក់ដឹកនាំរដ្ឋាភិបាលដើម្បីរកដំណោះស្រាយរួមគ្នា ។
-
វេបសាយក្រុមកាហ្វេនយោបាយ ដាក់ដំណើរជាផ្លូវការដើម្បីឲ្យយុវជនពិភាក្សាពីបញ្ហាសង្គម និងនយោបាយ
ក្រុមយុវជនធ្វើការលើកិច្ចការសង្គមនៅថ្ងៃសៅរ៍នេះដាក់ឲ្យដំណើរការវេបសាយក្រុមកាហ្វេនយោបាយ (www.politikoffee.com) ដើម្បីឲ្យយុវជនចាប់អារម្មណ៍ពិភាក្សាដេញដោលលើកិច្ចការសង្គម និងនយោបាយ ដែលជាប្រយោជន៍ប្រទេសជាតិ។ ក្នុងសន្និសីទសារព័ត៌មាននៅថ្ងៃដាក់ឲ្យដំណើរការវេបសាយក្រុមកាហ្វេនយោបាយ (www.politikoffee.com) នៅថ្ងៃទី២៤ ខែមករានេះ ស្ថាបនិកកាហ្វេនយោបាយលោក អ៊ូ រិទ្ធី មានប្រសាសន៍ថា យុវជនភាគច្រើនទទួលទានគ្រឿងស្រវឹង មិនចាប់អារម្មណ៍ក្នុងកិច្ចការសង្គម ដែលធ្វើឲ្យក្រុមយុវជនរបស់លោក ចាប់ផ្តើមពិភាក្សា បង្កើតវេបសាយនេះ ដើម្បីឲ្យយុវជនបានបញ្ចេញមតិយោបល់ និងសរសេរអត្ថបទមកកាន់វេបសាយនេះ។
-
យុវជនចង់ឲ្យអ្នកនយោបាយជជែកដេញដោលគ្នាជាសាធារណៈ
យុវជនមួយក្រុមមានមហិច្ឆតា ចង់ឲ្យអ្នកនយោបាយជជែកដេញដោលគ្នាជាសាធារណៈ ក្នុងការបោះឆ្នោតឆ្នាំ២០១៨ ខាងមុខ។ នេះជាបំណងរបស់វេទិកាយុវជនមួយ ឈ្មោះថា កាហ្វេនយោបាយ។ ក្រុមយុវជនទាំងនេះ រំពឹងថា ពួកគេនឹងអាចជំរុញឲ្យអ្នកនយោបាយ ពីគ្រប់មជ្ឈដ្ឋានលុបបំបាត់វប្បធម៌ឃោសនាបែបប្រជាភិថុតិ ហើយបែរមកជជែកដេញដោលគ្នាពីលទ្ធភាពក្នុងការដោះស្រាយបញ្ហាជាតិវិញ។
-
កម្មករនៅខណ្ឌពោធិ៍សែនជ័យ តវ៉ាទាមទារឲ្យរោងចក្រផ្តល់ប្រាក់អត្ថប្រយោជន៍
កម្មករប្រមាណ៣០០នាក់ មកពីរោងចក្រកាត់ដេរស៊ិនជាដាក្នុងសង្កាត់ចោមចៅ ខណ្ឌពោធិ៍សែនជ័យ នៅព្រឹកថ្ងៃព្រហស្បតិ៍នេះ តវ៉ានៅខាងមុខរោងចក្រ ដោយទាមទារឲ្យភាគីរោងចក្រគោរពលក្ខខណ្ឌការងារមួយចំនួន និងទាមទារឲ្យផ្តល់ប្រាក់អត្ថប្រយោជន៍ដល់កម្មករ។ ប្រធានស្តីទីសហព័ន្ធសហជីពជាតិនៃឧស្សាហកម្មវាយនភណ្ឌកាត់ដេរកម្ពុជា អ្នកស្រី កេង ឆេងឡាង បានប្រាប់VODថាកម្មករចង់ឲ្យភាគីខាងរោងចក្រដោះស្រាយបញ្ហាដូចជាផ្តល់ឲ្យស្ត្រីមានផ្ទៃពោះពិនិត្យសុខភាពទៀង ទាត់ បើកប្រាក់បំណាច់ឆ្នាំប្រាក់៥ភាគរយ និងមិនត្រូវបង្ខំកម្មករឲ្យធ្វើការថែមម៉ោង។ អ្នកស្រីបន្តថា កម្មករក៏បានស្នើឲ្យភាគីរោងចក្រផ្តល់នូវប្រាក់អត្ថប្រយោជន៍ រួមមានប្រាក់ធ្វើដំណើរ និងប្រាក់រង្វាន់ទៀងទាត់ជាដើម។
