កំពុងស្វែងរកទិន្នន័យ
រកឃើញ: 12.457
-
តុលាការកាត់ទោសសកម្មជនសង្រ្គោះជាតិម្នាក់ឲ្យជាប់ពន្ធនាគារ២ឆ្នាំពីបទហិង្សាប្រឆាំងរាជការសាធារណៈ
សាលាដំបូងរាជធានីភ្នំពេញនៅព្រឹកថ្ងៃព្រហស្បតិ៍នេះបានប្រកាសសាលក្រមកាត់ទោសសកម្មជនគណបក្សសង្រ្គោះជាតិម្នាក់ លោក អ៊ុក ពេជ្រសំណាង អាយុ៥១ឆ្នាំ ឲ្យជាប់ពន្ធនាគារ២ឆ្នាំ ពីបទបង្កអំពើហិង្សានិងប្រឆាំងអ្នករាជការសាធារណៈ ខណៈលោកកំពុងជាប់ពន្ធនាគារពីបទចោទផ្សេងមួយទៀត។ ហិង្សាដែលតុលាការកាត់ទោសនោះទាក់ទងនឹងការប្រព្រឹត្តនៅចំណុចខាងជើងនាគបាញ់ទឹក ផ្លូវព្រះសុរាម្រិត សង្កាត់ចតុមុខ ខណ្ឌដូនពេញ រាជធានីភ្នំពេញ កាលពីថ្ងៃទី២០ ខែតុលា ឆ្នាំ២០១៤។ លោក អ៊ុក ពេជ្រសំណាង ត្រូវបានចោទប្រកាន់ថាបានបើកម៉ូតូកង់បីដែលដឹកអ្នកតវ៉ាបុករបាដែករបស់កងសន្តិសុខខណ្ឌដូនពេញ នៅពេលលោកចូលរួមតវ៉ាជាមួយប្រជាពលរដ្ឋមកពីខេត្តព្រះវិហារ ដែលព្យាយាមដាក់ញតិទៅលោកនាយករដ្ឋមន្ត្រីហ៊ុន សែន ។
-
ក្រសួងការងារស្វែងរកនីតិវិធីថ្មីដើម្បីដោះស្រាយវិវាទការងារជូនពលករក្រៅប្រទេស
លោកហ៊ូ វុឌ្ឍី អនុរដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ បានមានប្រសាសន៍ថា ក្រសួងការងារ នឹងរកឱ្យឃើញនូវភាពងាយស្រួល នៃការទទួលពាក្យបណ្តឹង និងសេវាដោះស្រាយពាក្យ បណ្តឹងកាន់តែមានភាពម៉ឹងម៉ាត់ និងប្រសិទ្ធភាពខ្ពស់ដែលធានាបានយុត្តិធម៌ជូនដល់ពលករ ដែលកំពុងបម្រើការងារនៅបរទេស។ ការអះអាងរបស់អនុរដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ នេះបានធ្វើឡើងក្នុងសិក្ខាសាលាពិនិត្យមើលដំណើរការដោះស្រាយវិវាទការងារពលករទេសន្តរប្រវេសន៍ នៅព្រឹកថ្ងៃ ទី១០ ខែកញ្ញា ឆ្នាំ២០១៥ នៅសណ្ឋាគារអ៊ឹមភើរៀល។ នេះបើតាមការចុះផ្សាយរបស់ទី ភ្នាក់ងារសាព័ត៌មានកម្ពុជា។ បើតាមក្រសួងការងារបានបញ្ជាក់ថា នីតិវិធីថ្មីៗដែលរកឃើញនេះនឹងត្រូវយកទៅអនុវត្តន៍ក្នុងជំហានទី២ ចាប់ពីឆ្នាំ២០១៦នេះ ដោយពង្រឹងលើការគ្រប់គ្រងទីភ្នាក់ងារជ្រើសរើសពលករធ្វើការក្រៅប្រទេស និងការដាក់ពិន័យ ចំពោះទីភ្នាក់ងារណាដែលពុំមានការកែលម្អ។ ក្រៅពីនេះពង្រឹងការគ្រប់គ្រង ស្ថិតិពលករទេសន្តរប្រវេសន៍ និងវិធីដោះស្រាយដ៏ល្អប្រសើរដែលធានាបាននូវសិទ្ធិនិង ផលប្រយោជន៍របស់ពលករ។
-
គណៈកម្មការទី១រដ្ឋសភា ស្នើក្រសួងរៀបចំដែនដី ដោះលែងអ្នកជាប់ឃុំដោយសាររឿងដីធ្លី ៣នាក់
បន្ទាប់ពីបានទទួលការបំភ្លឺពីទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម រយៈពេលប្រមាណ ៣ម៉ោង នៅក្នុងវិមានរដ្ឋសភា នាព្រឹកថ្ងៃ ទី១០កញ្ញានេះរួចមក ប្រធានគណៈកម្មការទី១រដ្ឋសភា បានស្នើសុំឲ្យក្រសួងនេះ មានអន្តរាគម ដោះលែងពលរដ្ឋ ៣នាក់ ដែលកំពុងជាប់ឃុំនៅក្នុងពន្ធនាគារ ដោយសារបញ្ហាដីធ្លី។ យ៉ាងណាក៏ដោយ ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី លោកអ៊ឹម ឈុនលឹម បានបញ្ជាក់ថា នឹងពិចារណា