កំពុងស្វែងរកទិន្នន័យ
រកឃើញ: 12.457
-
កម្មកររោងចក្រហ៊ីយ៉ុងជីននៅខណ្ឌពោធិ៍សែនជ័យកូដកម្មទាមទារឲ្យក្រុមហ៊ុនគោរពច្បាប់ការងារ
កម្មករប្រមាណ១០០នាក់នៅរោងចក្រ ហ៊ីយ៉ុងជីន ស្ថិតនៅភូមិកំបូល ខណ្ឌពោធិ៍សែនជ័យ រាជធានីភ្នំពេញ នាំគ្នាធ្វើកូដកម្មនៅព្រឹកថ្ងៃអង្ការនេះ ដើម្បីទាមទារឲ្យក្រុមហ៊ុនកុំបញ្ឈប់កម្មករដោយគ្មានមូលហេតុ និងលក្ខណ្ឌការងារមួយចំនួនទៀត។ បុគ្គលិកដោះស្រាយវិវាទសហជីពសេរីកម្មករលោក សយ ចាន់ធូ អះអាងថា ក្រុមហ៊ុនបានរំលោភច្បាប់កម្មករដូចជា ក្រុមហ៊ុនមិនទទួលខុសត្រូវនៅពេលកម្មករមានគ្រោះថ្នាក់ការងារ ហើយថែមទាំងបញ្ឈប់កម្មករទៀត។ លោកបន្តថា កម្មករបាននាំគ្នាធ្វើកូដកម្ម ដើម្បីទាមទារនូវលក្ខណ្ឌការងារ៧ចំណុចមានដូចជា កុំឲ្យក្រុមហ៊ុនបញ្ឈប់កម្មករដោយគ្មានមូលហេតុ សុំឲ្យក្រុមហ៊ុនបើកប្រាក់ខែឲ្យទៀងទាត់ដល់កម្មករ សុំឲ្យស្ត្រីដែលមានផ្ទៃពោះត្រូវចេញមុនម៉ោង១៥នាទី និងលក្ខណ្ឌមួយចំនួនទៀត។ កម្មករម្នាក់លោក អ៊ីន ស៊ីន័យ មានប្រសាសន៍ថា ពួកគាត់បានតវ៉ារយៈពេល២ថ្ងៃហើយ តែរហូតមកដល់ពេលនេះខាងភាគីក្រុមហ៊ុនមិនទាន់មានដំណោះស្រាយជួនពួកគាត់នោះទេ។ លោកបានបញ្ជាក់ថា៖ “ពួកយើងទាមទារនេះសូមកុំឲ្យក្រុមហ៊ុនរំលោភទៅលើច្បាប់ការងារ”។
-
អាដហុកបង្ហាញកង្វល់ជុំវិញដំណោះស្រាយបញ្ហាដីធ្លីរបស់អាជ្ញាធរនៅបន្ទាយមានជ័យ
ប្រជាពលរដ្ឋដែលមានទំនាស់ដីធ្លី និងមន្ត្រីអង្គការសង្គមស៊ីវិលនៅខេត្តបន្ទាយមានជ័យ បង្ហាញក្ដីកង្វល់ពីការដោះស្រាយទំនាស់ដីធ្លីរបស់អាជ្ញាធរ និងមន្ត្រីពាក់ព័ន្ធខេត្តនេះ ថាមានការយឺតយ៉ាវ និងមិនដំណើរការទៅមុខ។ បញ្ហានេះ បានបង្កផលលំបាកជាខ្លាំងដល់ប្រជាពលរដ្ឋ ធ្វើឲ្យពួកគាត់ខាតបង់ទាំងទ្រព្យ និងពេលវេលាអស់ជាច្រើនឆ្នាំ ក្នុងការស្វែងរកដំណោះស្រាយដោយពុំទទួលបានលទ្ធផលអ្វីឡើយ។ ទាំងប្រជាពលរដ្ឋ និងមន្ត្រីអង្គការអាដហុក (Adhoc) ខេត្តបន្ទាយមានជ័យ អំពាវនាវឲ្យលោកនាយករដ្ឋមន្ត្រី ហ៊ុន សែន និងមន្ត្រីពាក់ព័ន្ធពន្លឿនដោះស្រាយទំនាស់ដីធ្លីដល់ប្រជាពលរដ្ឋឲ្យបានឆាប់ ដើម្បីពួកគាត់យកដីនោះទៅដាំដុះដោះស្រាយជីវភាពគ្រួសារក្នុងរដូវវស្សានេះ។
