កំពុងស្វែងរកទិន្នន័យ
រកឃើញ: 13.209
-
បក្សទាំងពីរ មិនទាន់ស្វែងរកចំណុចរួមត្រង់ការកំណត់សញ្ជាតិ និងញាតិលោហិតនៃសមាសភាព គជប
ក្រុមការងារបច្ចេកទេសបក្សទាំងពីរ បន្តខ្វែងគំនិតគ្នាត្រង់ការកំណត់សញ្ជាតិ និងដាក់ញាតិលោហិតរបស់សមាសភាព គណៈកម្មធិការរៀបចំការបោះឆ្នោត ខណៈចំណុចផ្សេងៗ ឯកភាពគ្នាបានច្រើន ។ បន្ទាប់ពីជំនួបរវាងបក្សទាំងពីរនៅរសៀលថ្ងៃទី១៧ ខែវិច្ឆិកា នៅវិមានរដ្ឋសភា ប្រធានក្រុមការងាររបស់គណបក្សប្រជាជនកម្ពុជា លោក ប៊ិន ឈិន ថ្លែងប្រាប់អ្នកសារព័ត៌មានថា កិច្ចប្រជុំថ្ងៃនេះ បក្សទាំងពីរនៅតែខ្វែងគំនិតគ្នាត្រង់ការកំណត់សញ្ជាតិខ្មែរពីកំណើត និងសញ្ជាតិខ្មែរតែមួយគត់ និងបញ្ហាមួយទៀត សមាសភាព គជប មិនត្រូវជាប់ញាតិលោហិត ឬសែលោហិតជាមួយប្រធានឬអនុប្រធានគណបក្សនយោបាយ ។ ទោះជាយ៉ាងណា លោកថា ចំពោះលក្ខណៈសម្បត្តិរបស់សមាសភាព គជប បក្សទាំងពីរឯកភាពគ្នា ដោយមិនតម្រូវឲ្យសមាសភាព គជប មានសញ្ញាបត្រផ្នែកច្បាប់ខាងរដ្ឋបាល ឬសេដ្ឋកិច្ចឡើយ ដោយគ្រាន់តែមានសញ្ញាបត្រចាប់ពីឧត្តមសិក្សាឡើងទៅ ។
-
អ្នកភូមិអូរដំរីខេត្តព្រះសីហនុចោទក្រុមហ៊ុនមួយថាជួលកម្លាំងស៊ីឈ្នួលឲ្យបំផ្លាញដំណាំពួកគាត់
ប្រជាពលរដ្ឋខេត្តព្រះសីហនុ ចោទក្រុមហ៊ុនមួយថា ជួលកម្លាំងស៊ីឈ្នួលឲ្យមកកម្ទេចដំណាំក្នុងភូមិរបស់ពួកគេ។ តំណាងសហគមន៍សង្កាត់អូរត្រេះ ហៅអូរដំរី ខណ្ឌស្ទឹងហាវ ខេត្តព្រះសីហុន លោក ង៉ែត ចន្ធូ ឲ្យVODដឹងនៅថ្ងៃទី១៥ ខែ វិចិ្ឆកា ឆ្នាំ ២០១៤នេះថា អ្នកស្រី ហ៊ឹម សុវណ្ណារី ដែលជាម្ចាស់ក្រុមហ៊ុន យ៉េ ម៉ាឡេ បានជួលកម្លាំងស៊ីឈ្នួលឲ្យមកកាប់និងដុតបំផ្លាញដំណាំរបស់ប្រជាពលរដ្ឋ ដោយចោទប្រជាពលរដ្ឋថា រស់នៅលើដីរបស់ខ្លួនដោយខុសច្បាប់។ លោកង៉ែត ចន្ធូ អះអាងថា ប្រជាពលរដ្ឋបានចូលទៅរស់នៅលើដីនៅភូមិអូរដំរីនេះតាំងពីឆ្នាំ១៩៨៦ មកម្ល៉េះ។ លោកបន្តថា កន្លងមកមានក្រុមហ៊ុនមួយចំនួន បានមករុះរើផ្ទះប្រជាពលរដ្ឋនៅក្នុងភូមិនេះ ពេលនោះពួកគាត់បានពឹងពាក់រកអ្នកឲ្យជួយ ក្នុងនោះមានឈ្មោះអ្នកស្រី ហ៊ឹម សុវណ្ណារី ម្ចាស់ក្រុមហ៊ុន យ៉េ ម៉ាឡេ ម្នាក់ដែរ។ ប៉ុន្តែមួយឆ្នាំក្រោយមក ស្រាប់តែអ្នកស្រី ហ៊ឹម សុវណ្ណារី អះអាងថា គាត់ក៏មានដីនៅនោះដែរ។ ពេលនោះហើយទំនាស់ក៏ចាប់ផ្ដើមកើតមានឡើង រវាងអ្នកភូមិ និងលោកស្រី ហ៊ឹម សុវណ្ណារី។
