កំពុងស្វែងរកទិន្នន័យ
រកឃើញ: 12.457
-
សង្គមស៊ីវិលរិះគន់អំពីការលើកកម្ពស់សមភាពយេនឌ័រនៅកម្ពុជា
លោកនាយករដ្ឋមន្ត្រី ហ៊ុន សែន បានបង្ហាញថ្នាក់ដឹកនាំពិភពលោកថា កម្ពុជាបានចូលរួមយ៉ាងសកម្មជាមួយបណ្ដាប្រទេសសមាជិកនៃអង្គការសហប្រជាជាតិ ក្នុងការលើកកម្ពស់សមភាពយេនឌ័រ និងសិទ្ធិអំណាចស្ត្រីនៅក្នុងសង្គម។ ចំណែកខាងមន្ត្រីសង្គមស៊ីវិលដែលធ្វើការពាក់ព័ន្ធនឹងការលើកកម្ពស់សិទ្ធិស្ត្រីវិញបង្ហាញថា ជាគោលការណ៍ គឺឃើញមានភាពល្អប្រសើរ ប៉ុន្តែជាលទ្ធផលនៃការអនុវត្តជាក់ស្ដែងកម្ពុជា នៅមានការខ្វះចន្លោះច្រើន និងនៅឃ្លាតឆ្ងាយពីគោលដៅសហស្សវត្សរបស់អង្គការសហប្រជាជាតិដែលបានដាក់ចេញឲ្យប្រទេសជាសមាជិកអនុវត្តក្នុងរយៈពេល ១៥ឆ្នាំកន្លងមក។ មន្ត្រីសង្គមស៊ីវិលគាំទ្រចំពោះការលើកឡើងពីគោលការណ៍នៃការចូលរួមសកម្មលើកិច្ចការលើកកម្ពស់សមភាពយេនឌ័រនៅកម្ពុជា ប៉ុន្តែស្នើឲ្យរដ្ឋាភិបាលពង្រឹងលើការអនុវត្តឲ្យមានប្រសិទ្ធភាព។ ការស្នើបែបនេះ ដោយសារកន្លងមកមានតែការលើកឡើងនូវគោលការណ៍ ចំណែកការអនុវត្តនៅមានចំណុចអវិជ្ជមានច្រើន។
-
តុលាការមិនអនុញ្ញាតឲ្យគ្រូពេទ្យចូលព្យាបាលលោកហុង សុខហួរនៅក្នុងពន្ធនាគារ
ចៅក្រមស៊ើបសួរសាលាដំបូងរាជធានីភ្នំពេញ មិនអនុញ្ញាតឲ្យគ្រួពេទ្យប្រចាំនៅអង្គការលីកាដូចូលព្យាបាលជំងឺលោក ហុង សុខហួរ នៅក្នុងពន្ធនាគារព្រៃសទេ ដោយអះអាងថា មិនមានឯកសារបញ្ជាក់ពីពន្ធនាគារ។ កាលពីថ្ងៃទី២១ ខែសីហា កន្លងទៅនេះ លោក ជូង ជូងឺ មេធាវីការពារក្តីឲ្យលោក ហុង សុខហួរ សមាជិកព្រឹទ្ធសភា បានធ្វើលិខិតស្នើសុំទៅសាលាដំបូងរាជធានីភ្នំពេញ ដើម្បីឲ្យគ្រួពេទ្យអង្គការលីកាដូ ចូលទៅព្យាបាលកូនក្តីរបស់ខ្លួនដែលកំពុងមានជំងឺ។ ជាការឆ្លើយតប នៅថ្ងៃទី២៥ ខែសីហាលោក កោ វណ្ឌី ចៅក្រមស៊ើបសួរ បានបដិសេធមិនអនុញ្ញាតឲ្យគ្រូពេទ្យចូលព្យាបាលតាមការស្នើសុំរបស់លោក ជូង ជូងីទេ។ លោក កោ វណ្ឌី បញ្ជាក់តាមលិខិតថា មូលហេតុដែលលោកមិនអនុញ្ញាតនេះ ដោយសារមិនមានរបាយការណ៍ស្ថានភាពជំងឺពីពន្ធនាគារ ហើយម្យ៉ាងទៀតលោកបញ្ជាក់ថា នៅពន្ធនាគារមានសេវាថែទាំសុខភាពសម្រាប់ជនត្រូវជាប់ចោទគ្រប់រូបហើយ។
-
លោក កឹម សុខា រិះគន់រដ្ឋាភិបាលថាអនុវត្តរដ្ឋធម្មនុញ្ញនៅខ្វះចន្លោះ
ថ្នាក់ដឹកនាំគណបក្សប្រឆាំង អំពាវនាវឲ្យប្រជាពលរដ្ឋតាមដានរដ្ឋាភិបាល នូវការអនុវត្តរដ្ឋធម្មនុញ្ញ ដើម្បីងាយស្រួលសម្រេចជ្រើសរើសថ្នាក់ដឹកនាំថ្មី ការពារប្រយោជន៍ជាតិពិតប្រាកដ ដោយអះអាងថា មានចំណុចខ្លះរដ្ឋាភិបាលមិនទាន់អនុវត្តបានត្រឹមត្រូវនៅឡើយ។ អនុប្រធានគណបក្សសង្គ្រោះជាតិ លោក កឹម សុខា ថ្លែងបែបនេះនៅក្នុង“ឱកាសខួបទី២២ នៃការប្រកាសឲ្យប្រើរដ្ឋធម្មនុញ្ញនៃព្រះរាជាណាចក្រកម្ពុជា(២៤កញ្ញា១៩៩៣-២៤កញ្ញា២០១៥)” ខណៈលោកចូលរួមក្នុងពិធីបុណ្យ “រ៉ូយ៉ាហាជី” ជាមួយជនជាតិខ្មែរ-ឥស្លាម នៅភូមិអូរលយ ឃុំជើងគ្រាវ ស្រុករលាប្អៀរ ខេត្តកំពង់ឆ្នាំង កាលពីថ្ងៃអាទិត្យម្សិលមិញ។ វីឌីអូឃ្លីបជិត៥នាទីដែល លោក កឹម សុខា បង្ហោះនៅលើហ្វេសប៊ុករបស់លោកឲ្យដឹងថា ចាប់ពីឆ្នាំ១៩៩៣ដល់បច្ចុប្បនេះ គណបក្សកាន់អំណាចអនុវត្តរដ្ឋធម្មនុញ្ញបានខ្លះ និងមិនទាន់បានខ្លះ ដោយលោកអះអាងថា ចំណុចខ្វះខាតនោះរួមមាន សិទ្ធិសេរីភាពរបស់ប្រជាពលរដ្ឋ គោលការណ៍ប្រជាធិបតេយ្យពេញលេញ មិនទាន់បានអនុវត្តត្រឹមត្រូវនៅឡើយ។ លោក កឹម សុខា អំពាវនាវឲ្យប្រជាពលរដ្ឋខ្មែរ តាមដាននូវការអនុវត្តរបស់រដ្ឋាភិបាលបន្តទៀត ដើម្បីងាយស្រួលសម្រេចចិត្តជ្រើសរើសអ្នកដឹកថ្មីប្រកបដោយប្រសិទ្ធភាព។
-
CCHR៖ លទ្ធិប្រជាធិបតេយ្យនៅកម្ពុជាប្រឈមនឹងការគំរាមកំហែង
មជ្ឈមណ្ឌលសិទ្ធិមនុស្សកម្ពុជា (ម.ស.ម.ក) បានចាត់ទុកលទ្ធិប្រជាធិបតេយ្យនៅកម្ពុជា ថាកំពុងតែប្រឈមនឹងការគំរាមកំហែង។ នេះបើតាមសេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ចុះថ្ងៃទី២៤ ខែកញ្ញា ឆ្នាំ២០១៥ ។ មជ្ឈមណ្ឌលសិទ្ធិមនុស្សកម្ពុជា បានចេញសេចក្តីថ្លែងមួយមានចំណងជើងថា «កម្ពុជា៖ លទ្ធិប្រជាធិបតេយ្យប្រឈមនឹងការគំរាមកំហែង» ក្នុងឱកាសប្រារព្ធទិវារដ្ឋធម្មនុញ្ញ និងដំណើរទស្សនកិច្ចរបស់លោកស្រី រ៉ូណា ស្ម៊ីត អ្នករាយការណ៍ពិសេស ស្តីពីស្ថានភាពសិទ្ធិមនុស្សនៅកម្ពុជា នៃអង្កការសហប្រជាជាតិ។ ក្នុងសេចក្តីថ្លែងការនេះ មជ្ឈមណ្ឌលសិទ្ធិមនុស្សកម្ពុជា បានចាត់ទុកលទ្ធិប្រជាធិបតេយ្យនៅកម្ពុជា ថាកំពុងតែប្រឈមនឹងការគំរាមកំហែង និងរិតត្បិតសិទ្ធិសេរីភាពប្រជាពលរដ្ឋ ដែលផ្ទុយនឹងរដ្ឋធម្មនុញ្ញនៃព្រះរាជាណាចក្រកម្ពុជា។
-
អតីតស្ត្រីបឹងកក់បដិសេធដំណោះស្រាយរបស់សាលារាជធានី ស្នើឲ្យចងក្រងជាសហគមន៍ក្រីក្រ
បណ្តាញស្ត្រីអតីតសហគមន៍បឹកកក់ បដិសេធដំណោះស្រាយរបស់សាលារាជធានីភ្នំពេញ ដែលស្នើឲ្យពួកគាត់ចងក្រងជាសហគមន៍ក្រីក្រ ក្នុងការស្វែងរកដំណោះស្រាយបញ្ហាដីធ្លី។ ការបដិសេធនេះ បន្ទាប់ពីតំណាងសហគមន៍បឹងកក់ចំនួន៥នាក់ បានចូលជួបជាមួយមន្ត្រីសាលារាជធានីភ្នំពេញ ជជែកពីការស្វែងរកដំណោះស្រាយ នៅព្រឹកថ្ងៃទី២៥ ខែកញ្ញានេះ។ តំណាងសហគមន៍បឹងកក់អ្នកស្រី ស្រ៊ា ណារ៉េត ថ្លែងប្រាប់អ្នកសារព័ត៌មានក្រោយជំនួបនោះថា ពួកគាត់មិនចង់បានដំណោះស្រាយរបស់សាលារាជធានីនោះទេ។ អ្នកស្ត្រីបន្តថា អ្នកបឹងកក់រងគ្រោះដោយសារការបណ្តេញដោយគ្មានសំណងសមរម្យ មិនមែនពួកគាត់ជាអ្នកក្រនោះទេ។ អ្នកស្រីព្រមានថា បណ្តាញសហគមន៍អតីតបឹងកក់ នឹងតវ៉ារហូតមានដំណោះស្រាយសមរម្យ៖ “ខ្ញុំមិនមែនក្រីក្រ ដោយសារខ្ញុំរកស៊ីក្រខ្ជិលមកសុំសាលារាជធានីភ្នំពេញទេ គឺខ្ញុំក្រីក្រដោយសារការអភិវឌ្ឍតំបន់បឹងកក់ ធ្វើឲ្យខ្ញុំរងគ្រោះវេទនា បាត់ផ្ទះសម្បែង ដើររសាត់អណ្តែត បែកកូនចៅ។ អ៊ីចឹងហើយសាលារាជធានីត្រូវទទួលខុសត្រូវក្នុងការអភិវឌ្ឍ មិនមែនអភិវឌ្ឍពីប្រជាពលរដ្ឋមានផ្ទះ រហូតដល់អត់ផ្ទះនៅ ដើរយំស្រែកតាមចិញ្ចើមថ្នល់ទេ ខ្ញុំមិនអាចទទួលយកបានទេ”។