អានបន្ត -
លោក ស៊ូប៊ែឌី ចូលរួមឃ្លាំមើលសវនាការសាលាឧទ្ធរណ៍ករណីស្ត្រីសកម្មជនដីធ្លី
អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា លោក សុរិយា ស៊ូប៊ែឌី នៅរសៀលថ្ងៃព្រហស្បតិ៍នេះ ចូលរួមតាមដានស្ដាប់សវនាការនៅសាលាឧទ្ធរណ៍ លើបណ្ដឹងសារទុក្ខរបស់ស្ត្រីសកម្មជនដីធ្លីទាំង១០នាក់ និងព្រះសង្ឃមួយអង្គ ។ សាលាឧទ្ធរណ៍នៅរសៀលថ្ងៃព្រហស្បតិ៍នេះ បើកសវនាការដើម្បីជំនុំជម្រះលើករណីបណ្ដឹងសាទុក្ខរបស់ស្ត្រីសកម្មជនដីធ្លី១០នាក់ និងព្រះសង្ឃ១អង្គ ដែលបានប្ដឹងទាស់ទៅនឹងសាលក្រមរបស់សាលាដំបូងរាជធានីភ្នំពេញ កាត់ទោសឲ្យពួកគេឲ្យជាប់ពន្ធនាគារម្នាក់១ឆ្នាំ ចោទថាតវ៉ាបិទផ្លូវធ្វើឲ្យកកស្ទះចរាចរណ៍សាធារណៈ ។ ក្រៅពីលោក សូប៊ែឌី គេក៏សង្កេតឃើញមានតំណាងទូត តំណាងរាស្ត្រគណបក្សសង្គ្រោះជាតិ មន្ត្រីអង្គការសិទ្ធិមនុស្សមួយចំនួន ព្រមទាំងសកម្មជនដីធ្លី និងព្រះសង្ឃប្រមាណ២០០អង្គ/នាក់ ចូលរួមស្ដាប់សវនាការនារសៀលនេះផងដែរ ។
-
ចៅក្រមនិងព្រះរាជអាជ្ញាចំនួន១៧នាក់ត្រូវបានតែងតាំងនិងផ្ទេរមុខតំណែងថ្មី
17 judges and prosecutors from the Ministry of Justice and the court of first instance were appointed and transferred.
-
ចៅក្រមនិងព្រះរាជអាជ្ញាចំនួន១៧នាក់ត្រូវបានតែងតាំងនិងផ្ទេរមុខតំណែងថ្មី
យោងតាមលទ្ធផលនៃកិច្ចប្រជុំពេញអង្គលើកទី២៥ កាលពីថ្ងៃទី២១ ខែមករា ឆ្នាំ២០១៥ របស់ឧត្តមក្រុមប្រឹក្សានៃអង្គចៅក្រម គឺចៅក្រមនិងព្រះរាជអាជ្ញាកំពុងបម្រើការងារនៅតាមបណ្តាសាលាជម្រះក្តី និងក្រសួងយុត្តិធម៌ចំនួន១៧នាក់ ត្រូវបានតែងតាំង និងផ្ទេរមុខតំណែងថ្មី ដោយព្រះរាជក្រឹត្យលេខនស/រកត/០១១៥/០៨៨ ចុះថ្ងៃទី២២ ខែមករា ឆ្នាំ២០១៥ ដូចតទៅ ៖
-