ពិភាក្សាពីក្របខណ្ឌច្បាប់ ជាមួយសមត្ថកិច្ចជាមុនសិន។ គណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា ដែលមានលោកអេង ឆៃអ៊ាង ជាប្រធាន នៅថ្ងៃទី ១០កញ្ញា បានកោះហៅលោកអ៊ឹម ឈុនលឹម ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចូលបំភ្លឺចំពោះគណកម្មការទី១នៃរដ្ឋសភា អំពីលទ្ធផលនៃការដោះស្រាយទំនាស់ដីធ្លី ដែលទាក់ទងនឹងវិស័យទទួលខុសត្រូវរបស់ក្រសួង។
-
ការបារម្ភអំពីនាយកដ្ឋានប្រឆាំងបទល្មើសបច្ចេកវិទ្យាជាមធ្យោបាយរឹតបន្តឹងសេរីភាពបញ្ចេញមតិ
រដ្ឋាភិបាលកំពុងបង្កើតអោយមាននាយកដ្ឋានថ្មីមួយអោយឋិតក្រោមអគ្គស្នងការនគរបាលជាតិ ដែលមានឈ្មោះថា "នាយកដ្ឋានប្រឆាំងបទល្មើសបច្ចេកវិទ្យា"។ មន្ត្រីជាន់ខ្ពស់ក្រសួងមហាផ្ទៃ បញ្ជាក់ថា នាយកដ្ឋានថ្មីនេះនឹងមានសមត្ថភាពក្នុងការស៊ើបអង្កេត និងបង្ក្រាបបទល្មើសដែលកើតមានតាមប្រព័ន្ធអ៊ីនធឺណិត (Internet)។ ការបង្កើតនាយកដ្ឋានថ្មីនេះ បែរជាទទួលបានក្ដីបារម្ភពីក្រុមយុវជនអ្នកប្រើប្រាស់បណ្ដាញសង្គម និងក្រុមអ្នកធ្វើការងារផ្សព្វផ្សាយតាមប្រព័ន្ធអ៊ីនធឺណិត មួយចំនួនទៅវិញ។ ក្រុមអង្គការមិនមែនរដ្ឋាភិបាល និងយុវជនបារម្ភថា នាយកដ្ឋានថ្មីដែលមានតួនាទីស៊ើបអង្កេត និងបង្ក្រាបបទល្មើសនានា នៅលើប្រព័ន្ធអ៊ីនធឺណិត អាចជាមធ្យោបាយថ្មីមួយរបស់រដ្ឋាភិបាលក្នុងការរឹតបន្តឹងសិទ្ធិសេរីភាពបញ្ចេញមតិរបស់ពលរដ្ឋ។ ការបារម្ភនេះកើតឡើងនៅពេលដែលក្រសួងមហាផ្ទៃ បង្កើតនាយកដ្ឋានប្រឆាំងនឹងបទល្មើសបច្ចេកវិទ្យា។ នៅក្នុងអនុក្រឹត្យលេខ ១០៩ ស្ដីពីការរៀបចំ និងការប្រព្រឹត្តទៅនៃក្រសួងមហាផ្ទៃ ចុះថ្ងៃទី១៩ ខែសីហា ឆ្នាំ២០១៥ ក៏បានលើកឡើងពីការបង្កើតនាយកដ្ឋានថ្មីនេះ។ ក្នុងនោះបានចែងថា នាយកដ្ឋានប្រឆាំងបទល្មើសបច្ចេកវិទ្យាមានតួនាទីជាសេនាធិការរៀបចំគោលការណ៍ គោលនយោបាយយុទ្ធសាស្ត្រផែនការសកម្មភាព ការពារ និងទប់ស្កាត់ ដែលនឹងរួមចំណែក ការពារសន្តិសុខជាតិ។
-
ចៅក្រមផ្តន្ទាទោសសកម្មជនគណបក្សសង្គ្រោះជាតិ អ៊ុក ពេជ្រសំណាង ដាក់ពន្ធនាគា២ឆ្នាំ និងពិន័យប្រាក់ ១៤លានរៀល
រាជធានីភ្នំពេញ៖ សកម្មជនគណបក្សសង្គ្រោះជាតិ លោក អ៊ុក ពេជ្រសំណាង ត្រូវបានចៅក្រមជំនុំជម្រះនៃសាលាដំបូងរាជធានីភ្នំពេញប្រកាសសាលក្រមផ្តន្ទាទោសដាក់ពន្ធនាគារ២ឆ្នាំ និងពិន័យជាប្រាក់ ១៤លានរៀល ក្រោមបទចោទថ្មីមួយទៀត «ហិង្សាដោយចេតនា និងប្រឆាំងអ្នករាជការសាធារណៈ» ដែលប្រព្រឹត្តទៅនាពេលកន្លងមក។ ចៅក្រមជំនុំជម្រះនៃសាលាដំបូងរាជធានីភ្នំពេញ លោក អ៊ឹម វណ្ណះ នៅព្រឹកថ្ងៃទី១០ ខែកញ្ញា ឆ្នាំ២០១៥នេះ បានប្រកាសសាលក្រមកាត់ទោសទៅលើជនត្រូវចោទឈ្មោះ អ៊ុក ពេជ្រសំណាង ជាសកម្មជនគណបក្សសង្គ្រោះជាតិ ដោយសម្រេចដាក់ពន្ធនាគារ ២ឆ្នាំ និងពិន័យជាប្រាក់ចូលរដ្ឋចំនួន ៤លានរៀល ហើយនិងសងទៅដើមបណ្តឹងរដ្ឋប្បវេណីចំនួន ១០លានរៀល ក្រោមបទថ្មី «ហិង្សាដោយចេតនា និងប្រឆាំងអ្នករាជការសាធារណៈ» ដោយពាក់ព័ន្ធនឹងករណីលោក អ៊ុក ពេជ្រសំណាង បើកម៉ូតូរ៉ឺម៉កកង់៣ បុកបារ៉ាស់របស់សមត្ថកិច្ចនៅក្បែរភូមិគ្រឹះរបស់លោកនាយករដ្ឋមន្រ្តី ហ៊ុន សែន កាលពីថ្ងៃទី២០ ខែតុលា ឆ្នាំ២០១៤ កន្លងទៅ។
