កាលពីថ្ងៃទី២ ខែវិច្ឆិកា ឆ្នាំ២០២២ អធិការនគរបាលក្រុងបាវិត បានបញ្ជាឱ្យអ្នកសារព័ត៌មានជាច្រើននាក់ ដែលកំពុងផ្សាយផ្ទាល់លើករណីគ្រោះថ្នាក់ចរាចរណ៍ឱ្យបញ្ឈប់ និងលុបរាល់វីដេអូពាក់ព័ន្ធករណីនេះ។ នៅពេល លោក ព្រំ ចន្ថា អ្នកសារព័ត៌មានមកពីសារព័ត៌មានលួស សេង បានបដិសេធមិនលុបចោលវីឌីអូនោះ មេនគរបាលរូបនោះបានចាប់យកទូរសព្ទរបស់គាត់មកលុបវីដេអូដោយផ្ទាល់ដៃ ព្រមទាំងគំរាមវាយខ្នោះគាត់ទៀតផង។ ក្រោយមក នៅថ្ងៃទី២១ ខែវិច្ឆិកា ឆ្នាំ២០២២ សារព័ត៌មាន លួស សេង បានដាក់ពាក្យបណ្ដឹងទៅតុលាការខេត្ដស្វាយរៀងចំពោះការគំរាមកំហែងលើអ្នកសារព័ត៌មាន។ គាត់បានអះអាងថា ព្រះរាជអាជ្ញាបានព្យាយាមបញ្ជុះបញ្ជូលគាត់ដោយសុំឱ្យគាត់ "សម្របសម្រួល" ជំនួសវិញ។