កំពុងស្វែងរកទិន្នន័យ
រកឃើញ: 12.457
-
CCHR ស្នើលោកស ខេង បញ្ជាក់ឲ្យច្បាស់ពីការអនុវត្តច្បាប់NGO ចំពោះអង្គការនៅតាមមូលដ្ឋាន
លោកស្រីចក់ សុភាព នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា ឬហៅកាត់ថា (CCHR)កាលពីថ្ងទី២១ សីហា បានចេញលិខិតចំហរមួយស្នើលោកស ខេង រដ្ឋមន្ត្រីក្រសួងមហាផ្ទៃ ចេញសេចក្ដីបញ្ជាក់ អំពីការអនុវត្តច្បាប់ស្ដីពីសមាគម និងអង្គការមិនមែនរដ្ឋាភិបាល ទៅលើក្រុមអង្គការថ្នាក់មូលដ្ឋាន និងបណ្ដាញក្រៅផ្លូវការ។ ក្នុងលិខិតចំហមួយច្បាប់របស់ CCHR បានឲ្យដឹងថា កាលពីខែកក្កដាកន្លងទៅ ក្រសួងមហាផ្ទៃបានអះអាងថា ច្បាប់សមាគម និងអង្គការ នឹងមិនអនុវត្តទៅលើក្រុមសហគមន៍ នៅថ្នាក់មូលដ្ឋាន ដែលមានបំណងសម្ដែងពីក្ដីបារម្ភ ទៅលើបញ្ហានៅក្នុងមូលដ្ឋានរបស់ខ្លួននោះទេ។ តែយ៉ាងណាក្ដី CCHR មានការព្រួយបារម្ភ ជាខ្លាំងអំពីបញ្ហានេះ ដោយសារតែមានករណីមួយបានកើតឡើង នៅខេត្តក្រចេះនាពេលថ្មីៗនេះ ពាក់ព័ន្ធនឹងបញ្ហាដីធ្លី។
-
តុលាការឃុំខ្លួនយុវជនម្នាក់ដោយសារសរសេររឿងធ្វើបដិវត្តន៍ពណ៌នៅលើហ្វេសប៊ុក
សាលាដំបូងរាជធានីភ្នំពេញ កាលពីថ្ងៃទី២២ ខែសីហា បានសម្រេចបញ្ជូនខ្លួនយុវជនម្នាក់ទៅឃុំនៅពន្ធនាគារព្រៃសបណ្ដោះអាសន្ន ពាក់ព័ន្ធទៅនឹងការសរសេររៀបរាប់របស់យុវជននោះ អំពីការធ្វើបដិវត្តន៍ពណ៌ផ្លាស់ប្ដូររដ្ឋាភិបាលនៅលើបណ្ដាញសង្គមហ្វេសប៊ុក (Facebook)។ យ៉ាងណាក៏ដោយ សង្គមស៊ីវិលយល់ឃើញថា ការសរសេររបស់យុវជននោះ គ្រាន់តែជាការបញ្ចេញមតិប៉ុណ្ណោះ។ មន្ត្រីការពារសិទ្ធិមនុស្សនៃអង្គការលីកាដូ (LICADHO) លោក អំ សំអាត ឲ្យដឹងនៅថ្ងៃទី២២ សីហា ថា យុវជនដែលត្រូវបានសាលាដំបូងរាជធានីភ្នំពេញ សម្រេចឃុំខ្លួនបណ្ដោះអាសន្ននោះមានឈ្មោះ គង់ រ៉ៃយ៉ា គឺជានិស្សិតច្បាប់ឆ្នាំទី១ នៃសាកលវិទ្យាល័យខេមរៈ និងជាសមាជិកនៃបណ្ដាញសហព័ន្ធនិស្សិតកម្ពុជា។
-
CCHR ស្នើឲ្យក្រសួងមហាផ្ទៃបញ្ជាក់ពីការអនុវត្តច្បាប់ NGO នៅថ្នាក់មូលដ្ឋាន
