កំពុងស្វែងរកទិន្នន័យ
រកឃើញ: 13.209
-
ព្រះសង្ឃដែលធ្លាប់ចេញតវ៉ាប្រឆាំងវៀតណាមត្រូវរងការវាយដំនៅវត្តស្ទឹងមានជ័យ
ព្រះសង្ឃមួយអង្គដែលសកម្មក្នុងការតវ៉ាប្រឆាំងនឹងស្ថានទូតវៀតណាមនោះ ត្រូវរងការវាយដំពីសំណាក់មនុស្សក្រុមមួយទៀត នៅពេលមានជម្លោះ ក្នុងវត្ដស្ទឹងមានជ័យកាលពីវេលាម៉ោង៧យប់ថ្ងៃទី២៣ ខែតុលា ឆ្នាំ២០១៤។ មន្ត្រីស៊ើបអង្កេតនៃអង្គការលីកាដូ លោក ឆេង សុភ័ស ឲ្យដឹងថា ព្រះសង្ឃ សឺន សាយ ត្រូវមនុស្សមួយក្រុមទៀតវាយ ដោយចោទថាបានជិះម៉ូតូក្នុងវត្តខុសវិន័យសង្ឃ ហើយពេលនោះ ចៅអធិការវត្ដស្ទឹងមានជ័យនិងអ្នករត់ម៉ូតូកង់បី នៅក្នុងវត្ដបានទៅឃាត់ ក៏កើតមានជម្លោះ បណ្តាលឲ្យបែកព្រះកេស ព្រះសង្ឃ សឺន សាយ និងត្រូវបានព្យាបាលដោយគ្រូពេទ្យអង្គការលីកាដូ។
-
សាលារាជធានីភ្នំពេញថ្កោលទោសការហែក្បួនប្រារព្ធខួបកិច្ចព្រមព្រៀងក្រុងប៉ារីស
សាលារាជធានីភ្នំពេញ ថ្កោលទោសចំពោះការដង្ហែក្បួនរបស់ប្រជាពលរដ្ឋ និងមន្ត្រីសង្គមស៊ីវិល១០០០នាក់ ដែលប្រារព្ធខួបលើកទី២៣ កាលពីម្សិលមិញ នៃកិច្ចព្រមព្រៀងទីក្រុងប៉ារីស ២៣ ខែតុលា ឆ្នាំ១៩៩១ ដោយចោទថា ក្បួនដង្ហែនោះមានភាពអនាធិតេយ្យ និងបង្កឲ្យស្ទះចរាចរណ៍។ សេចក្តីថ្លែងការណ៍របស់សាលារាជធានីភ្នំពេញ ចេញផ្សាយកាលពីថ្ងៃទី២៣ខែតុលា បានសរសេរថា អ្នកនាំពាក្យសាលារាជធានីភ្នំពេញសូមថ្កោលទោស ចំពោះអ្នកដឹកនាំរៀបចំកម្មវិធីរំឭកខួបកិច្ចព្រមព្រៀងសន្តិភាពទីក្រុងប៉ារីសថ្ងៃទី២៣ខែតុលា១៩៩១ និងព្រមានថា អ្នករៀបចំកម្មវិធីជាអ្នកទទួលខុសត្រូវចំពោះមុខច្បាប់ ប្រសិន បើមានបាតុភាព។
-
កម្មកររោងចក្រហ្គ្រេនធ្វីនប្រមាណ៣ពាន់នាក់បិទផ្លូវជាតិលេខ៤
កម្មកររោងចក្រហ្រ្គេនធ្វីន (Grand Twins) ប្រមាណ ៣.០០០នាក់ បិទផ្លូវជាតិលេខ៤ ដែលឋិតក្នុងសង្កាត់ចោមចៅ ខណ្ឌពោធិ៍សែនជ័យ នៅថ្ងៃទី២៤ តុលា បំណងសុំអោយក្រុមហ៊ុនផ្ដល់ប្រាក់ថ្លៃបាយ ទូទាត់សំណង និងផ្លាស់ប្ដូរលក្ខខណ្ឌការងារចំនួនជាង ១០ចំណុច។ តំណាងកម្មករអះអាងប្រហាក់ប្រហែលគ្នាថា ពួកគេទាមទារប្រាក់ថ្លៃបាយប្រចាំថ្ងៃចំនួន ២.០០០រៀល និងបន្ថែម ១.០០០រៀលទៀតពេលថែមម៉ោង។ ស្របគ្នានេះ កម្មករទាមទារអោយរោងចក្រទូទាត់សំណងចាស់អោយកម្មករ គឺសំណងដែលរោងចក្របានប្ដូរឈ្មោះពីរោងចក្រ ឃ្យូអិមអាយ (QMI) មកជារោងចក្រ ហ្រ្គេនធ្វីន ដោយពុំបានផ្ដល់សំណងដល់កម្មករ។