-
អ្នករាយការណ៍ពិសេសអង្គការសហប្រជាជាតិបន្តពិនិត្យមើលដីសម្បទានសេដ្ឋកិច្ច
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្ម៊ីត(Rhona Smith) បានថ្លែងថាលោកស្រីនឹងបន្តការងារដែលបំពេញដោយអ្នករាយការណ៍ពិសេសមុនៗ ដោយនឹងយកចិត្តទុកដាក់លើដីសម្បទានសេដ្ឋកិច្ច។ លោកស្រីបានថ្លែងបែបនេះនៅក្នុងសន្និសីទសារព័ត៌មានកាលពីថ្ងៃព្រហស្បតិ៍ ក្រោយពីបញ្ចប់បេសកកម្មផ្លូវការលើកដំបូងរបស់លោកស្រី។ ក្នុងដំណើរទស្សនកិច្ចផ្លូវការជាអ្នករាយការណ៍ពិសេស ជំនួសលោក សុរិយា ស៊ូប៊ែឌី លោកស្រី រ៉ូណា ស្ម៊ីត បានជួបជាមួយលោកនាយករដ្ឋមន្រ្តី ហ៊ុន សែន រដ្ឋមន្រ្តីក្រសួងមហាផ្ទៃ រដ្ឋមន្រ្តីក្រសួងធម៌ ប្រធានគណៈកម្មាធិការសិទ្ធិមនុស្សកម្ពុជា រដ្ឋមន្រ្តីក្រសួងការងារ រដ្ឋមន្រ្តីក្រសួងអប់រំនិងរដ្ឋមន្រ្តីបរិស្ថានជាដើម។ លោកស្រីបានថ្លែងថាលោកស្រីបានធ្វើការជាអ្នករាយការណ៍ពិសេសនេះ ដោយឯករាជ្យពីរដ្ឋាភិបាលឬអង្គការណាមួយហើយលោកស្រីបំពេញទៅតាមសមត្ថភាពរបស់លោកស្រី។ លោកស្រីបន្តថាតួនាទីរបស់លោកស្រីមានបីគឺផ្តល់យោបល់ តាមដាននិងធ្វើរបាយការណ៍ស្តីពីស្ថានភាពសិទ្ធិមនុស្សនៅកម្ពុជា។
-
អតីតអ្នកបឹងកក់ទាមទារឲ្យសាលារាជធានីភ្នំពេញពន្លឿនដោះស្រាយរឿងដីធ្លី
អតីតអ្នកបឹងកក់ ដែលមានបញ្ហាដីធ្លីជាង ១០០នាក់ នៅព្រឹកថ្ងៃទី២៥ ខែកញ្ញា នេះ បានតវ៉ា និងដាក់ញត្តិដើម្បីទាមទារឲ្យសាលារាជធានីភ្នំពេញ ពន្លឿនការដោះស្រាយផ្ដល់សំណងបន្ថែមដល់ពួកគាត់ចំនួន ១៦០គ្រួសារ។ តំណាងបណ្ដាញស្ត្រីអតីតសហគមន៍បឹងកក់ លោកស្រី ស៊ា ណារ៉េត បាននិយាយថា បើទោះបីជាអតីតអ្នកបឹងកក់ បានសំណងដូចជា ផ្ទះ និងថវិកាមួយចំនួនក្តី តែជាការទទួលយកទាំងបង្ខំ និងជាសំណងតិចតួចប៉ុណ្ណោះ។ លោកស្រីបន្តថា ទង្វើរបស់រដ្ឋាភិបាល និងក្រុមហ៊ុនស៊ូកាគូ (Shukaku) បានធ្វើឲ្យអ្នកបឹងកក់ រងទុក្ខវេទនា បាត់ដី និងទ្រព្យសម្បត្តិអស់រលីងគ្មានសល់ ដោយសារតែការបណ្ដេញចេញ៖ «បញ្ហារបស់អតីតសហគមន៍បឹងកក់ ពួកខ្ញុំមកពីការដោះស្រាយមិនសមរម្យ មិនមានតម្លាភាព និងយុត្តិធម៌ ដោយក្រុមហ៊ុន និងរដ្ឋាភិបាលឃុបឃិតគ្នា យកដីពលរដ្ឋបឹងកក់ សងសំណងមិនសមរម្យ ហើយជាយកដីនោះទៅលក់ឲ្យក្រុមហ៊ុន»។ នៅម៉ោងប្រមាណ ១០ព្រឹក សាលារាជធានីភ្នំពេញបានអនុញ្ញាតឲ្យតំណាងស្ត្រីអតីតអ្នកបឹងកក់ ១០នាក់ចូលជួប ដើម្បីពិភាក្សាពីបញ្ហានេះ។ តំណាងអតីតអ្នកបឹងកក់ លោកស្រី ស៊ា ណារ៉េត បានឲ្យដឹងថា សាលាក្រុងនៅតែឆ្លើយតបថា សាលារាជធានីភ្នំពេញនឹងព្យាយាមអភិវឌ្ឍនៅកន្លែងដែលអតីតអ្នកបឹងកក់ ទៅរស់នៅប៉ុណ្ណោះ។