មជ្ឈមណ្ឌលសិទ្ធិមនុស្សកម្ពុជា ហៅកាត់ថា CCHR ស្នើឲ្យក្រសួងមហាផ្ទៃបញ្ជាក់ពីការអនុវត្តច្បាប់ NGO នៅថ្នាក់មូលដ្ឋាន និងក្រុមបណ្ដាញក្រៅផ្លូវការ។ សំណើនេះ ធ្វើឡើងបន្ទាប់ពី CCHR ពិនិត្យឃើញថា ការតវ៉ានៅសហគមន៍ក្នុងខេត្តក្រចេះត្រូវបានអាជ្ញាធររារាំង។ អាជ្ញាធរតម្រូវឲ្យសហគមន៍ទៅចុះបញ្ជីនៅ ក្រសួងមហាផ្ទៃជាមុនសិន មុននឹងធ្វើការតវ៉ា។ បើតាម CCHR សកម្មភាពរបស់អាជ្ញាធរដូច្នេះ ផ្ទុយពីការអះអាងរបស់រដ្ឋលេខាធិការក្រសួងមហាផ្ទៃដែលថា ច្បាប់ NGO នឹងមិនត្រូវអនុវត្តទៅ លើក្រុមសហគមន៍នៅថ្នាក់មូលដ្ឋាននោះទេ។
-
អង្គការជាតិនិង អន្តរជាតិស្នើឲ្យUNជួយស្តារសិទ្ធិមនុស្សនៅកម្ពុជា
អង្គការជាតិ និងអន្តរជាតិស្នើឲ្យក្រុមប្រឹក្សាសិទ្ធិមនុស្សអង្គការសហប្រជាជាតិ ជួយអន្តរាគមន៍ធ្វើយ៉ាងណាឲ្យដំណើរការនៃការគោរពសិទ្ធិមនុស្សនៅកម្ពុជាឲ្យមានភាពល្អប្រសើរឡើង។ ក្នុងលិខិតរួមរបស់បណ្តាញអង្គការសិទ្ធិមនុស្សជាតិ និងអន្តរជាតិ ផ្ញើទៅអង្គការសហប្រជាជាតិកាលពីថ្ងៃទី២០ខែសីហា មានលើកឡើងថា ការគោរពសិទ្ធិមនុស្សនៅកម្ពុជាកំពុងធ្លាក់ចុះ ដែលតម្រូវឲ្យអង្គការពិភពលោកមួយនេះ ជួយពិនិត្យ និង ស្តារឲ្យមានភាពប្រសើរឡើង។
-
ច្បាប់អង្គការប៉ះពាល់ភ្លាមៗនៅមូលដ្ឋានក្រោយការអនុម័ត
ភ្នំពេញ—សកម្មជនដីធ្លីនៅស្រុកមួយក្នុងខេត្តក្រចេះកំពុងត្អូញត្អែរអំពីចំណាត់ការខាងផ្លូវច្បាប់ បន្ទាប់ពីអាជ្ញាធរចាប់ផ្តើមអនុវត្តច្បាប់ស្តីពីសមាគម និងអង្គការក្រៅរដ្ឋាភិបាល នៅក្រោយព្រះមហាក្សត្របានឡាយព្រហស្តលេខាលើច្បាប់ដ៏ចម្រូងចម្រាសមួយនេះកាលពីសប្តាហ៍មុន។ លោក ស៊ីម ពៅ តំណាងឲ្យប្រជាពលរដ្ឋ៦៩គ្រួសារ បានធ្វើដំណើរមកទីក្រុងភ្នំពេញ ដើម្បីជួបជាមួយនឹងអ្នកតវ៉ាក្នុងសហគមន៍បឹងកក់ និងបុរីកីឡាព្រមទៀងសហគមន៍ថ្មគោល ក្នុងគោលបំណងស្វែងយល់ពីវិធីក្នុងការចងក្រងសហគមន៍របស់លោកនៅឯឃុំមួយក្នុងខេត្តក្រចេះ។ ការខិតខំស្វែងយល់នេះធ្វើឡើងនៅប៉ុន្មានខែប៉ុណ្ណោះ មុនពេលសេចក្តីព្រាងច្បាប់ស្តីពីសមាគម និងអង្គការក្រៅរដ្ឋាភិបាលត្រូវបានឡាយព្រះហស្តលេខាដោយអង្គព្រះមហាក្សត្រ ក្លាយជាច្បាប់។
-
