កំពុងស្វែងរកទិន្នន័យ
រកឃើញ: 13.209
-
ពលរដ្ឋមានជម្លោះដីធ្លីមកពីខេត្តបន្ទាយមានជ័យដាក់ញត្តិទៅទីស្ដីការគណៈរដ្ឋមន្ត្រីរកអន្តរាគមន៍
ប្រជាពលរដ្ឋមានជម្លោះដីធ្លីមកពីស្រុកម៉ាឡៃ ខេត្តបន្ទាយមានជ័យ ដែលកំពុងស្នាក់នៅវត្តស្ទឹងមានជ័យ នៅរសៀលថ្ងៃចន្ទនេះ ហែក្បួនដាក់ញត្តិទៅកាន់ទីស្ដីការគណៈរដ្ឋមន្ត្រី ដើម្បីសុំអន្តរាគមន៍។ តំណាងពលរដ្ឋម្នាក់លោក ហ៊ឹម យឿន មានប្រសាសន៍ប្រាប់VODនៅរសៀលថ្ងៃចន្ទនេះថា ប្រជាពលរដ្ឋរួមជាមួយនឹងព្រះសង្ឈប្រមាណជិត៥០អង្គ/នាក់នាំគ្នាដើរចេញពីវត្តស្ទឹងមានជ័យទៅកាន់ទីស្ដីការគណៈរដ្ឋមន្ត្រី ដើម្បីដាក់ញត្តិសុំអន្តរាគមន៍ពាក់ព័ន្ធនឹងជម្លោះដីធ្លីរបស់ពួកគាត់។ លោកបន្តថា ប្រជាពលរដ្ឋក៏នឹងបន្តដើរទៅកាន់ផ្ទះលោកនាយករដ្ឋមន្ត្រី ហ៊ុន សែន ដើម្បីសុំអន្តរាគមន៍ផងដែរ។
-
កម្មកររោងចក្រជិត១ពាន់នាក់ហែក្បួនដាក់ញត្តិទៅក្រសួងការងារសុំអន្តរាគមន៍
កម្មកររោងចក្រដែលទើបប្តូរឈ្មោះថ្មីពី "ហ៊ុយ ចៀន" ទៅជា "ចៀន ឡឹ" ប្រមាណជិត១ពាន់នាក់ នៅព្រឹកថ្ងៃចន្ទនេះ ដង្ហែក្បួនតវ៉ា និងដាក់ញត្តិទៅក្រសួងការងារ ដើម្បីសុំអន្តរាគមន៍ បន្ទាប់ពីការតវ៉ាកន្លងមកមិនទាន់ទទួលបានដំណោះស្រាយ។ ប្រធានសម្ព័ន្ធសហជីពជាតិ លោក ហ្វា សាលី ប្រាប់ VOD នៅព្រឹកថ្ងៃចន្ទនេះថា គោលបំណងនៃការដាក់ញត្តិ និងប្រមូលផ្ដុំតវ៉ាមុខក្រសួងការងារព្រឹកននេះ គឺដើម្បីជំរុញឲ្យខាងក្រសួងរកដំណោះស្រាយឲ្យកម្មករ ព្រោះរហូតមកដល់ពេលនេះមិនទាន់មានចំណាត់ការច្បាស់លាស់ណាមួយនៅឡើយទេ។
-
ប្រជាសហគមន៍បឹងកក់តវ៉ាមុខសាលារាជធានីទាមទារប្រើម៉ាស៊ីនបូមទឹកដែលកំពុងជន់លិច
ប្រជាសហគមន៍បឹងកក់ប្រមាណ៦០នាក់ ប្រមូលផ្តុំនៅមុខសាលារាជធានីភ្នំពេញ នៅរសៀលថ្ងៃអាទិត្យនេះ ដើម្បីទាមទារឲ្យអាជ្ញាធរប្រើម៉ាស៊ីនបូមទឹកដែលកំពុងលិចផ្ទះនៅក្នុងសហគមន៍របស់ពួកគាត់។ ប្រជាសហគមន៍ដែលប្រមូលផ្តុំនៅរសៀលនេះ ទាមទារឲ្យសាលារាជធានីភ្នំពេញ ប្រើប្រាស់ម៉ាស៊ីនយ៉ាងតិច៥គ្រឿង បូមទឹកដែលកំពុងលិចផ្ទះ និង ផ្លូវនៅក្នុងសហគមន៍។ ប្រជាពលរដ្ឋអះអាងថា សំភារៈប្រើប្រាស់នៅក្នុងផ្ទះសើមអស់ បើអាជ្ញាធរមិនប្រើប្រាស់ម៉ាស៊ីនបូមទឹកឲ្យបានទាន់ពេលទេ ពួកគាត់នឹងអត់អីបរិភោគ និងគ្មានកន្លែងស្នាក់នៅ។
