កំពុងស្វែងរកទិន្នន័យ
រកឃើញ: 12.457
-
ប្រជាពលរដ្ឋពយជប៉ុនខេត្តកោះកុងប្ដេជ្ញាបន្តបិទផ្លូវរហូតមានដំណោះស្រាយ
ប្រជាពលរដ្ឋ៣០គ្រួសារនៅចំណុចពយជប៉ុន ភូមិព្រែកស្មាច់ ឃុំកោះស្តេច ស្រុកគិរីសាគរ ខេត្តកោះកុង ប្ដេជ្ញាបន្តបិទផ្លូវរបស់ក្រុមហ៊ុនចិនទៅកាន់កំពង់ផែសមុទ្រជំរុញឲ្យក្រុមហ៊ុនចិន និងអាជ្ញាធរពាក់ព័ន្ធបើកផ្លូវចូលភូមិដូចធម្មតាឡើងវិញ និងឆ្វៀលដីភូមិរបស់ពួកគេចេញពីគម្រោងអភិវឌ្ឍន៍របស់ក្រុមហ៊ុនចិននោះ ។ តំណាងប្រជាពលរដ្ឋដែលកំពុងតវ៉ា លោកស៊ឹម គឹមសាន ឲ្យVODដឹងនៅថ្ងៃអាទិត្យនេះថា មកដល់ថ្ងៃនេះប្រជាពលរដ្ឋ៣០គ្រួសារនៅពយជប៉ុនបានបិទផ្លូវរបស់ក្រុមហ៊ុនចិនទៅកាន់កំពង់ផែសមុទ្រអស់រយៈពេល២២ថ្ងៃហើយ ដើម្បីជំរុញឲ្យមានដំណោះស្រាយបើកផ្លូវចូលភូមិ និងឆ្វៀលដីភូមិរបស់ពួកគេទំហំ៣៥ហិកតាដែលមានទាំងសាលារៀន និងវត្តអារ៉ាមផងចេញពីការអភិវឌ្ឍរបស់ក្រុមហ៊ុនចិន UDG ( Union Development Group) Co.,Ltd ។
-
វៀតណាមជំរុញឲ្យពង្រឹងសន្តិសុខព្រំដែនខណៈបក្សប្រឆាំងនៅកម្ពុជារកឃើញមានការរំលោភទឹកដីខ្មែរ
ក្រសួងមួយនៃប្រទេសវៀតណាម កាលពីថ្ងៃសុក្រម្សិលមិញបានស្នើឲ្យកម្ពុជាសហការគ្នាដើម្បីទប់ស្កាត់បទឧក្រិដ្ឋឆ្លងដែននានារួមទាំងពង្រឹងសន្តិសុខតាមខ្សែក្រវ៉ាត់ព្រំដែន ។ ការស្នើសុំនេះធ្វើឡើងបន្ទាប់ពីមន្ត្រីបក្សប្រឆាំងរកឃើញថា ប្រទេសជិតខាងមួយនេះបានធ្វើផ្លូវរំលោភចូលដីខ្មែរជិត៥០គីឡូម៉ែត្រនៅឃុំដាក់ដាំក្នុងខេត្តមណ្ឌលគិរី ។ កិច្ចព្រមព្រៀងនោះធ្វើឡើងរវាងមន្ត្រីជាន់ខ្ពស់នគរបាលសាធារណៈរដ្ឋប្រជាមានិតវៀតណាម លោក ត្រឹង ដាយក្វាង និងរដ្ឋមន្ត្រីក្រសួងមហាផ្ទៃកម្ពុជា លោក ស ខេង កាលពីថ្ងៃទី១៦ខែមករាឆ្នាំ២០១៥ម្សិលមិញ ។ នៅចុងឆ្នាំ២០១៤ តំណាងរាស្ត្របក្សប្រឆាំង លោក ម៉ៅ មុនីវណ្ណ បានស្នើប្រធានរដ្ឋសភាលោកហេង សំរិន ឲ្យកោះហៅ លោកនាយករដ្ឋមន្ត្រីហ៊ុន សែន មកសាកសួរដេញដោលផ្ទាល់មាត់ក្នុងរដ្ឋសភាករណីរដ្ឋាភិបាលមិនអាចទប់ស្កាត់បាន នូវអ្វីដែលលោកអះអាងថា វៀតណាមបានធ្វើ ផ្លូវក្រាលកៅស៊ូរំលោភចូលដីកម្ពុជានៅតំបន់ដាក់ដាំ ខេត្តមណ្ឌលគិរី ប្រមាណជិត៥០គីឡូម៉ែត្រ ។