-
កម្មកររោងចក្រ ចៀន ឡឹ ទាមទារឲ្យរដ្ឋមន្ត្រីក្រសួងការងារដោះស្រាយបញ្ហារបស់ខ្លួនតាមការសន្យា
កម្មកររោងចក្រ ចៀន ឡឹ ប្រមាណ៤០០នាក់ នៅព្រឹកថ្ងៃសុក្រនេះ ធ្វើការប្រមូលផ្ដុំតវ៉ាជាថ្មីនៅមុខក្រសួងការងារ ទាមទារឲ្យរដ្ឋមន្រី្តក្រសួងការងារអនុវត្តតាមការសន្យានាពេលកន្លងមក។ ប្រធានសម្ព័ន្ធសហជីពជាតិ លោក ហ្វា សាលី ប្រាប់VODថា ការប្រមូលផ្ដុំតវ៉ាជាថ្មីរបស់កម្មករ-កម្មការនី នាព្រឹកនេះ ដើម្បីទាមទារក្រសួងការងារជួយដោះស្រាយបញ្ហារបស់កម្មករតាមការសន្យារបស់រដ្ឋមន្ត្រីក្រសួងការងារកន្លងមក។ លោកថា កម្មករទាំងអស់មិនសប្បាយចិត្តនោះទេ ដោយសារការសន្យាលោករដ្ឋមន្រ្តីនាពេលកន្លងមកថាជួយដោះស្រាយជូនកម្មករ ប៉ុន្តែមកទល់ពេលនេះ មិនទាន់មានការអនុវត្តអ្វីជាក់លាក់នៅឡើយទេ។
-
អង្គជំនុំជម្រះព្រមានមេធាវីរបស់ខៀវ នួន និងនួន ជា ថាធ្វើខុសវិជ្ជាជីវៈ
អង្គជំនុំជម្រះសាលាក្តីខ្មែរក្រហមបានចេញលិខិតព្រមានមេធាវីជាតិ និងអន្តរជាតិរបស់ជនជាប់ចោទ លោក ខៀវ សំផន និងលោក នួន ជា ថាប្រព្រឹត្តខុសវិជ្ជាជីវៈ និងផ្តល់ឱកាសចុងក្រោយក្នុងការចូលរួមកិច្ចប្រជុំដែលគ្រោងនឹងធ្វើឡើងនៅសប្តាហ៍ក្រោយ។ សេចក្តីប្រកាសព័ត៌មានរបស់សាលាក្តីខ្មែរក្រហមចេញផ្សាយនៅថ្ងៃសុក្រនេះឲ្យដឹងថា យោងតាមវិធានផ្ទៃក្នុង៣៨របស់អង្គជំនុំជម្រះ តុលាការចេញលិខិតព្រមានជាផ្លូវការមួយសម្រាប់ការប្រព្រឹត្តខុសរបស់មេធាវីជាតិ និងអន្តរជាតិការពារឲ្យជនជាប់ចោទលោក ខៀវ សំផន និងនួន ជា។លិខិតព្រមាននេះត្រូវបានធ្វើឡើងបន្ទាប់ពីមេធាវីការពារបានដើរចេញពីបន្ទប់សវនាការលើសំណុំរឿង០០២/០២កាលពីថ្ងៃទី១៧ខែតុលា ឆ្នាំ២០១៤ និងការមិនចូលរួមកិច្ចប្រជុំរៀបចំសវនាការកាលពីថ្ងៃទី២១ខែតុលា។
-
កម្មកររោងចក្រGrand Twinsក្នុងខណ្ឌពោធិ៍សែនជ័យបាតុកម្មតវ៉ាបិទផ្លូវជាតិលេខ៤