-
មូលនិធិក្រុមប្រឹក្សាអាជ្ញាកណ្ដាលបង្ហាញមូលហេតុនៃកូដកម្មក្នុងវិស័យកាត់ដេរ
មូលនិធិក្រុមប្រឹក្សាអាជ្ញាកណ្ដាល រកឃើញពីមូលហេតុមួយចំនួនដែលនាំឲ្យមានកូដកម្មនៅក្នុងវិស័យកាត់ដេរ និងដេរស្បែកជើង។ កូដកម្មភាគច្រើន ទាក់ទងនឹងការទាមទារប្រាក់ឈ្នួល បន្ទាប់មក គឺការបញ្ឈប់ និងការចោទប្រកាន់អំពីការរើសអើងសហជីព។ ស្របគ្នានេះ ការអនុវត្តដែលមិនប្រកបដោយវិជ្ជាជីវៈ ដូចជា ការស៊ីសំណូក ការគំរាមកំហែង និងការជ្រៀតជ្រែកដោយមិនស្របច្បាប់ ក៏ជាកត្តាបង្កឲ្យមានកូដកម្មដែរ។ របាយការណ៍កម្រាស់ជិត ៦០ទំព័រចេញដោយមូលនិធិក្រុមប្រឹក្សាអាជ្ញាកណ្ដាល ស្ដីពីវិវាទការងារ និងការប្រើប្រាស់កូដកម្ម ដែលចេញសម្រាប់ខែសីហា បញ្ជាក់ពីកត្តាធំៗចំនួន៣ ដែលបង្កឲ្យកើតមានកូដកម្មក្នុងវិស័យកាត់ដេរ និងដេរស្បែកជើង។ កត្តាទាំងនោះរួមមាន កម្មវត្ថុ ឬបំណងប្រាថ្នានៃការទាមទារ ដែលមានក្នុងសំណុំរឿងកូដកម្មក្នុងពេលថ្មីៗ កត្តាជំរុញ និងបរិយាកាសដែលនាំឲ្យមានកូដកម្ម។ ការរកឃើញនេះ ជាលទ្ធផលនៃការស្រាវជ្រាវដោយប្រើវិធីសាស្ត្រចម្រុះ រួមបញ្ចូលទាំងការស្រាវជ្រាវឯកសារ និងការសាកសួរភាគីពាក់ព័ន្ធប្រមាណជិត ១០០នាក់។ ការសិក្សានោះ បានផ្ដើមពីខែមេសា ឆ្នាំ២០១៤។ អ្នកដែលក្រុមអ្នកស្រាវជ្រាវបានជួបសម្ភាសនោះរួមមាន កម្មករនិយោជិត និយោជក មន្ត្រីក្រសួងការងារ អង្គការអន្តរជាតិខាងការងារ និងអ្នកបញ្ជាទិញផង។
-
អង្គការសិទ្ធិមនុស្សអន្តរជាតិទទូចកុំបញ្ជូនជនជាតិភាគតិចម៉ុងតាញ៉ាត្រឡប់ទៅវៀតណាម
អង្គការការពារសិទ្ធិមនុស្សអន្តរជាតិធំៗជាង១០ ទទូចឲ្យរដ្ឋាភិបាលកម្ពុជា កុំចាប់បញ្ជូនជនភៀសខ្លួនដែលជាជនជាតិភាគតិចម៉ុងតាញ៉ា-វៀតណាម ត្រឡប់ទៅកាន់ប្រទេសវៀតណាម វិញ។ ការបារម្ភនេះ គឺបន្ទាប់ពីមន្ត្រីរដ្ឋាភិបាលលើកឡើងថា កម្ពុជា នឹងបញ្ជូនជនជាតិភាគតិចម៉ុងតាញ៉ា-វៀតណាម ប្រមាណ ១០០នាក់ទៅវៀតណាម វិញ នៅពេលខាងមុខ។ អង្គការការពារសិទ្ធិមនុស្សអន្តរជាតិទាំងនោះមានដូចជា អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) អង្គការលើកលែងទោសអន្តរជាតិ (Amnesty International) សហព័ន្ធអន្តរជាតិដើម្បីការពារសិទ្ធិមនុស្ស គណៈកម្មការអ្នកច្បាប់អន្តរជាតិ គណៈកម្មាធិការការពារសិទ្ធិមនុស្សវៀតណាម និងក្រុមអ្នកការពារសិទ្ធិពលរដ្ឋ ជាដើម។ អង្គការអន្តរជាតិទាំងនេះ សុទ្ធតែសម្ដែងការបារម្ភពីលទ្ធភាព នៃការចាប់បញ្ជូនខ្លួនជនជាតិភាគតិចម៉ុងតាញ៉ា ត្រឡប់ទៅកាន់ប្រទេសវៀតណាម វិញពីសំណាក់រដ្ឋាភិបាលកម្ពុជា។ ពួកគេលើកឡើងថា ការចាប់បញ្ជូនជនភៀសខ្លួនទៅកាន់ប្រទេសដើម ទីដែលពួកគេអាចប្រឈមនឹងការធ្វើទុក្ខបុកម្នេញពីរដ្ឋាភិបាលនៃប្រទេសនោះ គឺជាការរំលោភសិទ្ធិមនុស្ស ពិសេសគឺអនុសញ្ញាអន្តរជាតិស្ដីពីជនភៀសខ្លួន។