-
មន្រ្តីកម្ពុជា៖ជនភៀសខ្លួននៅអូស្ត្រាលី អាចនឹងមកដល់កម្ពុជានៅចុងឆ្នាំ២០១៤
មន្ត្រីក្រសួងការបរទេសកម្ពុជា នៅព្រឹកថ្ងៃចន្ទនេះថ្លែងថាជនភៀសខ្លួននៅអូស្ត្រាលី អាចនឹងមកដល់កម្ពុជានៅចុងឆ្នាំ២០១៤នេះ តែមិនទាន់កំណត់ថាតើមានចំនួនប៉ុន្មាននៅឡើយទេ។ ក្នុងសន្និសីទសារព័ត៌មានមួយនៅក្រសួងមហាផ្ទៃ លោក ឡុង វិសាលោ រដ្ឋលេខាធិការក្រសួងការបរទេស បានថ្លែងថាកម្ពុជាទទួលយកតែបុគ្គលណាដែលឆ្លងកាត់ការសម្ភាសន៍ផ្តល់ឋានៈជាជនភៀសខ្លួន និងទទួលយកអ្នកណាដែលឆ្លើយតបលក្ខខណ្ឌរបស់កម្ពុជាបាន។លោកបន្តថាកម្ពុជានឹងបញ្ជូនក្រុមការងារទៅជួបជាមួយជនភៀសខ្លួនទាំងនោះ ដើម្បីបង្ហាញពីស្ថានភាពប្រទេសកម្ពុជា។លោកថាបើជនភៀសខ្លួនសុខចិត្តមកកម្ពុជា គឺត្រូវឲ្យបំពេញបែបបទ និងបញ្ជូនមកកម្ពុជានៅចុងឆ្នាំ២០១៤នេះ ហើយបើយូរអាចពន្យារពេលដល់ដើមឆ្នាំ២០១៥។
-
សមាជិកក្រុមប្រឹក្សាខណ្ឌច្បារអំពៅរបស់គណបក្សសង្គ្រោះជាតិម្នាក់ត្រូវចាប់ខ្លួន
សមាជិកក្រុមប្រឹក្សាខណ្ឌច្បារអំពៅរបស់គណបក្សសង្គ្រោះជាតិមួយរូប ត្រូវបាននគរបាលការិយាល័យព្រហ្មទណ្ឌកម្រិតធ្ងន់រាជធានី ចាប់ខ្លួនពាក់ព័ន្ធនឹងការធ្វើបាតុកម្មនៅលើស្ពាននាគក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា សមាជិកក្រុមប្រឹក្សាជាប់ឆ្នោតខណ្ឌច្បារអំពៅរបស់គណបក្សសង្គ្រោះ លោក សំ វុទ្ធី ត្រូវបានចាប់ និងឃុំខ្លួននៅស្នងការរាជធានីភ្នំពេញនារសៀលថ្ងៃចន្ទនេះ ពាក់ព័ន្ធនឹងការប្រព្រឹត្តអំពើហិង្សានៅស្ពាននាគកន្លងមក។ លោកថា ឥឡូវនេះលោកមិនអាចធ្វើអត្ថាធិប្បាយបានទេ ដោយលោកនៅបន្តតាមដានឲ្យដឹងច្បាស់ពីមូលហេតុនៃការចាប់ខ្លួនជាមុនសិន។
-
បទវិភាគ៖ កត្តាអ្វីខ្លះដែលថាកម្ពុជាអសមត្ថភាពក្នុងការទទួលយកជនភៀសខ្លួន?