កម្មកររោងចក្រ Grand Twins រាប់ពាន់នាក់ នៅព្រឹកថ្ងៃសុក្រនេះ បាតុកម្មបិទកំណាត់ផ្លូវជាតិលេខ៤ត្រង់វិទ្យាល័យជម្ពូវ័ន បណ្ដាលមានការកកស្ទះចរាចរណ៍យ៉ាងខ្លាំង ។ ប្រធានសហព័ន្ធសហជីពគាំទ្រកម្មករកម្ពុជា លោក នួន នី ប្រាប់VODឲ្យដឹងថា មូលហេតុដែលនាំកម្មករបិទផ្លូវគឺដោយសារការតវ៉ាជាច្រើនថ្ងៃមកនេះមិនមានដំណោះស្រាយណាមួយ ដោយភាគីខាងរោងចក្រមិនព្រមចេញមកធ្វើការចរចា ។ លោកថា មន្ត្រីមកពីក្រសួងការងារកំពុងចរចាជាមួយរោងចក្រដើម្បីកំណត់ឲ្យមានការចរចារវាងរោងចក្រជាមួយកម្មករ តែពុំទាន់មានការឆ្លើយតបពីភាគីក្រុមហ៊ុន ។
-
មន្ដ្រីមន្ទីរអប់រំខេត្ដសៀមរាបរងការចោទថា ប្រព្រឹត្ដអំពើពុករលួយកឹបកេងប្រាក់បេសកកម្ម
មន្ដ្រីមន្ទីរអប់រំ យុវជន និងកីឡា ខេត្ដសៀមរាប ចោទប្រកាន់ប្រធានការិយាល័យខ្លួនថា កឹបកេងថវិកាបេសកកម្មសម្រាប់ចុះពិនិត្យ និងពង្រឹងគុណភាពអប់រំ ក៏ដូចជាការងារអភិវឌ្ឍន៍នៅតាមគ្រឹះស្ថានមធ្យមសិក្សាក្នុងខេត្ដ។ មន្ដ្រីរដ្ឋបាលការិយាល័យមធ្យមសិក្សា នៃមន្ទីរអប់រំយុវជន និងកីឡា ខេត្ដសៀមរាប លោក ហេ សុគន្ធមាលា ប្រាប់ VOD នៅថ្ងៃព្រហស្បតិ៍នេះថា នៅក្នុងតារាងទឹកប្រាក់បេសកកម្មដែលផ្ដល់ឲ្យមន្ដ្រីចុះធ្វើការតាមគ្រឹះស្ថាននានា មានចំនួនទឹកប្រាក់ត្រឹមត្រូវតាមច្បាប់ ប៉ុន្ដែនៅពេលប្រធានការិយាល័យមធ្យមសិក្សាចំណេះទូទៅ លោក ញឹក សាគុណ ផ្ដល់ឲ្យបែរជាមិនគ្រប់ចំនួនទៅវិញ និងមិនបានបញ្ជាក់ពីមូលហេតុនោះឡើយ។ លោកបន្ដថា អភិបាលខេត្ដសៀមរាប លោក ឃឹម ប៊ុនសុង បានណែនាំដល់មន្ទីរអប់រំខេត្តថាកុំឲ្យមានការកឹបកេងថវិកាបេសកកម្មនោះបន្តទៀត។ លោកបន្ថែមថា ករណីនេះលោកក៏បានដាក់ស្នើទៅរដ្ឋមន្ត្រីក្រសួងអប់រំ លោក ហង់ ជួនណារ៉ុន ដែរ ប៉ុន្ដែមិនមានប្រសិទ្ធភាពឡើយ។
-
ទស្សនៈសង្គមស៊ីវិលជុំវិញកំណែទម្រង់ការបោះឆ្នោត
សង្គមស៊ីវិលដែលធ្វើការទាក់ទងនឹងការបោះឆ្នោតលើកឡើងថា ការមិនបើកចំហព័ត៌មានពីការធ្វើកំណែទម្រង់ការបោះឆ្នោត រវាងគណបក្សទាំងពីរ ឲ្យពលរដ្ឋ និងជាពិសេសសង្គមស៊ីវិលបានដឹង ជាឧបសគ្គធំនៃការធ្វើកំណែទម្រង់នោះ។ ការលើកឡើងបែបនេះ ក្រោយពីមន្ត្រីជំនាញការបោះឆ្នោតជប៉ុន ជួបជាមួយក្រុមការងារកំណែទម្រង់ការបោះឆ្នោតនៃគណបក្សទាំងពីរ នៅថ្ងៃ២២ ខែតុលា ម្សិលមិញ។ ក្រោយជំនួបនោះ ភាគីជប៉ុនស្នើឲ្យមានកំណែទម្រង់បញ្ជីឈ្មោះបោះឆ្នោត។ អ្នកសារព័ត៌មានមិនអាចដឹងពីឆន្ទៈរបស់គណបក្សប្រជាជនកម្ពុជា ថាតើគណបក្សនេះទទួលយកសំណើរបស់ជប៉ុន ឬយ៉ាងណានោះទេ ព្រោះមន្ត្រីជាន់ខ្ពស់គណបក្សប្រជាជនកម្ពុជា ដែលបានចូលរួមក្នុងជំនួបជាមួយភាគីជប៉ុននោះ បានគេចចេញពីអ្នកសារព័ត៌មាន។ ចំណែកឯភាគីគណបក្សសង្គ្រោះជាតិវិញ ថ្លែងទៅកាន់អ្នកសារព័ត៌មានថា បើគណបក្សប្រជាជនកម្ពុជា មានសុឆន្ទៈពិតប្រាកដក្នុងការកែទម្រង់ការបោះឆ្នោត ដូចដែលជប៉ុនបានរកឃើញមែននោះ នោះការកែទម្រង់នឹងអាចដំណើរការបានលឿនជាទីបំផុត។
-
បទយកការណ៍៖ ពលរដ្ឋខ្មែរស្នើឲ្យភាគីកិច្ចព្រមព្រៀងក្រុងប៉ារីស ពិនិត្យឡើងវិញលើការគោរពសន្ធិសញ្ញានេះ
តាំងពីព្រឹកព្រលឹម នៅថ្ងៃ២៣តុលានេះ បណ្តាញព្រះសង្ឃ មន្ត្រីអង្គការសង្គមស៊ីវិល និស្សិត បញ្ញាវ័ន្ត និងអ្នកមានជម្លោះដីធ្លី បានប្រមូលផ្តុំគ្នា នៅមុខស្ថានទូតបារាំងប្រចាំកម្ពុជា ដែលមានដៃកាន់ទង់ជាតិចម្រុះជាតិសាសន៍ និងបដាផ្សេងៗមានទាំងឧបករណ៍បំពងសំឡេងផង។ ការប្រមូលផ្តុះនោះ មិនមែនជារឿងចៃដន្យទេ គឺពួកគេនាំគ្នាប្រារព្ធខួប២៣ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១។ កិច្ចព្រមព្រៀងនោះមានប្រទេសចំនួន១៨បានចុះហត្ថលេខា រួមទាំងប្រទេសមហាអំណាចធំៗផង ដូចជាសហរដ្ឋអាមេរិក ចិន សហភាពសូវៀត បារាំង អូស្ត្រាលី និងប្រទេសមួយចំនួនទៀត ពិសេសប្រទេសថៃនិងវៀតណាម ដែលមានព្រំប្រទល់ជាប់នឹងប្រទេសកម្ពុជា។
-
សមត្ថកិច្ចចាប់ខ្លួនយុវជនដែលចែកលិខិតអំពាវនាវឲ្យធ្វើបាតុកម្មប្រឆាំងវៀតណាម
សមត្ថកិច្ចរាជធានីភ្នំពេញ នៅថ្ងៃព្រហស្បតិ៍នេះបានចាប់ខ្លួនយុវជនយ៉ាងតិចពីរនាក់ដែលចែកខិតប័ណ្ណដោយមានរូបសញ្ញាចលនារណសិរ្សរំដោះជាតិខ្មែរ ក្នុងន័យអំពាវនាវឲ្យធ្វើបាតុកម្មប្រឆាំងវៀតណាម។ សេចក្តីអំពាវនាវចុះថ្ងៃទី០៩ ខែកញ្ញា របស់រណសិរ្សរំដោះជាតិខ្មែរ (រ.ស.រ.ជ.ខ) ឲ្យចូលរួមធ្វើបាតុកម្មមុខទូតវៀតណាមនៅថ្ងៃទី២៣ ខែតុលា ឆ្នាំ២០១៤ នេះគឺបានសរសេរបាវចនារបស់គេថា ជាតិ សាសនា ប្រជាជាតិខ្មែរ។ ខិតប័ណ្ណនោះបានអំពាវនាវដល់ប្រជាពលរដ្ឋខ្មែរ និងខ្មែរក្រោមទាំងអស់ក្រោកឡើងធ្វើបាតុកម្មមុខស្ថានទូតវៀតណាមប្រចាំ កម្ពុជា ដើម្បីទាមទារឲ្យប្រទេសនេះគោរពកិច្ចព្រមព្រៀងទីក្រុងប៉ារីស២៣ តុលា ១៩៩១ និងទទួលស្គាល់ប្រវត្តិសាស្ត្រពិត។