-
ព្រះសង្ឃមួយអង្គគង់នៅវត្តនាគវន្តរងសម្ពាធពេលចូលប្រឡូកសកម្មភាពទាមទារយុត្តិធម៌សង្គម
ព្រះសង្ឃមួយអង្គដែលចូលរួមទាមទារយុត្តិធម៌សង្គមញឹកញាប់ គង់នៅវត្តមួយក្នុងរាជធានីភ្នំពេញ ត្រូវអះអាងមកថា ប្រឈមនឹងការចាប់ព្រះកាយពីកម្លាំងអាជ្ញាធរ បើនៅតែបន្តចេញធ្វើសកម្មភាពដូចមុន។ ព្រះតេជគុណ កែវ សុមាលី គង់នៅវត្តនាគវន្ត ដែលព្រះចៅអធិការវត្ត ចេញប្រកាសកាលពីថ្ងៃទី១៤ខែវិច្ឆិកាឆ្នាំ២០១៤ ទុកពេលឲ្យ៤៨ម៉ោង ឲ្យនិមន្តចេញពីវត្ត មុនប្រគល់ឲ្យអាជ្ញាធរ ចាត់វិធានការនោះ ឲ្យVODដឹងនៅថ្ងៃទី១៦ខែវិច្ឆិកានេះថា ព្រះចៅអធិការ បានសម្រេចលុបចោលការបណ្តេញព្រះអង្គចេញពីវត្ត បន្ទាប់ពីព្រះអង្គ ទៅសុំខមាទោស នៅព្រះវិហារ រាល់ពាក្យពេចន៍ទាំងឡាយ ដែលព្រះអង្គមានដីកាជ្រុលជ្រួស ទៅលើថ្នាក់ដឹកនាំសង្ឃប្រចាំវត្តរូបនោះ។
-
ពលរដ្ឋជាង៣០០នាក់តវ៉ានៅមុខពន្ធនាគារព្រៃសទាមទារឲ្យដោះលែងមនុស្ស១៧នាក់
សកម្មជនការពារដីធ្លី ប្រជាពលរដ្ឋ និងព្រះសង្ឃ ប្រមាណ៣០០នាក់ និងអង្គ បានប្រមូលផ្ដុំគ្នា នៅខាងមុខពន្ធនាគារព្រៃស នៅថ្ងៃទី ១៦ វិច្ឆិកា។ ការជួបជុំនេះ គឺដើម្បីទាមទារឲ្យមានដោះលែង សកម្មជនគណបក្សនយោបាយ ព្រះសង្ឃ និងសកម្មជនការពារដីធ្លីចំនួន ១៧នាក់។ អង្គការសង្គមស៊ីវិល ដែលឃ្លាំមើលការវិវត្តនៃការឃុំខ្លួននេះ យល់ឃើញថា ដោយសារការផ្ដល់យុត្តិធម៌មានភាពលម្អៀង មិនអាចទទួលយកបាន និងជាសេចក្ដីសម្រេច មិនផ្អែកលើភស្តុតាងក្នុងការដាក់បន្ទុកឲ្យបានត្រឹមត្រូវ នេះគឺជាមូលហេតុចម្បងដែលនាំឲ្យមានការតវ៉ា រហូតដល់មុខពន្ធនាគារដូច្នេះ។
-
សហគមន៍មានជម្លោះដីធ្លីប្រកាសធ្វើបាតុកម្មមុខពន្ធនាគារព្រៃសរាល់ថ្ងៃអាទិត្យ
ប្រជាសហគមន៍មកពីរាជធានីខេត្ត ប្រកាសមុខពន្ធនាគារព្រៃស នាព្រឹកថ្ងៃអាទិត្យនេះថា ពួកគេនឹងប្រមូលផ្តុំគ្នាតវ៉ាមុខពន្ធនាគារនេះ រៀងរាល់មួយសប្តាហ៍ម្តង បើតុលាការមិនដោះលែងសកម្មជន១៧នាក់ឲ្យមានសេរីភាពវិញទេនោះ។ ការប្រកាសនេះ ធ្វើឡើងក្នុងពិធីរំដោះគ្រោះតាមបែបព្រះពុទ្ធសាសនា នៅមុខពន្ធនាគារព្រៃស