-
ប៉ូលិស បញ្ជូនបុរសម្នាក់ ទៅតុលាការពីបទរំលោភសេពសន្ថវៈលើកូនស្រីបង្កើត
តាកែវ: បុរសម្នាក់ ត្រូវបានសមត្ថកិច្ចនគរបាលឃាត់ខ្លួន រួចកសាងសំណុំរឿង បញ្ជូនទៅតុលាការ កាលពីព្រឹកថ្ងៃទី១០ ខែកញ្ញា ឆ្នាំ២០១៥។ បុរសនោះ បានចាប់បង្ខំរំលោភកូនស្រីបង្កើត នៅក្នុងបន្ទប់ផ្ទះជួលរបស់ខ្លួន។ ហេតុការណ៍នោះ បានកើតឡើង កាលពីថ្ងៃទី៥ ខែកញ្ញា ឆ្នាំ២០១៥ វេលាម៉ោង ១២ នៅភូមិត្រាំត្បាល់ ឃុំក្រាំងលាវ ស្រុកបាទី ខេត្តតាកែវ។ ឪពុកតិរិច្ឆាននោះ ត្រូវបានប៉ូលិសចាប់ តាមពាក្យបណ្ដឹងរបស់ប្រពន្ធ និងជាម្ដាយរបស់ក្មេងស្រីរងគ្រោះ។ លោក ង៉ាន់ សារី អធិការស្រុកបាទី បានអោយដឹងថា ជនសង្ស័យ មានឈ្មោះ ស៊ិន សើ ភេទប្រុស អាយុ ៣៧ឆ្នាំ រីឯក្មេងស្រីរងគ្រោះ ត្រូវជាកូនបង្កើត មានអាយុ ១៣ ឆ្នាំ រស់នៅភូមិឃុំកើតហេតុជាមួយគ្នា។
-
លោក អ៊ឹម ឈុនលឹម កំពុងបំភ្លឺនៅចំពោះមុខគណៈកម្មការសភាពាក់ព័ន្ធនឹងទំនាស់ដីធ្លី
ឆ្លើយតបតាមការអញ្ជើញរបស់គណៈកម្មការទី ១ នៃរដ្ឋសភាគឺគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា និងព្រឹទ្ធសភា លោក អ៊ឹម ឈុនលឹម រដ្ឋមន្រ្តីក្រសួងរៀបចំដែនដី នគរូបនីយកម្ម បានចូលខ្លួនឆ្លើយបំភ្លឺនៅចំពោះមុខលោក អេង ឆៃអ៊ាង ប្រធានគណៈកម្មការនេះ។ លោក អ៊ឹម ឈុនលឹម នឹងឆ្លើយបំភ្លឺប្រាប់លោក អេង ឆៃអ៊ាង អំពីករណីទំនាស់ក្នុងការបែងចែកដីសម្បទានសង្គមកិច្ចដល់ប្រជាពលរដ្ឋជាង ៨រយ គ្រួសារ នៅក្នុងខេត្តក្រចេះ និងខេត្តឧត្តមានជ័យ។ ករណីទំនាស់ដី្លធីរវាងប្រជាពលរដ្ឋជាមួយលោកឧកញ៉ា ជៀប ផែន ក្នុងស្រុកស្ទឹងហាវ ខេត្តព្រះសីហនុ និងករណីវិវាទដីធ្លីមួយចំនួនទៀតដែលទាក់ទងនឹងសមត្ថកិច្ចកិច្ច របស់ក្រសួងរៀបចំដែនដី នគរូបនីយកម្ម។
-
ប្រទេសកម្ពុជាត្រៀមពិនិត្យមើលជនភៀសខ្លួនបន្ថែមទៀតដែលអូស្ត្រាលីឃុំខ្លួននៅលើកោះណូរូ
ទីប្រឹក្សាម្នាក់របស់លោកនាយករដ្ឋមន្ត្រី ហ៊ុន សែន បានមានប្រសាសន៍បន្ទាប់ពីលោកនាយករដ្ឋមន្ត្រីបានជួបពិភាក្សាជាមួយលោក ភីធើ ដាត់ធិន (Peter Dutton) រដ្ឋមន្ត្រីក្រសួងអន្តោប្រវេសន៍អូស្ត្រាលី ដែលបានមកបំពេញទស្សនកិច្ចកាលពីម្សិលមិញថា ប្រទេសកម្ពុជាត្រៀមចាប់ផ្ដើមពិនិត្យមើលជនភៀសខ្លួនបន្ថែមទៀតដែលប្រទេសអូស្ត្រាលីសង្ឃឹមថា នឹងមកតាំងទីលំនៅនៅទីនេះពីប្រទេសដែនកោះណូរូក្រោមកិច្ចព្រមព្រៀងដ៏ចម្រូងចម្រាសរវាងប្រទេសទាំងពីរ។ ដំណើរទស្សនកិច្ចរបស់លោក ដាត់ធិន ធ្វើឡើងដោយគ្មានការប្រកាស និងធ្វើឡើងបន្ទាប់ពីប្រព័ន្ធផ្សព្វផ្សាយរាយការណ៍ព្រោងព្រាតថា កិច្ចព្រមព្រៀងនេះប្រហែលជាជិតបរាជ័យបន្ទាប់ពីប្រទេសកម្ពុជាបានលើកឡើងថា ខ្លួននឹងមិនទទួលយកជនភៀសខ្លួនណាម្នាក់បន្ថែមទៀតឡើយ លុះណាតែជនភៀសខ្លួនបួននាក់ដំបូងដែលបានមកដល់កាលពីខែមិថុនា ត្រូវបានបញ្ចូលទៅក្នុងសង្គមពេញលេញសិន។
