កំពុងស្វែងរកទិន្នន័យ
រកឃើញ: 13.209
-
សមាជិកាអង្គការនីតិបញ្ញតិអូស្ត្រាលីនិងកម្ពុជាពិភាក្សាអំពីការជំទាស់នឹងកិច្ចព្រមព្រៀងជនភៀសខ្លួន
សមាជិកាព្រឹទ្ធសភាអូស្ត្រាលីម្នាក់មកពីគណបក្សជំទាស់ គឺលោកស្រី Sarah Hanson-Young បានស្វះស្វែងរកការបញ្ឈប់ការបញ្ជូនជនភៀសខ្លួនចម្រុះជាតិសាសន៍ពីអូស្ត្រាលីមកកម្ពុជា។ នេះបើតាមការអះអាងរបស់លោក កឹម សុខា អនុប្រធានទី១នៃរដ្ឋសភាកម្ពុជា និងជាអនុប្រធានគណបក្សសង្គ្រោះជាតិ ដែលបានថ្លែងក្នុងទំព័រ Facebook របស់លោក ក្រោយពីជំនួបមួយកាលពីថ្ងៃអង្គារក្នុងរាជធានីភ្នំពេញ។ លោកបានថ្លែងថា គោលជំហរគណបក្សជំទាស់អូស្ត្រាលីនិងគោលជំហរគណ បក្សជំទាស់កម្ពុជា គឺដូចគ្នាអំពីរឿងជំទាស់នឹងការបញ្ជូនជនភៀសខ្លួនមកកម្ពុជា ដែលរដ្ឋាភិបាលកម្ពុជានិងរដ្ឋាភិបាលអូស្ត្រាលីបានចុះហត្ថលេខាកាលពីចុងខែកញ្ញា។
-
តុលាការចាប់ខ្លួនពលរដ្ឋត្រូវគេបោះពស់វែកចូលផ្ទះ
ប្រជាពលរដ្ឋមួយគ្រួសារ ដែលមានជម្លោះដីធ្លីដ៏រ៉ាំរ៉ៃ ជាមួយក្រុមហ៊ុន ឃុនសៀ ហើយដែលធ្លាប់ត្រូវបានគេបោះពស់វែកមួយការុងចូលផ្ទះឲ្យចឹកទាំងពាក់កណ្តាលយប់នោះ ត្រូវបានសមត្ថកិច្ចចាប់ខ្លួនជាបន្តបន្ទាប់បញ្ជូនមកសាលាដំបូងរាជធានីកាលពីម្សិលមិញខណៈដែលកូនប្រុសម្នាក់បានរត់គេចខ្លួនចេញពីតុលាការវិញ នៅពេលតុលាការបានចាប់ខ្លួនកូនស្រីម្នាក់បន្ថែមទៀតនៅពេលពួកគេទៅសួរឪពុក។ គ្រួសារដែលមានសមាជិក ៤ នាក់ ដែលសុទ្ធតែត្រូវបានតុលាការចេញដីកាកោះហៅ ហើយដែលត្រូវបានចាប់ខ្លួនបុរសជាឪពុក និងកូនស្រីម្នាក់ កូនប្រុសម្នាក់ និងស្ត្រីជាប្រពន្ធបានរត់គេចខ្លួននេះ ធ្លាប់មានទំនាស់ដីធ្លីយ៉ាងក្តៅគគុក ជាមួយក្រុមហ៊ុន ឃុនសៀ នៅ សង្កាត់បឹងកក់ ១ ខណ្ឌទួលគោក។
-
ក្រសួងយុត្តិធម៌ថាការដោះលែង លោក មាជ សុវណ្ណារ៉ា ទុកឲ្យតុលាការជាអ្នកសម្រេច