-
ថៃយល់ព្រមឈប់ប្រើអាវុធបាញ់ប្រហារមកលើពលរដ្ឋខ្មែរដែលឆ្លងដែនខុសច្បាប់
ភាគីថៃបានឯកភាព និងយល់ព្រមឈប់ប្រើប្រាស់អាវុធខុសបាញ់ប្រហារមកលើពលរដ្ឋខ្មែរ ដែលឆ្លងដែនចូលកាប់ឈើខុសច្បាប់នៅតាមខ្សែបន្ទាត់ព្រំដែន នៃប្រទេសទាំងពីរ ដោយត្រូវអនុវត្ដតាមនីតិវិធីច្បាប់ ចំពោះអ្នកប្រព្រឹត្តបទល្មើសនោះ ។ ថ្លែងប្រាប់អ្នកសារព័ត៌មានក្រោយកិច្ចប្រជុំគណៈកម្មការចម្រុះ សម្រាប់កិច្ចសហប្រតិ្ដការទ្វេភាគីកម្ពុជា-ថៃ លើកទី៩ រយៈពេលពីរថ្ងៃ ចាប់ពីថ្ងៃទី១៥ ដល់ថ្ងៃទី១៦ ខែមករា នៅខេត្ដសៀមរាប អ្នកនាំពាក្យក្រសួងការបរទេស និងសហប្រតិបត្ដិការអន្ដរជាតិកម្ពុជា លោក កុយ គួង ឲ្យដឹងថារដ្ឋាភិបាលកម្ពុជា និងថៃបានឯកភាពគ្នាចាត់វិធានការមិនឲ្យការកាប់ឈើខុសច្បាប់ នៅតាមខ្សែបន្ទាប់ព្រំដែននៃប្រទេសទាំងពីរបន្ដទៀតនោះទេ ។ លោកបន្ដថា ភាគីទាំងពីរបានឯកភាពដើរល្បាតរួមគ្នា និងផ្ដល់ព័ត៌មានឲ្យគ្នាទៅវិញទៅមក ហើយបើសិនមានឧបទ្ធវហេតុណាមួយកើតឡើង ដែលបណ្ដាលឲ្យមានមនុស្សស្លាប់ ឬរបួស ភាគីទាំងពីរត្រូវស៊ើបអង្កេតឲ្យបានច្បាស់លាស់ ។
-
ក្រុមសិទ្ធិមនុស្ស៖ប្រជាធិបតេយ្យ និងសិទ្ធិមនុស្សថយក្រោយក្រោមការដឹកនាំ៣០ឆ្នាំរបស់លោកហ៊ុន សែន
វ៉ាស៊ីនតោន—លោកនាយករដ្ឋមន្ត្រីហ៊ុន សែននៃប្រទេសកម្ពុជាបានកាន់កាប់អំណាច៣០ឆ្នាំហើយមកដល់ថ្ងៃពុធសប្តាហ៍នេះ។ នៅក្នុងថ្ងៃខួបនៃការកាន់អំណាចដ៏យូរម្នាក់ក្នុងពិភពលោក លោកហ៊ុន សែនរងការរិះគន់ជាច្រើនទាក់ទងនឹងការរំលោភសិទ្ធិមនុស្សដ៏ធ្ងន់ធ្ងរ និងធ្វើឲ្យប្រជាធិបតេយ្យមិនដើរទៅមុខ។ ការរិះគន់ពីក្រុមអង្គការសិទ្ធិមនុស្ស និងអ្នកសង្កេតការណ៍អន្តរជាតិទាំងនោះ រាប់បញ្ចូលទាំងការដឹកនាំប្រទេសតាមរបៀបជិះជាន់ គាបសង្កត់ ប្រើអំពើហិង្សា រំលោភសិទ្ធិមនុស្ស បង្អាក់ដំណើរការប្រជាធិបតេយ្យ ពុករលួយ បក្ខពួកនិយម បង្កើតវប្បធម៌និទណ្ឌភាព ការបាញ់សម្លាប់កម្មករ ការបង្កឲ្យជនស៊ីវិលស្លាប់ ការរំលោភយកដីធ្លីប្រជាពលរដ្ឋ និងការប្រើប្រាស់ប្រព័ន្ធតុលាការដើម្បីបំបិទមាត់ក្រុមជំទាស់ជាដើម។