-
មនុស្សប្រមាណ១០០០នាក់បានដើរជាក្បួនជំរុញឲ្យគោរពកិច្ចព្រមព្រៀងទីក្រុងប៉ារីស
ភ្នំពេញ— ក្រុមប្រជាពលរដ្ឋរងគ្រោះដោយសារទំនាស់ដីធ្លី ព្រះសង្ឃ ក្រុមយុវជនអង្គការសមាគមខ្មែរកម្ពុជាក្រោម សមាគមនិស្សិតបញ្ញវន្តនិងសហជីពកម្មករនិងអង្គការសង្គមស៊ីវិល សរុបប្រមាណជិត១០០០នាក់បានរំឭកអំពីការអនុវត្តកិច្ចព្រមព្រៀងសន្តិភាពទីក្រុងប៉ារីនៅក្នុងទីក្រុងភ្នំពេញនៅថ្ងៃព្រហស្បតិ៍នេះដោយសង្កត់ធ្ងន់លើការបរាជ័យរបស់រដ្ឋាភិបាលក្នុងការគោរពឲ្យបានពេញលេញនូវកិច្ចព្រមព្រៀងនេះ។
-
កម្មកររោងចក្រGrand Twinsក្នុងខណ្ឌពោធិ៍សែនជ័យបន្តធ្វើតវ៉ាទាមទារលក្ខខណ្ឌការងារ
កម្មកររោងចក្រGrand Twins នៅព្រឹកថ្ងៃពុធនេះ បន្តតវ៉ានៅមុខរោងចក្រ ដើម្បីទាមទារឲ្យរោងចក្រផ្ដល់ប្រាក់អតីតភាពការងារ និងលក្ខខណ្ឌការងារសមរម្យមួយចំនួន។ កម្មករបានតវ៉ាជាច្រើនថ្ងៃមកហើយ តែមិនទាន់មានដំណោះស្រាយនៅឡើយទេ។ កម្មការិនីដែលចូលរួមធ្វើការតវ៉ា កញ្ញា វណ្ណេត មានប្រសាសន៍ថាការតវ៉ានេះ គឺដើម្បីទាមទារលក្ខខណ្ឌការងារមួយចំនួនដូចជា សុំឲ្យដំឡើងប្រាក់ថ្លៃបាយពេលថែមម៉ោងនៅថ្ងៃអាទិត្យ ប្រាក់ថ្លៃធ្វើដំណើរ១៥ដុល្លារ ប្រាក់ថ្លៃជួលផ្ទះឲ្យគ្រប់១០ដុល្លារ សុំឲ្យស្ត្រីមានផ្ទៃពោះចេញមុនម៉ោង១៥នាទី និងអនុញ្ញាតឲ្យកម្មករធ្វើការថែមម៉ោងដោយស្ម័គ្រចិត្តជាដើម។
-
សង្គមស៊ីវិលជំរុញឲ្យរដ្ឋាភិបាលរឹតបន្តឹងការអនុវត្តច្បាប់ប្រឆាំងបទល្មើសព្រៃឈើ
សង្គមស៊ីវិល និងបណ្តាញអ្នកការពារព្រៃឈើនៅកម្ពុជា សើ្នរដ្ឋាភិបាលរឹតបន្តឹងចំពោះការអនុវត្តច្បាប់ប្រឆាំងនឹងបទល្មើសព្រៃឈើឲ្យមានប្រសិទ្ធភាព និងតម្លាភាព ដើម្បីរក្សាធនធានធម្មជាតិឲ្យបានគង់វង្ស។ ការជំរុញនេះ ធ្វើឡើងក្នុងសន្និសីទសារព័ត៌មានស្តីពី កង្វល់លើបទល្មើសព្រៃឈើនៅកម្ពុជា នៅព្រឹកថ្ងៃទី២២ ខែតុលា ឆ្នាំ២០១៤ រៀបចំដោយវេទិការអង្គការមិនមែនរដ្ឋាភិបាលស្តីពីកម្ពុជា ដើម្បីឲ្យតំណាងអ្នកការពារព្រៃឈើបង្ហាញពីក្តីកង្វល់ និងបញ្ហាប្រឈម។ នាយកប្រតិបត្តិនៃវេទិកានៃអង្គការមិនមែនរដ្ឋាភិបាលស្តីពីកម្ពុជា លោក តឹក វណ្ណារ៉ា មានប្រសាសន៍សន្និថា លោកបារម្ភយ៉ាងខ្លាំងទៅលើសោកនាដកម្មនៃការថយចុះធនធានព្រៃឈើនៅកម្ពុជា នៅក្នុងអំឡុងពេល២ឆ្នាំចុងក្រោយនេះ។ លោក ស្នើរដ្ឋាភិបាលពិនិត្យរាល់ការផ្តល់អាជ្ញាប័ណ្ណដល់ក្រុមហ៊ុនឯកជន ដែលនាំឈើចេញ និងបញ្ជាក់ពីទីតាំង បរិមាណ និងតម្លែជាដើម។
-
គណបក្សសង្រ្គោះជាតិអំពាវនាវឲ្យរាជរដ្ឋាភិបាលបញ្ឈប់ការប្រើហិង្សាលើអ្នកដីធ្លី
គណបក្សសង្រ្គោះជាតិ នៅថ្ងៃពុធនេះ អំពាវនាវឲ្យរាជរដ្ឋាភិបាលកម្ពុជាបញ្ឈប់ជាបន្ទាន់នូវការប្រើហិង្សាទៅលើអ្នកមានជម្លោះដីធ្លីដែលឡើងមករាជធានីភ្នំពេញ ដើម្បីសុំអន្តរាគមន៍ពីលោកនាយករដ្ឋមន្រ្តី ហ៊ុន សែន។ កាលពីថ្ងៃទី២០ ខែតុលា ប្រជាពលរដ្ឋរងគ្រោះដោយបញ្ហាដីធ្លី មកពីស្រុកជាំក្សាន្ត ខេត្តព្រះវិហារ បានប៉ះទង្គិចជាមួយអាជ្ញាធរខណ្ឌ នៅក្បែរវិមានឯករាជ្យ ជិតផ្ទះនាយករដ្ឋមន្រ្តី បណ្តាលឲ្យមនុស្សរាប់សិបនាក់រងរបួសធ្ងន់ និងស្រាល។
-
សហភាពសហជីពកម្ពុជាថាក្រសួងការងាររិតត្បិតការបញ្ចេញយោលបល់ក្នុងការកំណត់ប្រាក់ឈ្នួលកម្មករ
ហភាពសហជីពកម្ពុជា លើកឡើងថាក្រសួងការងាររិតត្បិតសេរីភាពក្នុងការបញេ្ចញយោបល់របស់ភាគី ដែលចូលរួមប្រជុំពិភាក្សាកំណត់ប្រាក់ឈ្នួលអប្បបរមារបស់កម្មករ-និយោជិត។ សេចក្ដីថ្លែងការណ៍របស់សហភាពសហជីពកម្ពុជា ចុះថ្ងៃទី២១ ខែតុលានេះ ឲ្យដឹងថា កាលពីរសៀលថ្ងៃចន្ទ ទី២០ ក្រុមការងារបានចាប់ផ្ដើមកិច្ចប្រជុំពិភាក្សាបញ្ហាប្រាក់ឈ្នួលអប្បបរមារបស់កម្មករនិយោជិត ផ្នែកវាយនភ័ណ្ឌកាត់ដេរសម្លៀកបំពាក់ និងស្បែកជើង ដែលមានការរឹតបន្តឹងដល់ភាគីចូលរួមពិភាក្សាយ៉ាងធ្ងន់ធ្ងរ ដែលមិនធ្លាប់មានចំពោះរាល់កិច្ចប្រជុំពិគ្រោះយោបល់កន្លងមក។ សេចក្ដីថ្លែងការដដែលបន្ថែមថា នៅក្នុងក្រមសីលធម៌នៃការប្រជុំនេះបានដាក់បម្រាមដល់អ្នកចូលរួម ត្រូវរក្សាការសម្ងាត់នៃព័ត៌មាន។
-
អ្នករងរបួសក្នុងព្រឹត្តិការណ៍បង្ក្រាបជិតផ្ទះនាយករដ្ឋមន្ត្រីកើនដល់ជិត៤០នាក់