-
នគរបាលចាប់ខ្លួនមនុស្ស៦នាក់ពាក់ព័ន្ធក្រុមជួញដូរមនុស្សឆ្លងដែន
នគរបាលបាននិយាយថា បុរសជនជាតិចិនបីនាក់ និងជនជាតិខ្មែរបីនាក់ត្រូវបានចាប់ខ្លួនក្នុងរាជធានីភ្នំពេញកាលពីម្សិលមិញ ដោយសង្ស័យថាជាក្រុមជួញដូរមនុស្ស ដែលក្នុងនោះស្ត្រីជនជាតិខ្មែរត្រូវបានឲ្យរៀបការជាមួយបុរសជនជាតិចិន។ លោក កែវ ធា នាយការិយាល័យនគរបាលប្រឆាំងការជួញដូរមនុស្សរាជធានីបានមានប្រសាសន៍ថា អង្គភាពរបស់លោកបានតាមដានមនុស្សទាំងបីនាក់នេះរយៈពេលជាង១ខែមកហើយ ហើយទើបតែបានប្រទះឃើញនៅម៉ោងប្រហែល៥ទៀបភ្លឺ ខណៈដែលពួកគេម្នាក់បានដឹកស្ត្រីជនជាតិខ្មែរម្នាក់ទៅអាកាសយានដ្ឋានអន្តរជាតិភ្នំពេញ ដើម្បីឡើងយន្តហោះទៅទីក្រុងប៉េកាំងនៅម៉ោង៨ព្រឹក។
-
តំណាងពលរដ្ឋដែលរងផលប៉ះពាល់ពីគម្រោងផ្លូវដែក នៅបន្ទាយមានជ័យទាមទារសំណង
ប្រជាពលរដ្ឋដែលរងផល់ប៉ះពាល់ពីគម្រោងអភិវឌ្ឍន៍ផ្លូវដែក នៅក្រុងប៉ោយប៉ែត ខេត្ដបន្ទាយមានជ័យ នៅព្រឹកថ្ងៃព្រហស្បតិ៍នេះ បានប្រមូលផ្ដុំគ្នាតវ៉ាទាមទារឲ្យរដ្ឋាភិបាល និងធនាគារអភិវឌ្ឍន៍អាស៊ី(ADB) ផ្ដល់សំណងដល់ពួកគេឲ្យសមរម្យ និងឲ្យគោរពតាមកិច្ចសន្យារបស់ធនាគារនោះ។ ពលរដ្ឋប្រមាណ៦០នាក់ បានប្រមូលផ្ដុំគ្នានៅខាងមុខសាលាក្រុងប៉ោយប៉ែត ចាប់តាំងពីម៉ោង៧ព្រឹក ក្នុងនោះអ្នកភូមិ៥០នាក់ តំណាងឲ្យពលរដ្ឋរាប់រយគ្រួសារប្រឈម នឹងការបណ្ដេញចេញ និង១០នាក់ទៀត ត្រូវបានបណ្តេញចេញពីលំនៅឋានរួចហើយ ប៉ុន្ដែពួកគាត់ថា សំណងដែលផ្ដល់ឲ្យមិនស្របតាមកិច្ចសន្យាដែលឲ្យពួកគេមានជីវភាពល្អប្រសើរឡើងក្រោយពេលចាកចេញទៅកន្លែងផ្សេង។ តំណាងពលរដ្ឋនៅក្រុងប៉ោយប៉ែត លោក ឆេង ប៊ុនហាក់ ប្រាប់VODថា ធនាគារ ADB មានគោលនយោបាយល្អ ចំពោះពលរដ្ឋដែលរងផលប៉ះពាល់ពីគម្រោងអភិវឌ្ឍន៍ផ្លូវដែកនៅកម្ពុជា ប៉ុន្ដែមន្ដ្រីរដ្ឋាភិបាលមិនអនុវត្ដ តាមដោយឃុបឃិតគ្នាប្រព្រឹតអំពើពុករលួយ។ លោកបន្ដថា ពួកគាត់ទាមទារឲ្យរដ្ឋាភិបាល និងធនាគារ ADB ផ្ដល់សំណងសមរម្យតាមតម្លៃទីផ្សារ និងគោរពកិច្ចសន្យាដែលថាឲ្យពួកគាត់រស់នៅល្អប្រសើរ។ លោកថា៖ "ព្រោះស្ថាប័ននេះ(ADB) គេធ្វើរបស់គេ បើយើងមើលពីគោលនយោបាយហ្នឹង យើងដឹងថាគេធ្វើល្អត្រឹមត្រូវណាស់ ប៉ុន្តែដោយសារពួកថោកទាបអស់ហ្នឹងវាធ្វើគំនិតឆ្កែ។ ពួកយើងខ្ញុំអត់មានបានទេ អ៊ីចឹងត្រូវមន្ត្រីខិលខូចមួយចំនួន គាត់យកដីហ្នឹងទៅលក់អស់ហើយ ហើយលុយដកយកទៅចែកចាយបក្ខពួករបស់មន្ត្រីខិលខូចហ្នឹងអស់ហើយ"។
-
កម្ពុជា-អូស្ត្រាលី បន្តកិច្ចព្រមព្រៀងស្តីពីជនភៀសខ្លួន ទោះមានជនជាតិរ៉ូហ៊ីនយ៉ាម្នាក់សុំត្រឡប់ទៅវិញ