-
គណបក្សប្រជាជនស្នើឲ្យកំណត់សិទ្ធិសង្គមស៊ីវិលបន្ថែមទៀតក្នុងច្បាប់បោះឆ្នោត
មន្រ្តីជំនាញកំណែទម្រង់ការបោះឆ្នោតរបស់គណបក្សប្រជាជនកម្ពុជា ស្នើឲ្យមានការកំណត់សិទ្ធិរបស់សង្គមស៊ីវិលក្នុងពេលឃោសនាបោះឆ្នោត ដោយបញ្ចូលទៅក្នុងច្បាប់បោះឆ្នោត ដើម្បីធានាអព្យាក្រឹត្យភាព និងភាពមិនលម្អៀងរបស់សង្គមស៊ីវិល ដោយក្នុងនោះមានការចែងកុំឲ្យសង្គមស៊ីវិលប្រមាថ និងមាក់ងាយទៅលើគណបក្សនយោបាយណាមួយ។ ក្រោយពីជួបពិភាក្សានៅរសៀលថ្ងៃសុក្រ ទី១៦ ខែមករានេះ តំណាងគណបក្សប្រជាជនកម្ពុជា លោក ប៊ិន ឈិន មានប្រសាសន៍ថាគណបក្សស្នើឲ្យសមាគមក្នុងស្រុក និងអង្គការក្រៅរាជរដ្ឋាភិបាល មានជំហរអព្យាក្រឹត្យ និងកុំឲ្យធ្វើការងារលម្អៀងទៅគណបក្សណាមួយអំឡុងពេលឃោសនាបោះឆ្នោត។ លោកបន្តថាគណបក្សនឹងកំណត់កុំឲ្យសង្គមស៊ីវិលសរសេរជាលាយលក្ខណ៍អក្សរ ឬផុ្តល់បទសម្ភាសន៍ទៅប្រព័ន្ធផ្សព្វផ្សាយ ដោយប្រមាថ និងមាក់ងាយដល់គណបក្សនយោបាយ ឬតំណាងរាស្រ្តណាមួយ។ លោកបន្តថាគណបក្សសង្រ្គោះជាតិមិនចង់ឲ្យប្រើពាក្យ«បន្ទោសបង្អាប់»សម្រាប់ការកំណត់សិទ្ធិសង្គមស៊ីវិលនេះ។
-
អភិបាលក្រុងឡូវែលរបស់អាមេរិកទៅសួរសុខទុក្ខស្ត្រីសកម្មជនដីធ្លីជាប់ឃុំទាំង១០នាក់នៅរសៀលនេះ
អភិបាលក្រុងឡូវែល (Lowell) រដ្ឋម៉ាស្សាឈូសេត (Massachusetts) របស់សហរដ្ឋអាមេរិក និងតំណាងរាស្ត្រគណបក្សសង្គ្រោះជាតិនឹងចូលទៅសួរសុខទុក្ខស្ត្រីសកម្មជនដីធ្លីទាំង១០នាក់ដែលកំពុងជាប់ឃុំនៅពន្ធនាគារព្រៃស នៅរសៀលថ្ងៃសុក្រនេះ ។ នៅក្នុងលិខិតចុះថ្ងៃទី១៤ ខែមករា ផ្ញើជូនលោក គុយ ប៊ុនសន អគ្គនាយកនៃនាយកដ្ឋានពន្ធនាគារនៃក្រសួងមហាផ្ទៃ តំណាងរាស្ត្រមណ្ឌលសៀមរាបលោក អ៊ុំ សំអាន បានស្នើសុំការអនុញ្ញាតឲ្យរូបលោក ជាមួយសមាជិករដ្ឋសភា១រូប និងសហការី ព្រមទាំងគណៈប្រតិភូនៃក្រុងឡូវែលដែលក្នុងនោះមានលោក Rodney Elliot អភិបាលក្រុងឡូវែល ដើម្បីចូលសួរសុខទុក្ខស្ត្រីសកម្មជនទាំង១០នាក់ នៅថ្ងៃទី១៦ ខែមករា ឆ្នាំ២០១៥ ម៉ោង២រសៀល ។