អង្គការសិទ្ធិមនុស្សក្រៅស្រុកនិងក្នុងស្រុក ព្រមទាំងអង្គការសហប្រជាជាតិទទួលបន្ទុកជនភៀសខ្លួនផង កំពុងមានការព្រួយបារម្ភអំពីកិច្ចព្រមព្រៀងរវាងរដ្ឋាភិបាលកម្ពុជា និងរដ្ឋាភិបាលអូស្ត្រាលី ដើម្បីផ្ទេរជនភៀសខ្លួនពីកោះណាវរូ មកអោយរស់នៅកម្ពុជា។ ពួកគេយល់ឃើញថា កម្ពុជាមិនមែនជាប្រទេសសមស្រប និងមានសមត្ថភាពដើម្បីទទួលជនភៀសខ្លួនឡើយ។
-
ពលរដ្ឋស្រុកជីក្រែង ខេត្តសៀមរាប បារម្ភអត់ដីធ្វើស្រែនិងផ្ទះដោយសារការអភិវឌ្ឍប្រព័ន្ធធារាសាស្ដ្រ
ប្រជាពលរដ្ឋរាប់ពាន់គ្រួសារ ក្នុងស្រុកជីក្រែង ខេត្ដសៀមរាប បារម្ភបាត់បង់ដីស្រែ និងដីលំនៅដ្ឋានខណៈគម្រោងអភិវឌ្ឍន៍ប្រព័ន្ធធារាសាស្ដ្រកាត់តាមភូមិរបស់ពួកគាត់។ ក្ដីបារម្ភនេះកើតឡើងពេលដែលមន្ដ្រីរដ្ឋាភិបាល នៅថ្ងៃចន្ទ ទី២៩ ខែកញ្ញានេះកំពុងចុះវាស់វែង និងបោះបង្គោលព្រំដីកំណត់ទំហំខ្នងប្រឡាយទឹក ដែលមានទទឹង១០០ម៉ែត្រ ប៉ះលើដីលំនៅដ្ឋាន និងដីស្រែរបស់ពលរដ្ឋនៅឃុំគោកធ្លក។
-
សកម្មជនការពារធម្មជាតិថា ក្រសួងរ៉ែនិងថាមពលមិនមានទំនួលខុសត្រូវលើគម្រោងជាយអារ៉ែង
សកម្មជនការពារធម្មជាតិ ប្រតិកម្មទៅនឹងការបំភ្លឺរបស់ក្រសួងរ៉ែនិងថាមពល ថាខុសពីការពិត និងខ្វះការទទួលខុសត្រូវ។ ប្រតិកម្មនេះធ្វើឡើងបន្ទាប់ពី ក្រសួងរ៉ែ និងថាមពល កាលពីថ្ងៃសៅរ៍បានផ្សព្វផ្សាយសេចក្តីបំភ្លឺរបស់ខ្លួនមួយដោយលើកឡើងថា ទំនប់វារីអគ្គិសនីជាយអារ៉ែងនឹងផ្តល់ប្រយោជន៍ច្រើនដល់វិស័យថាមពលនៅកម្ពុជា ដោយថាគម្រោងវារីអគ្គិសនីជាយអារ៉ែង ជាគម្រោងដែលត្រូវបានកំណត់អភិវឌ្ឍន៍តាំងពីមុនឆ្នាំ១៩៧០ ហើយរាជរដ្ឋាភិបាលបច្ចុប្បន្នក៏បានបន្តរក្សាគម្រោងនេះក្នុងបញ្ជីផែនការអភិវឌ្ឍន៍វិស័យថាមពលជាតិ។
-
សកម្មជនដីធ្លីចោទអាជ្ញាធរថាទុកឲ្យទឹកជន់លិចផ្ទះពួកគេដើម្បីផ្តាច់ស្បៀងក្នុងការតវ៉ា
