កំពុងស្វែងរកទិន្នន័យ
រកឃើញ: 12.457
-
បទយកការណ៍៖ កូនៗស្ត្រីសកម្មជនដីធ្លីស្នើភរិយាលោក អូបាម៉ាជួយអន្តរាគមន៍ដោះលែងម្តាយពួកគេ
កុមារា កុមារី ដែលជាកូន និងជាចៅរបស់សកម្មជនដីធ្លីនៅរាជធានីភ្នំពេញ បានស្រែកកងរំពងនៅមុខស្ថានទូតអាមេរិកប្រចាំកម្ពុជា មុនពេលភរិយាយរបស់លោក បារ៉ាក់ អូបាម៉ា គឺលោកស្រី មីហ្សែល អូបាម៉ា មកធ្វើទស្សនៈកិច្ចនៅកម្ពុជាចុងសប្តាហ៍នេះដើម្បីលើកតម្កើងគំនិតផ្តួចផ្តើម «ឲ្យក្មេងស្រីរៀន» “Let Girls Learn” ។ កុមារទាំងនោះគឺជាកូន និងចៅសកម្មជនដីធ្លី១១នាក់ រួមទាំងអ្នកស្រី ទេព វន្នី ជាម្ចាស់ពានរង្វាន់ស្ត្រីជាអ្នកដឹកនាំពិភពលោកដែលបានផ្តល់ដោយសហរដ្ឋអាមេរិកកន្លងមក ។
-
ជនជាតិដើមភាគតិចព្នងនៅមណ្ឌលគិរីព្រមានធ្វើបាតុកម្មប្រឆាំងក្រុមហ៊ុនរំលោភដីធ្លី
អ្នកភូមិជនជាតិដើមភាគតិចព្នង នៅភូមិពូលុ ឃុំប៊ូស្រា ស្រុកពេជ្រាដា ខេត្តមណ្ឌលគិរី ព្រមានថានឹងនាំគ្នាធ្វើបាតុកម្មប្រឆាំងក្រុមហ៊ុនវិនិយោគលើដីសម្បទានសេដ្ឋកិច្ចមួយកន្លែង ដែលកំពុងបង្កផលប៉ះពាល់ច្រើនផ្នែកដល់ពលរដ្ឋ។ អ្នកភូមិអះអាងថា មន្ត្រីអាជ្ញាធរព្រងើយកន្តើយមិនចូលរួមដោះស្រាយជម្លោះតាមពាក្យប្ដឹងរបស់អ្នកភូមិឡើយ។ ហេតុនេះ ពួកគាត់គ្រោងនឹងរៀបចំបាតុកម្មតវ៉ាជំរុញឲ្យមានការដោះស្រាយរឿងនេះបន្ថែមទៀត។ អ្នកភូមិពូលុ អះអាងថា ក្រុមហ៊ុនឈ្មោះ ខេហ្វើស (K-First) កំពុងបំពានឈូសឆាយព្រៃតំបន់សក្ការៈ ដីចម្ការវិលជុំ និងដីចម្ការគ្រួសារសហគមន៍កាន់តែធ្ងន់ធ្ងរឡើង។ ក្រៅពីនោះ ក្រុមហ៊ុននេះបានធ្វើរបាំងបិទផ្លូវដាក់បម្រាមហាមចូលទៅកាន់តំបន់ភ្នំយុប្រាណ ដែលជាតំបន់ទេសចរណ៍ប្រវត្តិសាស្ត្ររបស់អ្នកភូមិទៀតផង។
-
លីកាដូស្នើឲ្យតុលាការអនុវត្តសេចក្ដីណែនាំរបស់ក្រសួងយុត្តិធម៌ពីការឃុំខ្លួនស្ត្រីមានកូនតូច