-
លោក ផៃ ស៊ីផាន៖ CCHR មិនដែលនិយាយអ្វីល្អពីរាជរដ្ឋាភិបាលកម្ពុជានោះទេ
(ភ្នំពេញ)៖ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានឲ្យដឹងថា មជ្ឈមណ្ឌលសិទ្ធិមនុស្សកម្ពុជា (CCHR) មិនដែលនិយាយល្អ និងលើកសរសើរចំពោះរាជរដ្ឋាភិបាលកម្ពុជានោះទេ។ ការរិះគន់របស់លោក ផៃ ស៊ីផាន បានធ្វើឡើង បន្ទាប់ពីមជ្ឈមណ្ឌលសិទ្ធិមនុស្សកម្ពុជា បានចេញរបាយការណ៍មួយ ដោយចាត់ទុកលទ្ធិប្រជាធិបតេយ្យនៅកម្ពុជា កំពុងតែប្រឈមនឹងការគំរាមកំហែង។ អ្នកនាំពាក្យនៃទីស្តីការគណៈរដ្ឋមន្ត្រី លោក ផៃ ស៊ីផាន បានឱ្យដឹងថា ការលើកឡើងរបស់ CCHR នេះ គឺជាភាសាមួយ ដែលមិនមានការសហការទេ ប៉ុន្តែជាភាសាដែលប្រឆាំងឬប្រឈម ឬដាក់កំហិតឲ្យធ្វើតាម ឬជានិន្នាការដាក់បញ្ជាតែប៉ុណ្ណោះ។ លោកថា «រហូតមកដល់ពេលនេះ យើងអត់ដែលទាន់ឮ មជ្ឈមណ្ឌលហ្នឹងនិយាយថា លទ្ធិប្រជាធិបតេយ្យកម្ពុជា បានដើរទៅមុខទេលើកលែង តែពួកមកពីខាងក្រៅវិញ ស្ថានទូតបាននិយាយថា សិទ្ធិមនុស្ស លទ្ធិប្រជាធិបតេយ្យកម្ពុជាបានដើរ បានចាក់ឫស»។
-
លោកស្រី រ៉ូណាស្មីត៖ ប្រទេសកម្ពុជា បន្តអភិវឌ្ឍក្នុងល្បឿនមួយលើសពីការរំពឹងទុក
ភ្នំពេញ: លោកស្រី រ៉ូណា ស្មីត ( Rhona Smith ) អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា បានលើកឡើងថា ប្រទេសកម្ពុជា បន្តអភិវឌ្ឍន៍ក្នុងល្បឿនមួយ លើសពីការរំពឹងទុក ហើយស្របពេលជាមួយនោះ ក៏ត្រូវបានចាត់ថា បាន និងកំពុងបំពេញតួនាទីមួយដ៏លេចធ្លោ នៅក្នុងចំណោមប្រទេស ក្នុងសមាគមអាស៊ាន និងនៅលើពិភពលោកទាំងមូល។ លោកស្រី រ៉ូណា ស្មីត បានលើកឡើងដូច្នេះ ក្នុងសេចក្តីថ្លែងការណ៍របស់លោកស្រី ដែលបានផ្សព្វផ្សាយ ក្នុងសន្និសីទកាសែត នារសៀលថ្ងៃទី២៤ ខែកញ្ញា ឆ្នាំ២០១៥ នៅពេលលោកស្រី បញ្ចប់ដំណើរទស្សនកិច្ចផ្លូវការ លើកដំបូង នៅកម្ពុជា ចាប់ពីថ្ងៃទី១៦ ដល់ថ្ងៃទី២៤ ខែកញ្ញា ឆ្នាំ២០១៥។
-
ស្ត្រីខ្មែរ៣នាក់ត្រូវបានជួយសង្គ្រោះពីប្រទេសម៉ាឡេស៊ី និងចិន
ក្រសួងការបរទេសកម្ពុជាឲ្យដឹងថា ពលការិនីខ្មែរចំនួន២នាក់ដែលបានទៅធ្វើការនៅប្រទេសម៉ាឡេស៊ី តាមរយៈមេខ្យល់និងតាមរយៈក្រុមហ៊ុនហើយជួបការលំបាកក្នុងការងារ និងស្ត្រីម្នាក់ដែលដែលត្រូវបានមេខ្យល់បោកបញ្ឆោតនាំយកទៅរៀបការជាមួយបុរសជនជាតិចិន ត្រូវបានជួយសង្គ្រោះឲ្យវិលត្រឡប់មកកម្ពុជាវិញ។ សេចក្តីប្រកាសព័ត៌មានរបស់ក្រសួងការបរទេសចេញផ្សាយកាលពីថ្ងៃពុធម្សិលមិញនេះឲ្យដឹងថា ពលការិនីរងគ្រោះទាំង២នាក់នៅប្រទេសម៉ាឡេស៊ីបានទៅរកជំនួយពីស្ថានទូតកាលពីថ្ងៃទី៨ និងថ្ងៃទី១៤ ខែកញ្ញានេះ ដើម្បីឲ្យពួកគេបានវិលត្រឡប់មកកម្ពុជាវិញ។ ពលការិនីម្នាក់មកពីខេត្តកណ្ដាល ត្រូវបានមេខ្យល់នាំយកទៅប្រទេសម៉ាឡេស៊ីកាលពីខែកក្កដា ឆ្នាំ២០១៤ និងម្នាក់ទៀតមកពីខេត្តត្បូងឃ្មុំ ដោយពលការិនីរូបនេះបានទៅធ្វើការនៅម៉ាឡេស៊ីតាមរយៈក្រុមហ៊ុនមួយ(មិនចាំឈ្មោះ)កាលពីថ្ងៃទី០១ ខែកញ្ញា ឆ្នាំ២០១៥នេះ ធ្វើការជាស្ដ្រីជំនួយការមេផ្ទះ។
-
ខួប២២ឆ្នាំនៃរដ្ឋធម្មនុញ្ញ និងការរិះគន់ចំពោះការអនុវត្តច្បាប់មិនបានត្រឹមត្រូវ
រដ្ឋធម្មនុញ្ញថ្មីនៃព្រះរាជាណាចក្រទី២ មានអាយុកាល ២២ឆ្នាំហើយគិតមកត្រឹមថ្ងៃទី២៤ ខែកញ្ញា ឆ្នាំ២០១៥។ ក្នុងខួប ២២ឆ្នាំនៃរដ្ឋធម្មនុញ្ញនេះ មជ្ឈមណ្ឌលសិទ្ធិមនុស្សកម្ពុជា បានចេញផ្សាយនូវកំណត់ត្រាសង្ខេបមួយ ដោយបង្ហាញពីការធ្លាក់ចុះនៃការអនុវត្តច្បាប់មិនបានត្រឹមត្រូវ ចំណែកការគោរពលទ្ធិប្រជាធិបតេយ្យ ក៏មិនបានពេញលេញដែរ។ កំណត់ត្រាសង្ខេបរបស់មជ្ឈមណ្ឌលសិទ្ធិមនុស្សកម្ពុជា ដែលចេញផ្សាយចំថ្ងៃខួប ២២ឆ្នាំនៃកំណើតរដ្ឋធម្មនុញ្ញនេះ បានដាក់ចំណងជើងថា «លទ្ធិប្រជាធិបតេយ្យប្រឈមនឹងការគំរាមកំហែង»។ ខ្លឹមសារនៃកំណត់ត្រានេះ បានលើកឡើងពីទិដ្ឋភាពជា ៣ផ្នែកផ្សេងគ្នា គឺការការពារផ្នែកច្បាប់ សេរីភាពជាមូលដ្ឋាន ការរឹតត្បិតសេរីភាពជាមូលដ្ឋាន និងផ្នែកទី៣ បានលើកឡើងពីសសរស្ដម្ភនៃលទ្ធិប្រជាធិបតេយ្យ ដែលត្រូវបានគេដៅសញ្ញា ដែលជាផ្នែកមួយនៃប្រព័ន្ធបំបិទសំឡេងប្រឆាំងរដ្ឋាភិបាល។
-
ជនជាតិដើមភាគតិចព្នងតវ៉ាប្រឆាំងនឹងតុលាការខេត្តក្រចេះសាកសួរតំណាង៥នាក់
ពលរដ្ឋជនជាតិដើមភាគតិចព្នង ជិត ១០០នាក់ បានប្រមូលផ្ដុំគ្នានៅមុខសាលាដំបូងខេត្តក្រចេះ បន្ទាប់ពីអ្នកភូមិ ៥នាក់ ត្រូវចូលខ្លួនបកស្រាយបំភ្លឺតាមដីកាកោះហៅរបស់តំណាងអយ្យការ។ ការតវ៉ានេះ កើតឡើងដោយសារតែអ្នកភូមិនៅតែព្រួយបារម្ភពីនីតិវិធីរបស់តំណាងអយ្យការអមសាលាដំបូងខេត្តនេះ។ ចំណែកក្រុមអង្គការសង្គមស៊ីវិលដែលឃ្លាំមើលករណីនេះ ចាត់ទុកករណីនេះថាអាចជាចេតនាចង់បំបាក់ស្មារតីសហគមន៍ ដែលតែងតែឈឺឆ្អាលចំពោះការអភិរក្សដីព្រៃឈើ ឬធនធានធម្មជាតិ។ ពលរដ្ឋជនជាតិដើមភាគតិចព្នង រស់នៅភូមិប្អៀរ ឃុំថ្មី ស្រុកចិត្របុរី ខេត្តក្រចេះ ចំនួន ៩៩នាក់ក្នុងចំណោមពលរដ្ឋចំនួន ១៩៧គ្រួសារ ដែលមានទំនាស់ដីធ្លីជាមួយក្រុមហ៊ុនសម្បទានសេដ្ឋកិច្ចវៀតណាម ដូវ ទឺសៃហ្គ៊ន ប៊ិច ភឿក បានធ្វើដំណើរទៅសាលាដំបូងខេត្តនេះ ដើម្បីត្រៀមតវ៉ាប្រឆាំងសេចក្តីសម្រេចរបស់តំណាងអយ្យការ ប្រសិនការសាកសួរនោះអាចឈានដល់ការឃុំខ្លួនអ្នកភូមិ។
-
លោក កឹម សុខា ស្នើឲ្យអ្នករាយការណ៍ពិសេសអង្គការសហប្រជាជាតិកែទម្រង់ប្រព័ន្ធតុលាការ