អ្នកមានជម្លោះដីធ្លីក្នុងរាជធានីភ្នំពេញ និងមកពីខេត្ត ចោទមន្ត្រីសាលារាជធានីថាមានចេតនាធ្វើឲ្យខូចខាតទ្រព្យសម្បត្តិ និងស្បៀងអាហាររបស់សហគមន៍ ដើម្បីបំបាក់ស្មារតីមិនចេញមុខតវ៉ាប្រឆាំងនឹងការបណ្តេញចេញ។ តំណាងអ្នកភូមិបឹងកក់ដែលចេញតវ៉ាគឺ កញ្ញា សុង ស្រីលាភ ប្រាប់អ្នកសារព័ត៌មាននៅកន្លែងតវ៉ាមុខសាលារាជធានីភ្នំពេញ នាថ្ងៃទី២៩ខែកញ្ញាឆ្នាំ២០១៤នេះថា នៅពេលមានភ្លៀងធ្លាក់ កាលពីថ្ងៃអាទិត្យម្សិលមិញ ពួកគេបានទាក់ទងទៅអាជ្ញាធរពាក់ព័ន្ធ ពិសេសមន្ត្រីសាលារាជធានីភ្នំពេញ សុំឲ្យបើកទ្វារទឹកដើម្បីបញ្ចៀសការជន់លិច។ តែទីបំផុតអាជ្ញាធរបែrធ្វើព្រងើយកន្តើយ ទុកឲ្យជនលិចខូចខាតទ្រព្យសម្បត្តិរបស់អ្នកភូមិមួយចំនួន និងអង្ករចំនួន២តោន ជាជំនួយរបស់សប្បុរសជនសម្រាប់ជាស្បៀងអាហារ ដល់ការតស៊ូមតិប្រឆាំងនឹងការបណ្តេញចេញ។
-
ការដាក់ញត្តិតវ៉ារបស់ពលរដ្ឋស្រុកសេសានទៅសាលាខេត្តស្ទឹងត្រែងត្រូវខកខាន
ការដាក់ញត្តិតវ៉ារបស់ពលរដ្ឋស្រុកសេសាន ទៅអភិបាលខេត្តស្ទឹងត្រែង នៅព្រឹកថ្ងៃចន្ទនេះ ប្រឆាំងនឹងការជម្លៀសចេញពីលំនៅដ្ឋាន ដើម្បីធ្វើទំនប់វារីអគ្គិសនីសេសានក្រោម២នោះ ត្រូវបានខកខានទៅវិញ។ តំណាងពលរដ្ឋមកពីភូមិក្បាលរមាស លោក គឹម ឌឿង ប្រាប់VODថា មន្រី្តរដ្ឋបាលរបស់សាលាខេត្តស្ទឹងត្រែង មិនព្រមទទួលយកញត្តិតវ៉ារបស់ក្រុមតំណាងពលរដ្ឋមកពីភូមិក្បាលរមាស និងភូមិស្រែគរទេ ដោយអះអាងថាលោកអភិបាលខេត្តកំពុងជាប់រវល់ទៅប្រជុំនៅប្រទេសឡាវ។
-
អង្គការសង្គមស៊ីវិល៣០ជំរុញឲ្យរដ្ឋាភិបាលបង្កើតច្បាប់ស្តីពីសិទ្ធិទទួលបានព័ត៌មានឲ្យបានឆាប់
ក្រុមអង្គការសង្គមស៊ីវិលចំនួន៣០ ជំរុញឲ្យរាជរដ្ឋាភិបាលកម្ពុជា និងរដ្ឋសភានីតិកាលទី៥ អនុម័តច្បាប់ស្តីពីសិទ្ធិទទួលព័ត៌មានឲ្យបានឆាប់ និងស្របទៅតាមបទដ្ឋានអន្តរជាតិ ខណៈពួកគេរកឃើញថា ស្ថាប័នសាធារណៈមិនទាន់បើកចំហព័ត៌មានឲ្យបានទូលាយនៅឡើយ។ សេចក្តីថ្លែងការណ៍រួមនេះធ្វើឡើងស្របពេល ខួបលើកទី១១នៃទិវាជាសកលស្តីពីសិទ្ធិដឹង នៅថ្ងៃអាទិត្យទី២៨ខែកញ្ញាឆ្នាំ២០១៤នេះ។ ទិវានេះ ត្រូវបានបង្កើតឡើងដោយក្រុមអ្នកតស៊ូមតិជុំវិញពិភពលោក ដើម្បីលើកកម្ពស់សិទ្ធិប្រជាពលរដ្ឋ ក្នុងការទទួលបានព័ត៌មានសាធារណៈពីស្ថាប័នរដ្ឋ។
