១-ឧសភា-២០១០
ការចេញផ្សាយ : សេចក្តីថ្លែងការណ៍
នៅក្នុងឱកាសនៃទិវាពលកម្មអន្តរជាតិខួបលើកទី១២៤ ថ្ងៃទី១ ឧសភាឆ្នាំ២០១០នេះ គណៈកម្មាធិការប្រព្រឹត្តិកម្មនៃអង្គការ-សមាគមការពារសិទ្ធិមនុស្សកម្ពុជា(CHRAC) ដែលជាសម្ព័ន្ធនៃសមាគម-អង្គការមិនមែនរដ្ឋាភិបាលក្នុងស្រុកចំនួន២៣ សូមសំដែងនូវក្តីសោមនស្សនិងចូលរួមអបអរសារទរយ៉ាងកក់ក្ដៅចំពោះការប្រារព្ធទិវានេះនៅទូទាំងពិភពលោក និងជាពិសេសនៅក្នុងព្រះរាជាណាចក្រកម្ពុជាដោយក្រុមអង្គការសង្គមស៊ីវិលនិងក្រុមសហព័ន្ធ សហជីព កម្មករផ្សេងៗ។ទិវាពលកម្មអន្តរជាតិ ឫទិវានៃសេចក្ដីប្រកាសអន្តរជាតិអំពីសិទ្ធិការងារ គឺជាទិវាដ៏មានសារៈសំខាន់ដែលបានឆ្លុះបញ្ចាំងនូវកិច្ចខិតខំប្រឹងប្រែង និងពលិកម្មទាំងឡាយរបស់វីរៈកម្មករ-ពលករ ដែលបានពុះពារក្នុងការទាមទារឲ្យមានការគោរពនូវសិទ្ធិ និងសេចក្ដីថ្លៃថ្នូរក្នុងភាពជាមនុស្ស។ ជាងនេះទៅទៀតទិវាពលកម្មអន្តរជាតិដែលបានកំពុងប្រារព្ធធ្វើឡើងនេះ កាន់តែជំរុញឲ្យមានការខិតខំជាបន្តបន្ទាប់ថែមទៀតក្នុងគោលដៅជំរុញអោយមានការគោរពសិទ្ធិការងារព្រមទាំងលើកស្ទួយនូវលក្ខខណ្ឌការងារនៅក្នុងព្រះរាជាណាចក្រកម្ពុជាឲ្យកាន់តែប្រសើរឡើង។ឆ្លៀតក្នុងឱកាសដ៏មានអត្ថន័យជាប្រវត្តិសាស្រ្តនេះ ក្នុងនាមអង្គការសង្គមស៊ីវិលដែលកំពុងធ្វើការដើម្បីលើកស្ទួយការគោរពសិទ្ធិមនុស្ស និងលទ្ធិប្រជាធិបតេយ្យ គណៈកម្មាធិការប្រព្រឹត្តកម្មសូមចូលរួមអបអរចំពោះការបា្ររព្ធទិវានេះដោយក្រុមសហព័ន្ធ សហជីព កម្មករ និងគាំទ្រគោលជំហរដែលលើកឡើងក្នុងការទាមទារឲ្យគោរពលក្ខខណ្ឌមួយចំនួន និងសុំតំលើងប្រាក់បៀរវត្សរហូតដល់៩៣ដុល្លារសហរដ្ឋអាមេរិកក្នុង១ខែដើម្បីរស់បានសមរម្យ។ការគោរពនិងការអនុវត្តន៍សិទ្ធិការងារនាពេលកន្លងមកត្រូវបានធ្វើឲ្យយើងខ្ញុំព្រួយបារម្ភ ដែលជាញឹកញាប់ត្រូវបានរំខានឬរំលោភបំពានដោយអាជ្ញាធរកម្ពុជាដែលមានជាអាទិ៍ដូចជា៖ ការសំដែងមតិ និងការជួបប្រជុំដោយសន្តិភាព ការធ្វើកូដកម្ម និងសេរីភាពក្នុងការបង្កើតសហជីពជាដើម។ដូច្នេះយើងខ្ញុំសូមជូនពររាជរដ្ឋាភិបាលកម្ពុជានិងភាគីពាក់ព័ន្ធដ៏ទៃទៀតបន្តចូលរួមលើកតំកើងនូវការគោរពនិងការអនុវត្តសិទ្ធិការងារឲ្យបានកាន់តែប្រសើរនិងមានប្រសិទ្ធិភាពដូចដែលបានចែងក្នុងសេចក្ដីប្រកាសអន្តរជាតិស្ដីអំពីសិទ្ធិការងារនិងច្បាប់ការងាររបស់កម្ពុជា ជាពិសេសគោរពសិទ្ធិសេរីភាពក្នុងការបញ្ចេញមតិរបស់កម្មករដើម្បីទាមទារនូវលក្ខខណ្ឌការងាររបស់គេ ព្រមទាំងពង្រីកនូវយន្តការដោះស្រាយវិវាទការងារប្រកបដោយសន្តិវិធីនិងយុត្តិធម៌។
ប្រភពព័ត៍មាន : សេចក្ដីថ្លែងការណ៍របស់គណៈកម្មាធិការប្រព្រឹត្តកម្មនៃអង្គការ-សមាគមការពារសិទ្ធិមនុស្សកម្ពុជា (CHRAC)ក្នងទិវាពលកម្ម
គាំទ្រដោយ