-
កម្មករ៧៣នាក់បានស្លាប់ក្នុងគ្រោះថ្នាក់ការងារក្នុងឆ្នាំ២០១៤
សហភាពការងារកម្ពុជាឲ្យដឹងថា កម្មករ៧៣នាក់បានស្លាប់ក្នុងគ្រោះថ្នាក់ការងារ ក្នុងចំណោមកម្មករនិយោជិតជាង៤០០០នាក់ដែលបានរងគ្រោះថ្នាក់ការងារក្នុងឆ្នាំ២០១៤ ។ យោងតាមសេចក្តីថ្លែងការណ៍ចុះថ្ងៃទី១៥ ខែមករា ស្តីពីអំពើហិង្សា និងការរំលោភផ្សេងៗមកលើកម្មករនិយោជិតក្នុងឆ្នាំ២០១៤ ដែលចេញដោយសហភាពការងារកម្ពុជាបង្ហាញថា គ្រោះថ្នាក់ការងារក្នុងឆ្នាំ២០១៤ មាន៣៨០០ករណី ដែលក្នុងនោះកម្មករ៤៧៣៧នាក់បានរងគ្រោះ ដោយកម្មករ៧៣នាក់បានស្លាប់ ។ សេចក្តីថ្លែងការណ៍បន្តថា កម្មករនិយោជិតជាង១៨០០នាក់បានដួលសន្លប់ក្នុងអំឡុងពេលធ្វើការដោយសារតែការថែមម៉ោងហួសកម្លាំង និងបរិយាកាសមិនសូវល្អ ដែលរួមមានជាតិគីមីពុលផងដែរ ។
-
ADB សន្យាផ្តល់ព័ត៌មានទៅប្រជាសហគមន៍ស្តីពីការសង់ផ្លូវរថភ្លើងនៅដើមសប្តាហ៍ក្រោយ
ធនាគារអភិវឌ្ឍន៍អាស៊ី(ADB)នៅថ្ងៃសុក្រនេះ សន្យាជាមួយប្រជាសហគមន៍រស់នៅតាមបណ្តោយផ្លូវរថភ្លើងថា នឹងផ្តល់ព័ត៌មានពីការជួបប្រជុំសាធារណៈជាមួយភាគីពាក់ព័ន្ធនៅថ្ងៃអង្គារ ទី២០សប្តាហ៍ក្រោយទាក់ទងនឹងគម្រោងសាងសង់ផ្លូវរថភ្លើងនេះ ។ ការសន្យានេះធ្វើឡើងបន្ទាប់ពីប្រជាសហគមន៍ចំនួន៨ និងមានអ្នកចូលរួមប្រមាណ៥០នាក់ ប្រមូលផ្តុំនៅមុខធានាគារអភិវឌ្ឍន៍អាស៊ីនៅព្រឹកនេះ ដើម្បីទាមទារឲ្យស្ថាប័ននេះ ផ្តល់ព័ត៌មានឲ្យបានជាក់លាក់ ពីចំនួនម៉ែត្រដែលត្រូវកំណត់ចេញពីផ្លូវរថភ្លើងទៅផ្ទះរបស់ពួកគេ ខណៈពួកគេព្រួយបារម្ភពីការបណ្តេញចេញពីលំនៅដ្ឋានទាំងបង្ខំ ។ សហគមន៍ទាំងនោះរួមមាន សហគមន៍ភូមិ២ ភូមិ១៧ ភូមិ១០៤ ភូមិ១០៥ ភូមិ២៣ សហគមន៍រួមចិត្តតែមួយ និងសហគមន៍អភិវឌ្ឍន៍ថ្មីជាដើម ។
-
លោក ប៊្រែដ អាដាម៖ លោក ហ៊ុន សែន មិនអាចយកការអភិវឌ្ឍមកលុបបំបាត់ឧក្រិដ្ឋកម្មបានទេ