-
អ្នកភូមិ៣នាក់រងរបួសស្រាលខណៈតវ៉ាឲ្យអាជ្ញាធរបើកលូរំដោះទឹកភ្លៀងចេញពីតំបន់បឹងកក់
សកម្មជនការពារសិទ្ធិដីធ្លីនៅតំបន់បឹងកក់ អ្នកស្រី យ៉ោម បុប្ផា អះអាងនៅថ្ងៃអាទិត្យនេះថា អ្នកភូមិបឹងកក់៣នាក់រងរបួសស្រាល ដោយសារសន្តិសុខសាលារាជធានីភ្នំពេញវាយ ខណៈពួកគាត់បិទផ្លូវមុន្នីវង្សខាងមុនស្ថាប័ននេះ ទាមទារឲ្យ បើកលូរំដោះទឹកភ្លៀងចេញពីតំបន់បឹងកក់។ អ្នកស្រី យ៉ោម បុប្ផា ដែលដឹកនាំការតវ៉ានោះមានប្រសាសន៍ថា មូលហេតុដែលឈានដល់ការបិទផ្លូវ ដោយសារអ្នកភូមិ២០នាក់ បានទៅស្នើរឲ្យមន្ត្រីសាលារាជធានីភ្នំពេញ ជួយបើកលូរំដោះទឹកចេញពីតំបន់បឹងកក់ ដោយសារនៅតំបន់នោះកំពុងជនលិចដោយសារទឹកភ្លៀង នៅម៉ោងប្រមាណ១០ព្រឹក។ អ្នកស្រីថា មន្ត្រីស្ថាប័ននេះមិនអើពើនឹងការស្នើរសុំរបស់ពួកគាត់ ទើបពួកគាត់សម្រេចចិត្តបិទផ្លូវ តែសន្តិសុខនៅទីនោះវាយបណ្តេញពួកគាត់ បណ្តាលឲ្យពលរដ្ឋ៣នាក់រងរបួសស្រាល។
-
អ្នកភូមិឡពាងកំពុងស្នាក់នៅក្នុងសហគមន៍បឹងកក់អំពាវនាវរកជំនួយខណៈទឹកបន្តជន់លិចតំបន់នេះ
តំណាងអ្នកភូមិឡពាង ដែលកំពុងស្នាក់នៅក្នុងសហគមន៍បឹងកក់រាជធានីភ្នំពេញ នៅរសៀលថ្ងៃអាទិត្យនេះ អំពាវនាវរកជំនួយ ជាស្បៀងអាហារ និងកន្លែងស្នាក់នៅ ខណៈទឹកភ្លៀងបន្តជន់ឡើងនៅក្នុងសហគមន៍នេះ។ ការអំពាវនាវនេះ ធ្វើឡើងបន្ទាប់ពីមានភ្លៀងមួយមេធំ នៅព្រឹកថ្ងៃអាទិត្យនេះ ធ្វើឲ្យជនលិចផ្លូវ និងផ្ទះប្រជាពលរដ្ឋ ស្ទើរតែគ្រប់ខណ្ឌក្នុងរាជធានីភ្នំពេញ។ លោក សួន ញឿន អះអាងជាអ្នកភូមិឡពាងម្នាក់ក្នុងចំណោមប្រមាណ២០នាក់ និងក្មេងៗ ផងនោះ កំពុងស្នាក់នៅផ្ទះអ្នកស្រី