សម្ព័ន្ធខ្មែរជំរឿន និងការពារសិទ្ធិមនុស្ស លីកាដូ ស្នើឲ្យតុលាការពិចារណាអនុវត្តតាមសេចក្ដីណែនាំរបស់ក្រសួងយុត្តិធម៌ ពាក់ព័ន្ធនឹងការសម្រេចឃុំខ្លួនស្ដ្រីមានកូន ឬស្ត្រីមានផ្ទៃពោះ ។ សេចក្ដីប្រកាសព័ត៌មានរបស់អង្គការលីកាដូចេញថ្ងៃទី១៨ ខែមីនា ឲ្យដឹងថា តាមការស្រាវជ្រាវរបស់អង្គការលីកាដូនាពេលថ្មីៗនេះ បានរកឃើញថា សុខុមាលភាពរបស់កុមារតូចៗដែលនៅជាមួយម្ដាយក្នុងពន្ធនាគារ គឺកម្រនឹងត្រូវបានគេយកចិត្តទុកដាក់ណាស់ ។ ស្ត្រីជាច្រើនដែលលីកាដូបានសម្ភាសអះអាងថា មុនពេលពួកគេត្រូវបញ្ជូនទៅកាន់ពន្ធនាគារ ចៅក្រមមិនបានសួរពួកគេថាតើមានកូន ឬគ្មានកូននោះទេ ។
-
ពលរដ្ឋ៤គ្រួសារនៅឧត្តរមានជ័យអះអាងថារស់នៅទំាំងវេទនា ក្រោយពេលបណ្តេញចេញ
ប្រជាពលរដ្ឋ៤គ្រួសារដែលរស់នៅក្នុងភូមិមនោរម្យ១ ឃុំគោកខ្ពស់ ស្រុកបន្ទាយអំពិល ខេត្ដឧត្ដរមានជ័យ អះអាងថាពួកគេរស់នៅក្នុងភាពលំបាកវេទនា ក្រោយពេលដែលត្រូវបានបង្ខំឲ្យបោះបង់ផ្ទះ និងដីរស់នៅចាស់ ដោយចោទថាមេភូមិបានឃុបឃិតលក់ដីទៅឲ្យឈ្មួញ។ ប្រជាពលរដ្ឋទាំង៤គ្រួសារនោះបានផ្តល់បទសម្ភាសន៍ឲ្យVOD ដោយរៀបរាប់ប្រហាក់ប្រហែលគ្នាថាពួកគាត់បានមករស់នៅតំបន់មួយកន្លែង ក្បែរនឹងផ្លូវក្រវ៉ាត់ព្រំដែនកម្ពុជា-ថៃ ជាប់ភ្នំដងរ៉ែក តាំងពីឆ្នាំ២០០៧ ដោយមានការអនុញ្ញាតពីមេភូមិត្រពាំងត្រាវ គឺលោក ម៉ោន គឹមយ៉ាន។ ពួកគេបន្តថានៅពេលនោះ ពួកគេទទួលបានដីស្រែទំហំ២ហិកតា និងដីឡូតិ៍(ក្បាល៣០គុណនឹង៤០ម៉ែត្រ) ដោយបង់ប្រាក់ចាប់ពី៣០ម៉ឺនទៅ៤០ម៉ឺនរៀលទៅឲ្យអាជ្ញាធរភូមិ។
-
រដ្ឋសភា ប្រជុំអនុម័តជាឯកច្ឆ័ន្ទលើច្បាប់បោះឆ្នោត និងច្បាប់គ.ជ.ប ដោយគ្មានការពិភាក្សាដេញដោល
សមាជិករដ្ឋសភា ដែលបានចូលរួមកិច្ចប្រជុំនៅថ្ងៃព្រហស្បតិ៍ ទី១៩ មីនានេះ បានលើកដៃអនុម័តជាឯកច្ឆ័ន្ទលើសេចក្តីស្នើច្បាប់គ.ជ.ប និងច្បាប់បោះឆ្នោត ដោយគ្មានការជជែក សួរដេញដោល និងកែប្រែខ្លឹមសារអ្វីទេ។ សេចក្តីស្នើច្បាប់ទាំងពីរ ត្រូវបានសង្គមស៊ីវិល រិះគន់ថា ធ្វើដោយប្រញាប់ប្រញាល់ និងជាពិសេសច្បាប់បោះឆ្នោតបានកំណត់ប៉ះពាល់សេរីភាពបញ្ចេញមតិ និងសិទ្ធិចូលរួមរបស់សង្គមស៊ីវិល។