ក្រសួងយុត្តិធម៌បំភ្លឺជាផ្លូវការទៅក្រសួងមហាផ្ទៃវិញថា ការដោះលែងសកម្មជនបក្សប្រឆាំងលោក មាជ សុវណ្ណារ៉ា ឲ្យនៅក្រៅឃុំបណ្តោះអាសន្ត ឬទម្លាក់ចោលបទចោទ គឺទុកឲ្យតុលាការជាអ្នកសម្រេច ។ ការអះអាងរបស់ក្រសួងយុត្តិធម៌នេះ ធ្វើឡើងបន្ទាប់ពីក្រសួងមហាផ្ទៃផ្ញើលិខិតទៅក្រសួងយុត្តិធម៌កាលពីថ្ងៃទី១៤ ខែវិច្ឆិកា ឆ្នាំ២០១៤ ដោយយោងតាមលិខិតរបស់ប្រធានគណបក្សសង្គ្រោះជាតិលោក សម រង្ស៊ី ដែលស្នើសុំជួយអន្តរាគមន៍ទម្លាក់ការចោទប្រកាន់ និងលើកលែងលោក មាជ សុវណ្ណារ៉ា ។ សកម្មជនបក្សប្រឆាំងរូបនេះត្រូវតុលាការឃុំខ្លួនដោយចោទពាក់ព័ន្ធនឹងអំពើហិង្សាលើពួកសន្តិសុខ ដែលរារាំងបាតុករទាមទារឲ្យបើកទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ ។ លិខិតក្រសួងសួងមហាផ្ទៃបានស្នើទៅរដ្ឋមន្ត្រីក្រសួងយុត្តិធម៌ជួយពិនិត្យ និងជួយយោបល់មកក្រសួងមហាផ្ទៃដើម្បីមានមូលដ្ឋានចាត់វិធានការបន្ត ។
-
កម្មកររោងចក្រ ជីម លី នៅខណ្ឌពោធិ៍សែនជ័យ ជាង១ពាន់នាក់ហែក្បួនទៅក្រសួងការងាររកអន្តរាគមន៍
កម្មកររោងចក្រកាត់ដេរ ជីម លី ក្នុងខណ្ឌពោធិ៍សែនជ័យ មានគ្នាប្រមាណ២ពាន់នាក់ នៅព្រឹកថ្ងៃពុធនេះ ហែក្បួនទៅកាន់ក្រសួងការងារ ដើម្បីទាមទារឲ្យក្រសួងដាក់សម្ពាធទៅភាគីរោងចក្រផ្ដល់លក្ខខណ្ឌការងារ៨ចំណុចដល់កម្មករ ។ តំណាងកម្មករម្នាក់លោក សុំ សេង ឲ្យVODដឹង ថា នៅព្រឹកថ្ងៃពុធនេះ កម្មករបាននាំគ្នាឈរមុខរោងចក្រអស់រយៈពេលប្រមាណជា១ម៉ោង រួចនាំគ្នាដើរហែក្បួនពីមុខរោងចក្រទៅក្រសួងការងារដើម្បីរកអន្តរាគមន៍ ។ លោកថា ការដើរហែក្បួននេះធ្វើឡើងបន្ទាប់ពីការតវ៉ារបស់កម្មករបីថ្ងៃមកនេះមិនដំណោះស្រាយពីរោងចក្រ ។
-
ពលករខ្មែរ២០នាក់ដែលត្រូវបានសង្គ្រោះនៅឥណ្ឌូនេស៊ីមកដល់កម្ពុជានៅរសៀលនេះ
ក្រសួងការបរទេសឲ្យដឹងថា ពលករខ្មែរ២០នាក់ដែលត្រូវបានជួយសង្គ្រោះពីទូកនេសាទថៃ ក្នុងប្រទេសឥណ្ឌូនេស៊ី នាពេលកន្លងមក និងត្រូវបញ្ជូនមកដល់ប្រទេសកម្ពុជានៅម៉ោង៣និង៣០នាទី រសៀលថ្ងៃពុធនេះ ។ សេចក្ដីប្រកាសព័ត៌មានរបស់ក្រសួងការបរទេសចេញថ្ងៃទី១៨ ខែវិច្ឆិកា ឲ្យដឹងថា ស្ថានទូតកម្ពុជាប្រចាំប្រទេសឥណ្ឌូនេស៊ី បានសហការជាមួយអង្គការទេសន្តរប្រវេសន៍អន្តរជាតិ IOM នៅទីក្រុងហ្សាកាតា ដើម្បីធ្វើមាតុភូមិនិវត្តន៍ពលរដ្ឋខ្មែររងគ្រោះទាំង២០នាក់មកកម្ពុជាវិញ។
-