ជនភៀសខ្លួនជនជាតិភាគតិច Rohingya នៃប្រទេសមីយ៉ាន់ម៉ាម្នាក់ ដែលបានមកតាំងលំនៅថ្មីនៅកម្ពុជាបានស្នើសុំទៅរស់នៅក្នុងប្រទេសមីយ៉ាន់ម៉ាវិញ បន្ទាប់ពីបានរស់នៅរាជធានីភ្នំពេញ អស់រយៈពេល៣ខែ។ ជនភៀសខ្លួនជនជាតិភាគតិច Rohingyaម្នាក់នេះ គឺជាផ្នែកមួយនៃកិច្ចព្រមព្រៀងស្តីពីជនភៀសខ្លួន ដែលមានទឹកប្រាក់រាប់លានដុល្លារ រវាងរដ្ឋាភិបាលកម្ពុជាជាមួយនឹងរដ្ឋាភិបាលអូស្ត្រាលី ។ រដ្ឋមន្ត្រីក្រសួងមហាផ្ទៃកម្ពុជា និងរដ្ឋមន្ត្រីអន្តោប្រវេសន៍អូស្ត្រាលី បានឯកភាពគ្នាថានឹងអនុ វត្តន៍អនុស្សារណៈយោគយល់គ្នា ស្តីពីជនភៀសខ្លួន ដែលបានធ្វើឡើង កាលពីពេលថ្មីៗនេះ បន្តទៅទៀត។ ការប្តេជ្ញានេះ បានធ្វើឡើង នៅក្នុងជំនួបមួយរវាង លោក ស ខេង រដ្ឋមន្ត្រីក្រសួងមហាផ្ទៃកម្ពុជា និងលោក ភីតធើ ឌុចតុន (Petter Dutton) រដ្ឋមន្ត្រីក្រសួងអន្តោប្រវេសន៍ និងការពារព្រំដែនអូស្ត្រាលី នៅថ្ងៃទី៩ ខែកញ្ញា ឆ្នាំ២០១៥។
-
ពលរដ្ឋស្រុកជ័យសែនខេត្តព្រះវិហាររិះគន់សមត្ថកិច្ចថាមិនបង្ក្រាបបទល្មើសព្រៃឈើ
អង្គការក្រៅរដ្ឋាភិបាលដែលធ្វើការពាក់ព័ន្ធនឹងបណ្ដាញសហគមន៍ការពារព្រៃឈើ ឲ្យដឹងថា បច្ចុប្បន្នសកម្មភាពកាប់បំផ្លាញព្រៃឈើដើម្បីជួញដូរខុសច្បាប់ កំពុងកើតមានយ៉ាងខ្លាំងនៅតាមបណ្ដាស្រុកមួយចំនួនរបស់ខេត្តព្រះវិហារ ហើយគេមិនសូវឃើញសមត្ថកិច្ចខាងណាចេញមុខបង្ក្រាបទេ។ ដោយសារតែបទល្មើសព្រៃឈើកើនឡើង និងមិនសូវមានការបង្ក្រាបនេះ សិប្បកម្មកែច្នៃឈើក៏កំពុងកើតឡើងជាច្រើនកន្លែងនៅស្រុកជ័យសែន ចម្ងាយជាង ៧០គីឡូម៉ែត្រភាគខាងជើងឆៀងខាងកើតពីរួមខេត្តព្រះវិហារ។ ប្រជាពលរដ្ឋមួយចំនួនដែលរស់នៅស្រុកជ័យសែន ខេត្តព្រះវិហារ បានរិះគន់ថា បច្ចុប្បន្នសកម្មភាពដឹកជញ្ជូនឈើប្រណីតខុសច្បាប់ កំពុងកើតមានស្ទើរតែរៀងរាល់ថ្ងៃ នៅក្នុងតំបន់ដែលពួកគេរស់នៅ។ បើទោះបីជាឈើប្រណីតប្រភេទធ្នង់ និងដួងចែម ត្រូវបានក្រុមឈ្មួញដឹកជញ្ជូនតាមរថយន្ត និងគោយន្តដោយចំហ មិនបាច់បិទបាំង ហើយយកទៅដាក់តាមរោងសិប្បកម្មជាប្រចាំថ្ងៃក៏ដោយ ក៏មិនមានសមត្ថកិច្ចរបស់រដ្ឋាភិបាលណា យកចិត្តទុកដាក់បង្ក្រាបទេ។
-
តុលាការសម្រេចឱ្យមន្ត្រីបក្សប្រឆាំងម្នាក់បង់ប្រាក់៣លានរៀលពីបទញុះញង់ឱ្យមានការរើសអើង
ភ្នំពេញ—មន្ត្រីបក្សប្រឆាំងនៅថ្នាក់ស្រុកម្នាក់ត្រូវបានតុលាការចោទប្រកាន់ថាបានចែកចាយខិត្តប័ណ្ណដែលចោទប្រកាន់វៀតណាមថា កំពុងព្យាយាម «លុបបំបាត់» ប្រទេសកម្ពុជា។ លោក ឈា តាំងស៊នអាយុ ៦៣ ឆ្នាំត្រូវបាននគរបាលស្រុកស្រុកព្រៃកប្បាសក្នុងខេត្តតាកែវកោះហៅហើយបន្ទាប់មកត្រូវបានប៉ូលិសខេត្តឃុំខ្លួន។ បន្ទាប់ពីត្រូវបានឃុំខ្លួនអស់រយៈពេលពីរយប់លោកត្រូវបានតុលាការកាត់ទោសពីបទញុះញង់ឱ្យមានការរើសអើងហើយបញ្ជាឱ្យគាត់បង់ប្រាក់ ៣ លានរៀល (ប្រហែល ៧៣០ដុល្លារ) ចំពោះបទល្មើសនេះ។ លោក ជុំ ឈឿន អធិការស្រុកព្រៃកប្បាសបាននិយាយថាខិត្តប័ណ្ណនេះទទួលបានតាមរយៈហ្វេសប៊ុកនិយាយពី«វិធីសាស្រ្ត ២០ចំណុចរបស់យួនដើម្បីលុបបំបាត់ពូជសាសន៍ខ្មែរនឹងលេបទឹកដី»។
-
ក្រសួងការងារស្នើកុំឲ្យមានបាតុកម្មក្នុងពេលចរចាប្រាក់ឈ្នួលកម្មករមិនទាន់ចប់