-
តុលាការខេត្តកោះកុងសម្រេចចោទប្រកាន់យុវជនចលនាមាតាធម្មជាតិនិងបញ្ជូនទៅឃុំខ្លួន
ចៅក្រមស៊ើបសួរសាលាដំបូងខេត្តកោះកុងបានសម្រេចរក្សាការចោទប្រកាន់លើយុវជន៣នាក់ដែលជាសកម្មជនចលនាមាតាធម្មជាតិ ពីបទគំរាមកំហែងធ្វើឲ្យខូចខាត ដោយបញ្ជូនពួកគេទៅឃុំខ្លួនបណ្តោះអាសន្ននៅពន្ធនាគារខេត្ត។ កាលពីថ្ងៃចន្ទ សកម្មជនទាំង៣នាក់ មានលោក សាន់ ម៉ាឡា លោក ទ្រី សុវិគា និងលោក ស៊ិម សំណាង ត្រូវបាននគរបាលយុត្តិធម៌ស្រុកបូទុមសាគរនៃខេត្តកោះកុងឃាត់ខ្លួន រួចបញ្ជូនទៅតុលាការ។ អ្នកសម្របសម្រួលអង្គការសិទ្ធិមនុស្សលីកាដូប្រចាំខេត្តកោះកុង លោក អ៊ិន គង់ចិត្រ មានប្រសាសន៍ថាព្រះរាជអាជ្ញា ប៊ូ ប៊ុនហាំង បានចោទប្រកាន់យុវជនទាំង៣តាមមាត្រា៤២៤នៃក្រមព្រហ្មទណ្ឌពីបទគំរាមកំហែងថានឹងធ្វើឲ្យខូចខាតដែលភ្ជាប់នឹងបញ្ជាអ្វីមួយ។ លោកបន្តថារហូតមកដល់ពេលនេះ យុវជនទាំង៣កំពុងត្រូវបានឃុំខ្លួនបណ្តោះអាសន្ននៅពន្ធនាគារខេត្តកោះកុង។
-
មន្ត្រីច្រកព្រំដែនអូរស្មាច់នៅឧត្ដរមានជ័យរងការចោទប្រកាន់ថាទារលុយពីអ្នកឆ្លងដែន
ប្រជាពលរដ្ឋដែលឆ្លងដែនទៅប្រទេសថៃតាមច្រកអន្តរជាតិអូរស្មាច់ក្នុងខេត្តឧត្ដរមានជ័យអះអាងថា មន្ត្រីនគរបាលនៅច្រកព្រំដែននេះទារលុយពីពួកគាត់ពេលឆ្លងដែន ទោះបីជាពួកគាត់មានលិខិតឆ្លងដែនត្រឹមត្រូវក៏ដោយ។ ពលរដ្ឋម្នាក់ដែលឆ្លងដែនទៅធ្វើការនៅប្រទេសថៃតាមតាមច្រកអូរស្មាច់លោក ស្រ៊ុន សារេត ឲ្យដឹងថា មន្ត្រីនគរបាលព្រំដែនតែងតម្រូវឲ្យលោកបង់លុយចំនួន១០០០០រៀល ឬលុយថៃចំនួន១០០បាត បើមិនដូចនោះទេ លោកថា មន្ត្រីនគរបាលនឹងមិនបោះត្រាចេញពីប្រទេសឲ្យនោះទេ។
-
សេចក្តីព្រាងច្បាប់អធិការកិច្ច កំពុងពិភាក្សាអន្តរក្រសួង មុនដាក់ឆ្លងគណៈរដ្ឋមន្ត្រី
ភ្នំពេញ: សេចក្តីព្រាងច្បាប់អធិការកិច្ច បានត្រូវក្រសួងទំនាក់ទំនង រដ្ឋសភា ព្រឹទ្ធសភា និងអធិការកិច្ច ដាក់ឲ្យពិភាក្សាគ្នា នៅក្នុងសិក្ខាសាលាពិគ្រោះយោបល់ថ្នាក់ជំនាញជាអន្តរក្រសួងមួយ នាព្រឹកថ្ងៃទី១៨ ខែសីហា នេះ នៅសណ្ឋាគារកាំបូឌីយ៉ាណា ដោយមានការចូលរួមពី តំណាងក្រុមប្រឹក្សាអ្នកច្បាប់ នៃ ECO SOCC