កំពុងស្វែងរកទិន្នន័យ
រកឃើញ: 12.457
-
វិភាគ៖ តើស្ត្រីបឹងកក់ពិតជាចង់ជាប់ពន្ធនាគារដើម្បីបានមេដាយមែនទេ?
ក្នុងពិធីផ្ដល់សញ្ញាប័ត្រដល់និស្សិតសាកលវិទ្យាល័យមួយក្នុងរាជធានីភ្នំពេញ កាលពីថ្ងៃចន្ទ ទី២៣ ខែកុម្ភៈ ឆ្នាំ២០១៥ លោកនាយករដ្ឋមន្ត្រី ហ៊ុន សែន បានជំរុញឲ្យពន្លឿននីតិវិធី លើកលែងទោសស្ត្រីមានកូនតូច និងស្ត្រីមានផ្ទៃពោះក្នុងពន្ធនាគារ ឲ្យបានមុនចូលឆ្នាំខ្មែរ ឬមុនថ្ងៃ៨មីនាខាងមុខ។ ប៉ុន្តែលោកក៏បានថ្លែងមិនចំឈ្មោះ ដល់ស្ត្រីមួយក្រុមថា ខំរកវិធីសព្វបែបយ៉ាងឲ្យបានជាប់គុក ដើម្បីបានមេដាយ និងងារជាវីរនារីផងដែរ។
-
លីកាដូស្នើឲ្យតុលាការពិនិត្យឡើងវិញនូវដីកាឃុំខ្លួនលើម្ដាយនិងស្ត្រីមានផ្ទៃពោះ
ការដោះលែងស្ត្រីមានផ្ទៃពោះ និងស្ត្រីដែលមានកូនរស់នៅជាមួយក្នុងពន្ធនាគារ ផ្ដល់នូវភាពធូរស្រាលច្រើន ប៉ុន្តែមិនទាន់បានដោះស្រាយបញ្ហាជាចម្បងនានានៅឡើយទេ។ អង្គការលីកាដូ រកឃើញដូច្នេះ បន្ទាប់ពីគណៈកម្មការដែលដឹកនាំដោយក្រសួងយុត្តិធម៌ ប្រកាសថា ស្ត្រីដែលជាប់ពន្ធនាគារចំនួន ១៦នាក់ នឹងត្រូវដោះលែងឲ្យទាន់ទិវាសិទ្ធិនារីអន្តរជាតិ ៨ មីនា ខាងមុខ។ អង្គការលីកាដូ (Licadho) ស្នើសុំឲ្យតុលាការពិនិត្យឡើងវិញនូវដីកាឃុំខ្លួនលើម្ដាយ និងស្ត្រីមានផ្ទៃពោះ ដែលកំពុងរង់ចាំសវនាការ និងពិចារណាកាត់បន្ថយទោសដល់អ្នកដែលបានជាប់ពិរុទ្ធដោយពិចារណាលើអង្គហេតុនៃបទល្មើស និងស្ថានភាពគ្រួសាររបស់ពួកគាត់។
-
សង្គមស៊ីវិលបន្តធ្វើការដោះស្រាយជម្លោះដីរវាងក្រុមហ៊ុនស្ករអំពៅជាមួយពលរដ្ឋខេត្តកំពង់ស្ពឺ
ទំនាស់ផ្ទៃក្នុងរបស់អ្នកដឹកនាំក្រុមហ៊ុន ភ្នំពេញ ស៊ូហ្គើរ (Phnom Penh Sugar Co., LTD) កើតមានក្នុងពេលតំណាងក្រុមហ៊ុនមួយរូបបានអះអាងថា ប្រឹងប្រែងដោះស្រាយជម្លោះដីដាំអំពៅរបស់ក្រុមហ៊ុនជាមួយប្រជាពលរដ្ឋនៅស្រុកឱរ៉ាល់ ខេត្តកំពង់ស្ពឺ។ យ៉ាងណាក៏ដោយ ការអះអាងនេះ ត្រូវបានក្រុមហ៊ុនចេញលិខិតបដិសេធភាពជាតំណាងរបស់បុគ្គលនោះទៅវិញ។ ការសន្យាដោះស្រាយទំនាស់ដីដាំអំពៅដែលក្រុមហ៊ុនភ្នំពេញ ស៊ូហ្គើរ បានសន្យាជាឱឡារិកជាមួយប្រជាពលរដ្ឋនៅឃុំត្រពាំងជោ កាលពីថ្ងៃទី២៥ កុម្ភៈ កំពុងស្ថិតក្នុងភាពមិនច្បាស់លាស់ ដោយសារមានលិខិតរបស់ក្រុមហ៊ុនបដិសេធ លោក សឹង សុច្ចរា ដែលបានអះអាងកន្លងមកថា ជាតំណាងក្រុមហ៊ុនដើម្បីមកជួបប្រជាពលរដ្ឋដោះស្រាយទំនាស់ដី។