នាថ្ងៃទី១៦ខែវិច្ឆិកាឆ្នាំ២០១៤នេះ នូវអ្វីដែលក្រុមអ្នកតវ៉ាជឿថា អាចជំរុញឲ្យសកម្មជនទាំង១៧នាក់ដែលកំពុងជាប់ឃុំខ្លួន អាចរួចផុតពីការចោទប្រកាន់ទាំងអយុត្តិធម៌។ ក្នុងពិធីតស៊ូមតិដោយសន្តិវិធីនោះ ព្រះសង្ឃដែលបាននិមន្តចូលរួម បានសូត្រកំណាព្យ បែបបន្ទន់ចិត្តឲ្យមន្ត្រីពាក់ព័ន្ធពិចារណា ដោះលែងអ្នកតស៊ូមតិទាំងនោះឲ្យមានសេរីភាពវិញ។
-
សហព័ន្ធខែ្មរកម្ពុជាក្រោមថ្កោលទោសអាជ្ញាធរក្រុងភ្នំពេញចាប់ផ្សឹកព្រះសង្ឃ
សហព័ន្ធខែ្មរកម្ពុជាក្រោម ថ្កោលទោសអាជ្ញាធរក្រុងភ្នំពេញ ដែលបានចាប់ផ្សឹកព្រះសង្ឃខែ្មរកម្ពុជាក្រោម ៣អង្គ ដាក់ពន្ធនាគារនៅព្រៃស ដោយចាត់ទុកទង្វើនេះថា ជាការរំលោភបំពានយ៉ាងធ្ងន់ធ្ងរលើរដ្ឋធម្មនុញ្ញនៃប្រទេសកម្ពុជា។ លិខិតរបស់ប្រធានប្រតិបត្តិសហព័ន្ធខ្មែរកម្ពុជាក្រោម លោកថាច់ ង៉ុកថាច់ ផ្ញើជូនរដ្ឋមន្ត្រីក្រសួងការបរទេសលោកហោ ណាំហុង នៅថ្ងៃ១៤ វិច្ឆិកា បានចាត់ទុកការចាប់ព្រះកាយ និងផ្សឹកព្រះសង្ឃខ្មែរកម្ពុជាក្រោម៣អង្គនៅវត្តស្ទឹងមានជ័យ មានព្រះតេជគុណ សឺន ហាយ ព្រះតេជគុណ ថាច់ សាង និងព្រះតេជគុណ ឃិត វណ្ណៈ ជាការរំលោភលើបញ្ញត្តិពុទ្ធសាសនាផង និងរំលោភលើរដ្ឋធម្មនុញ្ញនៃព្រះរាជាណាចក្រកម្ពុជាផង។
-
អ្នកមានជម្លោះដីធ្លីធ្វើពិធីបន់ស្រន់មុខពន្ធនាគារព្រៃសជំរុញឲ្យដោះលែងសកម្មជន១៧នាក់
ប្រជាសហគមន៍អ្នកមានជម្លោះដីធ្លីប្រមាណ២០០នាក់ នៅព្រឹកថ្ងៃអាទិត្យនេះ ប្រមូលផ្ដុំគ្នាដោយសន្តិវិធីនៅពន្ធនាគារព្រៃស ដើម្បីបួងសួងឲ្យមន្ត្រីពាក់ព័ន្ធដោះលែងតំណាងពួកគេឲ្យមានសេរីភាពឡើងវិញ។ ពលរដ្ឋមកពីសហគមន៍ឡពាង ខេត្តកំពង់ឆ្នាំង សហគមន៍បឹងប្រាំ ខេត្តបាត់ដំបង ព្រមទាំងប្រជាសហគមន៍មានជម្លោះដីធ្លីមកពីខេត្តព្រះវិហារ រួមជាមួយប្រជាសហគមន៍មួយចំនួនទៀតនៅរាជធានីភ្នំពេញ មានសហគមន៍បឹងកក់ បុរីកីឡា និងថ្មគោល នៅព្រឹកថ្ងៃអាទិត្យទី១៦ វិច្ឆិកា នេះ បានប្រមូលផ្ដុំគ្នានៅជិតពន្ធនាគារព្រៃស ធ្វើពិធីតាមបែបពុទ្ធសាសនា មានការធ្វើសមាធិ សូត្រមន្តរំដោះគ្រោះ និងបួងសួងឲ្យមានការដោះលែងតំណាងពួកគេឲ្យមានសេរីភាព។
-
វិភាគ៖កំសោយរបស់តុលាការនឹងមានផលវិបាកអ្វីខ្លះដល់សង្គម?