សង្គមស៊ីវិលសាទរចំពោះការប្រាប់ឲ្យអ្នកកាសែតជួយដុសក្អែលអ្នកនាំពាក្យស្ថាប័នរដ្ឋ
សង្គមស៊ីវិលសាទរចំពោះការទទូចរបស់មន្ត្រីរដ្ឋាភិបាលដែលបានស្នើឲ្យអ្នកសារព័ត៌មាន ចូលរួមដុសក្អែលអ្នកនាំពាក្យក្នុងស្ថាប័នរដ្ឋនានា ក្នុងពេលបច្ចុប្បន្ន។ ការសាទរនេះ ធ្វើឡើងបន្ទាប់ពីរដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានថ្លែងកាលពីថ្ងៃទី១៩ ខែសីហា ជំរុញឲ្យអ្នកសារព័ត៌មានរាយការណ៍ទៅលោកបើមានអ្នកនាំពាក្យរដ្ឋាភិបាលណាមួយស្ពឹកស្រពន់។ ទោះជាយ៉ាងណា សង្គមស៊ីវិលផ្នែកការពារសិទ្ធិស្ត្រី ក៏បានរិះគន់លោក ផៃ ស៊ីផាន ដែលបានយកភរិយាលោក សម រង្ស៊ី មកធ្វើជាឧទាហរណ៍ដើម្បីប្រៀបធៀបសកម្មភាពរបស់បក្សប្រឆាំងជាមួយរដ្ឋាភិបាលកន្លងមក។ សង្គមស៊ីវិលលើកឡើងថា បើលោក ផៃ ស៊ីផាន ចង់ឲ្យអ្នកដទៃកែខ្លួន លោកក៏ត្រូវកែខ្លួនជាមុនផងដែរ។ នេះគឺជាការលើកទី១ហើយដែលមន្ត្រីរដ្ឋាភិបាលបានថ្លែងជាចំហឲ្យអ្នកកាសែតជួយចូលរួមដុសក្អែលមន្ត្រីនាំពាក្យស្ថាប័នរដ្ឋដែលស្ពឹកស្រពន់ ចាប់តាំងពីរដ្ឋាភិបាលបានបញ្ចេញបញ្ជីឈ្មោះអ្នកនាំពាក្យនៅតាមបណ្ដាក្រសួង ស្ថាប័នរដ្ឋនានា កាលពីខែកុម្ភៈ ឆ្នាំ២០១៥ មក។
-
បណ្ដាញអង្គការជាតិ-អន្តរជាតិស្នើអ.ស.បមានវិធានការចំពោះស្ថានភាពសិទ្ធិមនុស្សនៅកម្ពុជា
បណ្ដាញអង្គការការពារសិទ្ធិមនុស្សជាតិ និងអន្តរជាតិមួយចំនួនស្នើក្រុមប្រឹក្សាសិទ្ធិមនុស្សនៃអង្គការសហប្រជាជាតិ (អ.ស.ប) អោយជួយអន្តរាគមន៍ស្ដារស្ថានភាពសិទ្ធិមនុស្សនៅកម្ពុជា នៅពេលដែលក្រុមអង្គការទាំងនេះមើលឃើញថា ស្ថានភាពគោរពសិទ្ធិមនុស្សបានធ្លាក់ចុះនៅមួយរយៈពេលចុងក្រោយនេះ។ សំណើនោះធ្វើឡើងតាមរយៈលិខិតរួមមួយរបស់ក្រុមបណ្ដាញការពារសិទ្ធិមនុស្ស ដែលបានផ្ញើទៅក្រុមប្រឹក្សាសិទ្ធិមនុស្សនៃអង្គការសហប្រជាជាតិកាលពីថ្ងៃទី២០ ខែសីហា។ ទោះជាយ៉ាងណាមន្ត្រីរដ្ឋាភិបាលច្រានចោលការលើកឡើងរបស់ក្រុមអង្គការទាំងនោះ និងបញ្ជាក់ថា រដ្ឋាភិបាលតែងអនុវត្តតាមគោលការណ៍នីតិរដ្ឋ និងប្រជាធិបតេយ្យ។ លិខិតរបស់ក្រុមអង្គការមិនមែនរដ្ឋាភិបាលចំនួន ១២ លើកឡើងថា សិទ្ធិមនុស្សនៅកម្ពុជា កំពុងធ្លាក់ចុះ ដែលចាំបាច់ត្រូវក្រុមប្រឹក្សាសិទ្ធិមនុស្សអន្តរជាតិយកចិត្តទុកដាក់ និងផ្ដល់អនុសាសន៍ដើម្បីអោយរដ្ឋាភិបាលយកចិត្តទុកដាក់កែលំអស្ថានភាពនេះឡើងវិញ។
-
អង្គការសិទ្ធិមនុស្សស្នើលោក ស ខេង បកស្រាយការអនុវត្តច្បាប់អង្គការចំពោះបណ្តាញតាមមូលដ្ឋាន
មជ្ឈមណ្ឌលសិទ្ធិមនុស្សកម្ពុជា(CCHR)ស្នើលោក ស ខេង រដ្ឋមន្ដ្រីក្រសួងមហាផ្ទៃ បកស្រាយជាលាយល័ក្ខអក្សរចំពោះការអនុវត្តច្បាប់ស្តីពីសមាគមនិងអង្គការមិនមែនរដ្ឋាភិបាល ដោយបារម្ភពីផលប៉ះពាល់លើអង្គការមូលដ្ឋាននិងក្រុមបណ្ដាញក្រៅផ្លូវការ។ កាលពីថ្ងៃទី១២ខែសីហា ព្រះមហាក្សត្រ ព្រះបាទនរោត្តមសីហមុនីបានឡាយព្រះហស្តលេខាប្រកាសប្រើប្រាស់ច្បាប់ស្តីពីសមាគមនិងអង្គការមិនមែនរដ្ឋាភិបាល។ លិខិតចំហរបស់មជ្ឈមណ្ឌលសិទ្ធិមនុស្សកម្ពុជា ចុះថ្ងៃសុក្រទី២១ ខែសីហានេះឲ្យដឹងថាកាលពីថ្ងៃទី០៨ ខែកក្កដា កន្លងទៅ រដ្ឋលេខាក្រសួងមហាផ្ទៃ លោក សក់ សេដ្ឋា បានលើកឡើងថាច្បាប់អង្គការនឹងមិនត្រូវអនុវត្តចំពោះក្រុមអង្គការនៅមូលដ្ឋាននិងបណ្ដាញផ្លូវការឡើយ។ ប៉ុន្ដែលិខិតនោះបញ្ជាក់ថាថ្មីៗនេះមានករណីមួយនៅខេត្តក្រចេះ នៅពេលប្រជាពលរដ្ឋប្រមូលផ្ដុំគ្នាជាសហគមន៍ដើម្បីតវ៉ារឿងដីធ្លី ស្រាប់តែអធិការស្រុកស្នួលខេត្តក្រចេះបានប្រាប់ទៅតំណាងសហគមន៍ទាំងនោះថាបើចង់បង្កើតសហគមន៍ គឺពួកគេត្រូវទៅចុះឈ្មោះនៅក្រសួងមហាផ្ទៃ។ លិខិតនោះបញ្ជាក់ថាមជ្ឈមណ្ឌលសិទ្ធិមនុស្សកម្ពុជាមានក្ដីព្រួយបារម្ភចំពោះការអនុវត្តច្បាប់អង្គការនេះ ហើយស្នើឲ្យលោក ស ខេង បកស្រាយករណីនេះជាលាយល័ក្ខអក្សរ។
-
ក្រសួងព័ត៌មាន បើកឲ្យពលរដ្ឋបញ្ចេញមតិលើគេហទំព័រ«សិទ្ធិទទួលបានព័ត៌មាន»
ក្រសួងព័ត៌មានប្រកាសបើកឲ្យដំណើរការគេហទំព័រថ្មី ដើម្បីបើកចំហព័ត៌មាន និងផ្តល់ឱកាសឲ្យសាធារណជន បានចូលរួមបញ្ចេញមតិយោបល់ ធ្វើការកែលម្អ និងដាក់បញ្ចូលទៅក្នុងសេចក្តីព្រាងច្បាប់ស្តីពី«សិទ្ធិទទួលបានព័ត៌មាន» នៅក្នុងគេហទំព័រក្រសួងព័ត៌មានដែលមានឈ្មោះថា www.information.gov.kh