ក្រសួងយុត្តិធម៌មិនព្រមអន្តរាគមន៍ដោះលែងមន្ត្រីបក្សប្រឆាំង
ក្រសួងយុត្តិធម៌នៅថ្ងៃអង្គារនេះ មិនហ៊ានសម្រេចលើករណីលោក មាជ សុវណ្ណារ៉ា មន្ត្រីជាន់ខ្ពស់គណបក្សសង្គ្រោះជាតិទេ ដោយបានទម្លាក់ការទទួលខុសត្រូវទៅលើតុលាការក្រុងភ្នំពេញ ដោយសារតែតុលាការបានចេញដីកាចាប់ និងសម្រេចឃុំខ្លួននៅពន្ធនាគារព្រៃស។ ការសម្រេចនេះ បានធ្វើឡើងក្រោយពីបញ្ចប់កិច្ចប្រជុំគណៈកម្មការចម្រុះមួយនៅក្រសួងយុត្តិធម៌ដើម្បីឆ្លើយតបនឹងលិខិតរបស់ក្រសួងមហាផ្ទៃ។
-
២០០ នាក់ត្រូវបានចាប់ខ្លួនក្រោមសម្ពាធនយោបាយ
យ៉ាងហោចណាស់មានមនុស្សប្រមាណ ២០០ នាក់/អង្គ ត្រូវបានសមត្ថកិច្ចធ្វើការចោទប្រកាន់ និងចាប់ខ្លួនក្នុងអំឡុងពេល ៩ខែ ដើម ឆ្នាំ២០១៤ នេះដើម្បីជាការដាក់សម្ពាធខាងនយោបាយ ខណៈពេលស្ថានភាពនយោបាយតានតឹងនិងឡើងកម្ដៅ។ នេះបើយោងទៅ តាមរបាយការណ៍អង្កេតរបស់សមាគមការពារសិទ្ធិមនុស្សអាដហុក។ ថ្លែងបន្ទាប់ពីបញ្ចប់សន្និសីទសារព័ត៌មានស្តីអំពីការចាប់ខ្លួនសកម្មជនដីធ្លី សិទ្ធិមនុស្ស និងសកម្មជននយោបាយនៅទីស្នាក់ការកណ្តាលរបស់សមាគមអាដហុក ក្រោយពីសាលារាជធានីភ្នំពេញមិនអនុញ្ញាតឲ្យធ្វើនៅទីលានប្រធាធិបតេយ្យនោះ លោក ចាន់ សុវេត មន្ត្រីស៊ើបអង្កេតជាន់ខ្ពស់ បានថ្លែងឲ្យដឹងថា ចាប់ពីដើម ឆ្នាំ២០១៤ រហូតមកដល់បច្ចុប្បន្ននេះ មានមនុស្សចំនួន ២០០ នាក់រួមទាំងព្រះសង្ឃជាច្រើនអង្គត្រូវបានសមត្ថកិច្ចធ្វើការឃាត់ខ្លួននិងចោទប្រកាន់នៅតុលាការខណៈពួកគេបានប្រើប្រាស់សិទ្ធិបញ្ចេញមតិពួកគេដោយសន្តិវិធី។
-
កម្មកររោងចក្រ ជីម លី គ្រោងហែក្បួនទៅមុខក្រសួងការងារនៅព្រឹកស្អែក
កម្មករនៅរោងចក្រកាត់ដេរ ជីម លី ក្នុងខណ្ឌពោធិ៍សែនជ័យ គ្រោងហែក្បួនទៅមុខក្រសួងការងារនៅព្រឹកស្អែក ដើម្បីទាមទារឲ្យក្រសួងជំរុញទៅភាគីរោងចក្រគោរពលក្ខខណ្ឌការងារ ។ តំណាងកម្មករម្នាក់លោក សុំ សេង ឲ្យVODដឹង ថា គម្រោងដើរហែក្បួននេះធ្វើឡើងបន្ទាប់ពីការតវ៉ារបស់កម្មករពីរថ្ងៃមកនេះមិនដំណោះស្រាយពីរោងចក្រ ។ លោកថា កាលពីព្រឹកមិញនេះ កម្មករជាង២ពាន់នាក់បាននាំគ្នាធ្វើការតវ៉ានៅមុខរោងចក្រជាថ្មី តែភាគីរោងចក្រនៅតែមិនចេញមុខមកដោះស្រាយ ។
-
ពលរដ្ឋមានជម្លោះដីនៅព្រះវិហារឲ្យកោះហៅមន្ត្រីមកបំភ្លឺ
ពលរដ្ឋរងគ្រោះដោយសារដីធ្លីមកពី ខេត្តព្រះវិហារ ប្រមាណ ១០០ នាក់ ដែលបានស្នាក់នៅក្នុង វត្តសាមគ្គីរង្សី ជិត ៣ខែ ដើម្បីរង់ចាំរកដំណោះស្រាយពីមន្ត្រីរដ្ឋាភិបាលបានស្វែងរកអន្តរាគមន៍ជាថ្មីនៅមុខរដ្ឋសភា ដើម្បជំរុញឲ្យរដ្ឋាភិបាលពន្លឿនការដោះស្រាយទំនាស់ដីធ្លីរបស់ពួកគេ។ លោក យន់ សុគន្ធ តំណាងប្រជាពលរដ្ឋបានថ្លែងថា ពលរដ្ឋបានមករង់ចាំស្វែងរកដំណោះស្រាយជិត ៣ ខែមកហើយ ប៉ុន្តែនៅតែពុំមានដំណោះស្រាយ ដូច្នេះហើយទើបនាំគ្នាឡើងមកមុខរដ្ឋសភាដើម្បីឲ្យកោះមន្ត្រីដែលពាក់ព័ន្ធទាំងនោះឡើងមកឆ្លើយបំភ្លឺពីបញ្ហានោះ។ លោកថា៖ «ប្រសិនបើគេមិនដោះស្រាយទេ យើងនឹងស្នាក់នៅភ្នំពេញរហូតដើម្បីតវ៉ាឲ្យមានដំណោះស្រាយ។ ពួកយើងត្រូវបានគេឈូសផ្ទះអស់ហើយ»។
-
អ្នកតវ៉ាប្រមាណ ១៥០អង្គ/នាក់ បានប្រមូលផ្តុំគ្នាទាមទារដោះលែងសកម្មជន និងព្រះសង្ឃ
នាព្រឹកនេះ សមាជិកសហគមន៍ និងព្រះសង្ឃចំនួន ១៥០ អង្គ/នាក់ បានប្រមូលផ្តុំគ្នានៅមុខស្ថានទូតសហរដ្ឋអាមេរិក ដើម្បីគាំទ្រព្រះតេជគុណ លួន សុវាត និងទាមទារឲ្យមានការដោះលែងព្រះសង្ឃ និងសកម្មជនដែលជាសមាជិកសហគមន៍ដីធ្លីជាច្រើន ដែលត្រូវបានចាប់ខ្លួន និងឃុំខ្លួនកាលពីសប្តាហ៍មុន។ ព្រះតេជគុណ លួន សុវាត កំពុងដាក់លិខិតអញ្ជើញទៅស្ថានទូតចំនួន ១៣ ដោយអំពាវនាវសុំឲ្យចូលរួមស្តាប់សវនាការរបស់ព្រះអង្គ នៅថ្ងៃទី២៥ ខែវិច្ឆិកា នៅសាលាដំបូងរាជធានីភ្នំពេញ។ ព្រះអង្គនឹងត្រូវបានជំនុំជម្រះពីបទញុះញង់។
-
ព្រះតេជគុណលួន សុវ៉ាត ស្នើប្រទេសមហាអំណាចឃ្លាំមើលតុលាការខ្មែរដែលចោទព្រះអង្គថាក្បត់ជាតិ
ព្រះសង្ឃមួយអង្គ ដែលចូលរួមយ៉ាងសកម្ម ជំរុញឲ្យមានការគោរពសិទ្ធិមនុស្ស ទទូចឲ្យស្ថានទូត មហាអំណាចនានា ជួយតាមដាន ពីឯករាជ្យភាពរបស់តុលាការកម្ពុជា ខណៈព្រះអង្គមានដីកាកោះ ឲ្យចូលបំភ្លឺនៅចុងខែនេះ ជុំវិញបទចោទថាក្បត់ជាតិ។ ការជំរុញនេះ ធ្វើឡើងតាមរយៈការនិមន្តហែញត្តិ ដាក់នៅស្ថានទូតអាមេរិក ទូតអង់គ្លេស