អនុប្រធានទី១នៃរដ្ឋសភា លោក កឹម សុខា នៅព្រឹកថ្ងៃពុធនេះ បានស្នើមន្រ្តីអង្គការសហប្រជាជាតិទទួលបន្ទុកសិទ្ធិមនុស្ស ឲ្យជួយកែទម្រង់ប្រព័ន្ធតុលាការ ដែលលោកចាត់ទុកថាមិនឯករាជ្យបណ្តាលឲ្យមានការរំលោភសិទ្ធិមនុស្សនៅកម្ពុជា។ លោក កឹម សុខា បានថ្លែងបែបនេះក្រោយបញ្ចប់ជំនួបលើកដំបូងជាមួយអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្ម៊ីត(Rhona Smith)។ លោកមានប្រសាសន៍ថាលោកបានជំរុញឲ្យអ្នករាយការណ៍ពិសេសជួយធ្វើកំណែទម្រង់ប្រព័ន្ធតុលាការឲ្យឯករាជ្យ ដើម្បីឲ្យប្រជាពលរដ្ឋទទួលបានយុត្តិធម៌សង្គមទាំងសមភាពខាងនយោបាយ សេដ្ឋកិច្ចនិងសង្គម។ លោកចាត់ទុកការបញ្ជូនអ្នករាយការណ៍ពិសេសមកកម្ពុជាគឺត្រឹមត្រូវ។ លោក កឹម សុខា បានថ្លែងថា៖ "ខ្ញុំអត់លើកពីបញ្ហាទេ ព្រោះបញ្ហាគេដឹងអស់ហើយ ពិភពលោកគេដឹងហើយ បានគេបញ្ជូនមក។ បើគេមិនដឹងថា មានបញ្ហា គេមិនបញ្ជូនមកទេ។ ខ្ញុំលើកពីដំណោះស្រាយ។ ខ្ញុំថាដើម្បីដោះស្រាយបញ្ហាសិទ្ធិមនុស្សនៅប្រទេសកម្ពុជា ត្រូវកែទម្រង់ប្រព័ន្ធតុលាការជាមុនសិន។ បើមិនបានកែប្រព័ន្ធតុលាការឲ្យឯករាជ្យពិតប្រាកដទេ បញ្ហាសិទ្ធិមនុស្សនៅប្រទេសកម្ពុជាមិនអាចដោះស្រាយទេ”។
-
អង្គការស្ត្រីស្នើពិចារណាធ្វើវិសោធនកម្មច្បាប់ស្ដីពីការបោះឆ្នោតក្រុមប្រឹក្សាឃុំ-សង្កាត់
បណ្ដាញអង្គការធ្វើការងារលើកស្ទួយសិទ្ធិស្ត្រី ស្នើ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោក សម រង្ស៊ី ប្រធានគណបក្សសង្គ្រោះជាតិ ពិចារណាសំណើសុំធ្វើវិសោធនកម្មច្បាប់ ស្ដីពីការបោះឆ្នោតក្រុមប្រឹក្សាឃុំ-សង្កាត់ ដែលធានាសមភាពយេនឌ័រក្នុងតួនាទីជាអ្នកដឹកនាំក្នុងមូលដ្ឋាន។ សំណើនេះ ធ្វើឡើងមួយថ្ងៃមុនពេល លោក ស ខេង និងលោក សម រង្ស៊ី នឹងជួបគ្នាពិភាក្សាពាក់ព័ន្ធនឹងច្បាប់បោះឆ្នោតក្រុមប្រឹក្សាឃុំ-សង្កាត់។ ក្នុងលិខិតចំនួនពីរដាច់ដោយឡែកពីគ្នា ដែលដាក់ទៅ លោក ស ខេង និងលោក សម រង្ស៊ី ក្រុមអង្គការស្ត្រីបានលើកឡើងថា បច្ចុប្បន្ននៅមានវិសមភាពយេនឌ័រ ដែលធ្វើឲ្យការចូលរួមរបស់ស្ត្រី និងបុរស នៅពុំទាន់ស្មើភាពគ្នាក្នុងដំណើរការបោះឆ្នោត។ ក្រុមដដែលបញ្ជាក់ថា ចាំបាច់ត្រូវកែសម្រួលច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់។
-
កម្មកររោងចក្រប៊្លូមហ្វៀលខេត្តកំពង់ឆ្នាំងបន្តតវ៉ាទាមទារដំណោះស្រាយការងារ
តំណាង និងកម្មករកម្មការិនីរោងចក្រ ប៊្លូម ហ្វៀល (Blooms Field) នៅខេត្តកំពង់ឆ្នាំង នៅតែរក្សាជំហរធ្វើកូដកម្មនៅខាងមុខរោងចក្ររាល់ថ្ងៃ ឬអាចដង្ហែក្បួនតវ៉ាទៅកាន់មន្ទីរការងារ ប្រសិនបើនៅតែគ្មានដំណោះស្រាយ។ ការព្រមានបែបនេះ គឺបន្ទាប់ពីក្រុមកម្មករនាំយកញត្តិទៅដាក់នៅក្រសួងការងារ ហើយនាំគ្នាបន្តធ្វើកូដកម្មនៅមុខរោងចក្រពីរម៉ោងនៅថ្ងៃទី២២ ខែកញ្ញា។ កូដកម្មរបស់កម្មករកម្មការិនីប្រមាណ ២០០នាក់ បានឈានដល់ថ្ងៃទី៦ ហើយ គឺគិតចាប់ពីថ្ងៃទី១៧ ខែកញ្ញា ដើម្បីទាមទារលក្ខខណ្ឌការងារចំនួន ៤ចំណុចពីភាគីក្រុមហ៊ុន ប៊្លូម ហ្វៀល។ ក្រុមហ៊ុននេះ ផលិតប្រភេទអាវចាក់ ឬអាវរងាសម្រាប់នាំចេញទៅក្រៅប្រទេស។ លក្ខខណ្ឌទាំងបួនចំណុចដែលកម្មករទាមទារនោះ គឺទី១ កម្មករទាមទារឲ្យរោងចក្រទទួលយកកម្មករចំនួន ២០នាក់ដែលបានបញ្ឈប់ ឲ្យចូលធ្វើការវិញ។ ទី២ ត្រូវបញ្ឈប់មន្ត្រីរដ្ឋបាលរោងចក្រចំនួនពីរនាក់ គឺកញ្ញា ឡុង សាវី និងលោក មាស តារា។ ទី៣ ផ្ដល់កុងត្រាការងាររយៈពេលវែង គឺចាប់ពី ៦ខែទៅ ១ឆ្នាំ និងទី៤ ភាគីរោងចក្រមិនត្រូវបញ្ឈប់កម្មករដោយគ្មានមូលហេតុបន្តទៀត។
-
សមាគមនិយោជកបារម្ភខ្លាចអ្នកវិនិយោគចាកចេញ ខណៈសហជីពបន្តទាមទារតម្លើងប្រាក់ខែឲ្យកម្មករ
សហព័ន្ធនិយោជក និងសមាគមពាណិជ្ជកម្មកម្ពុជាបានបង្ហាញពីក្តីបារម្ភរបស់ខ្លួនថា អ្នកវិនិយោគអាចនិងបិទរោងចក្រ ប្រសិនសហជីពគាំទ្រកម្មករនៅទេបន្តទាមទារតម្លើងប្រាក់ឈ្នួលច្រើនហួសហេតុពេក។ ប៉ុន្តែការលើកឡើងនេះត្រូវបានតំណាងសហជីពកម្មករកម្ពុជាពន្យល់ថា នេះគ្រាន់តែជាលេសរបស់ក្រុមនិយោជក ដែលមិនចង់តម្លើងប្រាក់ឈ្នួលឲ្យកម្មករតែប៉ុណ្ណោះ ។ ការពិភាក្សាស្តីពីបញ្ហាតំម្លើងប្រាក់ឈ្នួលអប្បបរមាឲ្យកម្មករ ក្នុងវិស័យឧស្សាហកម្មវាយនភ័ណ្ឌ កាត់ដេរសំលៀកបំពាក់ និងផលិតស្បែកជើងក្នុងប្រទេសកម្ពុជា ត្រូវបានធ្វើឡើងយ៉ាងផុលផុះនៅប៉ុន្មានថ្ងៃចុងក្រោយនេះ។ គ្រប់សមាសភាពត្រីភាគី បានធ្វើការងាររៀងៗខ្លួនទៅលើបញ្ហានេះ ដើម្បីបង្ហាញជំហរក្នុងការតម្លើងប្រាក់ឈ្នួល។
-
NGO Forum ៖រាជធានីភ្នំពេញមានអត្រាវិវាទដីធ្លីកើតឡើងខ្ពស់ជាងគេ
រាជធានីភ្នំពេញឈរនៅលំដាប់ថ្នាក់ទីមួយដែលមានអត្រាវិវាទដីធ្លីកើតឡើងខ្ពស់បំផុត ហើយបន្ទាប់មកខេត្តរតនគិរីស្ថិតក្នុងលំដាប់ទីពីរ។ នេះបើយោងតាមការវិភាគស្ថិតិស្ដីពីវិវាទដីធ្លីនៅកម្ពុជាក្នុងឆ្នាំ២០១៤ដែលផ្សព្វផ្សាយដោយវេទិកានៃអង្គការមិនមែនរដ្ឋាភិបាលស្ដីពីកម្ពុជានៅថ្ងៃទី២២កញ្ញានៅភោជនីយដ្ឋានទន្លេបាសាក់។ មូលហេតុដែលធ្វើឲ្យរាជធានីភ្នំពេញនាំមុខខេត្តក្នុងរឿងវិវាទដីធ្លីដោយសារតែការអភិវឌ្ឍន៍ក្រុងប៉ះចំកន្លែងរស់នៅរបស់ពលរដ្ឋ និងកំណើនប្រជាជនក្រីក្រដែលកំពុងរស់នៅលើដីសាធារណៈរបស់រដ្ឋ។ ចំពោះខេត្តរតនគិរីដែលសំបូរទៅដោយជនជាតិដើមភាគតិចរស់នៅនោះគឺដោយសារការអភិវឌ្ឍន៍របស់ក្រុមហ៊ុនដែលទទួលបានសិទ្ធវិនិយោគដីសម្បទានសេដ្ឋកិច្ចអភិវឌ្ឍន៍ប៉ះពាល់ដល់ធនធានរួមរបស់ជនជាតិដើមភាគតិច។ ដូច្នេះហើយទើបធ្វើឲ្យមានវិវាទកើតឡើងរវាងក្រុមហ៊ុននិងជនជាតិដើមភាគតិច។ នេះបើតាមការបញ្ជាក់របស់លោកតឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាល។
គាំទ្រដោយ