មន្ត្រីជាន់ខ្ពស់អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) បន្តទទូចលោកនាយករដ្ឋមន្ត្រី ហ៊ុន សែន ត្រូវទទួលខុសត្រូវចំពោះឃាតកម្មក្រៅប្រព័ន្ធច្បាប់ ការរំលោភសិទ្ធិមនុស្ស និងការបង្ខំបណ្ដេញពលរដ្ឋចេញពីផ្ទះសម្បែង និងដីធ្លី ក្នុងរយៈពេល ៣០ឆ្នាំ ដែលលោកបានកាន់កាប់អំណាច។ សំណើនេះ ធ្វើឡើងបន្ទាប់ពី លោក ហ៊ុន សែន បដិសេធរបាយការណ៍អង្គការសិទ្ធិមនុស្សទាំងស្រុង។ ទោះបី លោក ហ៊ុន សែន កាលពីថ្ងៃទី១៤ មករា ជាថ្ងៃខួប ៣០ឆ្នាំនៃការឡើងកាន់តំណែងជានាយករដ្ឋមន្ត្រី បានប្រកាសមិនទទួលស្គាល់សមិទ្ធផលនៃអំពើឃាតកម្ម និងការរំលោភសិទ្ធិមនុស្សជាច្រើនករណីក៏ដោយ ក៏នាយកប្រតិបត្តិទទួលបន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្ស លោក ប្រ៊ែដ អាដាម (Brad Adams) បញ្ជាក់ថា លោក ហ៊ុន សែន ជាអ្នកទទួលខុសត្រូវការស្លាប់មនុស្សជាច្រើននាក់នៅកម្ពុជា។ លោកបញ្ជាក់ថា លោក ហ៊ុន សែន មិនអាចយកការអភិវឌ្ឍប្រទេសមកលុបបំបាត់ឧក្រិដ្ឋកម្មទាំងនោះបានទេ។
-
កម្មករកាត់ដេរត្រូវចំណាយប្រាក់កក់ជាង៣ម៉ឺនរៀលមុនទទួលបានតម្លៃភ្លើង៦១០រៀល
មន្រ្តីជំនាញខាងអគ្គិសនីឲ្យដឹងថាកម្មកររោងចក្រកាត់ដេរត្រូវចំណាយប្រាក់កក់ជាង៣ម៉ឺនរៀល មុននឹងអាចប្រើប្រាស់បណ្តាញអគ្គិសនីថ្មី ដែលកម្មករនឹងចំណាយតែ៦១០រៀលក្នុងមួយគីឡូវ៉ាត់។ ក្នុងបទសម្ភាសន៍ជាមួយទូរទស្សន៍CNC កាលពីថ្ងៃព្រហស្បតិ៍ លោក កែវ រតនៈ ប្រតិភូរាជរដ្ឋាភិបាលទទួលបន្ទុកអគ្គនាយកអគ្គិសនីកម្ពុជា មានប្រសាសន៍ថា កន្លងមក ម្ចាស់ផ្ទះ ឬបន្ទប់បានចំណាយប្រាក់ក្នុងការតភ្លើងទៅបន្ទប់របស់កម្មករ-កម្មការិនី ដោយម្ចាស់ផ្ទះបានយកថ្លៃភ្លើងច្រើនជាងការកំណត់របស់អាជ្ញាធរអគ្គិសនីកម្ពុជា ដែលមានតម្លៃចន្លោះពី៦១០ទៅ៨២០រៀលក្នុង១គីឡូវ៉ាត់។ លោកបន្តថាដើម្បីជាការសម្រួលកិច្ចការនេះ និងឲ្យកម្មករទទួលបានតម្លៃពិតប្រាកដពីអាជ្ញាធរអគ្គិសនីកម្ពុជា រាជរដ្ឋាភិបាលនឹងចំណាយប្រាក់ជាង២លានដុល្លារ ជាការរៀបចំបណ្តាញថ្មី ដោយទិញកុងទ័រជាង៤ម៉ឺនគ្រឿង ឌីសង់ទ័រ ខ្សែ និងឧបករណ៍រណបដទៃទៀត ដើម្បីតដល់មុខបន្ទប់របស់កម្មករ។
-