អង្គភាពប្រឆាំងអំពើពុករលួយ តំណាងសហគមន៍អឺរ៉ុប សង្គមស៊ីវិល និងដៃគូអភិវឌ្ឍន៍ មុននឹងបញ្ជូនសេចក្តីព្រាងច្បាប់នេះ ដាក់ចូលកិច្ចប្រជុំពិភាក្សា ពេញអង្គគណៈរដ្ឋមន្ត្រី។ នៅក្នុងឱកាសនោះ លោក ឆេង សារឿន តំណាងលោកស្រីឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនង រដ្ឋសភា ព្រឹទ្ធសភា និងអធិការកិច្ច បានមាន ប្រសាសន៍ថា៖ ការធ្វើសេចក្តីព្រាងច្បាប់អធិការកិច្ចនេះ គឺផ្អែកលើការស្រាវជ្រាវ ចងក្រង ច្បាប់ពាក់ព័ន្ធ លើវិស័យអធិការកិច្ច ពីបណ្តាប្រទេស មួយចំនួន មានដូចជា ប្រទេសចិន, កូរ៉េខាងត្បូង, បារាំង, និង វៀតណាម សម្រាប់ប្រើប្រាស់ ជាមូលដ្ឋាន និងខ្លឹមសារសមស្រប ដាក់បញ្ចូលក្នុងសេចក្តីព្រាងច្បាប់ អធិការកិច្ចនេះ។
-
អ្នកជំនាញសង្ឃឹមថាការចុះឈ្មោះអ្នកបោះឆ្នោតរបៀបថ្មីនឹងផ្តល់បញ្ជីមានគុណភាព
ភ្នំពេញ—ការចុះឈ្មោះអ្នកបោះឆ្នោតតាមរបៀបថ្មីគឺការប្រើប្រព័ន្ធអេឡិចត្រូនិកនឹងធ្វើឲ្យមានបញ្ជីដែលមានគុណភាព។ នេះបើតាមការអះអាងរបស់លោក គុល បញ្ញា នាយកប្រតិបត្តិអង្គការខុមហ្រែ្វលដែលចូលរួមជាវាគ្មិនក្នុងកម្មវិធី Hello VOA ពិសេសកាលពីរាត្រីថ្ងៃអង្គារទី១៨ ខែសីហា។ លោកថ្លែងយ៉ាងដូច្នេះដោយយោងថា ការចុះឈ្មោះថ្មីដោយប្រើប្រព័ន្ធកុំព្យូទ័រនេះគឺនឹងកាត់បន្ថយឈ្មោះស្ទួន ឈ្មោះខ្មោច បាត់ឈ្មោះអ្នកបោះឆ្នោតជាដើម។ គណៈកម្មការជាតិរៀបចំការបោះឆ្នោត(គ.ជ.ប.) នឹងសាកល្បងការចុះឈ្មោះនេះក្នុងឃុំសង្កាត់ចំនួន២៥នៅដើមឆ្នាំ២០១៦ គឺ១ឆ្នាំមុនការបោះឆ្នោតជ្រើសរើសក្រុមប្រឹក្សាឃុំសង្កាត់ និង២ឆ្នាំមុនការបោះឆ្នោតជាតិនៅឆ្នាំ២០១៨។
-
សង្គមស៊ីវិល៖ រដ្ឋាភិបាលកំពុងធ្វើយុទ្ធនាការបិទសំឡេងក្រុមមតិភាគតិចសិទ្ធិមនុស្ស
ភ្នំពេញ—នៅថ្ងៃអង្គារនេះ អង្គការសង្គមស៊ីវិលធំៗចំនួន១៣បានបញ្ជាក់ការព្រួយបារម្ភរបស់ខ្លួនអំពីការរំលោភសិទ្ធិមនុស្ស និងការគំរាមកំហែងយ៉ាងធ្ងន់ធ្ងរដល់លទ្ធិប្រជាធិបតេយ្យនៅកម្ពុជា បន្ទាប់ពីមានការចាប់ឃុំខ្លួនសកម្មជននិងមន្ត្រីគណបក្សជំទាស់ និងសកម្មជនសិទ្ធិមនុស្សជាបន្តបន្ទាប់ នាពេលថ្មីៗនេះ។ សេចក្តីថ្លែងការណ៍រួមរបស់អង្គការសង្គមស៊ីវិលនៅក្នុងប្រទេសកម្ពុជាបានឲ្យដឹងថា