តំណាងអ្នកភូមិអះអាងថា ពួកគេ៤នាក់កំពុងសង្គ្រោះបន្ទាន់ និងជិត៤០នាក់ផ្សេងទៀតកំពុងព្យាបាល ក្នុងជម្រកបណ្តោះអាសន្ន បន្ទាប់ពីកម្លាំងសន្តិសុខខណ្ឌដូនពេញបង្ក្រាបដោយហិង្សា កាលពីថ្ងៃចន្ទម្សិលមិញ នៅជិតផ្ទះនាយករដ្ឋមន្ត្រី នៅពេលពួកគេចេញតវ៉ាទាមទាររកយុត្តិធម៌រឿងជម្លោះដីធ្លី។ លោក ម៉េង ចាន់ថន មកពីស្រុកជាំក្សាន្ត ខេត្តព្រះវិហារ អះអាងថា ជាតំណាងក្រុមអ្នកតវ៉ារឿងដីធ្លី នោះឲ្យ VOD ដឹងនៅថ្ងៃទី២១ ខែតុលា ឆ្នាំ២០១៤នេះថា ពួកគេ៣៧នាក់បានរងរបួស ក្នុងព្រឹត្តិការណ៍បង្ក្រាបរបស់កម្លាំងសមត្ថកិច្ចជិតផ្ទះនាយករដ្ឋមន្ត្រី កាលពីថ្ងៃចន្ទម្សិលមិញ។
-
អ្នកច្បាប់៖ អភិបាលខេត្តគ្មានសិទ្ធិកោះហៅមន្ត្រីតុលាការមកសួរនាំ លើការសម្រេចសេចក្តីទេ
អ្នកជំនាញផ្នែកច្បាប់ក្នុងស្រុក លើកឡើងថា ការដែលអភិបាលខេត្តកោះអញ្ជើញប្រធានតុលាការ ឬព្រះរាជអាជ្ញាឲ្យចូលបំភ្លឺពាក់ព័ន្ធនឹងការសម្រេចសេចក្តីលើក្តីបទល្មើសអ្វីមួយនោះ គឺជាការរំលោភលើអំណាចតុលាការ និងក្រសួងយុត្តិធម៌។ ការបកស្រាយរបស់អ្នកច្បាប់នេះ ដោយសារតែថ្មីៗនេះ អភិបាលខេត្តតាកែវ លោក ឡាយ វណ្ណៈ បានកោះអញ្ជើញប្រធានសាលាដំបូង និងព្រះរាជអាជ្ញាអមសាលាដំបូងខេត្ត ដើម្បីបំភ្លឺរបាយការណ៍ស្តីពីការសម្រេច មិនឃុំខ្លួនជនសង្ស័យពីរនាក់ពីបទរក្សាទុកគ្រឿងញៀនខុសច្បាប់។ ប្រធានសម្របសម្រួលគណៈកម្មាធិការប្រព្រឹត្តកម្ម លោកមេធាវី សុក សំអឿន មានប្រសាសន៍ថា ប្រសិនបើអភិបាលខេត្តចង់ដឹងពីស្ថានភាពបទល្មើសថយ ឬមានការកើនឡើង គាត់អាចកោះហៅប្រធាន ឬព្រះរាជអាជ្ញាសាកសួរបន្ថែមបាន ក្នុងនាមជាមន្ត្រីគ្រប់គ្រងខេត្ត។ ប៉ុន្តែលោកថា ប្រសិនបើអភិបាលខេត្តកោះហៅប្រធានសាលាដំបូងខេត្តឲ្យចូលបំភ្លឺពាក់ព័ន្ធនឹងការសម្រេចរឿងក្តីអ្វីមួយនោះ ជាការបំពានអំណាចតុលាការ។
-
កម្មកររោងចក្រGrand Twinsក្នុងខណ្ឌពោធិ៍សែនជ័យបន្តធ្វើបាតុកម្មទាមទារលក្ខខណ្ឌការងារ
កម្មកររោងចក្រGrand Twins ជាង៤ពាន់នាក់ នៅថ្ងៃអង្គារនេះ បន្តការតវ៉ានៅមុខរោងចក្រដើម្បីទាមទារឲ្យរោងចក្រផ្ដល់ប្រាក់អតីតភាពការងារ និងលក្ខខណ្ឌការងារសមរម្យមួយចំនួន បន្ទាប់ពីការតវ៉ាកាលពីម្សិលមិញមិនទទួលបានដំណោះស្រាយ ។ កម្មការនីដែលចូលរួមធ្វើការតវ៉ា កញ្ញា វណ្ណេត ប្រាប់VODនៅព្រឹកថ្ងៃអង្គារនេះថា កម្មករបានប្រមូលផ្ដុំតាំងពីម៉ោង៦កន្លះព្រឹកមកម្លេះ ហើយនឹងបន្តធ្វើបាតុកម្មរហូតដល់ទទួលដំណោះស្រាយសមរម្យណាមួយ ។
