នៅថ្ងៃទី២៨ ខែកញ្ញា អ្នកសារព័ត៌មាន៤នាក់ ត្រូវបានវាយប្រហារនៅស្រុកមេមត់ ខេត្តត្បូងឃ្មុំ។ អង្គត់ឈើមួយដុំត្រូវបានគប់មកលើរថយន្តរបស់ពួកគេ ហើយពួកគេត្រូវបានវាយដំ ដោយជនដែលពួកគាត់ស្គាល់ថាជាឈ្មួញឈើ។ ពីរថ្ងៃមុនកើតហេតុ អ្នកសារព័ត៌មានបានរាយការណ៍ពីហេតុការណ៍កាប់ឈើខុសច្បាប់ទៅកាន់កងរាជអាវុធហត្ថស្រុកមេមត់។ ពួកគាត់ជឿថា ការវាយធ្វើបាបមកលើខ្លួនដោយសារតែការសងសឹក ហើយពួកគាត់បានដាក់ពាក្យបណ្តឹងទៅនគរបាលស្រុកមេមត់។