-
ពលរដ្ឋបីសហគមន៍នៅខណ្ឌជ្រោយចង្វារ សុំអន្តរាគមន៍ពីសាលាក្រុងឲ្យផ្តល់សំណងលើដីរបស់ពួកគេ
ប្រជាសហគមន៍មានជម្លោះដីធ្លីរស់នៅតាមដងផ្លូវជាតិលេខ៦អា ក្នុងខណ្ឌជ្រោយចង្វារ ជាង១០០នាក់ នៅថ្ងៃចន្ទនេះសុំអន្តរាគមន៍ជាលើកទី២ ទៅសាលារាជធានីភ្នំពេញ ជំរុញឲ្យក្រុមហ៊ុន OCIC ផ្តល់សំណងសមរម្យ ករណីយកដីលំនៅដ្ឋាន ដីស្រែចម្ការ របស់ពួកគេទៅអភិវឌ្ឍន៍ ។ យោងលិខិតតវ៉ាលើកទីពីរ របស់ប្រជាពលរដ្ឋចុះថ្ងៃទី០២ ខែមីនា ឆ្នាំ២០១៥ ឲ្យដឹងថា ប្រជាពលរដ្ឋដែលប៉ះពាល់ដីធ្លី ពីការអភិវឌ្ឍរបស់ក្រុមហ៊ុន OCIC នៅខណ្ឌជ្រោយចង្វារនោះរួមមាន សង្កាត់ជ្រោយចង្វារ ៤៧គ្រួសារ សង្កាត់ព្រែកលៀប ៩០គ្រួសារ និងសង្កាត់ព្រែកតាសេក ១៨គ្រួសារ ។
-
ការដោះលែងស្ត្រីមានផ្ទៃពោះ និងស្ត្រីដែលមានកូននៅជាមួយក្នុងពន្ធនាគារ ផ្តល់នូវភាពធូរស្រាល ប៉ុន្តែមិនទាន់បានដោះស្រាយបញ្ហាជាចំបងនានានៅឡើយទេ
ថ្ងៃ២ ខែមិនា ឆ្នាំ២០១៥ - កាលពីចុងសប្តាហ៍មុន គណកម្មាការដែលដឹកនាំដោយក្រសួងយុត្តិធម៌ បានប្រកាសថា ស្ត្រីដែលជាប់ពន្ធនាគារចំនួន ១៦នាក់ ដែលក្នុងនោះរួមមាន ១៥ នាក់ ជាស្ត្រីដែលមានកូនរស់នៅជាមួយក្នុងពន្ធនាគារ និងម្នាក់ជាស្ត្រីដែលមានផ្ទៃពោះ នឹងត្រូវបានដោះលែង នៅមុនទិវាសិទិ្ធនារីអន្តរជាតិនាថ្ងៃទី៨ ខែមិនា ឆ្នាំ២០១៥។ គណកម្មាកានោះ ក៏បានជូនដំណឹងថារាជរដ្ឋាភិបាល ក៏មានផែនការដោះលែងស្ត្រីមានផ្ទៃពោះ និងស្ត្រីដែលមានកូននៅជាមួយក្នុងពន្ធនាគារជារៀងរាល់ឆ្នាំ។
អានបន្ត -
លីកាដូអំពាវនាវឲ្យយកចិត្តទុកដាក់លើស្ថានភាពស្ដ្រី និងកុមារក្នុងពន្ធនាគារ