ក្រសួងការងារ និងតំណាងនិយោជក បានអំពាវនាវរួមគ្នាទៅកាន់បណ្ដាអ្នកពាក់ព័ន្ធ ពិសេសក្រុមសហជីព កុំឲ្យប្រើសកម្មភាពបាតុកម្ម កូដកម្ម ព្រមទាំងសកម្មភាពពាក់ព័ន្ធនយោបាយណាមួយ ខណៈកិច្ចចរចាប្រាក់ឈ្នួលអប្បបរមានៅកម្ពុជា មិនទាន់បញ្ចប់។ ទន្ទឹមគ្នានេះ តំណាងសហជីពអះអាងថា ការធ្វើកូដកម្ម បាតុកម្ម អាចកើតឡើងគ្រប់ពេលវេលា បើសិនជាប្រាក់ឈ្នួលកម្មករមិនត្រូវផ្ដល់ឲ្យ ឬផ្ដល់ឲ្យតិចតួចពេក។ រហូតមកនេះ ក្រុមការងារត្រីភាគីមិនទាន់បានកំណត់តួលេខច្បាស់លាស់នៃប្រាក់ឈ្នួលអប្បបរមារបស់កម្មករនិយោជិតសម្រាប់ឆ្នាំ២០១៦ នោះបាននៅឡើយទេ។ ប៉ុន្តែទាំងភាគីរដ្ឋាភិបាល និងតំណាងនិយោជក មិនចង់ឲ្យមានសកម្មភាពបាតុកម្ម កូដកម្ម ឬប្រើសកម្មភាពពាក់ព័ន្ធនឹងនយោបាយ ក្នុងអំឡុងកិច្ចចរចានេះ ដែលអាចបង្អាក់ដល់ដំណើរការចរចាប្រាក់ឈ្នួល។ ការលើកឡើងនេះ ត្រូវបានធ្វើឡើងនៅក្នុងសិក្ខាសាលាត្រីភាគីថ្នាក់ជាតិស្ដីពីប្រាក់ឈ្នួលអប្បបរមានៅកម្ពុជា ដែលត្រូវបានរៀបចំឡើងនៅថ្ងៃទី៨ ខែកញ្ញា។ ប្រធានសហព័ន្ធនិយោជកនិងពាណិជ្ជកម្មកម្ពុជា (CAMFBA) លោក វ៉ាន់ ស៊ូអៀង បាននិយាយថា លោកស្វាគមន៍ឲ្យមានកិច្ចចរចាប្រាក់ឈ្នួលលើវិស័យឧស្សាហកម្មកាត់ដេរ និងស្បែកជើងនេះ ប៉ុន្តែលោកថា ៩៥% នេះ ភាគច្រើនជាអ្នកវិនិយោគមកពីបរទេស ពួកគេនឹងត្រូវកែសម្រួលនៅទំហំនៃវិនិយោគរបស់ខ្លួនឲ្យត្រូវនឹងស្ថានភាពកម្ពុជា។ តំណាងនិយោជករូបនេះសូមអំពាវនាវកុំឲ្យបណ្តាអ្នកពាក់ព័ន្ធយកការចរចាប្រាក់ឈ្នួលធ្វើជាសកម្មភាពនយោបាយដែលបង្កការរំខានដល់អ្នកវិនិយោគនៅកម្ពុជា។
-
ក្រសួងមហាផ្ទៃបង្កើតនាយកដ្ឋានប្រឆាំងឧក្រិដ្ឋកម្មតាមអ៊ីនធឺណិត
វ៉ាស៊ីនតោន—ក្រសួងមហាផ្ទៃនឹងបង្កើតនាយកដ្ឋានប្រឆាំងបទល្មើសបច្ចេកវិទ្យា ដើម្បីទប់ស្កាត់បទល្មើសបច្ចេកវិទ្យា នឹងចាត់វិធានការចំពោះសកម្មភាពញុះញង់ ជេរប្រមាថ និងរើសអើងពូជសាសន៍តាមប្រព័ន្ធអ៊ិនធើណេត។ លោកឧត្តមសេនីយ៍ គៀត ច័ន្ទថារិទ្ធអ្នកនាំពាក្យប៉ូលិសជាតិបានប្រាប់កាសែត Phnom Penh Post ថា៖ «នាយកដ្ឋាននេះនឹងសហការជាមួយស្ថាប័នពាក់ព័ន្ធទាំងអស់ដើម្បីទប់ស្កាត់បទល្មើសតាមអ៊ីនធឺណិត ពីព្រោះបើសិនជាមិនទប់ស្កាត់ឧក្រិដ្ឋកម្មនោះទេវានឹងបង្កគ្រោះថ្នាក់ដល់សង្គម»។ ការប្រកាសរបស់រដ្ឋាភិបាលកើតមានឡើងក្រោយពីកងកម្លាំងមានសមត្ថកិច្ចបានចាប់ឃាត់ខ្លួនយុវជនពីរនាក់យកមកផ្តន្ទាទោសដោយសារការសរសេរតាមបណ្តាញហ្វេសប៊ុកអំពាវនាវឱ្យមានបដិវត្តន៍ពណ៍ និងគំរាមសម្លាប់អ្នកស្រាវជ្រាវកិច្ចការព្រំដែនម្នាក់។ សេចក្តីរាយការណ៍នានាបញ្ជាក់ថានាយកដ្ឋានប្រឆាំងបទល្មើសបច្ចេកវិទ្យា នឹងសិក្សារៀបចំគោលការណ៍ វិធានការ យុទ្ធសាស្ត្រ និងផែនការសកម្មភាពលើការបង្ការ ទប់ស្កាត់ ស្រាវជ្រាវ ស៊ើបអង្កេតនិងបង្ក្រាបបទល្មើសបច្ចេកវិទ្យា។
-
អាជ្ញាធរខេត្តព្រះវិហារព្រមានចាប់ពលរដ្ឋមួយចំនួនបើសិននៅតែប្រើហិង្សាតវ៉ារឿងដីធ្លី