បក្សប្រឆាំងជំរុញឲ្យដោះលែងសកម្មជន១៩នាក់ដែលខ្លួនយល់ថាឃុំក្រោមឥទ្ធិពលនយោបាយ
មេដឹកនាំបក្សប្រឆាំង ជំរុញម្តងទៀត នៅថ្ងៃព្រហស្បតិ៍នេះ ឲ្យតុលាការពិចារណាដោះលែងសកម្មជន១៩នាក់ដែលរដ្ឋាភិបាលចាប់ឃុំខ្លួនក្នុងពន្ធនាគារព្រៃសនោះ ដោយអះអាងថា វិធានការចាប់ខ្លួននោះជារឿងនយោបាយ។ ការជំរុញនេះ ធ្វើឡើងបន្ទាប់ពីមេបក្សឆាំងទាំងពីរ គឺលោក សម សង្ស៊ី និងលោក កឹម សុខា រួមទាំងតំណាងរាស្ត្រមួយចំនួនទៀត បានចូលសួរសុខទុក្ខសកម្មជនដីធ្លី និងសកម្មនយោបាយរបស់ខ្លួនដែលកំពុងឃុំខ្លួនក្នុងពន្ធនាគារព្រៃស នៅថ្ងៃទី២២ខែមករាឆ្នាំ២០១៥នេះ។ អនុប្រធានគណបក្សសង្គ្រោះជាតិ លោក កឹម សុខា ប្រាប់អ្នកសារព័ត៌មានថា ការឃុំខ្លួនសកម្មជនទាំងនោះ ជារឿងនយោបាយ ដូចនេះ លោកជឿថា តុលាការនឹងពិចារណាដោះលែង អ្នកទាំងនោះឲ្យមានសេរីភាពវិញ។ លោកមានប្រសាសន៍ថា «យើងយល់ឃើញថា រឿងនេះគឺរឿងនយោបាយ អ៊ីចឹងទាល់តែនយោបាយមានភាពស្រុះស្រួលណាមួយទៀត យើងជឿថានឹងមានការដោះលែង» ។
អានបន្ត -
លោក ស៊ូប៊ែឌី ជំរុញរដ្ឋាភិបាលកម្ពុជាបន្តដោះស្រាយបញ្ហាដីសម្បទានសេដ្ឋកិច្ច
អ្នករាយការណ៍ពិសេសអង្គការសហប្រជាជាតិទទួលបន្ទុកលើបញ្ហាសិទ្ធិមនុស្សនៅកម្ពុជា លោក សូរិយា ស៊ូប៊ែឌី ជំរុញរដ្ឋាភិបាលកម្ពុជាបន្តដោះស្រាយបញ្ហាដីសម្បទានសេដ្ឋកិច្ច ដើម្បីធានាកុំឲ្យមានការរំលោភសិទ្ធិប្រជាពលរដ្ឋដែលរងផលប៉ះពាល់។ លោក សូរិយា ស៊ូប៊ែឌី បានលើកឡើងបែបនេះ បន្ទាប់ពីលោកបានជួបជាមួយប្រធានសភាពាណិជ្ជកម្មកម្ពុជា លោក គិត ម៉េង នៅថ្ងៃព្រហស្បតិ៍នេះ ដើម្បីសិក្សាពីផលប៉ះពាល់នៃការអភិវឌ្ឍ និងបញ្ហាសិទ្ធិមនុស្ស។
-
ប្រជាពលរដ្ឋមានជម្លោះដីធ្លីមកពីខេត្តព្រះវិហារ ព្រមានបោះតង់នៅមុខរដ្ឋសភាដើម្បីរកអន្តរាគមន៍
អ្នកមានជម្លោះដីធ្លីមកពីស្រុកជាំក្សាន្ត ខេត្តព្រះវិហារ ប្រមាណ៧០នាក់គំរាមបោះតង់ស្នាក់នៅមុខរដ្ឋសភា ដើម្បីជំរុញឲ្យស្ថាប័នកំពូលមួយនេះ ជួយអន្តរាគមន៍ឲ្យពួកគេបានរស់នៅកន្លែងដើមវិញ បន្ទាប់ពីសមត្ថកិច្ចឈូសឆាយលំនៅដ្ឋានកាលពីឆ្នាំ២០១១នោះ ។ នៅព្រឹកថ្ងៃពុធនេះ ប្រជាពលរដ្ឋប្រមាណ៧០នាក់ដែលអះអាងតំណាងឲ្យ២៥៥គ្រួសារមកពីភូមិស្វាយជ្រំ ឃុំកន្ទួត ស្រុកជាំក្សាន្ត ខេត្តព្រះវិហារបានយកញត្តិដាក់ជូនរដ្ឋសភាជាថ្មីឲ្យជួយដោះស្រាយជម្លោះដីធ្លីរបស់ពួកគេ ។ អ្នកស្រី ជិន សុហេង ដែលអះអាងជាតំណាងពលរដ្ឋថ្លែងពេលដាក់ញត្តិថា ពួកគាត់បានយកញត្តិមកដាក់រដ្ឋសភាជាច្រើនដង ប៉ុន្តែនៅតែមិនទាន់មានដំណោះស្រាយ ។ អ្នកស្រីអំពាវនាមឲ្យរដ្ឋសភាពន្លឿនការដោះស្រាយបញ្ហាដីធ្លីពួកគាត់ឲ្យបានឆាប់ ប្រសិនបើមិនដូច្នោះទេពួកគាត់ទាំង២៥៥គ្រួសារ នឹងនាំគ្នាបោះតង់នៅមុខរដ្ឋសភា ។
-
មន្រ្តីអះអាងថារដ្ឋាភិបាលមិនទាន់ពិចារណាដាក់ទោសទណ្ឌក្រុមហ៊ុនសម្បទានដីសេដ្ឋកិច្ចដែលត្រូវដកហូតដី
មន្រ្តីក្រសួងកសិកម្ម នៅថ្ងៃពុធនេះ ឲ្យដឹងថាក្រសួងក៏ដូចជារដ្ឋាភិបាលមិនទាន់ពិចារណាក្នុងការដាក់ទណ្ឌកម្មទៅលើក្រុមហ៊ុនដែលទទួលបានដីសម្បទានសេដ្ឋកិច្ច តែមិនគោរពតាមគោលការណ៍នៅឡើយទេ ដោយលោកចាត់ទុកថាការដកដីសម្បទានពីក្រុមហ៊ុនមកវិញជាវិធានការសមរម្យណាស់ទៅហើយ។ អនុរដ្ឋលេខាធិកាក្រសួងកសិកម្ម រុក្ខាប្រមាញ់ និងនេសាទ លោក អ៊ាង សុផល្លែត មានប្រសាសន៍បែបនេះនៅក្នុងសន្និសីទសារព័ត៌មានដែលរដ្ឋាភិបាលប្រកាសដកហូតដីសម្បទានសេដ្ឋកិច្ចពីក្រុមហ៊ុនចំនួន៧ក្នុងខេត្តស្ទឹងត្រែង ក្នុងទំហំដីជាង១០ម៉ឺនហិកតា ដែលក្នុងនោះមានការដកហូតដីទាំងស្រុង និងការកែសម្រួលដី។
-
ពលរដ្ឋខណ្ឌដង្កោកំពុងរស់នៅក្រោមតង់ ព្រួយបារម្ភពីសុវត្ថិភាពបន្ទាប់ពីអាជ្ញាធរចុះរុះរើផ្ទះពួកគេ
ប្រជាពលរដ្ឋរស់នៅខណ្ឌដង្កោ១៩គ្រួសារកំពុងរស់ក្រោមតង់ នៅថ្ងៃពុធនេះបង្ហាញការព្រួយបារម្ភពីសុវត្ថិភាព បន្ទាប់ពីអាជ្ញាធរខណ្ឌបានចុះរុះរើផ្ទះរបស់ពួកគេកាលពីដើមខែមករា ឆ្នាំ២០១៥ ។ កាលពីថ្ងៃទី៥ ខែមករា ឆ្នាំ២០១៥ អភិបាលរងខណ្ឌដង្កោ លោក ប្រាជ្ញ សីហា បានដឹកនាំកម្លាំងចម្រុះប្រមាណជាង១០០នាក់ ប្រដាប់ដោយអាវុធ ដំបង និងគ្រឿងចក្រកម្ទេចផ្ទះរបស់ប្រជាពលរដ្ឋនៅតំបន់នោះ ព្រមទំាងបំផ្លាញសម្ភារប្រើប្រាស់ ដោយមិនបានជូនដំណឹងជាមុន និងមិនបានបង្ហាញពីលិខិតរុះរើ ដោយចោទពួកគាត់ថាសង់សំណង់អាណាធិបតេយ្យនៅលើដីរបស់រដ្ឋ ។