ស្ថាប័នតុលាការគ្រប់ជាន់ថ្នាក់ បច្ចុប្បន្នរងការរិះគន់ពីសគមន៍មានជម្លោះដីធ្លី អង្គការសង្គមស៊ីវិល និងសហគមន៍អន្តរជាតិមួយចំនួនថា ទន់ខ្សោយបំពេញការងារមិនឯករាជ្យ មិនអាចការពារផលប្រយោជន៍ប្រជាពលរដ្ឋឲ្យទទួលបានផលពីសង្គមដោយស្មើភាពគ្នាចំពោះមុខច្បាប់បានទេ . ប្រជាសហគមន៍មានជម្លោះដីធ្លី ក៏ដូចជាកម្មកររោងចក្រ បានធ្វើបាតុកម្មជាបន្តបន្ទាប់ ទាំងនៅរាជធានីភ្នំពេញ និង នៅតាមបណ្តាខេត្តដើម្បីស្វែងរកយុត្តិធម៌ការពារផលប្រយោជន៍ពួកគេ។ ពេលសួរថា ហេតុអ្វីបានជាពលរដ្ឋទាំងនោះមិនប្តឹងទៅតុលាការ ចាំបាច់តវ៉ាតាមដងផ្លូវដែលពេលខ្លះរងការវាយដំ និងត្រូវចាប់ខ្លួនទៀតនោះ? អ្នកទាំងនោះឆ្លើយថា ពួកគាត់មិនមានជំនឿលើប្រជាពលរដ្ឋតុលាការទេ។ ពេលខ្លះអ្នកតវ៉ាទាំងនោះលើកឡើងថា យុត្តិធម៌មិនមានទេសម្រាប់ពលរដ្ឋក្រីក្រ។
-
ព្រះសង្ឃដែលធ្លាប់ទាមទារយុត្តិធម៌សង្គមប្រកាសប្រឆាំងនឹងការបណ្តេញព្រះអង្គចេញពីវត្ត
ព្រះសង្ឃមួយអង្គ គង់នៅវត្តនាគវន្ត ក្នុងរាជធានីភ្នំពេញ ដែលធ្លាប់ចូលរួមជាញឹកញាប់ ទាមទារយុត្តិធម៌សង្គម អះអាង នៅថ្ងៃសៅរ៍នេះថា ព្រះអង្គនឹងមិននិមន្តចេញពីវត្ត តាមប្រកាសបណ្តេញចេញ របស់ព្រះចៅអធិការទ ដើម្បីបញ្ជាក់ថា ព្រះអង្គមិនបានធ្វើអ្វីខុសនឹងវិន័យសង្ឃ និងច្បាប់រដ្ឋ។ ការប្រកាសជំហរបស់ព្រះតេជគុណ កែវ សុមាលី នៅថ្ងៃនេះ ធ្វើឡើងមួយថ្ងៃ ក្រោយពីព្រះចៅអធិការវត្តនេះ ចេញលិខិតផ្លូវការ ទុកពេល៤៨ម៉ោង ឲ្យព្រះតេជគុណ ចេញពីវត្ត ដោយគ្មានលក្ខខណ្ឌ បើពុំនោះទេនឹងប្រគល់ឲ្យអាជ្ញាធរចាត់វិធានការផ្លូវច្បាប់ ដោយចោទថា ព្រះតេជគុណ កែវ សុមាលី ជាប់ពាក់ព័ន្ធនឹងការប្រើហិង្សា បង្កឲ្យព្រះសង្ឃដូចគ្នា រងរបួសលើព្រះកេស។
-
យូនីសេហ្វជំរុញរដ្ឋាភិបាលបង្កភាពងាយស្រួលដល់ជនពិការក្នុងការចូលរួមសកម្មភាពសង្គម