ទេព វន្នី ក្នុងតំបន់បឹងកក់ រងចាំដំណោះស្រាយករណីជម្លោះដីធ្លី មានប្រសាសន៍ថា រហូតមកដល់រសៀលថ្ងៃនេះ ទឹកភ្លៀងបន្តជន់ឡើងដល់ត្រឹមចង្កេះ ធ្វើឲ្យសំភារៈរបស់ពួកគាត់ទទឹកស្ទើរតែទាំងស្រុង។ លោកថា នៅពេលនេះ ពួកគាត់កំពុងប្រឈមនឹងការដាច់ស្បៀង និងគ្មានកន្លែងគេង ខណៈកូនៗរបស់ពួកគេចំនួន១០នាក់ធ្លាក់ខ្លួនឈឺជាបន្តបន្ទាប់។
-
តើកម្ពុជាមានចេតនាលាក់បាំងព័ត៌មានពីកិច្ចព្រមព្រៀងទទួលជនភៀសខ្លួនឬយ៉ាងណា?
កាលពីថ្ងៃទី២២ ខែកុម្ភៈ ឆ្នាំ២០១៤ លោកនាយករដ្ឋមន្ត្រី ហ៊ុន សែន បានជួបជាមួយរដ្ឋមន្ត្រីការបរទេសអូស្ត្រាលី លោកស្រី Julie Bishop នៅវិមានសន្តិភាពរាជធានីភ្នំពេញ។ ក្នុងជំនួបនោះ រដ្ឋមន្ត្រីការបរទេសអូស្ត្រាលីបានស្នើសុំឲ្យកម្ពុជាពិចារណាក្នុងការទទួលយកជនភៀសខ្លួនពីប្រទេសអូស្ត្រាលីមកតាំងទីលំនៅថ្មីនៅកម្ពុជា។ ការស្នើសុំនេះស្របពេលកម្ពុជាកំពុងជួបវិបត្តិនយោបាយ គឺតំណាងរាស្ត្រគណបក្សសង្គ្រោះជាតិទាំង៥៥រូបមិនទាន់ចូលសភា ដើម្បីធ្វើការជាមួយតំណាងរាស្ត្រគណបក្សប្រជាជនកម្ពុជាចំនួន៦៨រូប។ការមិនចូលសភានេះ មានការរិះគន់ថារដ្ឋាភិបាលកម្ពុជាមិនស្របច្បាប់ ខណៈមានការអំពាវនាវពីសហគមន៍អន្តរជាតិឲ្យភាគីទាំងពីរចរចាជាមួយគ្នា ដើម្បីរកដំណោះស្រាយនយោបាយរួម ក្នុងនោះក៏មានប្រទេសអូស្ត្រាលីផងដែរ។
-
សហគមន៍មានជម្លោះដីធ្លីនៅឃុំជីខលើគ្រោងហែញត្តិសុំអន្តរាគមន៍ដាក់ទៅស្ថាប័នចំនួន៣
សហគមន៍មានជម្លោះដីធ្លីចំនួន៣ភូមិ នៅឃុំជីខលើ ស្រុកស្រែអំបិល ខេត្តកោះកុង គ្រោងហែញត្តិទៅស្ថាប័នពាក់ព័ន្ធចំនួន៣ នៅដើមខែតុលាខាងមុខនេះ ដើម្បីឲ្យជួយដោះស្រាយបញ្ហាដីធ្លីជាមួយក្រុមហ៊ុនស្ករស ដែលអូសបន្លាយជិត១០ឆ្នាំមកនេះ។ តំណាងសហគមន៍ជម្លោះដីធ្លី នៅឃុំជីខលើ លោក សេង កៅ បានឲ្យដឹងនៅព្រឹកថ្ងៃសៅរ៍នេះថា សមាជិកសហគមន៍ទាំងអស់សម្រេចហែញត្តិទៅសាលាឃុំជីខលើ សាលាស្រុកស្រែអំបិល និងក្រុមហ៊ុន KSI របស់លោក លី យ៉ុងផាត់ នៅថ្ងៃទី៩ ខែតុលាឆ្នាំ២០១៤។ លោកថា ការហែរក្បួននេះ មានប្រជាសហគមន៍ប្រមាណ២០០នាក់ចូលរួម ដោយជិះគោយន្ត ឬម៉ូតូតាមលទ្ធភាពដោយសាររយៈពេលខ្លី និងចម្ងាយផ្លូវឆ្ងាយ។ លោកបន្ថែមថា ខ្លឹមសារញត្តិនេះជំរុញឲ្យស្ថាប័នទាំងនេះ ជួយអន្តរាគមន៍ផ្តល់ដីឲ្យពួកគេវិញ។
-
សហគមន៍ជនជាតិដើមភាគតិចនៅស្រុកពេជ្រាដាគ្រោងធ្វើបាតុកម្មជាថ្មីទៀត
សហគមន៍ជនជាតិដើមភាគតិចនៅក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរី គ្រោងធ្វើបាតុកម្មជាសាធារណៈជាថ្មីទៀត ដោយសារសំណើឲ្យអាជ្ញាធរជួយដោះស្រាយពីទុក្ខកង្វល់របស់ពួកគាត់ពេលកន្លងមក នៅមិនទាន់មានការឆ្លើយតបដែលអាចទទួលបានទេ។ កាលពីថ្ងៃទី១៥ខែកញ្ញា សហគមន៍ជនជាតិដើមភាគតិចធ្វើបាតុកម្មនៅមុខសាលាឃុំប៊ូស្រា ទាមទារចំណុចសំខាន់ៗចំនួន៦ ក្នុងនោះរួមមាន តវ៉ាឲ្យមានសិទ្ធិសេរីភាពក្នុងការដើរហើរ លុបដីសម្បទានសង្គមកិច្ច ដីសម្បទានសេដ្ឋកិច្ចថ្មីៗ ដែលប៉ះពាល់ដល់ដីសហគមន៍ និង ចាប់ខ្លួនជនដៃដល់ដែលប្រើអាវុធបាញ់ប្រហារលើប្រជាពលរដ្ឋ យកទៅផ្តន្ទាទោសតាមច្បាប់ជាដើម។
-
រដ្ឋមន្ត្រីអូស្ត្រាលី៖អ្នកសុំសិទ្ធិជ្រកកោនគួរត្រឡប់ទៅផ្ទះ បើមិនអញ្ចឹងត្រូវជាប់ឃុំឃាំងកាន់តែយូរ
រដ្ឋមន្ត្រីក្រសួងអន្តោប្រវេសន៍ និងកិច្ចការពារព្រំដែនអូស្ត្រាលី លោក ស្កុត ម៉ូរីសុន អំពាវនាវជាសារគំរាមមួយទៅកាន់អ្នកស្វែងរកសិទ្ធិជ្រកកោនក្នុងប្រទេសអូស្ត្រាលី និងកំពុងជាប់ឃុំឃាំងឲ្យត្រឡប់ទៅប្រទេសកំណើតរបស់ពួគេវិញ ដោយព្រមានថាពួកគេនឹងត្រូវជាប់ឃុំឃាំងកាន់តែយូរ ប្រសិនបើមិនចាកចេញ។
-
សមាជិកសភាចុះស្រាវជ្រាវពីបញ្ហាជម្លោះដីធ្លីនៅឡពាងខេត្តកំពង់ឆ្នាំង