-
មន្ត្រីគណបក្សសង្គ្រោះជាតិបន្តជំរុញឲ្យមានការដោះលែងមន្ត្រីរបស់ខ្លួន
មន្ត្រីជាន់ខ្ពស់គណបក្សសង្គ្រោះជាតិមានជំនឿថា បន្ទាប់ពីសមាជិករដ្ឋសភាអនុម័តសេចក្តីព្រាងច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោតរួចមក មេដឹកនាំនៃគណបក្សទាំងពីរទំនងជានឹងជួបពិភាក្សាគ្នាដើម្បីជជែកអំពីករណីលោក មាជ សុវណ្ណារ៉ា។ លោក មាជ សុវណ្ណារ៉ា ប្រធាននាយកដ្ឋានព័ត៌មានគណបក្សសង្គ្រោះជាតិត្រូវបានកងកម្លាំងមានសមត្ថកិច្ចរបស់រដ្ឋាភិបាលចាប់ខ្លួនកាលពីចុងឆ្នាំ២០១៤។
-
សង្គមស៊ីវិលសុំឱ្យលុបចោលមាត្រាដែលរិតត្បិតសិទ្ធិនិងសេរីភាព
រយៈពេលមួយថ្ងៃមុនពេលដែលសមាជិកសភាទាំង១២៣រូបមកពីគណបក្សសង្គ្រោះជាតិ និង គណបក្សប្រជាជនកម្ពុជាគ្រោងនឹងយកសេចក្តីព្រាងច្បាប់ចំនួនពីរ គឺសេចក្តីព្រាងច្បាប់ស្តីពីការបោះឆ្នោតជ្រើសតាំងតំណាងរាស្ត្រនិងសេចក្តីព្រាងច្បាប់ស្តីការរៀបចំការប្រព្រឹត្តិទៅនៃគណៈកម្មាធិការជាតិ រៀបចំការបោះឆ្នោតយកមកអនុម័តនោះអង្គការសង្គមស៊ីវិលដែលតាមដានឃ្លាំមើលដំណើរការបោះឆ្នោតនៅកម្ពុជាបានទាមទារឱ្យគណបក្សទាំងពីរលុបចោលបទប្បញ្ញត្តិមួយចំនួននៃមាត្រា ៨៤ ១៣៧ ១៤៨ ១៥៩ និង ១៦០ នៃសេចក្តីព្រាងច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ លើប្បញ្ញត្តិដែលចែងពីការដាក់ទោសពិន័យទៅលើសិទ្ធិចូលរួមសកម្មក្នុងជីវភាពនយោបាយនិងសេរីភាពបញ្ចេញមតិរបស់ សមាគម និង អង្គការសង្គមស៊ីវិលមិនមែនរដ្ឋាភិបាល។
-
សភាអនុម័តច្បាប់បោះឆ្នោតថ្មីរួចរាល់ជាស្ថាពរដោយគ្មានការជំទាស់
