សិទ្ធិជនជាតិដើមភាគតិចនៅក្នុងប្រទេសកម្ពុជា

១-កុម្ភៈ-២០១០

ការចេញផ្សាយ : របាយការណ៍

សម្ព័ន្ធអង្គការមិនមែនរដ្ឋាភិបាល និងក្រុមសមាគម ដែលកំពុងធ្វើការជាមួយជនជាតិដើមភាគតិចនៅក្នុងប្រទេសកម្ពុជាដាក់ជូនរបាយការណ៍នេះទៅ គណៈកម្មាធិការលុបបំបាត់ការរើសអើងពូជសាសន៍ ដើម្បីធ្វើការពិចារណាក្នុងសន្និបាតលើកទី៧៦។នៅក្នុងការដាក់ជូននូវសេចក្តីសន្និដ្ឋាននេះ និយមន័យនៃការរើសអើងពូជសាសន៍ដែលមានចែងនៅក្នុងមាត្រា១នៃអនុសញ្ញាអន្តរជាតិស្ដីអំពី ការលុបបំបាត់រាល់ទម្រង់នៃការរើសអើងពូជសាសន៍(អ.អ.ល.រ.ព.) ត្រូវបានលើកយកមកប្រើ៖ "ការរើសអើងពូជសាសន៍មានន័យថា ការប្រកាន់បែងចែក ការផាត់ចេញ ការរឹតត្បឹតឬការនិយមផ្អែកលើពូជសាសន៍ ពណ៌សម្បុរ បុព្វញាតិ ឬដើមកំណើត ឬជាតិពន្ធុដែលមានទិសដៅ ឬអានុភាពបំផ្លាញ ឬបន្ថយការទទួលស្គាល់ ការមាន ឬការប្រើប្រាស់ក្នុងលក្ខខណ្ឌសមភាពនូវសិទ្ធិមនុស្ស និងសេរីភាពមូលដ្ឋានខាងវិស័យនយោបាយ សេដ្ឋកិច្ច សង្គមកិច្ច និងវប្បធម៌ ឬវិស័យដ៏ទៃទៀតនៃជីវភាពសាធារណៈ"។យើងសង្កេតឃើញថាគណៈកម្មាធិការបានអះអាងបញ្ជាក់ម្តងហើយម្តងទៀតថា(អ.អ.ល.រ.ព.) អនុវត្តន៍ចំពោះរាល់ទម្រង់នៃការរើសអើងទៅនឹងជនជាតិដើមភាគតិចហើយនូវរាល់"ខ្លឹមសារអត្ថន័យសមស្របត្រូវបានបង្កើតឡើងដើម្បីយកទៅ ប្រយុទ្ធនិងលុបបំបាត់រាល់ទម្រង់នៃការរើសអើងបែបនេះ។យើងកត់សំគាល់ឃើញថា រដ្ឋធម្មនុញ្ញកម្ពុជាបានចែងថា ប្រជាពលរដ្ឋខ្មែរគ្រប់រូបទាំងអស់ "មានសិទ្ធិ សេរីភាពដូចគ្នា និងកាតព្វកិច្ចដូចគ្នា ដោយឥតមានបែងចែកពូជសាសន៍ ពណ៌សម្បុរ ជំនឿសាសនា និន្នាការនយោបាយ ដើមកំណើត ឋានៈសង្គម សុខភាពឬឋានៈ ដ៏ទៃទៀត"។យើងសូមអរគុណយ៉ាងស្មោះស្ម័គ្រចំពោះរាជរដ្ឋាភិបាលដែលបានបញ្ចប់សង្គ្រាមស៊ីវិល នៅក្នុងប្រទេសកម្ពុជា- សង្ក្រាមគឺជាអ្វីមួយដែលជាការរំលោភបំពានយ៉ាងធ្ងន់ធ្ងរបំផុតលើសិទ្ធិរបស់ជនជាតិដើមភាគតិច និងសិទ្ធិរបស់ប្រជាពលរដ្ឋទូទៅដែលមិនមែនជនជាតិភាគតិច-និងដែលបានបង្កើតរដ្ឋធម្មនុញ្ញនេះដោយផ្អែកលើសមធម៌។ទោះជាយ៉ាងណាក៏ដោយ ក៏នៅមានសកម្មភាព និងច្បាប់មួយចំនួនដែលមានអានុភាពបំផ្លាញ ឬបន្ថយការទទួលស្គាល់ ការមាន ឬការប្រើប្រាស់ក្នុងលក្ខខណ្ឌសមភាព នូវសិទ្ធិមនុស្ស និងសេរីភាជាមូលដ្ឋានរបស់ជនជាតិដើមភាគតិច។សេចក្តីសន្និដ្ឋានដែលត្រូវបានដាក់ជូនពន្យល់ថា ថ្វីបើរដ្ឋធម្មនុញ្ញនេះបានចែងអំពីការការពារដី ប្រពៃណី ភាសា វប្បធម៌ របស់ជនជាតិដើមភាគតិច និងការរើសអើងជនជាតិដើមភាគតិចនៅក្នុងប្រទេសកម្ពុជា ក៏ការអនុវត្តជាក់ស្តែងការរើសអើងទាំងនេះនៅតែកើតមានឡើង។សេចក្តីសង្ខបជាក់លាក់នៅក្នុងរបាយការណ៍នេះគឺលើកឡើងអំពីការរើសអើងប្រឆាំងទៅនឹងក្រុមជនជាតិដើមភាគតិច ដែលជាលទ្ធផលកើតចេញពីការដកសិទ្ធិតាមរយៈការធ្វើច្បាប់ផ្សេងៗ និងការប្រើប្រាស់ប្រព័ន្ធតុលាការអំពីដី និងការធ្វើអោយបាត់បង់ធនធានដែលកើតចេញពីបំលាស់ទីដោយបង្ខំ ការដាក់កំហិតលើសិទ្ធិស្វ័យសម្រេច ការចែងមិនពេញលេញអំពីការទទួលបានការអប់រំមួយសមស្រប និងអំពីការមិនសម្រេចបានពីសិទ្ធិសុខភាព។

ប្រភពព័ត៍មាន : សិទ្ធិជនជាតិដើមភាគតិចនៅក្នុងប្រទេសកម្ពុជា