ប្រជាពលរដ្ឋនៅសង្កាត់ដង្កោសុំឲ្យអាជ្ញាធរជួយដោះស្រាយបញ្ហាទឹកស្អុយលិចភូមិ
ប្រជាពលរដ្ឋជិត៨០នាក់ ប្រមូលផ្តុំនៅមុខសាលាខណ្ឌដង្កោ នៅព្រឹកថ្ងៃព្រហស្បតិ៍នេះ ដើម្បីស្នើឲ្យអាជ្ញាធរជួយដោះស្រាយបញ្ហាទឹកស្អុយលិចភូមិរបស់ពួកគាត់ ដែលនាំឲ្យប៉ះពាល់ដល់សុខភាព និងពិបាកក្នុងការប្រកបរបរចិញ្ចឹមជីវិត ។
-
ព្រះមហាក្សត្រឡាយព្រះហស្តលើច្បាប់ចរាចរណ៍ផ្លូវគោកថ្មីដែលមានការផាកពិន័យធ្ងន់ធ្ងរ
ព្រះមហាក្សត្រ ព្រះបរមនាថ នរោត្តមសីហមុនី បានឡាយព្រះហស្តលេខាលើច្បាប់ថ្មីស្តីពីចរាចរណ៍ផ្លូវគោក ដែលនឹងរឹតបន្តឹងការបើកបរក្នុងភាពស្រវឹង និងការផាកពិន័យធ្ងន់ធ្ងរ។ ច្បាប់នេះមានចំណុចមួយចំនួនដែលតម្រូវឲ្យអ្នកធ្វើដំណើរត្រូវតែគោរពនោះ គឺទោចក្រយានយន្តអាចផ្ទុកមនុស្សធំបានតែពីរនាក់ ប៉ុន្តែអាចបន្ថែមកុមារបានម្នាក់ តម្រូវឲ្យអ្នកដំណើរ និងកុមារចាប់ពីអាយុ៣ឆ្នាំ ត្រូវពាក់មួកសុវត្ថិភាព និងការបង្កើនផាកពិន័យចំពោះអ្នកបើកបរដែលស្ថិតក្នុងភាពស្រវឹងចាប់ពី ៨០០០០០រៀលទៅ៤០០០ ០០០រៀល។ ច្បាប់ចរាចរណ៍ផ្លូវគោកថ្មីនេះមាន១២ជំពូក និង៩២មាត្រា។
-
តម្លៃប្រេងសាំងនៅកម្ពុជាចាប់ផ្តើមចុះបន្តិចទៀត
យ៉ាងតិចក្រុមហ៊ុនប្រេងសាំងចំនួន២នៅកម្ពុជា បានបញ្ចុះតម្លៃប្រេងសាំង១០០ទៅ២០០រៀលបន្ថែមទៀត គឺមកត្រឹមតម្លៃចន្លោះពី៤០០០រៀលទៅ៤១០០រៀល សម្រាប់សាំងធម្មតា ខណៈតម្លៃប្រេងនៅលើពិភពលោកកំពុងធ្លាក់ចុះមកក្រោម៥០ដុល្លារក្នុងមួយបារ៉ែល(ធុងចំណុះ១៥៩លីត្រ)។ តាមតារាងតម្លៃប្រេងសាំងរបស់ក្រុមហ៊ុនកាល់តិច និងការអះអាងរបស់បុគ្គលិក ឲ្យដឹងថាតម្លៃសាំងធម្មតាបានចុះពី៤២៥០រៀលមក៤១០០រៀល កាលពីថ្ងៃព្រហស្បតិ៍។ ចំណែកក្រុមហ៊ុនសូគីមិចវិញ ក៏បានបញ្ចុះតម្លៃប្រេងសាំងធម្មតាពី៤២០០រៀលមកត្រឹម៤០០០រៀល។ គួររំឮកថា លោកនាយករដ្ឋមន្រ្តី ហ៊ុន សែន កាលពីថ្ងៃចន្ទ បានបន្តអំពាវនាវឲ្យមានការបញ្ចុះតម្លៃប្រេងសាំងបន្ថែមទៀត ឲ្យស្របនឹងទីផ្សារអន្តរជាតិ ដោយលើកឡើងថាក្រុមហ៊ុននៅតែបន្តចំណេញ បើទោះជាមានការចុះថ្លៃបន្តិចបន្តួច។ លោកនាយករដ្ឋមន្រ្តីមានប្រសាសន៍ថាកន្លងទៅ ក្រសួងសេដ្ឋកិច្ច និងហិរញ្ញវត្ថុបានបញ្ជូនលិខិតទៅក្រុមហ៊ុន ដោយសុំឲ្យបញ្ចុះតម្លៃប្រេងមកត្រឹម៣៩០០រៀល។ លោកបន្តថាតម្លៃប្រេងសាំងរបស់ក្រុមហ៊ុនក្រៅស្រុកនៅតែខ្ពស់ជាងក្រុមហ៊ុនក្នុងស្រុក។ លោកបញ្ជាក់ថា«ប៉ុន្តែក្នុងស្រុកក៏ដោយក្រៅស្រុកក៏ដោយ សូមមេត្តាពិនិត្យលទ្ធភាពនៃការចុះថ្លៃបន្ត។ចុះថ្លៃបន្ត ព្រោះអាទិញមកស្តុកមុនហ្នឹង ល្មមអស់ហើយ ល្មមអស់ហើយ កុំនៅចំណេញយូរពេក នៅចំណេញយូរពេក ចុះថែមតិចទៀត ចុះថែមតិចទៀត អំពាវនាវឲ្យមានការចុះថ្លៃ»។
-
សហគមន៍ដីធ្លីស្នើស្ថានទូតបរទេសឃ្លាំមើលសវនាការសាលាឧទ្ធរណ៍លើស្ត្រី១០នាក់
តំណាងសហគមន៍បឹងកក់ បុរីកីឡា និងព្រះសង្ឃប្រមាណ ១០០នាក់ នាំគ្នាយកញត្តិដាក់តាមបណ្ដាស្ថានទូតបរទេសនានា ក្នុងរាជធានីភ្នំពេញ ឲ្យចូលរួមឃ្លាំមើលសវនាការសាលាឧទ្ធរណ៍ លើស្ត្រីបឹងកក់ និងបុរីកីឡា ១០នាក់ នៅថ្ងៃទី២២ មករា ២០១៥។ ស្ត្រីសហគមន៍បឹងកក់ និងបុរីកីឡាទាំង ១០នាក់នោះ ត្រូវបានអាជ្ញាធរចាប់ខ្លួនកាលពីថ្ងៃទី១០ និងទី១១ ខែវិច្ឆិកា ហើយត្រូវបានតុលាការចោទប្រកាន់ពីបទប្រឆាំងនឹងមន្ត្រីរាជការសាធារណៈ និងបង្កការកកស្ទះចរាចរណ៍សាធារណៈជាដើម ដោយពិន័យជាប្រាក់ក្នុងម្នាក់ ២លានរៀល និងជាប់ពន្ធនាគាររយៈពេល១ឆ្នាំ។
-
សាលាឧទ្ធរណ៍បដិសេធម្តងទៀតលើការសុំនៅក្រៅឃុំរបស់សកម្មជនបក្សសង្គ្រោះជាតិ
សាលាឧទ្ធរណ៍នៅថ្ងៃព្រហស្បតិ៍នេះ បានបដិសេធជាថ្មីទៀត មិនឲ្យសកម្មជនគណបក្សសង្គ្រោះ បាននៅក្រៅឃុំនោះទេ ខណៈអ្នកឃ្លាំមើលចាត់ទុកការសម្រេចនេះថា មានសម្ពាធនយោបាយ ។ លោក មាជ សុវណ្ណារ៉ា និងសកម្មជនផ្សេងទៀត ត្រូវបានអាជ្ញាធរចាប់ខ្លួន ដោយលើករណីហិង្សាលើសន្តិសុខខណ្ឌដូនពេញ នៅជិតទីលានប្រជាធិបតេយ្យ កាលពីខែកក្កដា ឆ្នាំ២០១៤ កន្លងទៅ ។
-
អាដហុកស្នើតុលាការខេត្តតាកែវពន្យារពេលសវនាការរឿងទំនាស់ដីរបស់ពលរដ្ឋ៥០គ្រួសារ