ពួកខ្លួនយល់ថា រដ្ឋាភិបាលកម្ពុជាកំពុងតែរៀបចំយុទ្ធនាការថ្នាក់ជាតិមួយដើម្បីបិទមាត់ក្រុមមតិភាគតិច និងសង្គមស៊ីវិលនៅក្នុងប្រទេសកម្ពុជា។ ហើយការណ៍នេះធ្វើឲ្យប៉ះពាល់ដល់ដំណើរការប្រជាធិបតេយ្យនិងសិទ្ធិមនុស្សនៅក្នុងប្រទេសដ៏ក្រីក្រនេះ។ ក្រុមអង្គការសង្គមស៊ីវិលទាំងនេះរួមមានគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជាហៅកាត់ថា CHRAC អង្គការសិទិ្ធមនុស្ស ADHOC មជ្ឈមណ្ឌលសិទ្ធិមនុស្សកម្ពុជា CCHR អង្គការ SILAKA និងសហភាពការងារកម្ពុជា CLC ជាដើម។
-
សង្គមស៊ីវិលចាត់ទុកការចោទប្រកាន់សមាជិកព្រឹទ្ធសភាគណបក្ស សម រង្ស៊ី ជារឿងនយោបាយ
សង្គមស៊ីវិលមួយចំនួនបានចេញសេចក្តីថ្លែងការណ៍មួយដោយចាត់ទុកថាការសម្រេចរបស់តុលាការក្នុងការឃុំខ្លួនសមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ ជា”ទង្វើខុសច្បាប់និងជាករណីនយោបាយ” ដោយស្នើឲ្យដោះលែងសមាជិកព្រឹទ្ធសភារូបនោះជាបន្ទាន់។ លោក ហុង សុខហួរ ត្រូវបានសមត្ថកិច្ចចាប់ខ្លួនកាលពីថ្ងៃសៅរ៍ គឺក្រោយពីរថ្ងៃបន្ទាប់ពីលោកនាយករដ្ឋមន្រ្តី ហ៊ុន សែន បានចេញបញ្ជាឲ្យចាប់ខ្លួន ដោយចោទថាក្លែងឯកសារសន្ធិសញ្ញាកម្ពុជានិងវៀតណាមនៅឆ្នាំ១៩៧៩។ តុលាការកាលពីថ្ងៃអាទិត្យបានសម្រេចបញ្ជូនលោក ហុង សុខហួរ ទៅពន្ធនាគារ ដោយចោទលោក៣បទចោទ គឺការក្លែងឯកសារសាធារណៈ ការប្រើប្រាស់ឯកសារក្លែងក្លាយនិងញុះញង់ឲ្យមានអសន្តិសុខ។
-
សិទ្ធិសេរីភាពបញ្ចេញមតិ និងសិទ្ធិទទួលបានព័ត៌មាននៅតែមានការរឹតត្បិត
ភ្នំពេញ—ខណៈពេលដែលបញ្ហាសំខាន់ៗ ដូចជាបញ្ហាព្រំដែនកម្ពុជា-វៀតណាម ដំណើរការអនុម័តច្បាប់សមាគមនិងអង្គការមិនមែនរដ្ឋាភិបាល បញ្ហាដីធ្លី ត្រូវបានប្រជាពលរដ្ឋកម្ពុជាផ្តោតការយកចិត្តទុកដាក់នោះ អ្នកយកព័ត៌មានជាច្រើនត្រូវបានរំខាន និងរារាំង ពេលដែលពួកគេចុះបំពេញវិជ្ជាជីវៈយកព័ត៌មាន។ ជាក់ស្តែងនាដើមខែកក្កដាកន្លងទៅ លោកឈាង វុន អ្នកនាំពាក្យរដ្ឋសភា បានបណ្តេញលោក អ៊ុំ សំអាន តំណាងរាស្រ្តគណបក្សជំទាស់ និងអ្នកយកព័ត៌មានឲ្យចេញទៅធ្វើបទសម្ភាសន៍នៅក្រៅបរិវេណរដ្ឋសភា។ វីដេអូខ្លីអំពីទង្វើនេះត្រូវបានចែកចាយនៅលើបណ្តាញផ្សព្វផ្សាយសង្គមហ្វ៊េសប៊ុក ហើយទង្វើនេះបានរងការរិះគន់យ៉ាងខ្លាំងពីសំណាក់សង្គមស៊ីវិល ស្ថាប័នសារព័ត៌មាន ក៏ដូចជាសាធារណជនផងដែរ។