ហើយស្វែងរកពាក្យស្តីពី«សិទ្ធិទទួលបានព័ត៌មាន»។ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានមានប្រសាសន៍នៅក្នុងកិច្ចប្រជុំក្រុមការងារបច្ចេកទេសរៀបចំតាក់តែងសេចក្តីព្រាងច្បាប់ស្តីពី«សិទ្ធិទទួលបានព័ត៌មាន»លើកពី៥ នៅថ្ងៃទី២០ សីហានេះ ថា ការបង្កើនគេហទំព័រថ្មីនេះ គឺផ្តល់នូវអត្ថប្រយោជន៍សម្រាប់ឲ្យប្រជាពរដ្ឋទូទៅ អាចចូលរួមបញ្ចេញមតិយោបល់ឲ្យបានទូលំទូលាយ។ ជាពិសេស ក្រសួងចង់បានច្បាស់ស្តីពី«សិទ្ធិទទួលបានព័ត៌មាន»នេះ ឆ្លើយតបទៅនឹងតម្រូវការនៅក្នុងសង្គម និងប្រជាជនកម្ពុជា ដោយធ្វើយ៉ាងណាឲ្យស្របតាមបរិបទសង្គមបច្ចុប្បន្ន។
អានបន្ត -
ស្ទាវឡើងកចាប់ក្មេងស្រីអាយុ១៣ឆ្នាំរំលោភជាច្រើនដង ទីបំផុតដេកគុក
ខេត្តកណ្ដាល ៖ ជនស្ទាវឡើងកម្នាក់បានស្រឡាញ់គ្នាជាមួយក្មេងស្រីម្នាក់ ដែលទើបតែមានអាយុ១៣ឆ្នាំ កន្លងមកបានណាត់ជួបគ្នារួមមេត្រីជាច្រើនដងរួចមកហើយ លុះដល់លើកចុងក្រោយនេះ ត្រូវបានជីដូននាងមកទាន់ក៏បានប្ដឹងឲ្យប៉ូលិសចាប់ខ្លួន ដោយចោទប្រកាន់ថា បានចាប់រំលោភសេពសន្ថវៈចៅស្រី ពេលនេះយុវជនខាងលើ ត្រូវបានជាប់ខ្នោះ និងក្លាយជាអ្នកទោស ព្រោះរំលោភលើអនីតិជន កាលពីព្រឹកថៃ្ងទី២៦ សីហា ២០១៥ នៅក្នុងផ្ទះរបស់យុវជនរូបនេះ ស្ថិតនៅក្នុងភូមិត្រពាំងក្រឡាញ់ ឃុំសំរោងលើ ស្រុកអង្គស្នួល ។ ជនសង្ស័យ ឈ្មោះ អឿង ថា អាយុ១៩ឆ្នាំ ជាកម្មកររោងចក្រចំណីសត្វក្រុមហ៊ុនមួយ មានទីលំនៅក្នុងភូមិឃុំកើតហេតុខាងលើ ។ ចំណែកក្មេងស្រីរងគ្រោះ អាយុ១៣ឆ្នាំ ជាសិស្ស ។
-
ព្រះសង្ឃខ្មែរកម្ពុជាក្រោមតវ៉ាទាមទារឲ្យដោះលែងសង្ឃពីរអង្គ ដែលត្រូវសមត្ថកិច្ចចាប់ខ្លួន
ព្រះសង្ឃខ្មែរកម្ពុជាក្រោមនិងប្រជាពលរដ្ឋប្រមាណ៦០អង្គ/នាក់នាំគ្នាតវ៉ានៅមុខសាលាដំបូងរាជធានីភ្នំពេញនៅព្រឹកថ្ងៃពុធនេះ ដើម្បីទាមទាឲ្យដោះលែងព្រះសង្ឃពីរអង្គដែលត្រូវសមត្ថ កិច្ចចាប់ខ្លួន ដោយក្រុមព្រះសង្ឃអះអាងថាសង្ឃទាំងពីរអង្គនោះគ្មានទោសដូចការចោទប្រកាន់របស់តុលាការនោះឡើយ។ កាលពីថ្ងៃទី១ ខែសីហា ព្រះសង្ឃពីរអង្គព្រះនាម ជា វណ្ណដា និងព្រះតេជគុណ ដាវ ទេព្យ គង់ នៅវត្តអង្គតាមិញ ខណ្ឌពោធិ៍សែនជ័យ រាជធានីភ្នំពេញ ត្រូវបានសមត្ថកិច្ចចាប់ព្រះកាយនិងផ្សឹក ដោយចោទថាព្រះសង្ឃទាំងពីរអង្គនោះ បានប្រព្រឹត្តឬហៅថាបដិបត្តិផ្ទុយពីបញ្ញត្តិសាសនា។ អាជ្ញាធរអះអាងថាបានរកឃើញភស្តុតាងមួយចំនួនមានកាំបិទ ដាវ ដំបង និងវត្ថុផ្សេងទៀតនៅក្នុងកុដិ។