អ្នកភូមិតាបស នៃឃុំស្ដៅ ស្រុកសង្គមថ្មី បានបន្ថយសកម្មភាពតវ៉ារឿងទំនាស់ដីធ្លីមួយរយៈ បន្ទាប់ពីបានប្រើហិង្សាដុតបំផ្លាញសម្ភារៈរបស់ក្រុមហ៊ុនដីសម្បទានសេដ្ឋកិច្ច និងកាត់ផ្ដាច់ស្ពានមិនឲ្យអាជ្ញាធរ សមត្ថកិច្ច និងតំណាងក្រុមហ៊ុន អាចចាកចេញពីតំបន់ដែលពួកគេតវ៉ាបានមក។ ចំណែកមន្ត្រីសាលាខេត្តព្រះវិហារ បានអំពាវនាវឲ្យក្រុមអ្នកភូមិដែលលើកគ្នាតវ៉ាទាំងនោះ បញ្ចប់អំពើហិង្សា ហើយនាំគ្នាចូលមកសម្របសម្រួល និងដោះស្រាយដោយសន្តិវិធីតាមផ្លូវច្បាប់។ អាជ្ញាធរខេត្តព្រះវិហារ ព្រមានថា គេនឹងប្រើកម្លាំងសមត្ថកិច្ចតាមចាប់ខ្លួនអ្នកភូមិតាបស មួយចំនួន បញ្ជូនទៅកាន់តុលាការ ប្រសិនបើក្រុមអ្នកភូមិទាំងនោះនៅតែបន្តការតវ៉ារឿងទំនាស់ដីធ្លី ហើយបង្កអំពើហិង្សាបំផ្លាញទ្រព្យសម្បត្តិរបស់ក្រុមហ៊ុន និងសម្បត្តិសាធារណៈរបស់រដ្ឋតទៅទៀត។ អភិបាលរងខេត្តព្រះវិហារ ដែលចុះដោះស្រាយការតវ៉ារបស់អ្នកភូមិតាបស គឺលោក ស៊ូ សេរី។ លោកមានប្រសាសន៍កាលពីរសៀលថ្ងៃអង្គារ ទី៨ ខែកញ្ញា ដោយសូមឲ្យក្រុមអ្នកភូមិ ចូលរួមដោះស្រាយទំនាស់ដីធ្លីដែលមានអាជ្ញាធរជាអ្នកសម្របសម្រួល ហើយបញ្ឈប់សកម្មភាពតវ៉ាដោយហិង្សា ប៉ុន្តែបើសិនជាអ្នកភូមិនៅតែចចេសរឹងរូស ហើយបន្តបំផ្លាញទ្រព្យសម្បត្តិរបស់ក្រុមហ៊ុនឯកជន និងសម្បត្តិសាធារណៈរបស់រដ្ឋតទៅទៀត គឺអាជ្ញាធរនឹងចាត់វិធានការតាមផ្លូវច្បាប់៖ «គាត់បំផ្លាញសម្បត្តិសាធារណៈរបស់រដ្ឋហ្នឹង តើគាត់ខុសអ្វីខ្លះ? គឺគាត់ប្រាកដជាដឹងខ្លួនហើយ ប៉ុន្តែគាត់នៅតែជឿការញុះញង់របស់អង្គការសង្គមស៊ីវិលមួយចំនួន និងសកម្មជនដីធ្លី»។
-
លោក ហ៊ុន សែន ឲ្យអ្នកពាក់ព័ន្ធនឹងសមាជិកព្រឹទ្ធសភាសម រង្ស៊ី ចូលខ្លួនសារភាព
លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះ បានថ្លែងឲ្យអ្នកដែលរត់គេចខ្លួនទៅក្រៅប្រទេស ពាក់ព័ន្ធនឹងសមាជិកព្រឹទ្ធសភាគណបក្ស សម រង្ស៊ី លោក ហុង សុខហួរ ដែលត្រូវបានចោទប្រកាន់ថាក្លែងឯកសារ ចូលខ្លួនមកសារភាពនៅពេលនេះ។ លោក ហុង សុខហួរ ត្រូវបានតុលាការសម្រេចឃុំខ្លួន ដោយចោទលោក៣បទចោទ គឺការក្លែងឯកសារសាធារណៈ ការប្រើប្រាស់ឯកសារក្លែងក្លាយនិងញុះញង់ឲ្យមានអសន្តិសុខ ពាក់ព័ន្ធនឹងសន្ធិសញ្ញាកម្ពុជានិងវៀតណាមនៅឆ្នាំ១៩៧៩។ លោក ហុង សុខហួរ ត្រូវបានសមត្ថកិច្ចចាប់ខ្លួន ពីរថ្ងៃបន្ទាប់ពីលោកនាយករដ្ឋមន្រ្តី ហ៊ុន សែន បានចេញបញ្ជាឲ្យចាប់ខ្លួន ដោយចោទថាក្លែងឯកសារសន្ធិសញ្ញាកម្ពុជានិងវៀតណាមនៅឆ្នាំ១៩៧៩។ ក្នុងវីដេអូឃ្លីបថតទុកដែលចាក់ផ្សាយតាមទូរទស្សន៍ជាតិកម្ពុជា(ទ.ទ.ក)នៅរសៀលថ្ងៃអង្គារនេះ លោក ហ៊ុន សែន បានរិះគន់គណបក្សសង្រ្គោះជាតិថាបានយកផែនទីទៅបោកប្រាស់ប្រជាពលរដ្ឋកម្ពុជា។ លោកក៏បានព្រមានថារដ្ឋាភិបាលនឹងចាត់វិធានការផ្លូវច្បាប់ចំពោះអ្នកនិយាយរឿងផែនទីក្លែងក្លាយ។
-
បណ្តាញសង្គមសម្រាប់បញ្ចេញមតិប៉ុន្តែមានគ្រោះថ្នាក់នៃព័ត៌មានចចាមអារ៉ាម