អង្គការយូនីសេហ្វ (UNICEF) ប្រចាំប្រទេសកម្ពុជា ជំរុញឲ្យរដ្ឋាភិបាលបង្កភាពងាយស្រួលដល់ជនពិការក្នុងការចូលរួមសកម្មភាពសង្គមនានា ដោយអះអាងថា នាពេលបច្ចុនប្បន្ន ជនពិការ ជាពិសេសកុមារដែលពិការ នៅមានការលំបាកច្រើនក្នុងការចូលរួម និងទទួលបានសេវាសង្គម ។ ការជំរុញនេះ ធ្វើឡើងក្នុងកម្មវិធីសំណួរចម្លើយជាមួយអ្នកសារព័ត៌មាន នៅរសៀលថ្ងៃទី១៤ ខែវិច្ឆិកា នៅសណ្ឋាគារSunway ក្នុងទីក្រុងភ្នំពេញ ។ តំណាងអង្គការយូនីសេហ្វប្រចាំប្រទេសកម្ពុជា លោកស្រី Rana Flowers លើកឡើងតាមរយៈអ្នកបកប្រែថា សេវាកម្ម ឬហេដ្ឋារចនាសម្ព័ន្ធនៅក្នុងទីក្រុង ឬក៏ទីជនបទក្នុងប្រទេសកម្ពុជាមិនទាន់បង្កភាពងាយស្រួលគ្រប់គ្រាន់ដល់កុមារពិការ ឬជនពិការនៅឡើយទេ ជាក់ស្តែងដូចជាជនពិការភ្នែក ឬគថ្លង់ ពិបាកនឹងទទួលយកសេវាសង្គម និងធ្វើដំណើរ។ លោកស្រីថា ជនពិការ ពិសេសកុមារពិការត្រូវការការលើកទឹកចិត្ត និងការផ្តល់ឱកាសពីមជ្ឈដ្ឋានជុំវិញ ដើម្បីឲ្យគាត់បានបញ្ចេញសមត្ថភាពដែលខ្លួនគាត់មានដូចទៅនឹងជនមិនពិការដទៃទៀត ។
-
គណបក្សប្រជាជនកម្ពុជាច្រានចោលការចោទប្រកាន់ថាខ្លួនប្រើដៃតុលាការគំរាមដៃគូប្រកួត
បក្សកាន់អំណាច ថ្កោលទោសដាច់អហង្ការ ទៅនឹងការចោទប្រកាន់ទាំងឡាយណាដែលថា ខ្លួនកំពុងខ្ចីដៃតុលាការ ដើម្បីវាយបំបាក់ស្មារតីដៃគូប្រកួត ឲ្យទទួលយកនូវលក្ខខណ្ឌអ្វីមួយដែលខ្លួនចង់បាន។ ការច្រានចោលរបស់បក្សកាន់អំណាចនេះ ធ្វើឡើងបន្ទាប់ពីបក្សប្រឆាំងចោទប្រកាន់ថា ការចាប់ឃុំខ្លួនសកម្មជនរបស់ខ្លួនជាបន្តបន្ទាប់ ថាជាការរំលោភលើស្មារតីនៃកិច្ចព្រមព្រៀងបញ្ចប់ជម្លោះនយោបាយថ្ងៃ២២ ខែកក្កដា ឆ្នាំ២០១៤ កន្លងទៅ និងស្នើឲ្យបក្សកាន់អំណាច ពិចារណាដោះលែងជនដែលត្រូវចាប់ឃុំខ្លួនទាំងនោះវិញ ដើម្បីធានាថាដំណើរការជជែកពីកំណែទម្រង់ច្បាប់បោះឆ្នោត ដំណើរការទៅដោយស្មើភាព។
-
មេដឹកនាំបក្សប្រឆាំងគ្រោងទៅជួបសមាជិកបក្សរបស់ខ្លួននៅពន្ធនាគារព្រៃស
មេដឹកនាំគណបក្សប្រឆាំង គ្រោងនឹងចូលជួបសួរសុខទុក្ខមន្ត្រីរបស់ខ្លួន ព្រមទាំងស្រី្តសកម្មជនដីធ្លីបឹងកក់ រួមទាំងព្រះសង្ឃផង ដែលអាជ្ញាធរកំពុងឃុំខ្លួននៅពន្ធនាគារព្រៃស។ ប្រធានខុទ្ទកាល័យអនុប្រធានទី១នៃរដ្ឋសភាលោក មុត ចន្ថា បានឲ្យVODដឹងនៅថ្ងៃសៅរ៍នេះថា នៅថ្ងៃចន្ទ ទី១៧ ខែវិចិ្ឆកា ឆ្នាំ២០១៤ ខាងមុខនេះ លោក កឹម សុខា នឹងឲ្យមេធាវីរបស់លោករៀបចំបែបបទ ដាក់ពាក្យស្នើសុំចូលជួបសួរសុខទុក្ខសកម្មជនគណបក្សសង្គ្រោះជាតិ ព្រមទាំងសកម្មជនដីធ្លីដទៃទៀត ដែលត្រូវបានអាជ្ញាធរចាប់ខ្លួន ប៉ុន្តែលោកមិនកំណត់ថ្ងៃចុះជួបនៅឡើយទេ ព្រោះមិនដឹងថាអាជ្ញាធរនឹងអនុញ្ញាតឲ្យចូលជួបនៅថ្ងៃណា។