-
ពលរដ្ឋ២ស្រុកលើកគ្នាបន្តតវ៉ាឲ្យតុលាការដោះលែងយុវជនបរិស្ថាន៣នាក់
ប្រជាពលរដ្ឋច្រើននាក់មកពីស្រុកបុទុមសាគរ និងស្រុកគីរីសាគរ ខេត្តកោះកុង បានបន្តប្រមូលផ្ដុំគ្នានៅពីមុខតុលាការខេត្តនេះ ទាមទារឲ្យដោះលែងសកម្មជនអង្គការចលនាមាតាធម្មជាតិ ៣នាក់ ចេញពីពន្ធនាគារ។ មន្ត្រីសង្គមស៊ីវិលខេត្តនេះ បានចាត់ទុកការចាប់ខ្លួន និងឃុំខ្លួនសកម្មជនការពារធនធានធម្មជាតិទាំង ៣នាក់ របស់តុលាការខេត្តនេះទៅតាមពាក្យបណ្ដឹងរបស់អាជ្ញាធរ និងក្រុមហ៊ុនបូមខ្សាច់ ថាជាការបំបាក់ស្មារតីសកម្មជនការពារធនធានធម្មជាតិដទៃទៀត ឲ្យបញ្ឈប់សកម្មភាពតវ៉ា។ គិតមកដល់ថ្ងៃព្រហស្បតិ៍ ទី២០ ខែសីហា គឺជាថ្ងៃទី២ ហើយដែលប្រជាពលរដ្ឋមកពីស្រុកគីរីសាគរ និងស្រុកបុទុមសាគរ បានលើកគ្នាតវ៉ា និងស្នាក់នៅទាំងយប់ថ្ងៃនៅពីមុខតុលាការសាលាដំបូងខេត្តកោះកុង ដើម្បីទាមទារឲ្យដោះលែងសមាជិកអង្គការចលនាមាតាធម្មជាតិ ៣នាក់ ដែលតុលាការខេត្តនេះចាប់ដាក់គុក។
-
ពលរដ្ឋតវ៉ាទាមទារឲ្យតុលាការខេត្តកោះកុងដោះលែងយុវជនចលនាមាតាធម្មជាតិ៣នាក់
ប្រជាពលរដ្ឋនៅខេត្តកោះកុងប្រមាណ១០០នាក់នៅព្រឹកថ្ងៃព្រហស្បត្តិ៍នេះ នាំគ្នាតវ៉ានៅមុខសាលាដំបូងខេត្តទាមទារឲ្យដោះលែងសកម្មជនបរិស្ថាន៣នាក់ដែលត្រូវបានចាប់ខ្លួន បន្ទាប់ពីតវ៉ាប្រឆាំងនឹងក្រុមហ៊ុនបូមខ្សាច់របស់វៀតណាម។ កាលពីថ្ងៃចន្ទ សកម្មជនចលនាមាតាធម្មជាតិ៣នាក់មានលោក សាន់ ម៉ាឡា លោក ទ្រី សុវិគា និងលោក ស៊ិម សំណាង ត្រូវបាននគរបាលយុត្តិធម៌ស្រុកបទុមសាគរនៃខេត្តកោះកុងឃាត់ខ្លួនរួចបញ្ជូនទៅតុលាការ។ អ្នកទាំង៣ត្រូវចៅក្រមស៊ើបសួរសាលាដំបូងខេត្តនេះចោទប្រកាន់ពីបទគំរាមកំហែងធ្វើឲ្យខូចខាត និងបញ្ជូនពួកគេទៅឃុំខ្លួនបណ្តោះអាសន្ននៅពន្ធនាគារខេត្ត។
-