អ្នកស្រី ចក់ សុភាព នាយិការប្រតិបត្តិរបស់មជ្ឈមណ្ឌលសិទ្ធិមនុស្សកម្ពុជា បានឱ្យដឹងថា៖ «ចាប់ពីឆ្នាំ២០១២ ជាពិសេសអំឡុងពេលបោះឆ្នោតនៅឆ្នាំ២០១៣ហ្នឹង យើងឃើញថាមានការផុសផុលខ្លាំងក្នុងការចែករំលែក និងការពិភាក្សាក្នុងបញ្ហាសង្គម បញ្ហានយោបាយ និងបញ្ហាជាច្រើន»។ អ្នកស្រី ចក់ សុភាព បន្តថា នេះជាទម្រង់មួយក្នុងការបញ្ចេញមតិ ហើយការបញ្ចេញមតិនេះមិនប្រាកដថាត្រូវតែពិតរហូតនោះទេដោយសារតែព័ត៌មានជាច្រើននៅលើបណ្តាញទំនាក់ទំនងសង្គមនេះភាគច្រើនអ្នកប្រើប្រាស់មានបញ្ចូលគំនិតរបស់ពួកគេ ដែលប្រហែលជាមិនទាន់ត្រឹមត្រូវទាំងស្រុងនោះទេ។
-
សហព័ន្ធសហជីព ថាបញ្ញត្តិច្បាប់ក្រុមប្រឹក្សាអាជ្ញាកណ្តាលប៉ះពាល់ដល់សន្តិសុខការងារកម្មករ
សហព័ន្ធសហជីពកម្មករចំណីអាហារ និងសេវាកម្មកម្ពុជា បានលើកឡើងថា ការបកស្រាយបញ្ញត្តិរបស់ក្រុមប្រឹក្សាអាជ្ញាកណ្តាល មិនមានហេតុផលត្រឹមត្រូវ និងបានធ្វើឲ្យប៉ះពាល់ ដល់សន្តិសុខការងារកម្មករ ព្រោះថាបានយោងទៅលើតែហិរញ្ញវត្ថុរបស់និយោជកប៉ុណ្ណោះ។ នេះគឺជាខ្លឹមសារនៅក្នុងលិខិតចំហរ របស់សហជីពនេះ ផ្ញើរជូនទៅសមាជិកក្រុមប្រឹក្សាអាជ្ញាកណ្តាល ចុះថ្ងៃទី ០២ខែកញ្ញា។ សហព័ន្ធសហជីពកម្មករចំណីអាហារ និងសេវាកម្មកម្ពុជា បានបញ្ជាក់នៅក្នុងលិខិតចំហររបស់ខ្លួនថា ការបកស្រាយបញ្ញត្តិច្បាប់របស់ក្រុមប្រឹក្សាអាជ្ញាកណ្តាល នាពេលកន្លងមកនេះ បានធ្វើឡើងដោយផ្ទុយទៅនឹងខ្លឹមសារទាំងស្រុង នៃមាត្រា ៩១ និងបំពានទៅនឹងមាត្រា ៧៤ នៃច្បាប់ស្តីពីការងារ។ មាត្រា ដែលនិយាយពីសិទ្ធិរបស់ភាគីនៃកិច្ចសន្យាការងារ ដែលមានថិរវេលា មិនកំណត់ អាចធ្វើការរំលាយកិច្ចសន្យា ដោយផ្អែកតាមការសម្រេចចិត្តរបស់ភាគីណាមួយក៏បាន ប៉ុន្តែបានកម្រិតសិទ្ធិរបស់និយោជក។
-
មានអំពើហិង្សាតិចតួចពេលប៉ូលិសខេត្តកោះកុងបំបែកការតវ៉ាឲ្យដោះលែងសកម្មជនមាតាធម្មជាតិ
ភ្នំពេញ—អាជ្ញាធរមានសមត្ថកិច្ចនៅខេត្តកោះកុងបានបំបែកក្រុមអ្នកតវ៉ាដែលស្នើសុំឲ្យមានការដោះលែងសកម្មជនបីនាក់នៃចលនាមាតាធម្មជាតិ បន្ទាប់ពីក្រុមអ្នកតវ៉ាបានស្រែកទាមទារអស់រយៈពេលជិត២សប្តាហ៍មកហើយឲ្យមានការដោះលែងអ្នកទាំងបីនាក់នេះ។ ទោះបីជាមានការបង្រ្កាបដែលនាំឲ្យអ្នកតវ៉ាខ្លះរងរបួស និងមានការចាប់ខ្លួនសកម្មជនសិទ្ធិ និងអ្នកសារព័ត៌មានក្តី អាជ្ញាធរបានថ្លែងការពារចំណាត់ការនេះថា ជាការរក្សាសណ្តាប់ធ្នាប់សាធារណៈ ដើម្បីប្រយោជន៍ប្រជាពលរដ្ឋទូទៅនៅក្នុងក្រុងខេមរភូមិន្ទនៃខេត្តកោះកុង។ អាជ្ញាធរមានសមត្ថកិច្ចខេត្តកោះកុងនៅព្រឹកថ្ងៃពុធនេះបានឃាត់ខ្លួនសកម្មជនសិទ្ធិមនុស្ស អ្នកតវ៉ា និងអ្នកសារព័ត៌មានចំនួន១៧រូប នៅក្នុងការចុះបំបែកក្រុមអ្នកតវ៉ា ដែលទាមទារឲ្យអាជ្ញាធរដោះលែងសកម្មជនបរិស្ថានបីនាក់នៃចលនាមាតាធម្មជាតិ។ នេះបើតាមការបញ្ជាក់ពីសកម្មជនសិទ្ធិមនុស្ស និងអាជ្ញាធរខេត្ត។
គាំទ្រដោយ