អង្គការលីកាដូ ស្នើឲ្យមានវិធានការជាបន្ទាន់ ដើម្បីធ្វើឲ្យប្រសើរនូវស្ថានភាពរបស់ស្ដ្រីមានផ្ទៃពោះ កុមារ និងម្ដាយរបស់ពួកគេដែលកំពុងជាប់ក្នុងពន្ធនាគារ ហើយពុំទទួលបានប្រយោជន៍ពីការលើកលែងទោសនៅថ្ងៃទី០៨ មីនា ទិវានារីអន្ដរជាតិខាងមុខនេះ។ សេចក្ដីថ្លែងការណ៍របស់អង្គការលីកាដូ ចុះថ្ងៃទី០២ ខែមីនា បានលើកឡើងថាអង្គការស្នើឲ្យមានវិធានការ ដើម្បីផ្ដល់ម្ហូបអាហារ និងថ្នាំបង្ការមេរោគឲ្យស្របតាមបទដ្ឋានសម្រាប់កុមារ ស្ដ្រីជាម្ដាយកុមារ និងស្ដ្រីដែលមានផ្ទៃពោះ ដែលមិនទទួលបានផលប្រយោជន៍ពីការដោះលែងក្នុងថ្ងៃទិវានារីអន្ដរជាតិខាងមុខ។ សេចក្ដីថ្លែងការណ៍នោះបានលើកឡើងថា«អង្គការលីកាដូ សូមសំណូមពរឲ្យមានវិធានការជាបន្ទាន់ ដើម្បីធ្វើឲ្យប្រសើរឡើងនូវស្ថានភាពរបស់អ្នកទាំងនោះ រួមមានការបង្កើនថវិកាទិញម្ហូបអាហារសម្រាប់កុមារ និងស្ដ្រីផ្ទៃពោះ ហើយធានាថាកុមារទាំងនោះទទួលបានថ្នាំបង្ការមេរោគស្របតាមបទដ្ឋានជាតិ»។
-
ក្រសួងការងារហាមមិនឲ្យកម្មករធ្វើការថែមម៉ោងលើសពី២ម៉ោងក្នុងមួយថ្ងៃ
ក្រសួងការងារនិងបណ្ដុះបណ្ដាលវិជ្ជាជីវៈ បានក្រើនរំលឹកដល់រោងចក្រសហគ្រាសនានា មិនឲ្យអនុញ្ញាតឲ្យកម្មករធ្វើការថែមម៉ោងលើសពី២ម៉ោងក្នុងមួយថ្ងៃឡើយ។ គោលបំណងនៃសេចក្ដីជូនដំណឹងរបស់ក្រសួងនេះ គឺចង់កាត់បន្ថយគ្រោះថ្នាក់ការងារដែលកើតមានឡើងជាញឹកញាប់ តែអង្គការសង្គមស៊ីវិលយល់ឃើញថា គ្មានប្រយោជន៍។ ក្រសួងការងារនិងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងថា ទោះជាតាមរូបភាពណាក៏ដោយ រួមទាំងការស្ម័គ្រចិត្តរបស់កម្មករផង គឺកម្មករ និងថៅកែរោងចក្រ ឬសហគ្រាស មិនអនុញ្ញាត ឲ្យកម្មករ ឬនិយោជិកធ្វើការងារថែមម៉ោងលើសពី ២ម៉ោងក្នុងមួយថ្ងៃដែរ គឺរយៈពេលធ្វើការមានតែ ១០ម៉ោងប៉ុណ្ណោះក្នុងមួយថ្ងៃ។ ប្រសិនម្ចាស់សហគ្រាសមិនអនុវត្តតាម ក្រសួងនឹងចាត់វិធានការតាមផ្លូវច្បាប់ការងារដែលមានជាធរមាននៅប្រទេសកម្ពុជា។
-
ក្រសួងការងារណែនាំឲ្យម្ចាស់សហគ្រាសសុំគោលការណ៍ពីក្រសួង មុននឹងអនុញ្ញាតឲ្យមានការងារបន្ថែមម៉ោង
ក្រសួងការងារ និងបណ្តុះបណ្តាលវិជ្ជាជីវៈ ព្រមានចាត់វិធានការចំពោះម្ចាស់ និងនាយកសហគ្រាស គ្រឹះស្ថានដែលអនុវត្តគោលការណ៍បន្ថែមម៉ោងខុសពីច្បាប់ការងារ ដោយតម្រូវឲ្យម្ចាស់សហគ្រាសទាំងអស់ត្រូវសុំការអនុញ្ញាតពីក្រសួងការងារជាមុនសិន មុននឹងចាប់ផ្តើមឲ្យមានការងារបន្ថែមម៉ោង។