រដ្ឋសភាកម្ពុជាបានអនុម័តច្បាប់បោះឆ្នោតថ្មីរួចរាល់ហើយ គឺច្បាប់ស្ដីពីការរៀបចំ និងការប្រព្រឹត្តិទៅនៃគណៈកម្មាធិការជាតិរៀបចំការបោះឆ្នោត និងច្បាប់ស្ដីពីវិសោធនកម្មច្បាប់ស្ដីពីការបោះឆ្នោតជ្រើសតាំងតំណាងរាស្ត្រ ដោយគ្មានការជំទាស់ពីបក្សប្រឆាំងឡើយនៅថ្ងៃទី១៩ មីនា។ ប្រធានក្រុមតំណាងរាស្ត្រ និងជាប្រធានគណបក្សសង្គ្រោះជាតិ លោក សម រង្ស៊ី បានថ្លែងមុនចូលប្រជុំសភាថា ច្បាប់បោះឆ្នោតថ្មីនេះ នឹងមិនមានអ្វីជជែកដេញដោលក្នុងសភាទៀតទេ ព្រោះច្បាប់នេះ ត្រូវបានក្រុមការងារចរចានៃបក្សទាំងពីរ បានជជែកពិភាក្សាត្រឹមត្រូវល្អ និងប្រើពេលជាយូរមកហើយ។
-
ពលរដ្ឋនៅខេត្តព្រះសីហនុចោទអាជ្ញាធរថាចុះរុះរើផ្ទះដោយមិនជូនដំណឹង
ប្រជាពលរដ្ឋនៅខេត្តព្រះសីហនុ លើកឡើងថា ផ្ទះរបស់ពួកគេប្រមាណជា៥០ខ្នងត្រូវបានអាជ្ញាធរចុះរុះរើ ដោយប្រើប្រាស់សាលដីកាគ្មានកាលបិរច្ឆេទពិតប្រាកដ ព្រមទាំងមិនបានជូនដំណឺងជាមុន ។ ពលរដ្ឋម្នាក់ដែលផ្ទះរបស់គាត់រងការរុះរើ លោក សេង ឌីណា ប្រាប់ VOD ថា នៅព្រឹកថ្ងៃទីព្រហស្បតិ៍នេះកម្លាំងសមត្ថកិច្ចចម្រុះជិត១០០នាក់ បានចុះមករុះរើផ្ទះរបស់ប្រជាពលរដ្ឋប្រមាណជា៥០ខ្នងក្នុងសហគមន៍អូរដំរី ក្នុងសង្កាត់អូត្រេះ ខណ្ឌស្ទឹងហាវ ខេត្តព្រះសីហនុ ។ លោកថា ការចុះរុះរើនោះធ្វើឡើងលើដីកំពុងមានទំនាស់ ហើយសាលដីកាដែលយកអនុវត្តនោះមិនមានកាលបរិច្ឆេទច្បាស់លាស់ និងមិនបានបិទប្រកាសឲ្យដឹងជាមុន ។
-
អ្នកខេត្តព្រះវិហារស្នើរដ្ឋបាលព្រៃឈើ លុបបំបាត់រោងសិប្បកម្មកែច្នៃឈើនៅខេត្ដនេះ
ប្រជាសហគមន៍ស្រុកឆែប ខេត្ដព្រះវិហារ ដាក់ញត្ដិទៅរដ្ឋបាលព្រៃឈើខេត្ដ ជំរុញឲ្យស្ថាប័ននេះបិទរោងសិប្បកម្មកែច្នៃឈើមួយចំនួន ដែលពួកពលរដ្ឋអះអាងថាបានប្រើកម្មករទៅកាប់បំផ្លាញព្រៃឈើសហគមន៍ ។ ប្រជាសហគមន៍នៅភូមិពោធិ៍ទាប ឃុំម្លូព្រៃ១ ស្រុកឆែប នៅថ្ងៃព្រហស្បតិ៍នេះប្រាប់ VOD ដូចៗគ្នាថា ពួកគាត់ហែល១០០នាក់តំណាងឲ្យស្នាមមេដៃ២០៣គ្រួសារ ទាមទារឲ្យរដ្ឋបាលព្រៃឈើខេត្ដព្រះវិហារ បិទរោងសិប្បកម្មកែច្នៃឈើធំជាងគេ ដែលមានម្ចាស់ឈ្មោះ ស គិត និងរោងសិប្បកម្មកែច្នៃឈើមួយចំនួនទៀត ដែលគ្មានច្បាប់ទម្លាប់ ។ ប្រជាសហគមន៍បន្ដថា ម្ចាស់សិប្បកម្មឈ្មោះ ស គិត បានប្រើកម្មករ ទៅកាប់បំផ្លាញព្រៃសហគមន៍នៅព្រៃព្រះរការជារៀងរាល់ថ្ងៃ ដោយពុំមានសមត្ថកិច្ចណាហាមឃាត់ ឬទប់ស្កាត់នោះទេ ។ ពួកគាត់បន្ថែមថា ប្រជាពលរដ្ឋជាង២០០គ្រួសារនោះ អាស្រ័យផលលើព្រៃព្រះរការនោះ បើគេបំផ្លាញអស់ តើឲ្យពួកគាត់បានអ្វីរស់ទៀត ។
-
ពលរដ្ឋនៅកំពង់ធំបារម្ភខ្លាចគម្រោងផ្ដល់ដីសម្បទានសង្គមកិច្ចនឹងធ្លាក់លើដៃឈ្មួញ
ពលរដ្ឋនៅឃុំមានរិទ្ធ ស្រុកសណ្ដាន់ ខេត្តកំពង់ធំ កំពុងប្រឈមបាត់បង់ដីធ្លាប់អាស្រ័យផល ដោយសារអាជ្ញាធរបង្វែរដីពួកគាត់ឱ្យក្លាយជាដីសម្បទានសង្គមកិច្ចសម្រាប់ជូនពលរដ្ឋនៅខេត្តកំពង់ចាម។ ក៏ប៉ុន្តែពលរដ្ឋទាំងនោះអះអាងថា នេះគ្រាន់តែជាហេតុផលរបស់ឈ្មួញ រួមជាមួយអាជ្ញាធរដើម្បីយកដីពលរដ្ឋដោយស្របច្បាប់ប៉ុណ្ណោះ ព្រោះសូម្បីតែដីពលរដ្ឋនៅក្រៅប្លង់សម្បទាន ក៏អាជ្ញាធរថាជាដីសម្បទានសង្គមកិច្ចដែរ។ ក្រោយពេលអាជ្ញាធរខេត្តកំពង់ធំ បានបញ្ជូនសំណើរបស់ពលរដ្ឋនៅខេត្តកំពង់ចាម ទៅអាជ្ញាធរថ្នាក់ជាតិដើម្បីស្នើសុំដីសម្បទានសង្គមកិច្ចជាង ១ពាន់ហិកតារ (១.៤២៧) សម្រាប់ពលរដ្ឋជាង ៣០០គ្រួសារ គឺធ្វើឱ្យប៉ះពាល់ដល់ពលរដ្ឋមូលដ្ឋានជាច្រើនរយគ្រួសារ។ ពលរដ្ឋមូលដ្ឋានអាចបាត់បង់ដីធ្លាប់អាស្រ័យផល ដោយសារតែអាជ្ញាធរ និងតំណាងពលរដ្ឋមកពីខេត្តកំពង់ចាម ហាមឃាត់ពួកគាត់មិនឱ្យចូលធ្វើចម្ការលើដីនោះបាន។ លើសពីនេះទៀត សូម្បីតែដីរបស់ពលរដ្ឋខ្លះស្ថិតនៅក្រៅប្លង់ដីសម្បទានសង្គមកិច្ចទៅហើយ ក៏អាជ្ញាធរហាមឃាត់ដែរ។
-
ជម្លោះដីធ្លីនៅសហគមន៍បុរីកីឡាក្រុងភ្នំពេញអាចនឹងបិទបញ្ចប់
ថ្ងៃនេះ ប្រជាសហគមន៍បុរីកីឡាក្រុងភ្នំពេញ និងក្រុមការងារពិសេសសិទ្ធិលំនៅដ្ឋាន ប្រជុំគ្នាដើម្បីត្រៀមធ្វើសន្និសីទសារព័ត៌មាននៅថ្ងៃស្អែក ជាមួយសាលារាជធានីភ្នំពេញ ទាក់ទងនឹងដំណោះស្រាយជម្លោះដីធ្លីរបស់ពួកគេ។ លទ្ធផលបឋមនៃដំណោះស្រាយដែលនឹងត្រូវបទផ្សាយនៅថ្ងៃស្អែកដែរនោះ ទំនងអាចបិទបញ្ចប់ជម្លោះដីធ្លីរ៉ាំរ៉ៃរបស់សហគមន៍បុរីកីឡានៅកណ្តាលរាជធានីភ្នំពេញ។