បារាំង សហភាពអឺរុប និងតំណាងអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា និងស្ថានទូតមួយចំនួនទៀត នាព្រឹកថ្ងៃអង្គារទី១៨ ខែវិច្ឆិកា ឆ្នាំ២០១៤នេះ ដែលមានព្រះសង្ឃ និងប្រជាសហគមន៍ដែលមានជម្លោះដីធ្លីជិត២០០អង្គ/នាក់ចូលរួម។ ព្រះតេជគុណ លួន សុវ៉ាត ត្រូវបានសាលាដំបូងរាជធានីភ្នំពេញចេញដីកាកោះ និមន្តព្រះអង្គចូលសវនាការនៅថ្ងៃទី២៥ ខែវិច្ឆិកាខាងមុខ ដើម្បីបំភ្លឺពីបទក្បត់ជាតិ រារាំងពលរដ្ឋមិនឲ្យបោះឆ្នោត ឬអុកឡុកការិយាល័យបោះឆ្នោត និងញុះញង់ឲ្យប្រព្រឹត្តបទឧក្រិដ្ឋ។
-
អង្គការសមាគមចំនួន៦ថ្កោលទោសអាជ្ញាធរ ករណីចាប់ខ្លួនអ្នកដែលហ៊ានចេញមុខតវ៉ាជាបន្តបន្ទាប់
អង្គការសមាគមចំនួន៦ថ្កោលទោសអាជ្ញាធរថា រំលោភសិទ្ធិមនុស្សធ្ងន់ធ្ងរ និងបង្កឲ្យមាន អស្ថិរភាពនៅក្នុងសង្គម ចំពោះការបង្ក្រាប និងចាប់ខ្លួនតំណាងសហគមន៍នានា រួមទាំងសកម្មជននយោបាយ និងព្រះសង្ឃជាបន្តបន្ទាប់។ សេចក្តីថ្លែងការណ៍រួមដែលផ្សព្វផ្សាយនៅក្នុងសន្និសីទមួយនាព្រឹកថ្ងៃទី១៨ ខែវិច្ឆិកានេះ ឲ្យដឹងថាការចាប់ឃុំខ្លួន និងផ្តន្ទាទោសជាបន្តបន្ទាប់នេះ ហាក់ដូចជាធ្វើឲ្យស្ថានភាពនយោបាយនៅកម្ពុជាវិលមករកភាពតានតឹងក្នុងការកែទម្រង់ស្ថាប័ននានា ផ្ទុយពីកិច្ចព្រមព្រៀង ២២ កក្កដា ២០១៤ របស់គណបក្សនយោបាយទាំងពីរថា បញ្ចប់ភាពជាប់គាំងនយោបាយ។
-
តុលាការសម្រេចឃុំខ្លួនឪពុកនិងកូនស្រីក្នុងសំណុំរឿងជម្លោះដីធ្លីនៅបឹងកក់១
ចៅក្រមសាលាដំបូងរាជធានីភ្នំពេញ សម្រេចឃុំខ្លួនពលរដ្ឋពីរនាក់ជាឪពុក និងកូន នៅក្នុងសំណុំរឿងជម្លោះដីធ្លីក្នុងសង្កាត់បឹងកក់១។ ពួកគេត្រូវបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស កាលពីម៉ោង ៨យប់ ថ្ងៃទី១៨ ខែវិច្ឆិកា បន្ទាប់ពីចៅក្រមបញ្ចប់ការសាកសួរ គឺតែប៉ុន្មានម៉ោងប៉ុណ្ណោះបន្ទាប់ពីការចាប់ខ្លួន។ លោក លី ស្រ៊ាខេង និងកូនស្រី កញ្ញា លី សៀវម៉ិញ រងនូវបទចោទមួយចំនួនដែលប្ដឹងដោយក្រុមហ៊ុន ឃុន សៀ។ ក្នុងចំណោមបទចោទដែលចៅក្រមស៊ើបសួរ លោក លឹម លីបម៉េង ព្រះរាជអាជ្ញារង ស៊ីវ វណ្ណី បានចោទប្រកាន់អ្នកទាំងពីរនោះមានបទចោទធំៗចំនួន៣ គឺបទរារាំងម្ចាស់អចលនទ្រព្យ គឺក្រុមហ៊ុន ឃុន សៀ មិនអោយធ្វើរបង បទបំផ្លិចបំផ្លាញទ្រព្យសម្បត្តិ និងបទបរិហារកេរ្តិ៍។