មន្ត្រីអង្គការសិទ្ធមនុស្ស អង្គការអាដហុក (Adhoc) ប្រចាំខេត្តតាកែវ នៅថ្ងៃទី១៥ មករា បានដាក់ពាក្យនៅតុលាការខេត្តតាកែវ សុំពន្យារពេល បើកសវនាការរឿងក្ដីទំនាស់ដីរវាងប្រជាពលរដ្ឋចំនួន៥០គ្រួសារ នៅឃុំអូរសារាយ ស្រុកត្រាំកក់ខេត្តតាកែវ ជាមួយមន្ត្រីយោធាម្នាក់នៅខេត្តកំពង់ស្ពឺឈ្មោះ ស្វាយ សារា។
-
សាលាឧទ្ធរណ៍បដិសេធជាថ្មីសំណើសុំនៅក្រៅឃុំរបស់សកម្មជនបក្សសង្គ្រោះជាតិ
ប្រធានក្រុមប្រឹក្សានៃអង្គជំនុំជម្រះសាលាឧទ្ធរណ៍ បានសម្រេចជាថ្មីទៀតប្រឆាំងការសុំនៅក្រៅឃុំរបស់សកម្មជនគណបក្សសង្គ្រោះជាតិ ទាំង ៥រូប កាលពីថ្ងៃព្រហស្បតិ៍ ទី១៥ ខែមករា។ អង្គការសង្គមស៊ីវិល ដែលឃ្លាំមើលសវនាការនេះ ចាត់ទុកថា ជាសេចក្ដីសម្រេចដែលផ្អែកលើសម្ពាធនយោបាយរបស់គណបក្សប្រជាជនកម្ពុជា។ ការចំណាយពេលបើកសវនាការជាថ្មីម្ដងទៀតប្រហែល ២ម៉ោង ប្រធានក្រុមប្រឹក្សានៃអង្គជំនុំជម្រះសាលាឧទ្ធរណ៍ បានបដិសេធមិនឲ្យសកម្មជនគណបក្សសង្គ្រោះជាតិ នៅក្រៅឃុំ។ ការសម្រេចនេះ នាំឲ្យមានការរិះគន់ដ៏ចម្រូងចម្រាសពីសំណាក់ក្រុមអង្គការមិនមែនរដ្ឋាភិបាល។
-
តុលាកាខេត្តព្រះវិហាឃុំខ្លួនសកម្មជនដីធ្លីមួយគ្រួសារ
ពលរដ្ឋមួយគ្រួសារនៅស្រុកឆែប ខេត្ដព្រះវិហារ ត្រូវសមត្ថកិច្ចឃុំខ្លួននៅពន្ធនាគារខេត្ដនេះ បន្ទាប់ពីឃាត់ខ្លួនសាកសួរ ពាក់ព័ន្ធនឹងជម្លោះដីធ្លីនៅភូមិពោធិទាប ឃុំម្លូរព្រៃមួយ។
-
គណៈកម្មការទី១នៃរដ្ឋសភាចុះអង្កេតនិងស្រាវជ្រាវព័ត៌មានពីជម្លោះដីធ្លីនៅភូមិឡពាង
តំណាងគណៈកម្មាការទី១នៃរដ្ឋសភា នៅព្រឹកថ្ងៃពុធនេះ បានចុះជួបប្រជាពលរដ្ឋអ្នកមានជម្លោះដីធ្លីនៅភូមិឡពាង ឃុំតាជេស ស្រុកកំពង់ត្រឡាច ខេត្ដកំពង់ឆ្នាំង ដើម្បីអង្កេតស្រាវជ្រាវប្រមូលព៌ត័មានបន្ថែម និងដោះស្រាយជូនប្រជាពលរដ្ឋ ។
-
ព្រះសង្ឃនិងប្រជាពលរដ្ឋស្នើឲ្យតំណាងស្ថានទូតចូលស្ដាប់សវនាការរឿងក្ដីស្ត្រីសកម្មជនដីធ្លី
ព្រះសង្ឃ និងប្រជាពលរដ្ឋមកពីសហគមន៍ដីធ្លីនៅក្នុងរាជធានីភ្នំពេញ ស្នើឲ្យតំណាងបណ្ដាស្ថានទូតនានានៅក្នុងប្រទេសកម្ពុជាចូលរួមតាមដានសវនាការលើស្ត្រីសកម្មជនដីធ្លី ដែលនឹងធ្វើឡើងនៅសាលាឧទ្ធរណ៍ ក្នុងសប្ដាហ៍ក្រោយនេះ ។
គាំទ្រដោយ