-
ពលរដ្ឋនៅខេត្តត្បូងឃ្មុំចោទអាជ្ញាធរមូលដ្ឋានថាឃុបឃិតគ្នាឈូសឆាយដីតម្កល់សព
ពលរដ្ឋនៅសង្កាត់វិហារហ្លួង ក្រុងសួង ខេត្តត្បូងឃ្មុំ នាំគ្នាប្ដឹងទៅអាជ្ញាធរឲ្យដោះស្រាយសកម្មភាពឈូសឆាយទីកន្លែងកប់សពរបស់អ្នកភូមិ។ ពលរដ្ឋថា ការឈូសឆាយនោះអាចធ្វើទៅបាន គឺដោយសារតែមានការឃុបឃិតជាមួយអាជ្ញាធរភូមិ។ យ៉ាងណា មេភូមិបដិសេធថាខ្លួនមិនបានដឹងរឿងនេះទេ។ ពាក្យបណ្ដឹងរបស់អ្នកភូមិបានប្ដឹងចំពោះឈ្មោះ ឈាង ឈឿន និងបក្ខពួកដែលជាអ្នកពាក់ព័ន្ធផ្ទាល់ ទៅអាជ្ញាធរមានសមត្ថកិច្ចក្រុងសួង នៅថ្ងៃទី១៩ មីនា។
-
អង្គការតម្លាភាព៖ យុវជននៅផ្លូវបំបែករវាងអំពើពុករលួយ និងសុចរិតភាព
ការសិក្សាថ្មីមួយរបស់អង្គការតម្លាភាពកម្ពុជារកឃើញថា យុវជនភាគច្រើនដឹងថាទម្រង់នៃការប្រព្រឹត្តអំពើពុករលួយជាច្រើនគឺជាអំពើខុសឆ្គង តែពួកគេគិតថាជាទង្វើដែលអាចទទួលយកបាន ហើយពួកគេត្រៀមខ្លួនរួចជាស្រេចក្នុងចូលរួមពាក់ព័ន្ធនឹងការប្រព្រឹត្តអំពើពុករលួយទៀតផង ។ អង្គការតម្លាភាពកម្ពុជា នៅថ្ងៃពុធនេះដាក់បង្ហាញរបាយការណ៍របស់ខ្លួនពីការស្ទង់មតិថ្នាក់ជាតិស្តីពីការយល់ឃើញរបស់យុវជនអំពីអំពើពុករលួយ និងសុចរិតភាពនៅប្រទេសកម្ពុជា ដែលបានសម្ភាសន៍យុវជន ១២០០នាក់ អាយុចន្លោះពី១៥ទៅ៣០ឆ្នាំនៅក្នុងរាជធានីខេត្តចំនួន៨ ។
-
ជនជាតិភាគតិចព្នងចោទរដ្ឋបាលព្រៃឈើខេត្តមណ្ឌលគិរីថាឃុបឃិតជាមួយអ្នកកាប់ឈើយកដី
ជនជាតិភាគតិចព្នងនៅភូមិពូគង់ ឃុំស្រែព្រះ ស្រុកកែវសីមា ខេត្តមណ្ឌលគិរី ចោទមន្ត្រីរដ្ឋបាលព្រៃឈើថា ឃុបឃិតជាមួយឈ្មួញ អនុញ្ញាតឲ្យមានការកាប់ព្រៃឈើ ទន្ទ្រានយកដីរាលដាលពាសពេញខេត្តនេះ។ ការចោទប្រកាន់នេះធ្វើឡើងក្នុងសន្និសីទកាសែតមួយ នៅទីស្នាក់ការអង្គការវេទិកានៃអង្គការមិនមែនរដ្ឋាភិបាល(NGO Forum)នៅថ្ងៃពុធនេះ។ អនុប្រធានសហគមន៍ដីធ្លីភូមិពូគង់ លោក ទ្រឺប ធើម ប្រាប់VODថា ការទន្ទ្រានយកដី និងការកាប់ព្រៃឈើនៅក្នុងភូមិពូគង់យ៉ាងសម្បើមដៃ ដោយសារមានការបើកដៃពីមន្ត្រីរដ្ឋបាលព្រៃឈើក្នុងតំបន់នោះ។ លោកបន្តថា ការឃុបឃិតឲ្យមានការកាប់បំផ្លាញព្រៃឈើនេះ បានធ្វើឲ្យប៉ះពាល់យ៉ាងខ្លាំង ដល់ជីវភាពរស់នៅរបស់សហគមន៍ជនជាតិដើមភាគតិច ដូចជាការបាត់បង់ដីធ្លី ព្រៃឈើ និងវប្បធម៌ជាដើម។
-
ក្លឹបអ្នកកាសែតនិងអង្គការតម្លាភាពរៀបចំប្រកួតសរសេរព័ត៌មានពីអំពើពុករលួយ
យោងតាមសេចក្តីប្រកាសព័ត៌មានស្តីពីការប្រកួតប្រជែងពានរង្វាន់អ្នកសារព័ត៌មានឆ្នើម សម្រាប់អត្ថបទពីអំពើពុករលួយនៅ ក្នុងប្រទេសកម្ពុជា ចុះផ្សាយថ្ងៃទី១៨មីនាបានផ្សព្វផ្សាយឲ្យដឹងថា អត្ថបទលេខ១ដែល ចាត់ទុកថាជាអត្ថបទល្អបំផុតនឹងត្រូវទទួលរង្វាន់ ជាទឹកប្រាក់ចំនួន១.២០០ដុល្លារអាមេរិក និងមានឱកាសទៅចូលរួម សន្និសីទលើកទី១៦ ស្តីពីការប្រឆាំងអំពើពុករលួយ ដែលរៀបចំដោយអង្គការតម្លាភាពអន្តរជាតិនៅទីក្រុងកូឡាឡាំពួរ ប្រទេសម៉ាឡេស៊ី ក្នុងខែកញ្ញាខាងមុខនេះ។ចំនែកអត្ថបទលេខ២ ទទួលរង្វាន់ទឹកប្រាក់ចំនួន ៩០០ដុល្លារអាមេរិក។រីឯ អត្ថបទលេខ៣ ទទួលរង្វាន់ទឹកប្រាក់ចំនួន ៦០០ដុល្លារអាមេរិក អត្ថបទលេខ៤ ទទួលរង្វាន់ទឹកប្រាក់ចំនួន ៤០០ដុល្លារអាមេរិក អត្ថបទលេខ៥ ទទួលបានរង្វាន់ទឹកប្រាក់ចំនួន ២០០ដុល្លារអាមេរិក។
-
ពលរដ្ឋជនជាតិដើមភាគតិចទទូចឲ្យពន្លឿនការចុះបញ្ជីដីឲ្យបានឆាប់
តំណាងប្រជាពលរដ្ឋជនជាតិដើមភាគតិច ៣រូប នៅភូមិពូគង់ ឃុំស្រែព្រះ ស្រុកកែវ សីមា ខេត្តមណ្ឌលគីរី នៅព្រឹកថ្ងៃទី ១៨ ខែមីនានេះ បានឡើងមករាជធានីភ្នំពេញ ដើម្បីស្នើឲ្យមាន ពន្លឿនការចុះបញ្ជីដីសហគមន៍ជនជាតិដើមព្នងឲ្យបានឆាប់ ។ បន្ទាប់ពីបរាជ័យក្នុងការតវ៉ា ជាច្រើនលើកច្រើនសារ ជុំវិញបញ្ហាកាប់ឆ្ការព្រៃ រុកទន្ទ្រានរបស់អ្នកមានអំណាច តំណាងប្រជាពលរដ្ឋ ជនជាតិដើមភាគតិច នៅភូមិពូគង់ ឃុំស្រែព្រះ ស្រុកកែវ សីមា ខេត្តមណ្ឌលគីរី បានឡើងមករាជធានីភ្នំពេញ ដើម្បីធ្វើសន្និសីទសារព័ត៌មាន សុំអន្តរាគមន៍ ឲ្យស្ថាប័ន ពាក់ព័ន្ធ ។