មន្ត្រីក្រសួងមហាផ្ទៃថារូបភាពនៃការជួញដូរមនុស្សមានភាពសាំញ៉ាំពិបាកចាប់ជនល្មើស
មន្ត្រីជាន់ខ្ពស់ក្រសួងមហាផ្ទៃលើកឡើងថា អាជ្ញាធរមានការពិបាកក្នុងការតាមដានចាប់មេខ្យល់និងមេខ្លោងជួញដូរមនុស្ស ក៏ដូចជាពិបាកក្នុងការកំណត់អត្តសញ្ញាណជនរងគ្រោះ ដោយអះអាងថាដោយសារតែរូបភាពនៃការឆបោកនិងជួញដូរមានភាពសាំញ៉ាំ។ រដ្ឋលេខាធិការក្រសួងមហាផ្ទៃនិងជាអនុប្រធានអចិន្ត្រៃយ៍របស់គណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង បានថ្លែងបែបនេះប្រាប់អ្នកសារព័ត៌មាន បន្ទាប់ពីលោកស្រីបញ្ចប់សុន្ទរកថានៅក្នុងសន្និសីទមួយនៅព្រឹកថ្ងៃពុធនេះ ស្តីអំពីការអនុវត្តល្អនៃគម្រោងប្រយុទ្ធប្រឆាំងអំពើជួញដូរមនុស្សនិងយុទ្ធសាស្ត្រទៅថ្ងៃអនាគត។
-
"ការបន្តដោះស្រាយវិវាទក្រៅប្រព័ន្ធច្បាប់ធ្វើឲ្យបរាជ័យក្នុងការការពារស្ត្រីពីអំពើហិង្សា"
ក្រុមអង្គការសង្គមស៊ីវិល ដែលធ្វើការពាក់ព័ន្ធនឹងសិទ្ធិស្ត្រីមើលឃើញថា ការបន្តដោះស្រាយវិវាទលើច្បាប់ក្រៅផ្លូវការ ធ្វើឲ្យបរាជ័យក្នុងកិច្ចការពារស្ត្រីពីអំពើហិង្សា។ លើសពីនេះ ធ្វើឲ្យស្ត្រីប្រឈមទៅនឹងអំពើហិង្សា មានការរើសអើងពីសង្គម ដែលអាចឲ្យស្ត្រីកម្ពុជា នៅតែមិនបានទទួលបានយុត្តិធម៌ពេញលេញ។ សង្គមស៊ីវិលជាតិ និងអន្តរជាតិ ចាត់ទុកថា ការបន្តដោះស្រាយវិវាទលើច្បាប់ក្រៅផ្លូវការ មានន័យថា ការបន្តដោះស្រាយវិវាទតាមបែបទំនៀមទម្លាប់ប្រពៃណី ជះឥទ្ធិពលអវិជ្ជមានខ្លាំងលើកិច្ចការពារស្ត្រី ខណៈប្រព័ន្ធផ្លូវការបានផ្តល់នូវមធ្យោបាយដល់ស្ត្រី ឲ្យទទួលបានការការពារ។ ការលើកឡើងរបស់សង្គមស៊ីវិលនៅពេលនេះ ធ្វើឡើងនៅក្នុងវេទិកាថ្នាក់ជាតិស្ដីពីការផ្តល់យុត្តិធម៌ដល់ស្ត្រី ក្នុងប្រព័ន្ធយុត្តិធម៌ចម្រុះលើករណីអំពើហិង្សាលើស្ត្រី នៅថ្ងៃទី២០ ខែសីហា។
-
កម្មកររោងចក្រប៊ីយូធីហ៊្វូលនៅបាវិតបន្តធ្វើកូដកម្មទាមទារលក្ខខណ្ឌការងារ១១ចំណុច