-
អ្នកភូមិខ្វា១៩គ្រួសារចោទអាជ្ញាធរខណ្ឌដង្កោថាឈូសបំផ្លាញផ្ទះនិងប្លន់ដី
ពលរដ្ឋភូមិខ្វា សង្កាត់ដង្កោ ខណ្ឌដង្កោ ចោទអាជ្ញាធរថាឈូសបំផ្លាញផ្ទះ ១១ខ្នងដែលពួកគាត់បានតាំងទីលំនៅក្នុងភូមិនោះប្រមាណជាង ៣០ឆ្នាំមកហើយ ដើម្បីប្រកបរបរដាំត្រកួន កញ្ឆែត ជាដើម។ ការចោទនេះ បានធ្វើឡើងក្នុងសន្និសីទសារព័ត៌មានកន្លែងដែលមានផ្ទះ និងដើមឈើរលំ ដោយសារគ្រឿងចក្រឈូសឆាយផ្ទះពួកគាត់ កាលពីព្រឹកថ្ងៃទី២១ ខែមករា ឆ្នាំ២០១៥។ អ្នកភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ក្មេងចាស់ប្រុសស្រីប្រមាណ ៣០នាក់ បានលើកបដាទាមទាររស់នៅលើដីរបស់ខ្លួនឡើងវិញ ទាមទារឲ្យបញ្ឈប់ការបណ្ដេញចេញ និងទាមទារឲ្យគោរពសិទ្ធិមនុស្ស ជាដើម។ ក្រៅពីនោះ ពួកគេបានលើកបង្ហាញសិទ្ធិរស់នៅស្របច្បាប់ ដូចជាប័ណ្ណសម្គាល់អចលនទ្រព្យ អត្តសញ្ញាណប័ណ្ណជនជាតិខ្មែរ សៀវភៅស្នាក់នៅ និងសៀវភៅគ្រួសារ។
-
សហជីពសេរីកម្មករប្រារព្ធខួប១១ឆ្នាំនៃការបាញ់សម្លាប់វីរជនកម្មករ លោក ជា វិជ្ជា
សហជីពសេរីកម្មករនៃព្រះរាជាណាចក្រកម្ពុជាដែលដឹកនាំដោយលោក ជា មុនី នៅព្រឹកថ្ងៃព្រហស្បតិ៍នេះ រៀបចំពិធីគោរពវិញ្ញាណក្ខន្ធសពវីរជនកម្មករ លោក ជា វិជ្ជា គម្រប់១១ឆ្នាំ នៃការបាញ់សម្លាប់កាលពីឆ្នាំ២០០៤។ ការប្រារព្ធពិធីនេះនឹងត្រូវធ្វើឡើងនៅផ្លូវច្រមុះជ្រូកខាងលិចវិមានឯករាជ្យ និងខាងត្បូងវត្តលង្ការ រាជធានីភ្នំពេញ ដែលនឹងមានកម្មកររាប់រយនាក់ចូលរួម និងការចូលរួមពីថ្នាក់ដឹកនាំរបស់គណបក្សសង្គ្រោះជាតិ លោក សម រង្ស៊ី និងលោក កឹម សុខា។ សាលារាជធានីភ្នំពេញបានអនុញ្ញាតឲ្យមានការប្រារព្ធពិធីនេះ ប៉ុន្តែហាមមិនឲ្យយកពិធីជួបជុំនេះទៅបម្រើអាជីវកម្មនយោបាយ និងរិះគន់ទៅលើថ្នាក់ដឹកនាំរាជរដ្ឋាភិបាល។ សាលារាជធានីក៏បានហាមមិនឲ្យហែក្បួនផងដែរ។
-
អាជ្ញាធរនៅតែរារាំងមិនឲ្យសហគមន៍ដីធ្លីធ្វើបាតុកម្មនៅទីលានប្រជាធិបតេយ្យ