-
គ្រូបង្រៀនមួយចំនួននៅសៀមរាបរអ៊ូរឿងមិនទាន់បើកប្រាក់បង្រៀនបន្ថែមម៉ោង
គ្រូបង្រៀនមួយចំនួននៅខេត្ដសៀមរាប ស្នើឲ្យរដ្ឋមន្ដ្រីក្រសួងអប់រំ យុវជន និងកីឡា ជួយពន្លឿនបើកប្រាក់បន្ថែមម៉ោង ឲ្យទាន់ពេលវេលា ដើម្បីជួយដោះស្រាយជីវភាពគ្រួសារ ខណៈប្រាក់បៀវត្សរ៍ពួកគាត់មិនអាចផ្គត់ផ្គង់ជីវភាពបាន។ គ្រូបង្រៀននៅវិទ្យាល័យ ១០មករា ឆ្នាំ១៩៧៩ ខេត្ដសៀមរាប លោក ហ៊ួត គីរីវី ថ្លែងប្រាប់VODនៅព្រឹកថ្ងៃសុក្រថា ប្រាក់បន្ថែមម៉ោងពួកគាត់ក្នុងឆ្នាំសិក្សា២០១៣ -២០១៤ ចំនួន៣ខែ ដោយចាប់ពីខែឧសភា ដល់ខែកក្កដា ឆ្នាំ២០១៤នេះ មិនទាន់បើកនៅឡើយទេ។ លោកបន្ដថា លោក និងគ្រូបង្រៀនផ្សេងទៀត សង្ឃឹមលើប្រាក់បន្ថែមម៉ោងនេះ ខណៈប្រាក់ខែមិនអាចផ្គត់ផ្គង់ជីវភាពបាន។ លោកថា ពួកគាត់ស្នើឲ្យស្ថាប័នពាក់ព័ន្ធ ពិសេសក្រសួងអប់រំ ជួយពន្លឿនបើកប្រាក់បន្ថែមម៉ោងនេះឲ្យបានទាន់ពេល ដើម្បីជួយដោះបន្ទុកជីវភាពគ្រួសារ។
-
សមាគមអាដហុកខេត្តកោះកុងថ្កោលទោសក្រុមហ៊ុនចិនឈូសឆាយផ្ទះប្រជាពលរដ្ឋ
សមាគមអាដហុកប្រចាំខេត្តកោះកុង ថ្កោលទោសសកម្មភាពក្រុមហ៊ុនចិន ដែលបានឈូសឆាយដីដំណាំ រុះរើ និងដុតកម្ទេចផ្ទះប្រជាពលរដ្ឋក្នុងស្រុកគិរីសាគរ ខេត្តកោះកុង ថាជាអំពើរំលោភសិទ្ធិមនុស្ស។ យោងសេចក្ដីប្រកាសព័ត៌មានលើទំព័រទំនាក់ទំនងសង្គមរបស់សមាគមអាដហុក ចុះផ្សាយថ្ងៃ១៤ វិច្ឆិកា ឲ្យដឹងថា ក្រុមហ៊ុនចិន Union Devotement Group បានឈូសឆាយចម្ការដំណាំ រុះរើ និងដុតកម្ទេចផ្ទះសម្បែងប្រជាពលរដ្ឋនៅស្រុកគិរីសាគរ ខេត្តកោះកុងជាបន្តបន្ទាប់។
-
ព្រះសង្ឃនិងពលរដ្ឋដាក់ញត្តិតាមស្ថានទូតនានា រកអន្តរាគមន៍ដោះលែងមនុស្ស១៧នាក់
