ការជំនុំជម្រះដោយយុតិ្តធម៌គឺជាការធានានូវសិទិ្ធដល់ជន ទាំងឡាយណាដែលត្រូវបានចោទប្រកាន់ពីបទឧក្រិដ្ឋ។ សិទ្ធិទទួលបានការជំនុំជម្រះដោយយុត្តិធម៌ជាការរួមបញ្ចូលគ្នានៃសិទ្ធិបុគ្គលមួយចំនូនដែលសិទ្ធិនេះមាននៅគ្រប់នីតិវិធីច្បាប់រាប់ចាប់ពីដំណាក់កាលការចាប់ខ្លួនជនសង្ស័យ នៅដំណាក់កាលដំបូង រហូតដល់បញ្ចប់ការបឹ្តងតវ៉ាចុងក្រោយបំផុត។ ការជំនុំជម្រះដោយយុត្តិធម៌ មានសារៈសំខាន់ណាស់ក្នុងការការពារនូវសិទ្ធិរបស់ជនជាប់ចោទ និងជនរងគ្រោះ ព្រមទាំងធានាបាននូវការគ្រប់គ្រងវិស័យយុត្តិធម៌ដែលមានសារៈសំខាន់ដល់នីតិរដ្ឋ។
ទស្សនៈទាននៃការជំនុំជម្រះដោយយុត្តិធម៌រួមបញ្ចូលទាំងការធានានូវសិទិ្ធ និងនីតិវិធីទាំងអស់ ដែលពាក់ព័ន្ធនឹងបទដ្ឋាននីតិវិធីអន្តរជាតិ ដែលមាននៅក្នុងយន្តការច្បាប់អន្តរជាតិ។ ដោយមិនមានការដាក់កំហិតការធានានូវសិទ្ធិ និងនីតិវិធីរាប់បញ្ចូលនូវសិទិ្ធ ការហាមប្រាម និងគោលការណ៍មួយចំនួនដូចខាងក្រោម៖
- សិទិ្ធទទូលបានការជំនុំជម្រះជាសាធារណៈ
- សិទិ្ធទទូលបានការជំនុំជម្រះដោយគ្មានការពន្យាពេល
- សិទ្ធិយល់ដឹងអំពីបទចោទប្រកាន់
- សិទ្ធិទទួលការពន្យល់ប្រាប់សិទិ្ធ
- សិទ្ធិមានពេលវេលា និងមធ្យោបាយគ្រប់គ្រាន់ក្នុងការការពារក្តី
- សិទ្ធិទទួលបានមេធាវី និងមានវត្តមាននៅក្នុងសវនាការ
- សិទ្ធិទទួលការសន្មតទុកជាមុនថាគ្មានទោស
- សិទ្ធិទទូលបានការជំនុំជម្រះដោយតុលាការឯករាជ្យ និងឥតលម្អៀង
- សិទ្ធិបង្ហាញភស្តុតាង (រួមទាំងសិទិ្ធហៅ និងសាកសូរសាក្សី)
- សិទ្ធិដឹងឮភស្តុតាងរបស់ភាគីម្ខាងទៀតសម្រាប់រៀបចំការការពារក្តី
- សិទ្ធិមិនឆ្លើយដាក់បន្ទុកខ្លូនឯង (មិនសារភាពពីពិរុទ្ធភាពដោយសារការបង្ខិតបង្ខំ ឬការលួងលោម)
- ការហាមឃាត់ចំពោះការអនុវត្តអានុភាពប្រតិសកម្មនៃច្បាប់ព្រហ្មទណ្ឌ (ត្រូវបានកាត់សេចក្តីសម្រាប់បទល្មើសមួយដែលមិនមែនជាបទល្មើសនៅពេលដែលប្រព្រឹត្ត) និង
- សិទ្ធិជនជាប់ចោទជាអនីតិជន
ដើម្បីទទួលបានព័ត៌មានលម្អិតថាតើអ្វីជាសិទិ្ធទទួលបានការជំនុំជម្រះដោយយុត្តិធម៌ និងថាតើសិទ្ធិទទួលបានការជំនុំជម្រះដោយយុត្តិធម៌ត្រូវបានការពារជាលក្ខណៈអន្តរជាតិ និងក្រោមច្បាប់កម្ពុជាយ៉ាងដូចម្តេចនោះ សូមអានសៀវភៅមគ្គុទេសក៍ស្តីពីសិទ្ធិទទួលបានការជំនុំជម្រះដោយយុត្តិធម៌ និងការសង្កេតការណ៍សវនាការ។