ប៉ូលិស និងកងសន្តិសុខខណ្ឌដូនពេញ ប្រមាណ ៥០នាក់ បានស្ទាក់ក្រុមស្ត្រីជាបាតុករមកពីសហគមន៍ដីធ្លីចំនួនបួន មិនឲ្យចូលទីលានប្រជាធិបតេយ្យនៅព្រឹកថ្ងៃទី២១ មករា។ កងកម្លាំងអាជ្ញាធរ បានប្រើរថយន្តពីរគ្រឿងរាំងខ្ទប់ក្រុមស្ត្រីមកពីសមាគមស្ត្រីបឹងកក់ បណ្ដាញអតីតស្ត្រីបឹងកក់ បុរីកីឡា ៣មករា និងសហគមន៍ អេស.អូ.អេស (SOS) ព្រលានយន្តហោះអន្តរជាតិ សរុបប្រមាណ ៥០នាក់ ខណៈដែលពួកគាត់បានដើរហែក្បួនពីមុខស្ថានទូតសហរដ្ឋអាមេរិក មកដល់ទីលានប្រជាធិបតេយ្យហើយនោះ។ អ្នកដឹកនាំគម្រោងបាតុកម្ម និងជាតំណាងសមាគមស្ត្រីបឹងកក់ អ្នកស្រី យ៉ោម បុប្ផា ថ្លែងថា ទីលានប្រជាធិបតេយ្យមានតែឈ្មោះសម្រាប់បំភ័ន្តសាធារណជនជាតិ និងអន្តរជាតិប៉ុណ្ណោះ៖ «បើកទីលានប្រជាធិបតេយ្យ តាមពិតមិនមែនទេ បើកចំហបើកបន្លាលួស ដកបន្លាលួសចេញមែន ប៉ុន្តែប្រជាពលរដ្ឋនៅតែមិនមានសិទ្ធិចូលទៅក្នុងទីលានហ្នឹងនៅឡើយទេ។ បានន័យថា ស្ថានភាពនយោបាយនៅក្នុងប្រទេសកម្ពុជា នៅតែមានការតានតឹងនៅឡើយ អត់ទាន់មានការធូរស្រាលទេ ចា៎!»។
-
វារីអគ្គិសនីក្រុមហ៊ុនចិននៅឧត្ដរមានជ័យប៉ះពាល់ប្រាសាទ ព្រៃសហគមន៍ និងពលរដ្ឋ១៥០គ្រួសារ
ប្រជាពលរដ្ឋប្រហែល១៥០គ្រួសារនៅស្រុកចុងកាល់ ខេត្ដឧត្ដរមានជ័យ រកអន្ដរាគមន៍បញ្ឈប់ការសាងសង់ទំនប់វារីអគ្គិសនីរបស់ក្រុមហ៊ុនចិនមួយ ដោយពលរដ្ឋលើកឡើងថាធ្វើឲ្យប៉ះពាល់ដល់ការរស់នៅរបស់ពួកគេ និងដំណាំរាប់ពាន់ហិកតា ។ តំណាងពលរដ្ឋនៅឃុំពង្រ ស្រុកចុងកាល់ ខេត្ដឧត្ដរមានជ័យ លោក លឹម ដូក ឲ្យដឹងថានៅថ្ងៃ២០ ខែមករា លោកបានដាក់ពាក្យបណ្ដឹងទៅសមាគមអាដហុកខេត្តឧត្តរមានជ័យ ដើម្បីឲ្យជួយអន្តរាគមន៍ទប់ស្កាត់ការសាង់សង់ទំនប់វារីអគ្គិសនីរបស់ក្រុមហ៊ុនចិនស៊ីណូហៃដ្រូ ដែលទំនប់នោះនឹងធ្វើឲ្យប៉ះពាល់ដល់ផលដំណាំ និងទីលំនៅរបស់ប្រជាពលរដ្ឋប្រមាណ១៥០គ្រួសារ នៅផ្នែកខាងលើទំនប់វារីអគ្គិសនីនោះ ។
-
លោក ស៊ូប៊ែឌី លើកបញ្ហានិទណ្ឌភាពក្នុងករណីបាញ់សម្លាប់កម្មករនៅផ្លូវវ៉េងស្រេងទៅលោក ស ខេង
អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជាលោក សូរិយា ប្រាសាទស៊ូប៊ែឌី បានលើកឡើងពីបញ្ហានិទណ្ឌភាពក្នុងករណីបាញ់សម្លាប់កម្មករនៅផ្លូវវ៉េងស្រេង កាលពីដើមខែមករា ឆ្នាំ២០១៤ ទៅពិភាក្សាជាមួយរដ្ឋមន្ត្រីក្រសួងមហាផ្ទៃ ។ ថ្លែងទៅកាន់អ្នកសារព័ត៌មានបន្ទាប់ពីចូលជួបជាមួយលោក ស ខេង រដ្ឋមន្ត្រីក្រសួងមហាផ្ទៃ នៅរសៀលថ្ងៃពុធនេះ លោក ស៊ូប៊ែឌី មានប្រសាសន៍ថា លោកបានសាកសួរទៅកាន់លោក ស ខេង ពីការវិវឌ្ឍនៃការស៊ើបអង្កេតលើករណីហិង្សានៅផ្លូវវ៉េងស្រេងកាលពីដើមខែមករា ឆ្នាំ២០១៤ ដែលបានសម្លាប់មនុស្ស៥នាក់ និងមួយចំនួនទៀតរងរបួស ។ លោក ស៊ូប៊ែឌី មិនបានបញ្ជាក់ពីការឆ្លើយតបរបស់លោក ស ខេង យ៉ាងណាទេ តែលោកថាលោកមានការពេញចិត្តនឹងលទ្ធផលនៃកិច្ចប្រជុំជាមួយលោក ស ខេង នៅថ្ងៃនេះ ដោយលោកអះអាងថា លោកទទួលបានការឆ្លើយតបដែលមានភាពស្មោះត្រង់ ហើយរដ្ឋមន្ត្រីក្រសួងមហាផ្ទៃបានផ្ដល់នូវព័ត៌មានមានសារៈប្រយោជន៍មួយចំនួនដល់លោក ហើយលោកនឹងបន្តធ្វើការជាមួយព័ត៌មានទាំងនេះបន្តទៀត ។
-
ពលរដ្ឋមានជម្លោះដីធ្លីមកពីព្រះវិហារជំរុញរដ្ឋសភាជាថ្មីឲ្យពន្លឿនកិច្ចអន្តរាគមន៍ទៅរដ្ឋាភិបាល
ប្រជាពលរដ្ឋមានជម្លោះដីធ្លីមកពីខេត្តព្រះវិហារប្រមាណ១០០នាក់ នៅព្រឹកថ្ងៃពុធនេះ ស្វែងរកអន្តរាគមន៍ជាថ្មីម្ដងទៀត នៅមុខរដ្ឋសភាដើម្បីស្នើឲ្យស្ថាប័ននេះ ជំរុញទៅរដ្ឋាភិបាលពន្លឿនដោះស្រាយទំនាស់ដីធ្លីជាមួយអាជ្ញាធរខេត្តដែលអូសបន្លាយជាង៣ឆ្នាំមកហើយ ។ តំណាងពលរដ្ឋម្នាក់លោក ផាន់ ធឿន ប្រាប់VODនៅព្រឹកថ្ងៃពុធនេះថា ពលរដ្ឋមានជម្លោះដីធ្លីមកពីភូមិស្វាយជ្រំ ឃុំកន្ទួត ស្រុកជាំក្សាន្ត ប្រមាណ១០០នាក់ដែលមានទំនាស់ដីធ្លីជាមួយអាជ្ញាធរខេត្តតាំងពីដើមឆ្នាំ២០១២ នាំគ្នាដាក់ញត្តិទៅរដ្ឋសភាជាថ្មីម្ដងទៀត ដើម្បីជំរុញឲ្យពន្លឿនរកដំណោះស្រាយឲ្យពួកគេ ។ លោក ផាន់ ធឿន ឲ្យដឹងថា ប្រជាពលរដ្ឋបានដាក់ញត្តិទៅរដ្ឋសភាដើម្បីស្វែងរកអន្តរាគមន៍ជាច្រើនលើកច្រើនសារហើយ តែនៅគ្មានដំណោះស្រាយ ។ បច្ចុប្បន្នពលរដ្ឋមានជម្លោះដីធ្លីមកពីខេត្តព្រះវិហារជាង១០០នាក់ កំពុងស្នាក់នៅវត្តសាមគ្គីរង្សី ដើម្បីរង់ចាំដំណោះស្រាយ ។