ព្រះសង្ឃ និងប្រជាពលរដ្ឋប្រមាណ២០០អង្គនាក់ នៅព្រឹកថ្ងៃអង្គារនេះ ដង្ហែញត្តិទៅដាក់តាមស្ថានទូតនានាក្នុងរាជធានីភ្នំពេញ រកអន្តរាគមន៍ឲ្យមានការដោះលែងសកម្មជន ដែលអាជ្ញាធរទើបតែបានចាប់ខ្លួន និងតាមដានដំណើរការសវនាការជំនុំជម្រះក្ដីព្រះសង្ឃមួយអង្គនាពេលខាងមុខ។ ព្រះសង្ឃមួយអង្គដែលចូលរួមយ៉ាងសកម្មជាមួយប្រជាពលរដ្ឋមានជម្លោះដីធ្លី ព្រះតេជគុណ លួន សុវ៉ាត មានសង្ឃដីកាពេលហែញត្តិទៅដល់ស្ថានទូតអាមេរិកនៅព្រឹកនេះថា គោលបំណងនៃការដាក់ញត្តិតាមស្ថានទូតនៅព្រឹកនេះ គឺដើម្បីជំរុញឲ្យមានការដោះលែងសកម្មជនដីធ្លី ព្រះសង្ឃ និងអ្នកនយោបាយ ចំនួន១៧នាក់ ដែលអាជ្ញាធរទើបតែចាប់ខ្លួននាពេលចុងក្រោយនេះ និងអំពាវនាវឲ្យអន្តរជាតិឃ្លាំមើលសវនាការជំនុំជម្រះក្ដីព្រះអង្គ។
-
អតីតអ្នកកាសែតជប៉ុនម្នាក់បោះពុម្ភផ្សាយសៀវភៅគំនូរដើម្បីជួយលុបបំបាត់ការជួញដូរមនុស្សនៅកម្ពុជា
អតីតអ្នកកាសែតជប៉ុនម្នាក់ កំពុងព្យាយាមជួយលុបបំបាត់ការជួញដូរមនុស្សនៅក្នុងប្រទេសកម្ពុជា តាមរយៈការបោះពុម្ភផ្សាយសៀវភៅគំនូរ ដើម្បីចែកចាយដល់កុមារ នៅទូទាំងប្រទេស ដើម្បីកុំឲ្យពួកគេចាញ់បោកពួកអ្នកជួញដូរ។ លោក ប៉ូច រាសី នៃវីអូអេ បានសម្ភាសអ្នកស្រី Natsuko Utsumi ដែលជាអ្នកបង្កើតអង្គការមិនមែនរដ្ឋាភិបាលមួយ ឈ្មោះ Cause Vision។ បទសម្ភាសន៍មានសេចក្តីជូនដូចតទៅ៖
-
មជ្ឈមណ្ឌលសិទ្ធិមនុស្សកម្ពុជាជំរុញឲ្យរដ្ឋាភិបាលបញ្ចប់វប្បធម៌និទណ្ឌភាព
អង្គការសង្គមស៊ីវិលក្នុងស្រុកមួយដែលធ្វើការផ្នែកសិទ្ធិមនុស្ស ជំរុញឲ្យរាជរដ្ឋាភិបាលកម្ពុជា ចាត់វិធានការស៊ើបអង្កេតដោយឯករាជ្យ ចាប់ជនដៃដល់សម្លាប់មនុស្សមកផ្ដន្ទាទោសឲ្យខាងតែបាន ដើម្បីលុបបំបាត់វប្បធម៌និទណ្ឌភាពនៅកម្ពុជា។ យោងតាមកំណត់ត្រាចំនួន៥ទំព័រ របស់មជ្ឈមណ្ឌលសិទ្ធិមនុស្សកម្ពុជា (CCHR) ចេញផ្សាយនៅ ខែវិចិ្ឆកា ឆ្នាំ ២០១៤ បានលើកឡើងថា ឃាតកម្មសម្លាប់អ្នកកាសែតដូចជាលោកឃឹម សំបូរ លោកហង្ស សេរីឧត្តម ប្រធានសហជីពលោកជា វិជ្ជា សកម្មជនសិទ្ធិមនុស្សនិងព្រៃឈើ លោកឈុត វុទ្ធី និង ឃាតកម្មលើប្រជាពលរដ្ឋមួយចំនួនទៀត ជិត១០ឆ្នាំ មកនេះ រដ្ឋាភិបាលមិនបានវែកមុខជនដៃដល់មកផ្ដន្ទាទោសតាមច្បាប់ទេ ដែលជាកត្តាជំរុញឲ្យមានការបាញ់សម្លាប់មនុស្សជាហូរហែ ដែល(CCHR) ចាត់ទុកថាជាឫសគល់វប្បធម៌និទណ្ឌភាពនៅកម្ពុជា។