-
កម្មករ-កម្មការិនី នៅរោងចក្រ ហី យ៉ុងជីន ព្រមានដុតកងឡានបើគ្មានដំណោះស្រាយ
កម្មករ-កម្មការិនីជាង១០០នាក់ធ្វើការនៅរោងចក្រ ហី យ៉ុងជីន ផ្ទុះកូដកម្មទាមទារលក្ខខណ្ឌការងារ៧ចំណុចពីថៅកែរោងចក្រនៅព្រឹកថ្ងៃ អង្គារ ១៨ សីហានេះ។ បើគ្មានដំណោះស្រាយឫក៏បន្តពន្យាពេលទៀតនោះ ក្រុមកម្មករ នឹងដុតកងឡាន ឈរតវ៉ា និង យកលក្ខខណ្ឌ៧ចំណុចនេះទៅដាក់នៅក្រសួងការងារ។ លក្ខខណ្ឌ៧ចំណុចនោះរួមមាន៖១-ស្នើទៅក្រុមហ៊ុនកុំបញ្ឈប់កម្មករដោយអត់មានមូលហេតុ២-សុំបើកលុយ៥ភាគរយនៅពេលដល់កិច្ចសន្យាការងារ ៣-បើកប្រាក់ខែឲ្យបានទៀងទាត់នៅមុនម៉ោង៤ ៤-សុំឲ្យស្ត្រីមានផ្ទៃពោះចេញមុនម៉ោង១៥នាទី ៥-នៅពេលកម្មករឈឺមានសំបុត្រពេទ្យសុំឲ្យក្រុមហ៊ុនទទួលយក ៦-នៅពេលកម្មករឈប់សម្រាក់សុំឲ្យក្រុមហ៊ុនកាត់លុយជាសមាមាត្រ ៧-ស្នើឲ្យមានពេទ្យប្រចាំការ និងថ្នាំពេទ្យគ្រប់គ្រាន់សម្រាប់កម្មករ។
-
លោក ប៊្រែដ អាដាម ថាទង្វើរបស់លោក ហុង សុខហួរ មិនមែនជាបទល្មើសព្រហ្មទណ្ឌ
មន្ត្រីជាន់ខ្ពស់នៃអង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ឲ្យដឹងថា ការចាប់ខ្លួន ចោទប្រកាន់ និងដាក់ពន្ធនាគារសមាជិកព្រឹទ្ធសភា លោក ហុង សុខហួរ គឺជាការរំលោភរដ្ឋធម្មនុញ្ញកម្ពុជា និងផ្ទុយពីច្បាប់អន្តរជាតិ ដែលកម្ពុជា ទទួលស្គាល់ជាច្បាប់ជាតិ។ លោក ប្រ៊ែដ អាដាម (Brad Adams) នាយកប្រតិបត្តិនៃអង្គការសិទ្ធិមនុស្ស យូមែន រ៉ៃត៍ វ៉ច្ឆ ទទួលបន្ទុកតំបន់អាស៊ី បញ្ជាក់ថា បើទោះជាលោកទទួលស្គាល់ថា ទង្វើរបស់សមាជិកព្រឹទ្ធសភារូបនេះខ្វះការទទួលខុសត្រូវ ដោយការបង្ហោះឯកសារមិនពិតស្ដីពីសន្ធិសញ្ញាមិត្តភាពកម្ពុជា-វៀតណាម ឆ្នាំ១៩៧៩ ត្រង់ចំណុចប្រការ៤ ក៏ដោយ ក៏ទង្វើនេះមិនមែនជាបទល្មើសឧក្រិដ្ឋ ដូចការចោទប្រកាន់នោះឡើយ។
-
ព្រះសង្ឃ ដែលប្រើហិង្សាលើនេនតូច ត្រូវដាក់ទណ្ឌកម្ម២១ថ្ងៃ តែមិនឈានដល់ការផ្សឹកព្រះសង្ឃអង្គនោះឡើយ!