-
អនុប្រធានសភាទី១ជួបតំណាងបាតុករប្រឆាំងការទទួលយកជនភៀសខ្លួនពីអូស្ត្រាលី
អនុប្រធានសភាទី១ លោក កឹម សុខា កាលពីព្រឹកថ្ងៃទី២១ ខែតុលា បានជួបតំណាងជាង ១០នាក់ នៃក្រុមបាតុករប្រឆាំងកិច្ចព្រមព្រៀងទទួលយកជនភៀសខ្លួនដែលស្វែងរកសិទ្ធិជ្រកកោននៅប្រទេសអូស្ត្រាលី មកកម្ពុជា។ ជំនួបនោះធ្វើឡើងបន្ទាប់ពីប្រធានសហព័ន្ធនិស្សិតបញ្ញវន្តកម្ពុជា លើកឡើងកាលពីថ្ងៃទី១៨ ខែតុលា ថា អ្នកតំណាងរាស្ត្រទាំង ១២៣រូប មិនបានយកចិត្តទុកដាក់បម្រើពលរដ្ឋអោយបានពេញលេញ ដោយសំអាងថា ពុំមានអ្នកតំណាងរាស្ត្រទទួលយកញត្តិបាតុករ។ ស្របគ្នានេះតំណាងរាស្ត្រ២រូប នៃគណបក្សសង្គ្រោះជាតិ បានអះអាងថា គឺក្រុមបាតុករទេដែលបដិសេធមិនប្រគល់ញត្តិ។ ប្រធានសហព័ន្ធនិស្សិតបញ្ញវន្តកម្ពុជា បញ្ជាក់ជាថ្មីទៀតថា សកម្មភាពរបស់អ្នកតំណាងរាស្ត្រក្នុងការឆ្លើយតបនឹងការដាក់ញត្តិប្រឆាំងការទទួលយកជនភៀសខ្លួនកំពុងធ្វើអោយពលរដ្ឋបាត់ទំនុកចិត្ត។
-
កម្មករ៧នាក់របួសដោយសារបាក់ស្រុតពិតានអាគាររោងចក្រនៅតាកែវ
កម្មការិនីរោងចក្រដេរសំលៀកបំពាក់ នីស៊ីគូ (Nishiku) ចំនួន ៧នាក់ បានរងរបួសស្រាលក្នុងហេតុការណ៍បាក់ស្រុតពិតាន និងអាគាររោងចក្រស្ថិតនៅតាមផ្លូវជាតិលេខ២ ក្នុងភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ។ ហេតុការណ៍នេះ បានកើតឡើងនៅថ្ងៃទី២១ តុលា ក្នុងពេលកម្មករប្រមាណ ៨០០នាក់ កំពុងបំពេញការងារ។ អាជ្ញាធរមានសមត្ថកិច្ចនៃឃុំពត់សរ ស្រុកបាទី ខេត្តតាកែវ បានហៅការបាក់ស្រុតពិតាន និងអាគាររោងចក្រក្នុងពេលកម្មករបំពេញការងារថា បណ្ដាលមកពីការសាងសង់ខ្វះបច្ចេកទេស។ នាយប៉ុស្តិ៍នគរបាលឃុំពត់សរ លោក នួន វណ្ណរ៉ា មានប្រសាសន៍នៅរសៀលថ្ងៃទី២១ តុលា ថា បន្ទាប់ពីបានចុះត្រួតពិនិត្យក្នុងហេតុការណ៍នេះដោយក្រុមកម្លាំងសមត្ថកិច្ច អាជ្ញាធរដែនដី មន្ត្រីក្រសួង និងមន្ទីរការងារ បានរកឃើញថា កម្មការិនី ៧នាក់ ដែលជាបុគ្គលិកផ្នែកដេរបានរងរបួសស្រាលនៅពេលពួកគេកំពុងបំពេញការងារ។
គាំទ្រដោយ