-
ប្រជាសហគមន៍ដូរកន្លែងប្រមូលផ្តុំ ដោយសារកម្លាំងប្រដាប់អាវុធយាមតឹងរ៉ឺងនៅទីលានប្រជាធិបតេយ្យ
ប្រជាសហគមន៍មានជម្លោះដីធ្លីក្នុងរាជធានីភ្នំពេញ ដូរទីកន្លែងប្រមូលផ្តុំនៅព្រឹកនេះ ពីទីលានប្រជាធិបតេយ្យទៅមុខស្ថានទូតសហរដ្ឋអាមេរិកវិញ ខណៈកម្លាំងសមត្ថកិច្ចប្រដាប់ដោយខែល និងដំបងឆក់យាមកាមតឹងរ៉ឹងនៅទីលានប្រជាធិបតេយ្យ ។ តាមគម្រោងនៅថ្ងៃព្រឹកថ្ងៃទី២០ ខែមករា ឆ្នាំ២០១៥នេះ ប្រជាហសហគមន៍ បុរីកីឡា (៣មករា) សហគមន៍SOSព្រលានយន្តហោះអន្តរជាតិ សហគមន៍បណ្តាញបឹងកក់អ្នកចាកចេញ និងសមាគមស្ត្រីបឹងកក់ នឹងតវ៉ានៅទីលានប្រជាធិបតេយ្យ ដើម្បីទាមទារឲ្យមានការដំណោះស្រាយបញ្ហាពួកគេ និងទាមទារឲ្យមានការដោះលែងសកម្មជនដីធ្លី សកម្មជននយោបាយ និងព្រះសង្ឃ ។ តែនៅព្រឹកនេះ នៅពេលពលរដ្ឋធ្វើដំណើរទៅកាន់ទីលានប្រជាធិបតេយ្យ ក៏មានកម្លាំងសមត្ថកិច្ចចម្រុះប្រមាណ៥០នាក់ប្រដាប់ដោយខែល និងដំបងឆក់ យាមកាមតឹងរ៉ឹងនៅទីនោះ ទើបប្រជាសហគមន៍ដែលមានជម្លោះដីធ្លីប្រមាណ៥០នាក់ដែរនោះ បានដូរទីតាំងនៃការជួបជុំទៅមុខស្ថានទូតអាមេរិកនៅក្បែរវត្តភ្នំវិញ ។
-
សមត្ថកិច្ចរារាំងមិនឲ្យសកម្មជនដីធ្លីនិងសិទ្ធិមនុស្សធ្វើបាតុកម្មនៅទីលានប្រជាធិបតេយ្យ
កងកម្លាំងអាជ្ញាធររាជធានីភ្នំពេញ ប្រមាណ ១០០នាក់ ប្រដាប់ដោយដំបង និងខែល រារាំងប្រជាពលរដ្ឋសហគមន៍ដីធ្លី ព្រះសង្ឃ និងសកម្មជននយោបាយប្រមាណ ១០០នាក់ មិនឲ្យប្រមូលផ្ដុំធ្វើបាតុកម្មនៅទីលានប្រជាធិបតេយ្យ នៅព្រឹកថ្ងៃទី២០ មករា។ ពលរដ្ឋសហគមន៍ដីធ្លីបឹងកក់ បុរីកីឡា ៣មករា និងព្រលានយន្តហោះជាដើម ចង់ធ្វើបាតុកម្មនៅទីលានប្រជាធិបតេយ្យ រយៈពេល ១ខែ ចាប់ពីថ្ងៃទី២០ មករា ដល់ថ្ងៃទី២០ កុម្ភៈ ដើម្បីទាមទារឲ្យមានការដំណោះស្រាយបញ្ចប់ជម្លោះដីធ្លី និងទាមទារឲ្យមានការដោះលែងសកម្មជនសិទ្ធិមនុស្ស និងដីធ្លី ១៩នាក់ ដែលកំពុងជាប់ឃុំនៅពន្ធនាគារព្រៃស។
គាំទ្រដោយ