កំពង់ឆ្នាំង៖ ករណីព្រះសង្ឃជាគ្រូបង្រៀន គង់នៅវត្ដធម្មវ័ន ដែលបានប្រើអំពើហិង្សាលើកូននេននៅខេត្ដកំពង់ឆ្នាំង ត្រូវបានមន្ដ្រីសង្ឃខេត្ដ ដាក់ទណ្ឌកម្ម ដោយឱ្យសង្ឃដទៃ មានថេរដីការករយៈពេល២១ថ្ងៃ តែមិនឈានដល់ការ ផ្សឹកព្រះសង្ឃអង្គនោះឡើយ! សាមណេររងគ្រោះព្រះនាម វ៉ាន់ វរៈ ព្រះជន្ម១១វស្សា។ ចំណែកព្រះសង្ឃដែលវាយកូននេនព្រះនាម ឌិត ប៉ែន ជាគ្រូឧបជ្ឈាយ៍ (គ្រូបង្រៀនក្នុងវត្ត)។អំពើហិង្សានេះបានកើតឡើងកាលពីវេលារសៀលថ្ងៃទី១៣ ខែសីហា ២០១៥ ស្ថិតនៅវត្ត ធម្មវ័ន ក្នុងឃុំស្វាយជ្រំ ស្រុករលាប្អៀ ខេត្តកំពង់ឆ្នាំង។
-
ម៉ុងតាញ៉ា២៣នាក់ថ្មីទៀតស្ម័គ្រចិត្តវិលត្រឡប់ទៅវៀតណាមបន្ទាប់ពីភៀសខ្លួនទៅថៃ
ជនជាតិដើមភាគតិចម៉ុងតាញ៉ាវៀតណាម ២៣នាក់ថ្មីទៀត បានស្ម័គ្រចិត្តវិលទៅស្រុកកំណើតវិញ នៅថ្ងៃទី១៨ ខែសីហា បន្ទាប់ពីពួកគេបានភៀសខ្លួនចូលទៅរស់នៅប្រទេសថៃ ច្រើនខែកន្លងទៅនេះ។ មន្ត្រីឃ្លាំមើលសិទ្ធិមនុស្សនៃសមាគមអាដហុក (adhoc) ខេត្តរតនគិរី លោក ឆាយ ធី ឲ្យដឹងថា ពលរដ្ឋវៀតណាម ទាំង ២៣នាក់មានស្ត្រី ១១នាក់ ក្នុងនោះមានកុមារចំនួន ១០នាក់។ ពួកគេត្រូវដឹកជញ្ជូនពីព្រំដែនកម្ពុជា-ថៃ ក្នុងខេត្តបន្ទាយមានជ័យ កាត់តាមខេត្តសៀមរាប ព្រះវិហារ ស្ទឹងត្រែង ឆ្ពោះមកច្រកទ្វារព្រំដែនអន្តរជាតិស្រុកអូរយ៉ាដាវ ខេត្តរតនគិរី តាមរយៈក្រុមគ្រួសារដែលមានការអនុញ្ញាតពីអាជ្ញាធរខេត្តយ៉ាឡាយ ប្រទេសវៀតណាម សហការជាមួយអាជ្ញាធរខេត្តរតនគិរី ជូនដំណើរពួកគេទៅប្រគល់ឲ្យអាជ្ញាធរវៀតណាម វិញ។
-
អ្នកកាសែតលោកព្រំ សាន រងប្ដឹងពីសមាជិកព្រឹទ្ធសភាបក្សកាន់អំណាច
រាជធានីភ្នំពេញ៖ លោក ព្រំ សាន (San Prum) ដែលជាអ្នកសារព័ត៌មានជិត ៣០ឆ្នាំមកហើយ និងជាសកម្មជន Facebook នឺងជាសមាជិកស្ថាបនិករបស់ក្រុមរួបរួមមិត្តកម្ពុជា ដើម្បីការងារមនុស្សធម៌ ត្រូវបានលោកជំទាវ កែវ ម៉ាលី សមាជិកព្រឹទ្ធសភាគណបក្សកាន់អំណាច ដាក់ពាក្យបណ្ដឹងទៅអយ្យការអមសាលាដំបូងរាជធានីភ្នំពេញ ពីបទបរិហារកេរ្ត៍ ជាសាធារណៈ។នេះបើយោងប្រភពច្បាស់ការពីមន្ត្រីសាលាដំបូងរាជធានីភ្នំពេញ។
-
ពលរដ្ឋខេត្តក្រចេះបារម្ភខ្លាចអាជ្ញាធរបែងចែកដីធ្លីពុំមានតម្លាភាព