-
ពលរដ្ឋនៅកោះរ៉ុងចោទក្រុមហ៊ុនថតកុនបេស្តខេមថាឈូសឆាយរំលោភដីចម្ការ
ប្រជាពលរដ្ឋមានលំនៅឋាននៅភូមិសុខសាន្ត សង្កាត់កោះរ៉ុង ខេត្តព្រះសីហនុ បានចោទក្រុមហ៊ុនថតកុន និងរីសត បេស្តខេម (Base Camp) ថាបានប្រើគ្រឿងចក្រឈូសបំផ្លាញដំណាំស្វាយចន្ទី ដែលធ្លាប់ទទួលផលជារៀងរាល់ឆ្នាំ ដើម្បីសង់ស្ទូឌីយូ (Studio) ឬបន្ទប់សម្រាប់ជួលឲ្យភ្ញៀវទេសចរសម្រាក។ មន្ត្រីសិទ្ធិមនុស្សទទួលស្គាល់ថា សកម្មភាពក្រុមហ៊ុនបេស្តខេម ពិតជាបានបំផ្លាញដំណាំស្វាយចន្ទី និងរំលោភដីចម្ការពលរដ្ឋពិតមែន។ ក្រុមប្រជាពលរដ្ឋរស់នៅភូមិសុខសាន្ត សង្កាត់កោះរ៉ុង ក្រុងព្រះសីហនុ ខេត្តព្រះសីហនុ សម្ដែងការព្រួយបារម្ភចំពោះសកម្មភាពរបស់ក្រុមហ៊ុនថតកុន និងរីសតបេស្តខេម ដែលបានប្រើគ្រឿងចក្រឈូសបំផ្លាញដំណាំស្វាយចន្ទី និងបំផ្លាញរបងហ៊ុមព័ទ្ធដីចម្ការពលរដ្ឋក្នុងភូមិសុខសាន្ត ជាច្រើនគ្រួសារ។
-
សមាជិកព្រឹទ្ធសភាអូស្ត្រាលីអញ្ជើញលោក កឹម សុខា ទៅអូស្ត្រាលីនិយាយរឿងជនភៀសខ្លួន
អនុប្រធានគណបក្សសង្គ្រោះជាតិលោក កឹម សុខា លើកឡើងថា សមាជិកព្រឺទ្ធសភាអូស្ត្រាលីអញ្ជើញរូបលោកទៅប្រទេសអូស្ត្រាលី ដើម្បីនិយាយពីការបញ្ជូនជនភៀសខ្លួនមកប្រទេសកម្ពុជា ។ អនុប្រធានគណបក្សសង្គ្រោះជាតិ និងជាអនុប្រធានទី១នៃរដ្ឋសភា លោក កឹម សុខា នៅព្រឹកថ្ងៃអង្គារនេះបានជួបជាមួយលោកស្រី Sarah Hanson-Young សមាជិកព្រឹទ្ធសភាអូស្ត្រាលីនៃគណបក្សបៃតង ដើម្បីពិភាក្សាពីការផ្ទេរជនភៀសខ្លួនពីអូស្ត្រាលីមកកាន់កម្ពុជា។
-
ក្រសួងយុត្តិធម៌បដិសេធសំណើលោក សម រង្ស៊ី សុំដោះលែងលោក មាជ សុវណ្ណារ៉ា