សមាជិករដ្ឋសភា មកពីគណបក្សប្រជាជនកម្ពុជា និងគណបក្សសង្គ្រោះជាតិ នៅថ្ងៃសៅរ៍នេះបានចុះទៅស្រាវជ្រាវប្រវត្តិដីធ្លី របស់ប្រជាពលរដ្ឋមានទំនាស់ជាមួយក្រុមហ៊ុន KDC របស់លោកស្រី ជា ខេង នៅ ឃុំតាជេស ស្រុកកំពង់ត្រឡាច ខេត្តកំពង់ឆ្នាំង។ ការចុះស្រាវជ្រាវនេះធ្វើឡើងបន្ទាប់ពី ក្រុមប្រជាពលរដ្ឋដែលមានទំនាស់ដីធ្លីទាំងនោះ ហែរក្បួនពីខេត្តកំពង់ឆ្នាំងមករាជធានាភ្នំពេញ ដើម្បីសុំអន្តរាគមន៍ពីបញ្ហាដីធ្លីរបស់ពួកគេពីស្ថាប័នពាក់ព័ន្ធ ក្រោយពីជម្លោះអូសបន្លយតាំងពីឆ្នាំ២០០៦ មិនមានដំណោះស្រាយ។
-
ក្រសួងការងារនឹងប្រជុំសម្រេចលើប្រាក់ឈ្នួលអប្បបរមារបស់កម្មករនៅថ្ងៃទី១០ខែតុលា
ក្រសួងការងារប្រកាសថា ការចរចាដំឡើងប្រាក់ឈ្នួល ដល់កម្មករក្នុងវិស័យកាត់ដេរសម្លៀកបំពាក់ និងស្បែកជើង គ្រោងប្រជុំសម្រេចជាផ្លូវការនៅថ្ងៃទី១០ខែតុលាឆ្នាំ២០១៤ខាងមុខ បន្ទាប់ពីការប្រជុំកាលពីម្សិលមិញមិនទទួលបានលទ្ធផល។ ថ្លែងបន្ទាប់ពីកិច្ចជំនួបកាលពីម្សិលមិញ លោក អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានអង្គប្រជុំនេះ បានទុកពេល១សប្តាហ៍ឲ្យភាគីទាំង២ គឺសហជីព និងនិយោជក ពិចារណាឡើងវិញ មុននឹងឈានទៅរកការប្រជុំអនុម័ត បិទការតវ៉ានៅថ្ងៃទី១០ ខែតុលា ខាងមុខនេះ។ លោកថា ប្រសិនបើភាគីទាំងនេះ នៅតែរកមិនទាន់ឃើញពីចំនួនតួលេខណាមួយរួមគ្នា ដើម្បីកំណត់ប្រាក់ឈ្នួលកម្មករនោះទេ ក្រសួងនឹងកំណត់តួលេខ រួចបោះឆ្នោតប្រជុំសម្រេច។
-
UNHCRជំរុញឲ្យអូស្ត្រាលីពិចារណាឡើងវិញពីការបញ្ជូនជនភៀសខ្លួនមកកាន់កម្ពុជា
ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន(UNHCR) ជំរុញឲ្យប្រទេសអូស្ត្រាលីពិចារណាឡើងវិញ ក្នុងការបញ្ជូនជនភៀសខ្លួនមកកាន់ប្រទេសកម្ពុជា។ នៅរសៀលថ្ងៃសុក្រម្សិលមិញ រដ្ឋាភិបាលកម្ពុជា និងអូស្ត្រាលីបានចុះហត្ថលេខារួមគ្នាលើអនុស្សរណៈយោគយល់គ្នាមួយ ដោយទទួលយកជនភៀសខ្លួនពីប្រទេសអូស្ត្រាលីមកតាំងទីលំនៅក្នុងប្រទេសកម្ពុជា ដោយមិនកំណត់ចំនួននិងរយៈពេលទេ។
គាំទ្រដោយ