ពលរដ្ឋខេត្តក្រចេះ បារម្ភថាអាជ្ញាធរបែងចែកដីធ្លីពុំមានតម្លាភាព និងចម្រូងចម្រាស។ ភាពចម្រូងចម្រាសនេះ គឺនៅបន្ទាប់ពីអាជ្ញាធរបែងចែកដីធ្លីមិនស្របនឹងសេចក្តីត្រូវការរបស់ពលរដ្ឋភាគច្រើន ស្របពេលដែលឈ្មោះពលរដ្ឋទទួលបានដីក្នុងបញ្ជី ១០៤គ្រួសារ ហាក់មានភាពមិនប្រក្រតីច្រើន។ ចំណែកអាជ្ញាធរស្រុកស្នួល បដិសេធការលើកឡើងរបស់ពលរដ្ឋ។ តំណាងពលរដ្ឋមានបញ្ហាដីធ្លីនៅភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ អះអាងថា ភាពចម្រូងចម្រាសទាក់ទិនការបែងចែកដីធ្លីជូនពលរដ្ឋចំនួន ១០៤គ្រួសារ ធ្វើឲ្យពលរដ្ឋមិនទាន់អាចទទួលយកបាន និងមានមន្ទិលចំពោះដំណោះស្រាយរបស់អាជ្ញាធរ ថានៅមានអាថ៌កំបាំង ទាក់ទិនបញ្ជីឈ្មោះទទួលបានការបែងចែកដីធ្លីពីអាជ្ញាធរ។
-
ពលរដ្ឋមានជម្លោះដីធ្លីនៅស្រុករមាសហែកសុំអន្តរាគមន៍ពីសាលាខេត្តស្វាយរៀង
តំណាងឲ្យពលរដ្ឋមានទំនាស់ដីធ្លីចំនួន ២០គ្រួសារ នៅភូមិបឹង ឃុំត្រស់ ស្រុករមាសហែក គឺលោក សឿង យ៊ាប ឲ្យដឹងថា ការឡើងមកសុំអន្តរាគមន៍ជាថ្មីពីសាលាខេត្តស្វាយរៀង នៅថ្ងៃទី១៧ ខែសីហា គឺបន្ទាប់ពីពួកគាត់ពុំដែលឃើញមានអាជ្ញាធរខេត្តស្វាយរៀង ចុះពិនិត្យ និងដោះស្រាយទំនាស់ដីធ្លីទំហំជាង ៩០ហិកតារ ដែលក្រុមហ៊ុនចម្ការកៅស៊ូពាមជាំង បានចូលរំលោភយកកាលពីឆ្នាំ២០០៧ នោះទេ បើទោះបីជារដ្ឋសភា បានចេញលិខិតស្នើសុំឲ្យជួយដោះស្រាយក្តី៖ «កាន់លិខិតដែលរដ្ឋសភាបានផ្តល់ឲ្យហ្នឹង យកទៅជូនការិយាល័យរដ្ឋបាលខេត្តស្វាយរៀង ហើយមន្ត្រីគេនិយាយថា លោកអភិបាលខេត្តបានប្រគល់ឲ្យលោកអភិបាលរងដោះស្រាយ។ លិខិតនោះរបស់រដ្ឋសភាតាំងខែ៦ តែឥឡូវច្រើនខែហើយ អត់មានចៅហ្វាយខេត្ត ឬមន្ត្រីណាមួយ ធ្វើឲ្យយើងមានទំនុកចិត្ត គឺទទេហ្មង»។
-
តើគួរមានគោលការណ៍អ្វីខ្លះដើម្បីឲ្យការបញ្ចេញមតិតាមអ៊ីនធឺណិតមានភាពល្អប្រសើរ?
សេរីភាពបញ្ចេញមតិតាមប្រព័ន្ធអ៊ីនធឺណិតនៅកម្ពុជា ត្រូវបានគេវាយតម្លៃថា មានលក្ខណៈល្អប្រសើរជាងពេលមុន ប៉ុន្តែអ្នកប្រើប្រាស់ខ្លះនៅតែអាចប្រឈមនឹងបញ្ហាផ្លូវច្បាប់ បើសិនជាគេគិតថា វាជាការវាយប្រហារ ឬជាព័ត៌មានមិនពិត។ តើសេរីភាពបញ្ចេញមតិតាមអ៊ីនធឺណិតនៅកម្ពុជា គួរមានគោលការណ៍អ្វីខ្លះ? សេរីភាពបញ្ចេញមតិតាមប្រព័ន្ធអ៊ីនធឺណិតនៅកម្ពុជា មានភាពល្អប្រសើរច្រើន។ អ្នកប្រើប្រាស់អ៊ីនធឺណិតអាចបញ្ចេញយោបល់ កាត់តរូបភាពផ្សេងៗ និងចែករំលែកតគ្នានូវអ្វីដែលពួកគេពេញចិត្ត។ នេះជាការអះអាងរបស់ លោក សូ សោទ្ធី មន្ត្រីសម្របសម្រួលតស៊ូមតិ នៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ កាលពីព្រឹកថ្ងៃទី១៦ ខែសីហា៖ «ទីមួយ យើងរីករាយដែរដែលស្រុកខ្មែរយើងមានសេរីភាពបញ្ចេញមតិច្រើននៅលើប្រព័ន្ធអ៊ីនធឺណិត ប៉ុន្តែទីពីរ យើងក៏បារម្ភដែរក្នុងការប្រើប្រាស់ក្នុងផ្លូវខុស។ អ៊ីចឹងយើងកំពុងតែបង្កើតឡើងនូវគោលការណ៍នៃសិទ្ធិអ៊ីនធឺណិតមួយ ដើម្បីឲ្យស្រុះស្រួលគ្នាថាសិទ្ធិយើងមាន ក៏ប៉ុន្តែយើងមិនត្រូវធ្វើឲ្យប៉ះពាល់ដល់សិទ្ធិឯកជនរបស់អ្នកដទៃទេ»។