កម្មកររោងចក្រប៊ីយូធីហ៊្វូល វីនដូរ (Beautiful Window) នៅតំបន់សេដ្ឋកិច្ចពិសេស សានតុងសាន់សែល (SHANDONG SUNSHEL) ស្ថិតក្នុងក្រុងបាវិត ធ្វើកូដកម្មទាមទារអត្ថប្រយោជន៍ចំនួន ១១ចំណុច ជាងមួយសប្ដាហ៍មកហើយ រហូតឈានដល់ផ្ទុះហិង្សាទៀតផង។ ឆ្លើយតបចំពោះបញ្ហានេះ តំណាងភាគីរោងចក្របញ្ជាក់ថា ក្រុមហ៊ុនបានធ្វើតាមការទាមទាររួចរាល់ហើយ តែកូដកម្មមិនចប់មិនហើយ ដោយសារសហជីពបន្តធ្វើការញុះញង់។ សូមស្ដាប់ លោក ថា កិត្យា ដែលបានចុះទៅតាមដានការតវ៉ានេះរាយការណ៍ដូចតទៅ៖
-
រដ្ឋមន្ត្រីព័ត៌មានច្រានចោលការលើកឡើងដែលថាច្បាប់ទទួលព័ត៌មានដាក់ទោសនាយករដ្ឋមន្ត្រី
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ច្រានចោលការលើកឡើងរបស់មន្ត្រីទីស្តីការគណៈរដ្ឋមន្ត្រីម្នាក់ ដែលបានលើកឡើងថា ច្បាប់ស្តីពីសិទ្ធិទទួលបានព័ត៌មាននឹងមានដាក់ទោសនាយករដ្ឋមន្ត្រី ឬរដ្ឋមន្ត្រីដែលមិនបានផ្តល់ព័ត៌មានដល់អ្នកដែលស្នើសុំ។ នៅក្នុងវគ្គបណ្តុះបណ្តាលក្រុមការងារបច្ចេកទេសរៀបចំតាក់តែងសេចក្តីព្រាងច្បាប់ស្តីពីសិទ្ធិទទួលបានព័ត៌មាននៅកម្ពុជាកាលពីរសៀលថ្ងៃទី១៨ ខែសីហាម្សិលមិញ អនុរដ្ឋលេខាធិការ និងជាសមាជិកក្រុមប្រឹក្សាអ្នកច្បាប់នៃទីស្ដីការគណៈរដ្ឋមន្ត្រី លោក ស៊ា ម៉ៅ បានមានប្រសាសន៍ថា ច្បាប់ស្តីពីសិទ្ធិទទួលព័ត៌មានដែលកំពុងស្ថិតក្នុងការធ្វើសេចក្តីព្រាង នឹងដាក់ទោសទណ្ឌមិនថាតែនាយករដ្ឋមន្ត្រី ឬរដ្ឋមន្ត្រី ដែលមិនឆ្លើយតបនឹងសំណួររបស់អ្នកសារព័ត៌មាន ឬប្រជាពលរដ្ឋដែលស្នើសុំព័ត៌មាន។
-
ក្រសួងដែនដីច្រានចោលការលើកឡើងរបស់ការិយាល័យសមាជិករដ្ឋសភាអាមេរិក
ក្រសួងរៀបចំដែនដី នគរូបនីយកម្ម និងសំណង់ ប្រតិកម្មនឹងការិយាល័យប្រធានគណៈកម្មាធិការទទួលបន្ទុកកិច្ចការបរទេស នៃរដ្ឋសភារបស់សហរដ្ឋអាមេរិក ដែលថា កម្ពុជា ខកខានមិនបានធានាសិទ្ធិជាមូលដ្ឋានរបស់ពលរដ្ឋ។ ក្រសួងរៀបចំដែនដី បានសំអាងលើបទដ្ឋានច្បាប់មួយចំនួន និងកិច្ចខិតខំប្រឹងប្រែងរបស់រដ្ឋាភិបាលក្នុងការធានាសិទ្ធិរបស់ពលរដ្ឋ។ ក្នុងសេចក្ដីប្រកាសព័ត៌មានរបស់ក្រសួងដែនដី នគរូបនីយកម្ម និងសំណង់ ចេញនៅថ្ងៃទី១៨ ខែសីហា ក្រសួងបញ្ជាក់ថា មកដល់ពេលនេះ កម្ពុជា មានបទដ្ឋានច្បាប់គ្រប់គ្រាន់ក្នុងការការពារសិទ្ធិស្របច្បាប់របស់ពលរដ្ឋ។
គាំទ្រដោយ