-
អឺរ៉ាស្នើក្រុមការងារបក្សទាំងពីរលុបចោលមាត្រាមួយចំនួននៃច្បាប់បោះឆ្នោតថ្មី
សម្ព័ន្ធកំណែទម្រង់ការបោះឆ្នោត (អឺរ៉ា) ស្នើដល់ក្រុមការងារចរចានយោបាយទាំងពីរលុបចោលមាត្រាច្បាប់ចំនួន៤នៃច្បាប់បោះឆ្នោតថ្មី ដូចជាការដាក់ទោសអង្គការសង្គមស៊ីវិល ការផាកពិន័យអ្នកសង្កេតការណ៍ស្ម័គ្រចិត្ត និងពិនិត្យឡើងវិញលើច្បាប់ដែលអនុញ្ញាតឲ្យមន្ត្រី តុលាការ យោធា ចូលរួមឃោសនាបោះឆ្នោតជាដើម។
-
អង្គការ Human Rights Watch រិះគន់ច្បាប់បោះឆ្នោតថ្មី
អង្គការឃ្លាំមើលការរំលោភសិទ្ធិមនុស្សមួយដែលមានឈ្មោះ Human Rights Watch បានបរិហាររិះគន់សេចក្តីព្រាងច្បាប់ថ្មីសម្រាប់ការកែទម្រង់ការបោះឆ្នោតថាបានរំលោភសិទ្ធិមនុស្សជាមូលដ្ឋាន និង រំលោភទៅលើបទដ្ឋាននៃលទ្ធិប្រជាធិបតេយ្យក៏ប៉ុន្តែមន្ត្រីគណបក្សប្រជាជនកម្ពុជាបានជំទាស់។ នៅក្នុងសេចក្តីប្រកាសព័ត៌មានរបស់អង្គការHuman Rights Watch ពីបុរី ញ៉ូវយក របស់សហរដ្ឋអាមេរិកដែលបានចេញផ្សាយនៅថ្ងៃអង្គារនេះ បានឱ្យដឹងថាសេចក្តីព្រាងច្បាប់ថ្មីនេះគួរតែត្រូវធ្វើការកែលម្អឡើងវិញមុននឹងយកទៅអនុម័តក្នុងរដ្ឋសភាដែលគ្រោងធ្វើក្នុងសប្តាហ៍នេះ។
-
សម្តេចតេជោសង្ឃឹមថា ច្បាប់បោះឆ្នោត និងច្បាប់គជប នឹងត្រូវអនុម័តដោយរដ្ឋសភា នៅថ្ងៃស្អែក
ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន បានបង្ហាញនូវក្តីសង្ឃឹម ថាសម័យប្រជុំរដ្ឋសភាជាវិសាមញ្ញនីតិកាលទី៥ នៅថ្ងៃទី ១៩ ខែ មីនា ឆ្នាំ ២០១៥ នឹងអនុម័តច្បាប់ដ៏មានសារៈសំខាន់ទាំង២ បាន។ សម្តេចតេជោបានថ្លែងបែបនេះ នៅក្នុងពិធីបើកការដ្ឋានសាងសង់ផ្លូវជាតិលេខ ៥៨ ដែលស្ថិតនៅក្នុងខេត្តបន្ទាយមានជ័យ នាព្រឹកថ្ងៃទី១៨ ខែមីនា ឆ្នាំ២០១៥។