-
កុមារីរងគ្រោះចោទតុលាការខេត្តព្រះសីហនុថាដោះលែងជនល្មើសរំលោភរូបនាង
កុមារីរងគ្រោះអាយុ ១៣ឆ្នាំម្នាក់រស់នៅស្រុកកំពង់សីលា ខេត្តព្រះសីហនុ ដែលត្រូវជនល្មើសចន្លោះពី ៥នាក់ទៅ ៦នាក់ចាប់រំលោភកាលពីដើមសប្ដាហ៍នេះ បានដង្ហោយរកកិច្ចអន្តរាគមន៍ពីស្ថាប័នពាក់ព័ន្ធ ពិសេសលោកនាយករដ្ឋមន្ត្រី ហ៊ុន សែន និងភរិយា ជួយស្វែងរកយុត្តិធម៌។ សារដង្ហោយរកកិច្ចអន្តរាគមន៍នេះ កើតឡើងក្រោយពេលតុលាការសាលាដំបូងខេត្តព្រះសីហនុ បានដោះលែងជនសង្ស័យ ២នាក់ក្នុងចំណោម ៥នាក់ ដែលសមត្ថកិច្ចចាប់ខ្លួនបាន និងត្រូវកុមារីរងគ្រោះចោទថា បានបង្ខាំងរូបនាងទុកក្នុងបន្ទប់បង្ខំឲ្យប្រើគ្រឿងញៀន និងចាប់រំលោភបូកជាច្រើននាក់។
-
តុលាការសម្រេចបញ្ជូនលោក ហុង សុខហួរ ទៅឃុំនៅពន្ធនាគារព្រៃសចោទ៣បទល្មើស
សមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ ប្រឈមជាប់ពន្ធនាគារពី ៥ឆ្នាំទៅ ១០ឆ្នាំ ខណៈដែលចៅក្រមស៊ើបសួរសាលាដំបូងរាជធានីភ្នំពេញ ចោទប្រកាន់បទល្មើសព្រហ្មទណ្ឌ ៣ករណី។ ចំណែកប្រធានគណបក្សប្រឆាំង លោក សម រង្ស៊ី គ្រាន់តែជាន់ជើងដល់ដីខ្មែរវិញ ថានឹងរកមធ្យោបាយត្រជាក់ដែលមិនមែនជាវប្បធម៌សន្ទនា ដើម្បីឲ្យមានការដោះលែង លោក ហុង សុខហួរ និងសកម្មជនគណបក្សសង្គ្រោះជាតិ ផ្សេងទៀត។ ភ្លាមៗក្រោយការសាកសួរពេញមួយព្រឹកនៅសាលាដំបូងរាជធានីភ្នំពេញ សមត្ថកិច្ចចម្រុះប្រដាប់ដោយអាវុធរាប់សិបនាក់ បានបញ្ជូនខ្លួន លោក ហុង សុខហួរ សមាជិកព្រឹទ្ធសភាមកពីគណបក្ស សម រង្ស៊ី ទៅឃុំខ្លួនបណ្ដោះអាសន្ននៅពន្ធនាគារព្រៃស។ ក្រោមបទចោទ គឺបទក្លែងឯកសារសាធារណៈ ប្រើប្រាស់ឯកសារក្លែង និងបទញុះញង់។
-
តុលាការបញ្ចប់ការសាកសួរអតីតប្រធានតុលាការក្រុងភ្នំពេញរឿងអំពើពុករលួយ
អតីតប្រធានសាលាដំបូងរាជធានីភ្នំពេញ លោក អាំង មាលតី ត្រូវបានអង្គភាពប្រឆាំងអំពើពុករលួយ បញ្ជូនទៅសាលាដំបូងខេត្តកណ្ដាល ដើម្បីសាកសួរនៅរសៀលថ្ងៃទី១៦ សីហា នេះ។ ការសាកសួរអតីតប្រធានសាលាដំបូងរាជធានីភ្នំពេញនេះ ហាក់មានភាពអាថ៌កំបាំង។ ការបញ្ជូនជនជាប់ចោទទៅសួរ និងក្រោយពេលបញ្ចប់ការសាកសួរ មន្ត្រីតុលាការមិនអនុញ្ញាតឲ្យអ្នកសារព័ត៌មានថតរូប និងធ្វើបទសម្ភាសន៍នោះទេ។
គាំទ្រដោយ