-
ពលរដ្ឋ១៥គ្រួសារអំពាវនាវឲ្យលោក ហ៊ុន សែននិងភរិយាជួយអន្តរាគមន៍ទំនាស់ដី
ប្រជាពលរដ្ឋមានទំនាស់ដីធ្លីចំនួន ១៥គ្រួសារ រស់នៅភូមិ៥ សង្កាត់៤ ក្រុងព្រះសីហនុ ដង្ហោយរកកិច្ចអន្តរាគមន៍ពីលោកនាយករដ្ឋមន្ត្រី និងភរិយា ឲ្យជួយដោះស្រាយជម្លោះដីធ្លីរ៉ាំរ៉ៃដែលឈ្មួញមានទ្រព្យធនឃុបឃិតជាមួយមន្ត្រីក្រសួង ឬស្ថាប័នពាក់ព័ន្ធ ធ្វើប្លង់កម្មសិទ្ធិលើដីលំនៅឋានកំពុងរស់នៅ។ លើសពីនេះ ក្រុមប្រជាពលរដ្ឋឲ្យដឹងថា ឈ្មួញបានបន្តប្ដឹងពួកគាត់ទៅតុលាការ ហើយសាលាដំបូងព្រះសីហនុ កោះហៅពួកគាត់ឲ្យទៅបំភ្លឺនៅថ្ងៃទី៦ ខែមីនា ខាងមុខ។
អានបន្ត -
ម៉ុងតាញ៉ា៣៦នាក់ដែលប៉ូលិសចាប់បញ្ជូនទៅឲ្យវៀតណាមបានវិលទៅលំនៅឋាន
ពលរដ្ឋខ្មែរអ្នកនាំផ្លូវ និងរៀបចំគម្រោងនាំជនភៀសខ្លួនម៉ុងតាញ៉ា ៣៦នាក់ ជម្លៀសទៅទីក្រុងភ្នំពេញ នៅបន្តបាត់ខ្លួន ក៏ប៉ុន្តែជនភៀសខ្លួនម៉ុងតាញ៉ាវៀតណាម មួយចំនួនក្នុងចំណោម ម៉ុងតាញ៉ា ៣៦នាក់ដែលប៉ូលិសខេត្តរតនគិរី ចាប់បញ្ជូនទៅ ត្រូវបានអាជ្ញាធរវៀតណាម អះអាងថា អាជ្ញាធរវៀតណាម បានដោះលែងពួកគេឲ្យវិលទៅលំនៅឋានវិញ។ ម៉ុងតាញ៉ាវៀតណាម ពីរនាក់ឋិតក្នុងក្រុមមានមនុស្ស ១៨នាក់ អះអាងថា ពួកគេត្រូវបានអាជ្ញាធរវៀតណាម បញ្ជូនឲ្យទៅលំនៅឋានវិញហើយ បន្ទាប់ពីពួកគេព្យាយាមរត់គេចចេញពីភូមិកំណើតទៅលាក់ខ្លួនក្នុងព្រៃខេត្តរតនគិរី ជាង ៥សប្ដាហ៍។
-
ពលរដ្ឋរងគ្រោះខេត្តស្ទឹងត្រែង ធ្វើពិធីដាក់បណ្តាសាក្រុមហ៊ុនចិនសាងសង់ទំនប់វារីអគ្គិសនីសេសានក្រោម២
ប្រជាពលរដ្ឋរងគ្រោះមកពីតាមបណ្តាខេត្ត និងអ្នករស់នៅក្នុងឃុំស្រែគរ ខេត្តស្ទឹងត្រែង នៅថ្ងៃសៅរ៍នេះបានធ្វើពិធីបែបសាសនា ដើម្បីដាក់បណ្តាសាដល់ក្រុមហ៊ុនចិនដែលសាងសង់ទំនប់វារីអគ្គិសនីសេសានក្រោម២ និងដើម្បីបន្ទន់ចិត្តដល់រដ្ឋាភិបាលឲ្យបញ្ឈប់គម្រោងសាងសង់នេះ។ ប្រជាពលរដ្ឋរងគ្រោះមកពីខេត្តរតនគិរី អ្នកភូមិក្បាលមាស និងអ្នកភូមិផ្សេងទៀតរស់នៅខេត្តស្ទឹងត្រែង ប្រមាណ២០០នាក់ នៅថ្ងៃសៅរ៍បាននាំគ្នាធ្វើពិធីដាក់បណ្តាសាដល់ក្រុមហ៊ុនចិនដែលទទួលការសាងសង់ទំនប់វារីអគ្គិសនីសេសានក្រោម២ ដោយពួកគេអះអាងថាគម្រោងនេះនឹងធ្វើឲ្យប៉ះពាល់ដល់ជីវភាពពួកគាត់។ ក្នុងពិធីនេះ ប្រជាពលរដ្ឋនាំគ្នាចងកន្សែងក្រហមរៀងៗខ្លួន និងធ្វើពិធីសែន ដោយមានទៀន ធូប អង្ករ និងក្បាលជ្រូកជាដើម។
អានបន្ត -
ក្រសួងមហាផ្ទៃទទួលស្គាល់ជនអន្តោប្រវេសន៍វៀតណាម និងផ្ដល់ប័ណ្ណស្នាក់នៅអចិន្ត្រៃយ៍
ក្រសួងមហាផ្ទៃសម្រេចទទួលស្គាល់ និងផ្ដល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍វៀតណាមសរុប១៥៥នាក់ នៅខេត្តព្រះសីហនុ។ ការប្រកាសទទួលស្គាល់ជនអន្តោប្រវេសន៍វៀតណាមបន្ថែមនិងការចែកប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍ខាងលើនេះធ្វើឡើងនៅស្នងការដ្ឋាននគរបាលខេត្តព្រះសីហនុ កាលពីព្រឹកថ្ងៃទី២៧ ខែកុម្ភៈ ឆ្នាំ២០១៥ម្សិលមិញ ដោយមានការចូលរួមពីលោក ហែម ថេង អគ្គនាយករង នៃអគ្គនាយកដ្ឋាននគរបាលអន្តោប្រវេសន៍ និងលោក ហេង សំអាន អភិបាលរងខេត្តព្រះសីហនុ រួមជាមួយ ជនជាតិវៀតណាមច្រើននាក់ទៀត ។
-
គណៈកម្មការទី១នៃរដ្ឋសភាស្នើឲ្យលោក ហ៊ុន សែន អន្តរាគមន៍ទំនាស់ដីនៅខេត្តក្រចេះ
គណៈកម្មការទី១នៃរដ្ឋសភាស្នើឲ្យលោក ហ៊ុន សែន ពិនិត្យនិងស៊ើបអង្កេតករណីបែងចែកដីសម្បទានសង្គមកិច្ចទំហំជាង៣០០០ហិកតានៅស្រុកឆ្លូង ខេត្តក្រចេះ ជូនប្រជាពលរដ្ឋ ខណៈមានការចោទថា ការបែងចែកដីរបស់អាជ្ញាធរខេត្តមានភាពមិនប្រក្រតី ។ ការស្នើនេះធ្វើឡើងតាមរយៈលិខិតរបស់គណៈកម្មការសិទ្ធិមនុស្ស ទទួលពាក្យបណ្តឹងអង្កេត និងទំនាក់ទំនងរដ្ឋសភា ព្រឹទ្ធសភា តាមរយៈប្រធានរដ្ឋសភាលោក ហេង សំរិន ទៅកាន់លោកនាយករដ្ឋមន្ត្រីហ៊ុនសែនចុះថ្ងៃទី១៧ ខែកុម្ភៈ ឆ្នាំ២០១៥ ។
-
មន្រ្តីក្រសួងយុត្តិធម៌៖ស្រ្តីមានកូន១៥នាក់ និងមានផ្ទៃពោះ១នាក់នឹងទទួលបានការលើកលែងទោស
