នៅថ្ងៃទី០៤ ខែកញ្ញា ឆ្នាំ២០២១ អ្នករាយការណ៍ម្នាក់នៃសារព័ត៌មានសំឡេងប្រជាធិបតេយ្យ(VOD) បានរងការយាយីពីអាជ្ញាធរ ខណៈពេលដែលគាត់កំពុងយកព័ត៌មានពីជម្លោះដីធ្លីរបស់ប្រជាពលរដ្ឋដែលរងផលប៉ះពាល់ពីគម្រោងអភិវឌ្ឍន៍អាកាសយានដ្ឋានអន្តរជាតិភ្នំពេញថ្មី។ នេះជាអ្នកសារព័ត៌មាន VOD ទីពីរហើយដែលបានរងការគំរាមពេលចុះយកព័ត៌មានពីជម្លោះដីធ្លីមួយនេះ។ លោក ពក ខឺយ អ្នកហាត់ការនៅសារព័ត៌មាន VOD បាននិយាយថា ខណៈពេលដែលលោកកំពុងសម្ភាសន៍អ្នកភូមិនៅទីតាំងដីដែលមានជម្លោះ អាជ្ញាធរក្នុងសម្លៀកបំពាក់ស៊ីវិលបានថតរូប និងម៉ូតូរបស់លោក។ ខណៈពេលដែលលោកជិះម៉ូតូត្រឡប់ទៅភ្នំពេញវិញ លោកខឺយ កត់សម្គាល់ថាមានមនុស្សចំនួនពីរនាក់បានតាមរូបលោក ហើយបន្ទាប់មកមាននគរបាលស្លៀកពាក់ឯកសណ្ឋានចំនួន៥នាក់ បានប៉ុនប៉ងប្រាប់លោកឱ្យឈប់។ លោកខឺយ បានបន្តជិះម៉ូតូទៅឆ្ងាយ។ បន្ទាប់មកនគរបាលបានស្រែកទៅគាត់ឱ្យឈប់និយាយគ្នាសិន ហើយនៅពេលលោកខឺយបដិសេធមិនព្រមឈប់ នគរបាលបានហៅគាត់ថាជា «ចោរ»។ បច្ចុប្បន្ននេះលោក ខឺយ បារម្ភពីសុវត្ថិភាពរបស់ខ្លួន។