-
CCHR បង្ហាញពី និទណ្ឌភាព ក្នុងប្រទេសកម្ពុជា បន្តអូសបន្លាយ
មជ្ឈមណ្ឌល សិទ្ធិមនុស្សកម្ពុជា(CCHR) បានលើកឡើងនៅក្នុងកំណត់ត្រាសង្ខេប ប្រចាំខែរបស់ខ្លួន ថា និទណ្ឌភាព(ការមិនត្រូវផ្ដន្ទាទោស ឬគ្មានផលវិបាកណាមួយ) ក្នុងប្រទេសកម្ពុជានៅតែបន្តអូសបន្លាយ ហើយថារដ្ឋាភិបាលគ្មានឆន្ទៈក្នុងការលុបបំបាត់។
-
កម្មកររោងចក្រនៅកំពង់ចាមហែក្បួនតវ៉ាឲ្យដោះលែងតំណាងរបស់ខ្លួន៥នាក់
កម្មកររោងចក្រ ជូ ហួយ ហ្វ៊ូតវែ (Juhui Footwear) ក្នុងខេត្តកំពង់ចាមមានគ្នាប្រមាណ៣០០នាក់ នៅព្រឹកថ្ងៃសុក្រនេះ ធ្វើការហែក្បួនតវ៉ាទាមទារឲ្យតុលាការខេត្ដនេះ ដោះតំណាងខ្លួន៥នាក់ និងទាមទារឲ្យរោងចក្រទទួលកម្មករដែរត្រូវបានបញ្ឈប់ចូលធ្វើការវិញ។ មន្ដ្រីផ្នែកច្បាប់នៅសហជីពស៊ីខៅឌូលោក ប៊ុត ប៊ុនឈាន ឲ្យVODដឹងនៅថ្ងៃសុក្រនេះថា កម្មករបានហែក្បួនទៅមុខសាលាដំបូងខេត្ដកំពង់ចាម ដើម្បីទាមទារតវ៉ាឲ្យដោះលែងតំណាងរបស់ខ្លួន៥នាក់ទៀតដែលសមត្ថកិច្ចបានចាប់ខ្លួនទៅដាក់ពន្ធនាគារខេត្ដកំពុងចាមកាលពីថ្ងៃសៅរ៍ ទី២៥ ខែតុលា ឆ្នាំ២០១៤ ដែលក្រោយមកអ្នកទាំង៥ត្រូវតុលាការបញ្ជូនទៅមន្ទីឃុំឃាំងនៅពន្ធនាគារវត្ដធ្នង់ជាបណ្ដោះអាសន្ន។
-
បទយកការណ៍៖ អ្នកមានជម្លោះដីធ្លីកាន់តែច្រើននាំគ្នាសម្រុកមកស្នាក់នៅភ្នំពេញ រង់ចាំដំណោះស្រាយ
«ថ្ងៃ៨បារាំង ខែ៩(កញ្ញា)ហ្នឹងមក អុី(មីង)អត់ដែលទៅណាទេ អុីដាច់ខាតជាមួយប្រជាជននៅរង់ចាំរហូត ចាំមើលសម្តេចហ៊ុន សែន និងលោកប្រធានសម រង្ស៊ី កឹម សុខា សភាគាត់ជួយទាំងអស់ ហើយឥឡូវខ្ញុំនៅចាំរហូតអូនអត់ទៅណាដាច់ខាត។ អស់ដីមានស្អីទៀត បើម្តាយមិនខំប្រឹង កូនក៏យ៉ាប់ទៅទៀត។ បងលំបាក់ខ្លាំងណាស់ សូម្បីតែផ្ទះក៏គ្មាននៅដែរ បងនៅដោយខ្ទមតូច...»។ គិតត្រឹមខែតុលានេះ មានរយៈពេលជិត៣ខែហើយ ដែលអ្នកមានជម្លោះដីធ្លីដ៏រ៉ាំរ៉ៃនៅតាមបណ្តាខេត្តនានា បាននាំគ្នាសម្រុកមកស្នាក់នៅរាជធានីភ្នំពេញ ដើម្បីយកញត្តិដាក់ទៅលោកនាយករដ្ឋមន្ត្រី ហ៊ុន សែន រដ្ឋសភា និងស្ថាប័នពាន់ព័ន្ធផ្សេងទៀតឲ្យពន្លឿនដោះស្រាយ។
គាំទ្រដោយ