មន្រ្តីក្រសួងយុត្តិធម៌ ឲ្យដឹងថាស្ដ្រីមានកូនដែលកំពុងរស់នៅក្នុងពន្ធនាគារទូទាំងប្រទេសកម្ពុជាចំនួន១៥នាក់ និងស្រី្ដមានផ្ទៃពោះ១នាក់ នឹងត្រូវបានទទួលការលើកលែងទោស នៅថ្ងៃ០៨ មីនា ខាងមុខនេះ។ ការលើកលែងទោសនេះធ្វើឡើងតាមការសុំព្រះរាជទានទោសរបស់លោកនាយករដ្ឋមន្ដ្រី ហ៊ុន សែន។ លោក គឹម សន្ដិភាព អ្នកនាំពាក្យក្រសួងយុត្តិធម៌ បានប្រាប់VODនៅព្រឹកថ្ងៃសុក្រនេះថាបន្ទាប់ពីមានកិច្ចប្រជុំដឹកនាំដោយរដ្ឋមន្ដ្រីក្រសួងយុត្តិធម៌ កាលពីថ្ងៃព្រហស្បតិ៍ ក្រសួងបានស្រង់ទិន្នន័យចំនួនស្ដ្រីជាប់ក្នុងពន្ធនាគារ១៦នាក់ ដែលត្រូវដោះលែងនៅថ្ងៃទី០៨ ខែមីនា ដែលជាថ្ងៃទិវានារីអន្ដរជាតិ។ លោកបន្ថែមថាក្នុងចំណោមស្ដ្រីទាំងនោះមានស្ដ្រីដែលមានកូននៅជាមួយ១៥នាក់ និងស្ដ្រីមានផ្ទៃពោះម្នាក់ ដែលនឹងត្រូវដោះលែង ហើយគណៈកម្មការនឹងពិនិត្យលើទិន្នន័យរបស់ខ្លួនបន្ដៗទៀត។
-
ការដកមន្រ្តីកងកម្លាំងប្រដាប់អាវុធ និងមន្រ្តីតុលាការចេញពីជួរដឹកនាំគណបក្ស នយោយបាយ ក្នុងការធ្វើសកម្មភាពគាំទ្រ និងប្រឆាំងគណបក្សណាមួយ ដើម្បីពង្រឹង នីតិរដ្ឋ និងលទ្ធិប្រជាធិបតេយ្យនៅកម្ពុជា
ថ្ងៃ២៦ ខែកុម្ភៈ ឆ្នាំ២០១៥ - យើងខ្ញុំជាក្រុមសម្ព័ន្ធកំណែទម្រង់ការបោះឆ្នោត (ERA) និងក្រុមអង្គការសង្គមស៊ីវិល ថ្កោលទោសចំពោះគណបក្សនយោបាយដែលបាន ឬនឹងបញ្ចូលមន្រ្តីតុលាការ និងមន្រ្តីនៃកងកម្លាំង ប្រដាប់អាវុធទៅក្នុងជួរដឹកនាំគណបក្សនយោបាយរបស់ខ្លួន ដើម្បីចូលរួមសកម្មភាពគាំទ្រគណបក្សខ្លួន ឬនិងប្រឆាំងគណបក្សផ្សេងៗ។ ការបញ្ចូលនេះ គឺរំលោភលើរដ្ឋធម្មនុញ្ញ នីតិរដ្ឋ គោលការណ៍ប្រជាធិបតេយ្យ ពិសេសការបោះឆ្នោតដោយសេរី និងយុត្តិធម៌។
អានបន្ត -
សង្គមស៊ីវិល ស្នើឱ្យដកមន្ត្រីកម្លាំងប្រដាប់អាវុធ និងតុលាការចេញពីជួរថ្នាក់ដឹកនាំនយោបាយ
សម្ព័ន្ធអង្គការសង្គមស៊ីវិល ហៅកាត់ថាអ៊ីរ៉ា នៅថ្ងៃព្រហស្បតិ៍ទី ២៦ កុម្ភៈនេះ បានចេញសេចក្តីថ្លែងការណ៍រួមគ្នាមួយស្តីពីការដកមន្ត្រីកងកម្លាំងប្រដាប់អាវុធនិងមន្ត្រីតុលាការចេញពីជួរដឹកនាំគណបក្សនយោបាយចេញពីសកម្មភាពគាំទ្រ និងប្រឆាំងគណបក្សណាមួយ។ ប៉ុន្តែគណបក្សប្រជាជនកម្ពុជាអះអាងថា ការស្នើនេះ គឺមានលក្ខណៈនយោបាយ ហើយថាពលរដ្ឋខ្មែរគ្រប់រូបមានសិទ្ធិធ្វើនយោបាយ។
-