ក្រសួងយុត្តិធម៌ បានបដិសេធលិខិតរបស់ លោក សម រង្ស៊ី ប្រធានគណបក្សសង្គ្រោះជាតិ ដែលសុំឲ្យក្រសួងយុត្តិធម៌ ដោះលែង លោក មាជ សុវណ្ណារ៉ា នៅក្រៅឃុំ។ ក្រសួងបានលើកហេតុផលថា ការចាប់ឃុំខ្លួនសកម្មជនគណបក្សនយោបាយ ជាសមត្ថកិច្ចរបស់តុលាការ ក្រសួងយុត្តិធម៌ មិនមានសិទ្ធិលូកដៃលើកិច្ចការរបស់តុលាការទេ។ យ៉ាងណាក៏ដោយ អ្នកវិភាគចាត់ទុកសកម្មភាពចាប់ខ្លួនសកម្មជនគណបក្សនយោបាយនេះ ជារឿងនយោបាយ ព្រោះករណីនេះ ធ្លាប់បានកើតមាននៅមុនគណបក្សទាំងពីរបានចរចាបញ្ចប់វិបត្តិនយោបាយកាលពីខែកក្កដា នោះ។ លោក មាជ សុវណ្ណារ៉ា មិនអាចដោះលែងតាមរយៈលិខិតសុំអន្តរាគមន៍របស់ លោក សម រង្ស៊ី ប្រធានគណបក្សសង្គ្រោះជាតិ ដាក់ទៅក្រសួងមហាផ្ទៃ បានទេ។
-
សមាជិកព្រឹទ្ធសភាគណបក្សសម រង្ស៊ី ទាមទារឲ្យមានការដោះលែងព្រះសង្ឃ ប្រជាពលរដ្ឋ និងសកម្មជននយោបាយ
សមាជិកព្រឹទ្ធសភាមកពីគណបក្ស សម រង្ស៊ី ទាមទារឲ្យមានការដោះលែងព្រះសង្ឃ ស្ត្រីសកម្មជនដីធ្លី និងសកម្មជននយោបាយ ដែលត្រូវបានអាជ្ញាធរចាប់ខ្លួននាពេលថ្មីៗនេះ ជាបន្ទាន់ និងគ្មានលក្ខខណ្ឌ ។ ការទាមទារនេះធ្វើឡើងតាមរយៈសេចក្តីថ្លែងការណ៍របស់សមាជិកព្រឹទ្ធសភាគណបក្ស សម រង្ស៊ី ចុះថ្ងៃទី១៧ ខែវិច្ឆិកា ឆ្នាំ២០១៤ ។ ក្នុងសេចក្តីថ្លែងការណ៍នោះ សមាជិកព្រឹទ្ធសភាគណបក្ស សម រង្ស៊ី ក៏ធ្វើការស្នើទៅកាន់ថ្នាក់ដឹកនាំកំពូលគណបក្សទាំងពីរដែលមានអាសនៈក្នុងរដ្ឋសភានីតិកាលទី៥នេះ ឲ្យជួយអន្តរាគមន៍ឲ្យមានការដោះលែងព្រះសង្ឃ ប្រជាពលរដ្ឋ និងសកម្មជននយោបាយទាំងនេះផងដែរ ។
-
កម្ពុជានៅតែរក្សាគោលជំហរ ទទួលជនអន្តោប្រវេសន៍ ពីអូស្ត្រាលី គ្មានការផ្លាស់ប្តូរ
ទាក់ទងនឹងការបញ្ជូន ជនអន្តោប្រវេសន្ត៍ពី ប្រទេសអូស្ត្រាលី មកកម្ពុជា លោក កុយ គួង អ្នកនាំពាក្យក្រសួងការបរទេស បានបញ្ជាក់ជាថ្មី នៅព្រឹកថ្ងៃទី១៧ វិច្ឆិកានេះថា៖ កម្ពុជា នៅតែរក្សាគោលជំហរ ទទួលយកជនអន្តោប្រវេសន៍ ពីប្រទេសអូស្ត្រាលី មកកម្ពុជា ក្នុងនាមមនុស្សធម៌ ដោយគ្មានការផ្លាស់ប្តូរទេ។ លោកកុយ គួង បានមានប្រសាសន៍ថា៖ ជាធម្មតាទេ នៅពេលដែលរាជរដ្ឋាភិបាល អនុវត្តអ្វីមួយ មិនអាចបំពេញចិត្តមនុស្សទាំងអស់បានទេ តែងតែមានការយល់ឃើញ ខុសគ្នាខ្លះៗ ក៏ប៉ុន្តែនៅទីបំផុត អ្នកទាំងនោះ នឹងយល់ថា អ្វីៗនឹងប្រព្រឹត្តទៅ ដោយរលូនមិនមានបញ្ហាអ្វី ដូចដែលអ្នកទាំងនោះ បានគិតនោះទេ។
គាំទ្រដោយ