ក្រុមហ៊ុនភ្នំពេញស៊ូហ្គើរប្រកាសមិនអត់ឱនចំពោះការប្រើប្រាស់ពលកម្មកុមារ
ក្រុមហ៊ុនភ្នំពេញស៊ូហ្គើរ នៅថ្ងៃព្រហស្បតិ៍នេះប្រកាសថាខ្លួននឹងមិនឲ្យមានពលកម្មកុមារនៅតាមរោងចក្រជាដៃគូជាដាច់ខាត ដោយសន្យាថានឹងដាក់ទោសទណ្ឌចំពោះរោងចក្រណាដែលប្រើប្រាស់ពលកម្មកុមារក្នុងអាជីវកម្មរបស់ខ្លួន។ ក្នុងសន្និសីទរៀបចំដោយក្រុមហ៊ុនភ្នំពេញស៊ូហ្គើរនៅរោងចក្រផលិតស្ករសក្នុងខេត្តកំពង់ស្ពឺ ក្រុមហ៊ុនបានប្រកាសក្នុងសេចក្តីថ្លែងការណ៍មួយថាខ្លួននឹងមិនអត់ឱនចំពោះការប្រើប្រាស់ពលកម្មកុមារនៅក្នុងចម្ការអំពៅ និងនៅឯរោងចក្ររបស់ក្រុមហ៊ុនឡើយ។ សេចក្តីថ្លែងការណ៍ឲ្យដឹងទៀតថាក្រុមហ៊ុនក៏នឹងមិនអត់ឱនចំពោះការប្រើប្រាស់កុមារនៅក្នុងអាជីវកម្មនានារបស់អ្នកផ្គត់ផ្គង់សម្ភារៈ ឬផ្តល់សេវា និងដៃគូនានារបស់រោងចក្រ និងចម្ការអំពៅរបស់ក្រុមហ៊ុននោះដែរ។
-
សង្គមស៊ីវិលថ្កោលទោសការបញ្ចូលមន្ត្រីតុលាការនិងកងប្រដាប់អាវុធចូលក្នុងបក្សនយោបាយ
ក្រុមសម្ព័ន្ធកំណែទម្រង់ការបោះឆ្នោតអឺរ៉ា (ERA) និងក្រុមអង្គការសង្គមស៊ីវិល ចេញសេចក្ដីថ្លែងការណ៍នៅថ្ងៃទី២៦ កុម្ភៈ ថ្កោលទោសគណបក្សនយោបាយដែលសំដៅលើគណបក្សកាន់អំណាច ដែលបានបញ្ចូលមន្ត្រីតុលាការ និងមន្ត្រីកងរាជអាវុធហត្ថ ទៅក្នុងជួរថ្នាក់ដឹកនាំគណបក្សរបស់ខ្លួន និងចូលរួមសកម្មភាពប្រឆាំងបក្សផ្សេង។ ការបញ្ចូលនេះ គឺរំលោភរដ្ឋធម្មនុញ្ញ នីតិរដ្ឋ គោលការណ៍ប្រជាធិបតេយ្យ ពិសេសការបោះឆ្នោតដោយសេរី និងយុត្តិធម៌។
-
សង្គមស៊ីវិលថ្កោលទោសគណបក្សនយោបាយបញ្ចូលមន្ដ្រីតុលាការ និងកងប្រដាប់អាវុធក្នុងជួរបក្ស
បណ្ដាញអង្គការសង្គមស៊ីវិលប្រមាណ១៧ នៅថ្ងៃព្រហស្បតិ៍នេះបានថ្កោលទោសចំពោះគណបក្សនយោបាយដែលបញ្ចូលមន្ដ្រីតុលាការ និងកងកម្លាំងប្រដាប់អាវុធទៅក្នុងជួរគណបក្សនយោបាយរបស់ខ្លួន ដោយចាត់ទុកថានេះការរំលោភលើរដ្ឋធម្មនុញ្ញ នីតិរដ្ឋ គោលការណ៍ប្រជាធិបតេយ្យ ការបោះឆ្នោតដោយសេរី និងយុត្ដិធម៌។ អង្គការទាំង១៧នោះមានដូចជាអង្គការខុមហ្រ្វែល និចហ្វិច លីកាដូ មជ្ឈមណ្ឌលសិទ្ធិមនុស្សកម្ពុជា និងសមាគមអាដហុកជាដើម។
គាំទ្រដោយ
